स्ट्रॉबेरी क्रेप


मी हे क्रेप्स एकंदर एक महिन्यापूर्वी बनवलेले पण त्यांच्याविषयी पूर्णतः विसरून गेलेले. काल एकदम लक्षात आल्यावर मी त्याचे फोटो शोधायला चालू केले. आणि मग लक्षात आले की तेंव्हा माझा कॉम्प्युटर बिघडला असल्यानी ते मी अजॉयच्या कॉम्प्युटरवर ठेवले आणि विसरून गेले. आज हि सोपी, सहज अशी चविष्ठ पाककृती इथे देत आहे.

स्ट्रॉबेरी क्रेप
साहित्य
३ वाटी स्ट्रॉबेरी
१/२ वाटी मैदा
१.५ वाटी दुध
१/२ वाटी वितळवलेले लोणी
२ अंडी
१/२ व्हॅनिला ईसेन्स
२ चमचा साखर
मीठ चवीपुरते

कृती
  • एका भांड्यात स्ट्रॉबेरी बारीक चिरून त्यात एक चमचा साखर घालुन बाजूला ठेवणे.
  • दुसऱ्या भांड्यात मैदा, दुध, उरलेली एक चमचा साखर, लोणी, व्हॅनिला ईसेन्स, अंडी आणि मीठ घालुन हॅन्ड मिक्सर वापरून फेसणे
  • तवा गरम करून त्यावर डावभर मिश्रण घालुन तवा तिरका करून पातळ पसरवणे
  • मध्यम आचेवर क्रेप दोन्ही बाजूनी गुलाबी होईपर्यंत भाजणे व एका ताटात काढणे
  • आता ह्या क्रेपवर २ चमचा स्ट्रॉबेरीचे सारण पसरवून रोल बनवणे. पाहिजे असल्यास थोडी पिठीसाखर शिंपडून खायला देणे.

टीप
मी क्रेप भाजण्यासाठी नॉनस्टिक तव्याचा वापर केला त्यामुळे मला तेल बिलकुल वापरावे लागले नाही.

कलिंगड स्प्लॅश


आजच्या जेवणानंतर मला कलिंगडाच काहीतरी नवीन बनवण्याचं मन केल आणि त्यातूनच ही ज्यूसची पाककृती आली.

कलिंगड स्प्लॅश
साहित्य
१/२ कलिंगड
२ मोठे लिंबू
४ चमचे साखर
६-७ पुदिना पानं
१/४ चमचे चाट मसाला
१/४ चमचे जिरे पूड
चिमुटभर मिरे पूड
मीठ चवीनुसार

कृती
  • कलिंगड चिरून मिक्सरच्या भांड्यात घालणे
  • त्यात लिंबू रस, साखर, पुदिना पानं, मीठ, जीरा पूड, चाट मसाला घालणे
  • मिक्सरमध्ये ज्यूस चांगला वाटून घेणे
  • ज्यूस ग्लासमध्ये ओतून त्यावर मिरे पूड शिंपडणे. ज्यूस थंड होण्यासाठी ठेवून देणे.
  • वरून पुदिना पानं आणि कलिंगडाचे गोळे घालुन प्यायला देणे.

टीप
ज्यूस लवकर थंड होण्यासाठी मी १० मिनिट त्याला फ्रीजरमध्ये ठेवून दिला. त्याऎवजी थंड कलिंगड वापरल तर १० मिनिटपण वाट बघावी लागणार नाही :)
मी बीनबियांचे कलिंगड वापले त्यामुळे मला बिया वेगळे काढण्याचे कष्ट घ्यावे नाही लागले.

चॉकलेट केक


ह्या आठवड्यात मला २ केक बनवायचे होते. एक फॉनडन्टच्या क्लाससाठी आणि एक फुलांच्या क्लाससाठी. हा केक मी फुलांनी सजवण्यासाठी बनवला. मला तो पांढऱ्या फुलांनी सजवायचा होता पण माझा आईसिंग जरा खराब झाल, मग मी हा केक महिनाभर क्लासमध्ये शिकताना बनवलेल्या फुलांनी सजवला. इथे हि सोपी केकची पाककृती देत आहे.

चॉकलेट केक
साहित्य
१.५ वाटी मैदा
१ वाटी लोणी
१ वाटी साखर
१ चमचा कोको पूड
१ स्पून बेकिंग पूड
३ अंडी

कृती
  • ओव्हन ३२५F/१६०C वर गरम करणे
  • मैदा, कोको पूड आणि बेकिंग पूड चाळून एका भांड्यात घेणे
  • त्यात लोणी वितळवून, साखर आणि अंडी घालुन चांगले फेटून घेणे.
  • केकच्या भांड्याला तेल किंवा लोणी लावून त्यात केकचे मिश्रण घालणे
  • केक ३२५F/१६०C वर भाजणे
  • ओव्हनमधून केक बाहेर काढून ५ मिनिट थंड करणे. त्यानंतर केक तटावर काढून पूर्णपणे थंड करणे

टीप

मी हा केक दोनवेळा आयताकृती भांड्यात बनवला. दोन केकच्यामध्ये चॉकलेट वितळवून घालुन तो जोडला व उंच बनवला. त्यावर चॉकलेटचे बटर आईसिंग आणि रॉयल आईसिंगची फुलं लावून सजवला.

प्लेन केक


मी हा सोपा केक माझ्या फॉनडन्ट केक डेकोरेशन कलाससाठी बनवलेला. चवीला उत्तम अगदी आईसिंग बरोबर किंवा तसाच

प्लेन केक
साहित्य
५ वाटी मैदा
२.५ वाटी लोणी
२.५ वाटी साखर
२ चमचे बेकिंग पूड
१.५ चमचे लिंबू रस
४ अंडी

कृती
  • ओव्हन ३२५F/१६०C वर गरम करणे
  • मैदा आणि बेकिंग पूड चाळून एका भांड्यात घेणे
  • त्यात साखर, लोणी वितळवून, लिंबू रस, आणि अंडी घालुन फेटणे.
  • केकच्या भांड्याला तेल किंवा लोणी लावून त्यात केकचे मिश्रण घालणे
  • केक ३२५F/१६०C वर भाजणे
  • ओव्हनमधून केक बाहेर काढून ५ मिनिट थंड करणे. त्यानंतर केक तटावर काढून पूर्णपणे थंड करणे. असाच किंवा आईसिंग करून वाढणे

टीप
केक असाच खाताना बरोबर लागत होता पण आईसिंग केलेला थोडा जास्त गोड लागत होता. त्या मुळे पुढच्यावेळी मी जर आईसिंग करणार असेल तर थोडी साखर कमी वापरेन

भरली भेंडी


ही पाककृती मी एकंदर ८ महिन्यांपूर्वी आईकडून मागून घेतलेली पण आज ही भाजी बनवण्याचा मुहूर्त आला. हा माझा भेंडीचा सगळ्यात आवडता भाजी प्रकार म्हणूनच इथे पाककृती देत आहे.

भरली भेंडी
साहित्य
१/२ किलो भेंडी
१.५ वाटी किसलेले खोबरे
१/२ चमचा बडीशेप
१/४ चमचा मौव्हरी
१/४ चमचा गरम मसाला
३/४ चमचा तिखट
१ वाटी दही
चिमुटभर हिंग
चिमुटभर साखर
मीठ चवीपुरतं
तेल

कृती
  • भेंडी धुवून त्याचे उभे तुकडे करणे
  • एका भांड्यात दही, खोबरे, तिखट, गरम मसाला आणि १/४ चमचा बडीशेप एकत्र करणे.
  • कढईत तेल गरम करून मौव्हरी, उरलेली १/४ चमचा बडीशेप घालुन फोडणी करणे
  • त्यात हिंग, चिरलेली भेंडी आणि दही-खोबरे-मसाला मिश्रण घालुन नीट एकत्र करणे.
  • कढईवर ताट झाकून ताटावर थोडे पाणी घालणे. असेच बेताचे शिजेपर्यंत धीम्या आचेवर ठेवणे. अधून मधून हलवणे ज्यानीकरून भजी करपणार नाही
  • त्यात साखर आणि मीठ घालुन भाजी पूर्णपणे शिजवणे.

टीप
ही भाजी ताज्या कवळ्या भेंडीची केली तर उत्तम होते. जर भेंडी जून असेल तर भाजीची चव जमून येत नाही

रस मलई


अजॉयनी दसऱ्यासाठी रस मलईची फर्माईश केलेली पण त्यादिवशी घरात जास्त दुध नसल्यानी आणि ते त्यांनी खूप उशिरा आणून दिल्यानी दसऱ्यासाठी काही मी रस मलई नाही बनवू शकले. पण काल मी ती बनवण्याचा घाट घातला. एकदम उत्तम झालेली ही रस मलईची पाककृती इथे देत आहे.

रस मलई
साहित्य
२ लिटर दुध
२ चमचे व्हिनेगर
१ चिमुटभर केशर
१/४ चमचा वेलची पूड
१/४ वाटी बदाम
१/४ वाटी पिस्ता
३ वाटी साखर

कृती
  • १ लिटर दुध उकळवायला ठेवणे
  • अर्ध्यावाटी पाण्यात व्हिनेगर घालुन ते हळूहळू उकळत्या दुधात घालुन ढवळणे.
  • पनीर वेगळे झाले की लगेच पंचावर ओतून पाणी गळून टाकावे. थंडपाण्याखाली हे पनीर ठेवून त्यातली व्हिनेगरची चव निघेपर्यंत नीट धुवून घ्यावे. पंचा घट्ट बांधून पाणी गाळण्यासाठी १-२ तास लटकवून ठेवणे.
  • दुसऱ्या पसरट भांड्यात उरलेले एक लिटर दुध उकलावायला ठेवणे. अर्धे होईपर्यंत सारखे ढवळत उकळवणे.
  • त्यात केशर आणि अर्धी वाटी साखर घालुन अजून २-३ मिनिट उकळवणे. थंड होण्यासाठी बाजूला ठेवणे.
  • एका मोठ्या पसरट भांड्यात किंव्हा कुकरमध्ये १.५ लिटर पाणी आणि उरलेली २.५ वाटी साखर घालुन उकळवणे.
  • परातीत पाणी गळून गेलेले पनीर घेऊन चांगले एकजीव होईपर्यंत मळणे. ह्या पनीरचे छोटे पसरट चपटे गोळे बनवून ते उकळत्या पाण्यात सोडणे. भांड्यावर झाकण लाऊन (कुकर असेल तर त्याला शिट्टी न लावता) १० मिनिट मोठ्या आचेवर शिजू देणे
  • आच बंद करून ५ मिनिट तसेच थंड होऊ देणे व नंतर झाकण काढून कोमट होण्यासाठी बाजूला ठेवणे.
  • आता एक एक गोळा तळहातावर घेऊन अलगद दाबून त्यातले साखरेचे पाणी काढून टाकणे. असे सगळे गोळे एका भांड्यात टाकणे.
  • आधी बनवलेल्या दुधात वेलची पूड आणि बारीक चिरलेले पिस्ता आणि बदाम घालणे. ते दुध तयार केलेल्या गोळ्यांच्या भांड्यात टाकून थंड करायला ठेवून देणे.

टीप
मी बदाम अर्ध्या वाटी पाण्यात २ तास भिजवून मग चिरले. चिरणे खूप सोपे होते.
१ लिटर दुध आटवण्याऎवजी अर्धा लिटर हाल्फ अ‍ॅन्ड हाल्फ वापरता येईल.
माझ्याकडे मोठा कुकर किंवा भांडे नसल्यानी मी अर्धे गोळे शिजवून घेतले. मग कुकरमध्ये अजून २ वाटी पाणी घालुन उरलेले अर्धे गोळे शिजवले. गोळे मऊ होण्यासाठी साखरेचे पाणी पातळ असणे महत्वाचे आहे. तसेच भांड्यात गोळ्यांना फुलण्यासाठी जागा असली पाहिजे

नटी बटरस्कॉच चॉकलेट केक


काल मी माझ्या केक डेकोरेशनच्या क्लासमध्ये घेऊन जायला केकसाठी पाककृती शोधत होते. प्रथम मला वाटले की कुठला तरी सोपा आणि सरळ असा केक बनवून काम संपवावे पण जशी मी स्वयंपाकगृहात गेले तसे मला वाटले की काहीतरी नवीन माझ्याकडच्या पुस्तकातून प्रयत्न करावे. त्या पुस्तकातील मला पीनटबटर केकची रेसिपी मला खूप आवडली पण पीनट बटर माझ्याकडे नव्हत म्हणून मग मी ही रेसिपी तयार केली. केक फारच सुरेख आणि चविष्ट झाला आणि त्याचा सुगंध इतका सुरेख होता की क्लासमध्ये सगळे लोक मला विचारात होते या केकविषयी.

नटी बटरस्कॉच चॉकलेट केक
साहित्य
४ वाटी मैदा
२.५ वाटी लोणी
१ वाटी हेजलनट
१ वाटी बदाम
१.५ वाटी साखर
३ अंडी
१ वाटी दुध
२ वाटी बटरस्कॉच चॉकोचीपस
२ चमचे बेकिंग पूड
मीठ चवीपुरतं

कृती
  • ओव्हन ३५०F/१८०C वरती गरम करणे.
  • हेजलनटस आणि बदाम मिक्सरमध्ये वाटून पूड करणे.
  • लोणी आणि साखर एकत्र करून फेटून घेणे.
  • त्यात हेजलनट आणि बदामची पूड टाकून पुन्हा फेटणे.
  • आता एक एक अंडे टाकून प्रत्येक वेळा चांगले फेटणे.
  • मैदा आणि बेकिंग पूड एकत्र २ वेळा चाळून घेणे. त्यात मीठ घालणे..
  • लोणी-साखर-अंध्याच्या मिश्रणात मैदा-बेकिंग पूड मिश्रण आणि दुध असे थोडे थोडे घालुन अलगद एकत्र करणे.
  • बटरस्कॉच चॉकोचिप्स मायक्रोवेव्हमध्ये १ मिनिट गरम करून ढवळणे. केकच्या मिश्रणात अलगद घालुन मिसळणे.
  • केकच्या भांड्याला तेल किंवा लोणी लावून त्यात पारचमेंट कागद घालुन त्यालापण तेल किंवा लोणी लावणे. केकचे मिश्रण त्यात अर्ध्या पातळीपर्यंत भरणे
  • केक ओव्हनमध्ये ३५०F/१८०C वरती ४० मिनिट भाजणे.
  • आईसिंगनी सजवणे किंवा तसाच खायला देणे.

टीप
मी दोन ८ इंचाची गोल भांडी केक भाजण्यासाठी वापरली पण मला वाटते की हा केक एका ८ इंचाच्या आणि एका ६ इंचाच्या भांड्यात जास्त छान झाला असता.
मी एका केकला माझ्या केक डेकोरेशनच्या क्लासमध्ये बटर आईसिंग केल आणि एक केक तसाच खाला. दोन्ही खूप चविष्ट होते पण मी नंतर कधी आईसिंगवाला केक बनवणार असेल तर ह्यात डार्क चॉकलेट किंवा कमी साखर वापरेन
हल्लीच मला कळले की ओव्हन कमीत कमी १५ मिनिट आधी गरम करून ठेवला तर तो सगळीकडे एकसारखा गरम होतो आणि केक सगळ्या बाजूनी चांगला फुलतो. माझा केक फक्त मध्ये न फुलता सगळीकडे एकसारखा फुलाला आणि मला तो केक डेकोरेशनच्या वेळी थोडा पण कापावा नाही लागला.

सॅन्डविच


हा माझा सगळ्यात आवडता बंगाली गोड पदार्थ. त्यामुळे मी अजॉयसाठी त्याचे आवडते मिष्टी दोही बनवायला घेतले, तेंव्हा बाजूला माझ्यासाठी हे सॅन्डविच बनवायला पण चालू केले. खूप चविष्ट झाला हा प्रयोग

सॅन्डविच
साहित्य
२ लिटर दुध
४ चमचे व्हिनेगर
१ चमचा रवा
२ वाटी खवा
१/२ वाटी आईसिंग शुगर
२.५ वाटी साखर
चांदीचा वर्ख
पिस्त्याची पूड
चिमुटभर बेकिंग पूड
२ चिमुट केशर

कृती
  • १/४ वाटी दुध बाजूला ठेवून बाकीचे दुध उकळवणे व त्यात २ चमचे पाण्यामध्ये व्हिनेगर घालुन एकत्र करणे.
  • दुधापासून पाणी वेगळे होईपर्यंत एकसारखे ढवळणे
  • हे मिश्रण चाळणीत पंचा टाकून त्यावर ओतणे. थंड पाण्याखाली धरणे. नंतर पंच्याला गाठ मारून ५ मिनिट बांधून ठेवणे.
  • कुकर मध्ये ६ वाटी पाणी आणि साखर घालुन उकळी आणणे.
  • बांधून ठेवलेले पनीर एका ताटात काढून चांगले मळून घेणे.
  • त्यात रवा आणि बेकिंग पूड घालुन पुन्हा चांगले मळणे
  • ह्या पनीरच्या पिठापासून पातळ चौकोनी तुकडे बनवणे. ह्यातील अर्धे तुकडे उकळत्या साखरेच्या पाण्यात घालणे.
  • कुकरचे झाकण बंद करून एक शिट्टी काढणे. त्यानंतर आच मंद करून १० मिनिटे अजून शिजवणे. कुकर थंड होऊ देणे
  • शिजलेले पनीर कुकरमधून काढून ठेवणे. कुकरमध्ये अजून २ वाटी पाणी घालुन उरलेले तुकडे त्यात सोडून आधीच्या तुकड्यांसारखे शिजवून थंड करून घेणे.
  • आता हे सगळे पनीरचे तुकडे उरलेल्या साखरेच्या पाण्यासकट फ्रीजमध्ये थंड होण्यासाठी रात्रभर ठेवून देणे.
  • दुसऱ्यादिवशी सकाळी खवा किसून त्यात आईसिंग शुगर घालुन मळणे.
  • उरलेले १/४ वाटी दुध गरम करून त्यात केशर घालणे. हे केशरीदुध खव्यामध्ये घालुन चांगले मळून घेणे.
  • फ्रीजमधून शिजवलेले पनीरचे तुकडे बाहेर काढून त्याचे त्रिकोणी तुकडे करणे.
  • प्रत्येक २ तुकड्यांमध्ये थोडे थोडे खव्याचे मिश्रण घालुन सॅन्डविच बनवणे. तसेच पिस्त्याची पूड खव्याच्या मिश्रणावर तसेच सॅन्डविचवर पसरवणे
  • चांदीचा वरखा लावून थंडगार वाढणे

टीप
मी जाड पनीरचे तुकडे करून चिरण्याऎवजी करतानाच पातळ तुकडे बनवले आणि दोन तुकड्यांमध्ये खवा घालुन सॅन्डविच बनवले.

सुकामेव्याचे चॉकलेट


एकेदिवशी फूडनेटवर्कचा चॅनेल बघत असताना मी हि पाककृती बघितली. एकदम सोपी आणि छान दिसणारी हि कृती त्याक्षणीच मला एकदम पसंत पडली. एकदम प्रमाण काही आठवत नसल्याने मी माझ्या अंदाजाने केलेला हा पदार्थ एकदम सुरेख झाला.

सुकामेव्याचे चॉकलेट
साहित्य
३५० ग्राम पांढरे चॉकलेट
१२० ग्राम डार्क चॉकलेट
१ वाटी अक्रोड
१/२ वाटी अ‍ॅप्रीकॉट
१/२ वाटी क्रेझीन

कृती
  • ओव्हन ३५०F/१८०C वर गरम करून त्यात अक्रोड १० मिनिटे भाजणे. थंड होण्यासाठी बाजूला ठेवणे
  • मायक्रोवेव्हमध्ये एका भांड्यात पांढरे चॉकलेट १.५ मिनिट गरम करणे. दर ३० सेकंदानी ढवळणे. पातळ एकसारखे चॉकलेटचे मिश्रण बनेल
  • दुसऱ्या पातेल्यात डार्क चॉकलेट १.५ मिनिट दर ३० सेकंदानी ढवळत मायक्रोवेव्हमध्ये गरम करणे.
  • एका प्लेट किंव्हा ट्रेवर पार्चमेंट कागद घालुन पांढरे चॉकलेट ओतणे. अलगदपणे सर्वत्र सारखे पसरणे
  • चार कोपर्यांमध्ये डार्क चॉकलेट ओतून ते फोर्क वापरून पांढर्या चॉकलेटमध्ये पसरवणे.
  • त्यात अक्रोड आणि अ‍ॅप्रीकॉट तुकडे करून, क्रेझीन्स पसरवणे.
  • मिश्रण थंड झाल्यावर, फ्रीजमध्ये जमण्यासाठी ठेवून देणे

टीप
मी जी पाककृती बघितली होती त्यात फक्त पांढरे चॉकलेट वापरले होते. पण त्यामुळे चॉकलेट खूप गोड लागते म्हणून त्यात डार्क चॉकलेट घातले ज्यांनीकरून गोडपणा कमी होईल. ह्याआधी एकदा मी सेमीस्वीट चॉकलेट पण वापरून बघितले होते पण ते सुद्धा खूप गोड लागले त्यामुळे ह्या वेळी डार्क चॉकलेट वापरले. तुम्ही अर्धे डार्क चॉकलेट आणि अर्धे सेमीस्वीट चॉकलेटपण वापरू शकतात.

मिष्टी दोही


ही अजॉयची एकदम आवडती स्वीट. दिसायला एकदम सोपी वाटते पण मला फार कष्ट पडले. इथे दही जमवणे हे फार किचकट काम. खूप वेळा माझा प्रयोग फसला. पण आता मला एक युक्ती कळली की ज्यामुळे दही नेहमी चांगले जमते. लगेच मी पुन्हा मिष्टी दोहीचा प्रयत्न केला आणि तो एकदम यशस्वी ठरला.

मिष्टी दोही
साहित्य
१.५ लिटर दुध
१ वाटी साखर
१/२ वाटी दही

कृती
  • दुध उकळवणे.
  • त्यामध्ये १/४ वाटी साखर घालणे व सारखे ढवळत ते आटवणे. साधारण १ लिटर एवढे दुध राहीपर्यंत आटवणे.
  • आता दुध उकळवणे चालूच ठेवणे पण बाजूला एक पातेल्यात उरलेली ३/४ वाटी साखर आणि १/४ वाटी पाणी टाकून उकळवणे.
  • जेंव्हा साखरेचे पाणी गडद सोनेरी रंगाचे होईल तेंव्हा दुधाची आच कमी करून त्यात हे सोनेरी पाणी घालणे.
  • दुध आणखीन ५ मिनिट उकळवणे आणि नंतर कोमट होईपर्यंत थंड होऊ देणे
  • एका पातेल्यात दही व एक वाटी आधी बनवलेले दुध एकत्र करून फेटणे.
  • त्यात उरलेले दुध घालुन झाकण लाऊन रात्रभर दही जमू देणे
  • फ्रीजमध्ये कमीत कमी २ तास थंड करून मग वाढणे.

टीप
इथे दही जमवण्यासाठी मी दह्याचे भांडे कॅसेरॉलमध्ये (ज्यात पदार्थ गरम राहतात) ठेवून, तो कॅसेरॉल ओव्हनमध्ये ठेवते. ओव्हनचा लाईट चालू ठेवायचा. ओव्हन गरम करावा किंव्हा चालू ठेवायला लागत नाही. कॅसेरॉल दुधाचे तापमान वाचवतो आणि लाईट ओव्हनला कोमट ठेवतो.
सोनेरी साखरेचे पाणी दुधात घालताना हळू हळू घालणे कारण तापमानातील फरकामुळे दुध व साखरेचे पाणी उडून हात भाजण्याची शक्यता असते.
छोट्या छोट्या वाटीमध्ये पण दही जमवून वाटी तशीच्या तशी वाढू शकतात.
जाड दुध वापरले तर खूप चांगले दही जमते व चव पण चांगली येते. इथे हाफ अ‍ॅन्ड हाफ मिळते ते मी दुधाच्याऎवजी एक लिटर वापरले त्यामुळे मला दुध आटवावे लागले नाही.

ढोकार दालना


मी बरेचदिवसांपासून हा पदार्थ बनवण्याचा विचार करत होते. मागच्यावर्षी एका नातेवैकांकडे कोलकत्तामध्ये खालेली. त्यावेळी मला फार काही बरे वाटत नसल्यानी फक्त चवीपुरता खालेली पण तेवढ्यातच मला हा प्रकार इतका आवडला की मी तो घरी बनवण्याचा निश्चय केला. शेवटी आज तो बनवण्याचा मुहूर्त आला

ढोकार दालना
साहित्य
२ वाटी हरबरा डाळ
२ टोमेटो
२ हिरव्या मिरच्या
२ चमचे आलं
५ लसूणाच्या पाकळ्या
१/२ चमचे जिरे
१/४ चमचे हळद
१/२ चमचे जिरे पूड
१/२ चमचे धने पूड
तेल
तूप
मीठ

कृती
  • रात्रभर डाळ पाण्यात भिजवून ठेवणे.
  • मिक्सरमध्ये डाळ वाटून घेणे.
  • कढई गरम करून त्यात २ चमचे तेल व जिरे टाकून फोडणी करावी
  • आता त्यात किसलेले १ चमचा आलं, हळद, मीठ आणि वाटलेली डाळ घालुन ते मिश्रण शिजवणे. मिश्रण बाजू सोडेपर्यंत शिजवणे.
  • ताटलीला तेलाचा हात लावून त्यावर हे मिश्रण पसरवणे व थंड करणे.
  • थंड झाल्यावर चौकोनी तुकडे कापून तव्यावर तेल टाकून तळून घेणे.
  • मिक्सरमध्ये टोमेटो, हिरव्या मिरच्या, उरलेले एक चमचा आलं, लसुणाच्या पाकळ्या घालुन वाटून घेणे.
  • कढईत एक चमचा तेल घालुन गरम करणे व त्यात वाटलेले मिश्रण घालुन शिजवणे.
  • त्यात जिरे पूड, धने पूड, मीठ आणि ३ वाटी पाणी घालुन उकळवणे.
  • त्यात तळलेले डाळीचे ढोकळे घालुन उकळवणे. ढोकळे ग्रेव्ही शोषून घेईपर्यंत उकळवणे.
  • वरून तूप सोडून वाढावे

टीप
मी ग्रेव्ही जास्त मसालेदार नाही बनवली त्यामुळे ढोकळ्याची चव खुलून आली.

व्हेज बिर्यानी


मी ही बिर्यानी बरेच वेळा बनवलीये पण शेवटी काल फोटो काढण्याचा अवसर मिळाला. त्यामुळे खास माझ्या व्हेजीटेरीअन दोस्तांसाठी ही पाककृती.

व्हेज बिर्यानी
साहित्य
३ वाटी तांदूळ
३५०ग्राम भेंडी
२५० ग्राम छोटी वांगी
२५० ग्राम गाजर
२ कच्ची केळी
४ बटाटे
४ कांदे
३ टोमेटो
२ चमचे पुदिना पानं
१० लसूण पाकळ्या
२ चमचे किसलेला आलं
१/२ वाटी काजू
१/४ वाटी बदाम
१ चमचा किसलेले सुके खोबरे
१/२ चमचा खसखस
२ सुक्या मिरच्या
१/४ चमचे बडीशेप
१/४ चमचा मिरे
१ चमचा जिरे
१ चमचा धने
३/४ चमचे तिखट
१ चमचा गरम मसाला
२ वेलची
२ लवंग
३ दालचिनी काड्या
१/४ वाटी दुध
चिमुटभर केशर
मीठ चवीपुरता
तूप
तेल

कृती
  • कुकरमध्ये दोन बटाटे शिजवून घेणे
  • तांदूळ गरम पाण्यात अर्धा तास भिजवणे
  • खसखस पाण्यात भिजवून ठेवणे
  • वांगी, भेंडी, सालं काढून आणि चिरून कच्ची केळी, २ बटाटे आणि गाजर तळून घेणे.
  • एका भांड्यात पाणी गरम करून त्यात भिजवलेले तांदूळ घालणे. भात बोटचेपा शिजेपर्यंत शिजवून घेणे. जास्तीचे पाणी गळून टाकणे.
  • एक चमचा तूप गरम करून त्यात वेलची, लवंग आणि एक दालचिनीचा तुकडा टाकणे. हे मिश्रण भातात घालुन एकत्र करणे.
  • कढईत तेल गरम करून त्यात २ कांदे बारीक चिरून शिजवणे. तेलातून बाजूला काढून ठेवणे.
  • त्याच कढईत अजून एक चमचा तेल घालुन, जिरे, मिरे, सुकी मिरची, धने, बडीशेप, सुके खोबरे, दालचिनी, १/४ वाटी काजू आणि बदाम घालुन तळणे
  • त्यात गरम मसाला, तिखट, खसखस, पुदिना पानं आणि आधी भाजलेला कांदा घालुन ढवळणे. मसाले सुगंध सोदेपार्यानता भाजून घेणे.
  • मिश्रण थंड करून त्यात टोमेटो घालुन मिक्सरमध्ये वाटणे.
  • कढईत तूप गरम करून त्यात वरचे वाटलेले मिश्रण घालणे. तेल सोडेपर्यंत भाजून घेणे.
  • आता त्यात तळलेल्या भाज्या आणि मीठ घालुन २ मिनिट शिजवणे.
  • दुध आणि केशर एकत्र करून गरम करून घेणे.
  • उरलेले २ कांदे बारीक उभे चिरून आणि काजू कुरकुरीत आणि गुलाबी होईपर्यंत तळून घेणे.
  • कुकरला तूप लावून त्यात उकडलेल्या बटाट्याचा, १/३ भाग भात, १/२ भाग भाजी, अजून १/३ भाग भात, बाकी उरलेली १/२ भाग भाजी आणि उरलेला १/३ भाग भात असे थर लावणे.
  • ह्या थरांच्या आर पार भोकं पाडून त्यावर केशर-दुधाचे मिश्रण शिंपडणे.
  • कुकर मंद आचेवर ठेवून, एक शिट्टी होईपर्यंत शिजवणे. बिर्यानीवर आधी तळलेला कांदा आणि काजू पसरवून वाढणे.

टीप
मी भाज्या ग्रेव्हीमध्ये शिजवण्याऎवजी त्यांना तळून ग्रेव्हीमध्ये घातले. त्यामुळे कुठलीच भाजी अर्धी कच्ची किंव्हा जास्त शिजली नाही आणि चव एकदम छान आली.
भाज्यातळताना छोटे बटाटे असतेतर जास्त चांगले झाले असते तर अख्खे तळता आले असते असे राहून राहून वाटले.

पनीर पॅटिस


आज सकाळी अजॉयनी काहीतरी नवीन आणि चमचमीत बनवायची फर्माईश केली. थोडावेळ विचार केल्यावर मी हा पदार्थ करण्याचे ठरवले. एकदम चविष्ठ आणि आम्ही तो ब्रंच म्हणूनपण खाला. :)

पनीर पॅटिस
साहित्य
४ वाटी बारीक चिरलेले पनीर
४ बटाटे
३ चमचे कॉर्न फ्लौर
१ चमचा आलं
३ हिरव्या मिरच्या
५ लसूणाच्या पाकळ्या
१/४ चमचे हळद
मीठ
तेल

कृती
  • बटाटे कुकरमध्ये उकडून घेणे.
  • मिक्सरमध्ये आलं, लसूण आणि मिरच्या १/४ वाटी पाणी घालुन वाटून घेणे
  • कढईत तेल गरम करून त्यात हळद आणि वरील वाटण घालुन २ मिनिट शिजवणे
  • त्यात पनीर आणि मीठ घालुन पूर्णपणे शिजवणे.
  • बटाट्याची सालं काढून ते कुस्करून घेणे.
  • त्यात कॉर्न फ्लौर आणि मीठ घालुन मळून घेणे.
  • त्याचे लिंबाच्या आकाराचे गोळे बनवून त्यांच्या दाबून वाटी बनवावी
  • ह्या वाट्यांमध्ये चमचाभर पनीर घालुन ते बंद करणे. ते गोळे हलक्या हातानी दाबून पॅटिस बनवणे
  • कढईत तेल गरम करून त्यात पॅटिस गुलाबी रंग येईपर्यंत भाजणे

टीप
पॅटिस भाजताना तेल एकदम गरम पाहिजे नाहीतर बटाट्याचे कव्हर कढईला चिकटू शकते.

चिकन रोल


बरेच दिवस झाले मी कुठलाही चिकनचा पदार्थ बनवून. मागच्या बरेच वेळा अजॉयच चिकन किंव्हा मटन बनवत होता, अर्थात प्रत्येक वेळा एकाच टाईपचा रस्सा आणि फक्त चिकन किंव्हा मटन घालुन. त्यामुळे मी आज विचार केला की चिकनचे काहीतरी वेगळे बनवून त्याला थोडा आश्चर्यचकित करूया. त्यावेळी मला त्याच्या आवडत्या रोलची आठवण झाली आणि मी हा पदार्थ बनवला.

चिकन रोल
साहित्य
५०० ग्राम बोनलेस चिकन
२ वाटी मैदा
१/२ वाटी गव्हाचे पीठ
१ मोठा कांदा
१ वाटी ब्रोकोली
१ वाटी टोमेटो
१/२ वाटी टोमेटो केचप
१/४ चमचा हळद
१/२ चमचा तिखट
१/२ चमचा जिरे पूड
१/२ चमचा धने पूड
१/२ चमचा मिरे पूड
१/२ चमचा गरम मसाला
१ चमचा आलं किसून
८ लसूणाच्या पाकळ्या
मीठ
तेल

कृती
  • मैदा, गव्हाचे पीठ, मीठ आणि २ चमचे तेल घालुन पीठ नीट मळून भिजायला बाजूला ठेवणे.
  • चिकनचे छोटे छोटे तुकडे चिरून बाजूला ठेवणे.
  • कढईत तेल गरम करून त्यात चिकन घालुन ढवळणे.
  • चिकन पांढरे झाल्यावर, त्यात किसलेले आलं, हळद, तिखट, जिरे पूड, धने पूड, मिरे पूड आणि गरम मसाला घालुन ढवळणे.
  • चिकन मधून मसाल्याचा वास सुटल्यावर, त्यात केचप घालुन ५ मिनिटे शिजवणे
  • त्यात बारीक चिरलेला टोमेटो आणि मीठ घालुन चिकन पूर्णपणे शिजवून बाजूला ठेवणे.
  • तव्यामध्ये तेल गरम करून त्यावर बारीक चुरून लसूण, उभा चिरलेला कांदा आणि ब्रोकोली घालुन पूर्णपणे शिजेपर्यंत सारखे हलवत शिजवणे. त्यात मीठ आणि चिमुटभर मिरे पूड घून ढवळणे आणि बाजूला ठेवणे
  • एक अंडे नीट फेटून रुंद पातेल्यात ओतणे.
  • पीठाचे लिंबाच्या आकाराचे गोळे बनवून पातळ चपाती लाटणे.
  • चपाती अंड्यामध्ये एका बाजूने भिजवून, न भिजलेली भाजू खाली असे गरम तव्यावर टाकणे
  • थोडे तेल शिंपडून दोन्हीबाजूने नीट भाजणे व ताटात टाकणे
  • चपातीवर मध्ये बारीक रेषेत दोन चमचे चिकन घालणे. त्यावर अर्धा चमचा ब्रोकोली आणि कांदा मिश्रण घालणे.
  • चपातीची खालची बाजू आणि डावी बाजू मिश्रणावर दुमडणे आणि मग घट्ट रोल करणे.

टीप
मला रोल थोडे हलके करायचे होते म्हणून मी एक अख्खे अंडे एका चपातीवर घालण्याऎवजी चपातीला हलका अंड्याचा वॉश दिला. त्यामुळे चपाती एकदम हलकी झाली आणि चिकनची चव चांगली खुलून आली.

लिंबू आणि खजुराचा कपकेक


हल्लीच मी फूड नेटवर्क बघायला चालू केला आणि तिथे काही कार्यक्रम चांगले असतात. त्यातील एक म्हणजे कपकेक वॉर्स. त्यात भाग घेणाऱ्या लोकांच्या कल्पनाशक्ती आणि त्यातून निर्माण होणारे कपकेक्स हे एकदम बघण्यासारखे असतात. त्यातूनच प्रेरणा घेऊन मी हा पदार्थ केला.

लिंबू आणि खजुराचा कपकेक
साहित्य
४ वाटी मैदा
३ वाटी खजूर
२ वाटी दुध
१ वाटी लोणी
२ वाटी क्रीम
१ वाटी आईसिंग शुगर
१.५ वाटी साखर
२ अंडी
२ लिंबू
१ चमचा बेकिंग पूड
१/४ चमचा बेकिंग सोडा
मीठ

कृती
  • १ वाटी खजूर आणि दुध मिक्सरमध्ये वाटून बाजूला ठेवावेत
  • लोणी आणि साखर हॅन्ड मिक्सर वापरुन फेटणे.
  • त्यात अंडी घालुन पुन्हा एकजीव होईपर्यंत फेटणे
  • मैदा, बेकिंग पूड, बेकिंग सोडा आणि मीठ चाळून घेणे
  • लोणी-साखर-अंडी ह्याच्या मिश्रणामध्ये ते आणि दुध-खजूर मिश्रण थोडे थोडे घालुन फेटणे.
  • आता त्यात उरलेले खजूर बारीक चिरून, एका लिंबूच साल किसून आणि त्याच लिंबूचा रस घालुन अलगद ढवळणे.
  • ओव्हन ३५०F/१८०C वर गरम करणे
  • कपकेकच्या भांड्यांमध्ये कागदाचे केककव्हर घालून त्यात केकचे मिश्रण २/३ पर्यंत भरणे
  • केक ओव्हनमध्ये ३५०F/१८०C वर २५ मिनिटं भाजणे व नंतर पूर्णपणे थंड होण्यासाठी बाजूला ठेवणे
  • एका भांड्यात क्रीम आणि आईसिंग शुगर एकत्र करणे.
  • हॅन्ड मिक्सर वापरुन घट्ट होईपर्यंत फेटणे
  • प्रत्येक केकवरती थोडे थोडे क्रीम चमच्याने घालणे किंवा पाईपिंग पिशवीत घालून सजवणे. त्यावर उरलेल्या लिंबूच साल किसून घालणे.

टीप
मी बटर पेपरचा कोन बनवून त्यांनी केक वर आईसिंग केला कारण माझ्याकडे पाईपिंग पिशवी नव्हती. चांगला मार्ग होता तो. थोड्या केक वर मी चमच्यानी पण आईसिंग लावलं.
क्रीम फेताण्यासाठी हॅन्ड मिक्सर फार उपयोगी पडतो. एकदम सोप, लवकर आणि खात्रीदायक आईसिंग बनत

भेंडी फ्राय


इथे इंचीन बांबू नावाच्या हॉटेलमध्ये मी पहिल्यांदा हा पदार्थ खाल्ला. अजॉयची एकदम आवडीची डीश. मिलिंदच्या भेंडीप्रेमाला लक्षात घेता हे ओळखणं कठीण नाही की आम्हाला ह्या डीशची परिचय त्यानी करून दिला. तो इथे आमच्याकडे राहत असताना करून बघण्याचा बेत होता पण तो राहूनच गेला. आज शेवटी एकदा मुहूर्त आला एकंदर. पदार्थाची चव एकदम मस्त आली आणि बरेचदा करण्यासाठी उत्तम पाककृती मिळाली आहे.

भेंडी फ्राय
साहित्य
५ वाटी भेंडी
४ चमचे मैदा
४ चमचे कॉर्न फ्लौर
१ कांदा
१ हिरवी मिरची
३ सुक्या मिरच्या
२ पाकळ्या लसूण
२.५ चमचे सोया सॉस
१/२ चमचे तिखट
१/४ चमचे लसुणाची पेस्ट
तेल
मीठ

कृती
  • मैदा, कॉर्न फ्लौर, तिखट, लसुणाची पेस्ट आणि मीठ एकत्र करणे.
  • त्यामध्ये पाणी घालुन भजीच्या पिठासारखे पीठ बनवणे.
  • मुठभरून भेंडीचे तुकडे त्या पिठात घोळवून गरम तेलात टाकणे.
  • सोनेरी रंग येईपर्यंत मध्यम-मोठ्या आचेवर भाजणे. बाजूला एका टिश्यूवरती काढून ठेवणे. उरलेले भेंडीचे तुकडे पण असेच भाजून घेणे.
  • कढईत दोन चमचे तेल गरम कडून त्यात बारीक उभा चिरलेला कांदा, हिरवी मिरची, लासुनाचे तुकडे टाकून गुलाबी रंग येईपर्यंत भाजून घेणे.
  • त्यामध्ये सुक्या मिरच्या कुस्करून, सोया सॉस टाकून ढवळणे.
  • फ्राय केलेले भेंडीचे तुकडे टाकून ढवळणे. लगेच खायला देणे.

टीप
जर पाहुण्यांसाठी हा पदार्थ करण्याचे ठरवले तर भेंडी फ्राय करून ठेवणे पण ऐनवेळीस सॉसमध्ये घोळवणे. भेंडीचा कुस्कुशीत आणि कुरकुरीतपणा टिकवण्यासाठी उपयोग होईल.

खेकडा पुलाव


हल्ली आम्ही कोस्टकोमधून खेकडे आणायला चालू केले. सगळ्यात प्रथम जेंव्हा खेकडे घेऊन आलो तेंव्हा मी हा सगळे साहित्य अंदाजाने घालत घालत हा पुलाव बनवण्याचा प्रयत्न केला. एकदम मस्त झाला पदार्थ आणि इतका आवडीचा ठरला की आता आमच्या जेवणात तो बरेचदा दिसतो.

खेकडा पुलाव
साहित्य
१.५ वाटी तांदूळ
३०० ग्राम खेकड्याचा गर
१ वाटी दही
१/२ चमचा तिखट
१/२ चमचा मिरे पूड
१/४ चमचा धने पूड
१/४ चमचा जिरे पूड
चिमुटभर दालचिनी पूड
चिमुटभर लवंग पूड
मीठ
तूप

कृती
  • दह्यामध्ये तिखट, मिरे पूड, धने पूड, जिरे पूड, दालचिनी पूड, लवंग पूड आणि मीठ घालणे.
  • दह्यामध्ये खेकड्याचा गर घालुन नीट हलवून २ तास बाजूला ठेवणे.
  • तांदूळ पाण्यामध्ये अर्धा तास भिजवून ठेवणे
  • पाणी गरम करून त्यात भिजलेले तांदूळ घालुन शिजवणे. भात होत आलं की आचेवरून काढून बाजूला ठेवणे.
  • कधी मध्ये तूप गरम करून त्यात दही लावलेले खेकडे दह्यासकट घालुन मध्यम आचेवर ब्रावून रंग येईपर्यंत शिजवणे. खेकडे शिजतील आणि तूप बाजूला सुटेल.
  • त्यामध्ये शिजवलेला भात आणि चावीपुरात मीठ घालुन हलक्या हाताने ढवळणे.
  • १-२ मिनिट वाफ काढून रायत्याबरोबर वाढणे

टीप
इथे खूप मोठे खेकडे मिळतात. आम्ही एकंदर ४ पाय = १.५ पाउंड = ०.७ किलो होते. त्याचे कवच काढून त्यातून ३०० ग्राम गर आला. जर छोटे खेकडे असतील तर कावचासहित वापरता येतील.
खेकड्याचा गर काढण्यासाठी ते धुवून घेतल्यावर धार धार सुरीनी कवच कापले आणि अलगद पणे गर बाहेर काढला.

क्रेझिन पॅन केक


मी असे पॅन केक बरेचवेळा बनवतीये, प्रत्येक वेळा वेगळे फळ. पण आज जेंव्हा मी सुके क्रॅनबेरी घालुन ते बनवले तेंव्हा असे वाटले की हे पॅन केक मिश्रण फक्त त्याच्यासाठीच बनले आहे. त्यामुळे इथे मी आज ते पोस्ट करतीये.


साहित्य
२ वाटी मैदा
१ चमचा साखर
१.५ चमचे बेकिंग पूड
१/२ वाटी लोणी वितळवून
२.५ वाटी दुध
१ अंडे
२ चमचे व्हॅनिला ईसेन्स
१ वाटी क्रेझींस
मीठ
तेल

कृती
  • अंडे आणि साखर चांगले फेटून घ्यावे
  • त्यात दुध आणि वितळवलेले लोणी घालुन फेटावे
  • आता त्यात व्हॅनिला ईसेन्स, चाळून घेतलेला मैदा, बेकिंग पूड आणि मीठ घालुन फेटावे
  • तवा गरम करणे
  • त्यावर २-३ थेंब तेल टाकणे आणि नंतर अर्धी वाटी केकचे मिश्रण घालणे.
  • त्यावर थोडे क्रेझींस टाकणे व खालची बाजू गुलाबी रंग होईपर्यंत भाजणे
  • २ थेंब तेल शिंपडून केक उलटवणे दुसरी बाजूसुद्धा गुलाबी होईपर्यंत भाजणे. बाकीचे सगळे केक पण असेच बनवणे.
  • एकावर एक ठेवून, मॅपल सिरप घालुन वाढणे.

टीप
मी क्रेझीनसच्या ऐवजी अ‍ॅप्रिकॉट्स, ब्लू बेरीज, मनुके आणि असेच बरेच वेगळी वेगळी फळ घालुन हे पॅन केकस बनवले आहेत पण मी आधी म्हटल्याप्रमाणे क्रेझीनचे केक सगळ्यात छान लागले.

गार्लिक बटर कोळंबी सॅलेड


मला आज काल सॅलेड हा प्रकार खूप आवडायला लागलाय. इथे एक एकदम सोपा पण चविष्ठ अशी पाककृती देत आहे

गार्लिक बटर कोळंबी सॅलेड

साहित्य
८ मोठे कोळंबी
२ वाटी ब्रोकोली
२ वाटी घेवडा
१ वाटी मक्याचे दाणे
१ अ‍ॅव्होकाडो
३ वाटी आईसबर्ग लेट्युस
१ कांदा
१ वाटी ढोबळी मिरची
१/४ वाटी चेरी टोमेटो
६ लसुणाच्या पाकळ्या
१/४ चमचा ऑरीगॅनो
१/२ चमचा मिरे पूड
१ लिंबू
मोझारीला चीझ
मीठ चवीनुसार
लोणी

कृती
  • तवा गरम करून त्यात ब्रोकोली आणि घेवडा लोण्याबरोबर भाजणे. मीठ घालुन बाजूला ठेवणे.
  • त्याच तव्यावर आता ढोबळी मिरची उभी चिरून आणि थोडे लोणी घालुन भाजणे.
  • ढोबळी मिरची शिजत आल्यावर उभा चिरलेला कांदा आणि मीठ घालुन गुलाबी रंग येईपर्यंत भाजणे.
  • घेवडा आणि ब्रोकोलीच्या भांड्यात हे भाजलेले कांदा आणि मिरची मिश्रण घालणे
  • आता त्याच तव्यावर थोडे लोणी घालुन त्यात कोळंबी आणि बारीक चिरून लसूण घालुन मध्यम आचेवर कोळंबी पूर्णपणे शिजेपर्यंत भाजणे. मीठ घालुन बाजूला ठेवणे.
  • मायक्रोवेव्हमध्ये मक्याचे दाणे २ मिनिट शिजवून घेणे व बाजूला ठेवणे
  • लेट्युस चिरून दोन भांड्यात घालणे.
  • घेवडा, कांदा, ढोबळी मिरची आणि ब्रोकोलीचे मिश्रण अर्धे अर्धे दोन्ही भांड्यात घालणे
  • अ‍ॅव्होकाडो चिरून अर्धा अर्धा दोन्ही भांड्यात घालणे.
  • आता दोन्ही भांड्यात निम्मे निम्मे कोळंबी-लसूण मिश्रण घालणे.
  • टोमेटो आणि मक्याचे दाणेपण अर्धे अर्धे दोन्ही भांड्यात घालणे
  • मिरे पूड, ऑरीगॅनो आणि लिंबू रस दोन्ही भांड्यात घालणे.
  • मोझारीला चीझ घालुन वाढणे

टीप
मी फक्त लिंबू रस सॅलेड ड्रेसिंगम्हणून वापरलं. रॅन्च किंव्हा दुसरा काही वापरावा लागला नाही पण तुम्ही तुमच्या चवीनुसार दुसरा ड्रेसिंगपण वापरू शकतात. माझ्यामते लिंबूमुळे सॅलेडची चव एकदम खुलून आली.
कोळंबी सोडून मी बाकी सगळ्या भाज्या मोठ्या आचेवर भाजल्या त्यामुळे त्या कुसकुशीत लागत होत्या. कोळंबी मी तव्यावर टाकताना तवा मोठ्या आचेवर होता पण तव्यावर घालताच आच मंद केली त्यामुळे ते नीट शिजले पण तरीही त्यांना एक ग्रील केल्यासारखी चव आली.

गाऊकामोले


मी पहिल्यांदा चीपोटलेमध्ये हा पदार्थ खाल्ला. खाताक्षणी मला खूपच आवडला आणि मग मी त्याची पाककृती शोधली. अत्यंत चविष्ठ आणि "२ min"वाला पदार्थ

गाऊकामोले
साहित्य
3 अ‍ॅव्होकाडो
२ कांदे बारीक चिरून
१ चमचा बारीक चिरून टोमेटो
१/४ चमचा हिरवी मिरची बारीक चिरून
१ लसूण
मुठभर कोथिंबीर
१ मोठे लिंबू
मीठ चवीनुसार

कृती
  • अ‍ॅव्होकाडो चिरून भांड्यात घालणे
  • त्यात कांदा, टोमेटो, हिरवी मिरची घालणे
  • लसूण आणि कोथिंबीर बारीक चिरून त्यात मिसळणे.
  • मीठ आणि लिंबू रस घालणे
  • नीट एकजीव करून वाढणे

टीप
मी मिश्रण बनवताना अ‍ॅव्होकाडो थोडे थोडे मुरडून एकजीव बनवले पण तरीही त्याचे थोडे थोडे तुकडे लागतील असे ठेवले.
हे लगेच खाणे महत्वाचे आहे कारण अ‍ॅव्होकाडो त्यातल्या लोहाच्या प्रमाणामुळे काळे पडतात.

स्ट्रॉबेरी सॉरबे


जेंव्हा मी आईसक्रीममेकर विकत आणला तेंव्हा मला दुविधा झालेली की पहिल्यांदा आंबा आईसक्रीम बनवायचे की सॉरबे.. दोन्ही माझे खूप आवडते पदार्थ पण आंबा आईसक्रीमनी बाजी मारली. पण आज कॉस्कोमध्ये गेल्यावर मी भरपूर स्ट्रॉबेरी आणले आणि सॉरबे बनवले. गरमीच्या या दिवसात उत्तम ठरतंय ते.

स्ट्रॉबेरी सॉरबे
साहित्य
६०० ग्राम स्ट्रॉबेरी
२ वाटी साखर
१/२ वाटी लिंबू रस
१/२ वाटी कॉर्न सिरप

कृती
  • स्ट्रॉबेरी ४ तुकडे करून काचेच्या भांड्यात घालणे..
  • त्यात साखर आणि लिंबू रस घालुन नीट ढवळणे
  • रात्रभर फ्रीजमध्ये ठेवून देणे.
  • सकाळी उठून ह्या मिश्रणात कॉर्न सिरप घालुन मिक्सर मध्ये वाटून घेणे.
  • हे मिश्रण आईसक्रीममेकरमध्ये घालुन मशीन चालू करणे.
  • साधारण ३० मिनिटांनी सॉरबे तयार होईल. ते डब्यात घालुन २-३ तास फ्रीजरमध्ये ठेवून देणे. नंतर पुदिन्याच्या पान लावून खायला देणे

टीप
मी मिक्सर मध्ये मिश्रण बनवताना ते पल्स केले त्यामुळे सॉरबेमध्ये स्ट्रॉबेरीचे छोटे छोटे तुकडे राहिले आणि चव आणखीन खुलून आली.
मिश्रण रात्रभर थंड करण्याऎवजी २-३ तास थंड केले तरी चालते.

मोल्टन लाव्हा केक


बरेच दिवसांपूर्वी मी ह्या केक विषयी वाचले होते आणि त्याचा कॉन्सेप्ट मला फार आवडला. मग मी ह्याची पाककृती शोधल्यावर कळले की हि सगळ्यात सोप्पी आणि पटकन तयार होणारी पाककृती आहे. पण माझ्याकडे ते बनवण्यासाठी रामेकिंस किंव्हा पेपर कप नसल्यानी बरेच दिवस केक बनवण्याचे मनातच राहून गेले. पण आज मी रामेकिंस विकत आणले आणि केक बनविले. एकदम हीट ठरलाय हा केक.

मोल्टन लाव्हा केक
साहित्य
१ वाटी मैदा
१.२५ वाटी सेमीस्वीट चॉकोचिप्स
१ वाटी लोणी
५ चमचे कोको पूड
३ अंडे
३ अंड्यांचे पिवळे
२ वाटी साखर

कृती
  • रामेकिंसना लोण्याचा हात लावून बाजूला ठेवणे.
  • ओव्हन ४५०F/२३०C वर गरम करणे.
  • मायक्रोवेव्हमध्ये लोणी आणि चॉकोचिप्स एकत्र करून १ मिनिट गरम करणे.
  • लोणी आणि चॉकोचिप्स नीट ढवळणे आणि एकजीव करणे आणि बाजूला ठेवणे.
  • अंडी आणि अंड्याचे पिवळे एकत्र फेसून घेणे.
  • त्यात साखर घालुन पांढरे होईपर्यंत पुन्हा फेटणे.
  • त्यात वितळवलेले चॉकलेट - लोणी मिश्रण घालुन पुन्हा फेटणे
  • मैदा आणि कोको पूड चाळून घेणे व वर बनवलेल्या मिश्रणात डाव घालुन हलकेच ढवळून घेणे.
  • बनवलेले मिश्रण ६ रामेकिंसमध्ये घालणे,
  • रामेकिंसना बेकिंग ट्रेमध्ये ठेवून ते ओव्हन मध्ये ४५०F/२३०C वर १३ मिनिट भाजणे.
  • ओव्हन मधून लगेच काढून बशीत उलटे करून खायला देणे

टीप
रामेकिंसऎवजी पेपर कप मफीन पॅनमध्ये ठेवून पण भाजू शकतो पण त्यासाठी थोडे उंच पेपर कप वापरणे म्हणजे त्याला धरून केक ला उचलून उलटे करणे सोपे जाईल
केकला उलटे करण्यासाठी रामेकीन एका बशीत ठेवणे व रामेकिंवर एक बशी ठेवणे व दोन्ही बश्याना धरून उलटे करणे. रामेकिंस खूप गरम असल्यानी बश्यांची फार मदत होते.

दाबेली स्टाईल बटाट्याचा पराठा


मी इंडियामधून जेंव्हा दाबेली मसाला घेऊन आले तेंव्हा पासून असे काहीतरी बनवण्याचे मनात होते. शेवटी मी आज हा पराठा बनवला

दाबेली स्टाईल बटाट्याचा पराठा
साहित्य
१० चमचे गव्हाचे पीठ
१ बटाटा
१/२ चमचा कच्ची दाबेली मसाला
१/४ चमचा तिखट
१/२ चमचा चिंच
१ चमचा शेंगदाणा कुट
१/२ चमचे मनुके
मुठभर कोथिंबीर
मीठ चवीपुरते
तेल

कृती
  • गव्हाचे पीठ, मीठ आणि एक चमचाभर तेल एकत्र करणे.
  • पाणी घालुन पीठ भिजवणे व भिजायला बाजूला ठेवून देणे.
  • कुकरमध्ये बटाटे उकडून घेणे व थंड होउ देणे.
  • चिंच २ चमचाभर पाण्यात भिजवून ठेवणे
  • बटाटे किसून त्यात दाबेली मसाला, तिखट, शेंगदाणा कुट, चिंचेचा कोळ आणि मीठ घालुन एकत्र करणे.
  • त्यात कोथिंबीर आणि मनुके बारीक चिरून आणि मनुके घालणे.
  • गव्हाच्या पीठाचे आणि बटाट्याच्या मिश्रणाचे ५ गोळे बनवणे.
  • गव्हाच्या पिठाच्या गोळ्याची वाटी बनवून त्यात बटाट्याचा गोळा घालुन बंद करणे
  • पराठा लारून तव्यावर दोन्ही बाजूनी गुलाबी रंगावर भाजून घेणे.

टीप
बटाटे एकदम व्यवस्थित एकदम नरम होईपर्यंत उकडणे महत्वाचे आहे ज्यामुळे मिश्रण एकजीव बनेल

हरियाली मेन्गो पनीर


आज आम्ही कपिल आणि श्रीन्खलाला रात्रीच्या जेवणासाठी भेटणार होतो. पण आयत्यावेळी आम्ही तो बेत रद्दकरून घरीच काहीतरी खाण्याचे ठरवले. माझ्याकडे मागच्या आठवड्यात मयुरीमधून आणलेली कैरी होती त्यामुळे मी त्याचे सलाड बनवण्याचा विचार करत होते पण शेवटच्याक्षणी मी बेत बदलून हरियाली मेन्गो पनीर बनवले. अतिशय उत्तम चव आली.

हरियाली मेन्गो पनीर
साहित्य
३ वाटी कोथिंबीर
१/२ वाटी पुदिना
१ कैरी
१ कांदा
२ वाटी पनीर
१ हिरवी मिरची
१ चमचा लसूण पाकळ्या
१/२ चमचा गरम मसाला
१ चमचा तिखट
१ चमचा धने पूड
१/४ चमचा हळद
१/२ चमचा जिरे पूड
मीठ चवीपुरतं
तेल

कृती
  • मिक्सरमध्ये कोथिंबीर, पुदिना, हिरवी मिरची आणि १ वाटी पाणी घालुन बारीक पेस्ट बनवणे.
  • कढईत तेल गरम करून त्यात पनीर गुलाबी रंगावर भाजून घेणे. बाजूला ठेवणे.
  • त्याच तेलात कांदा, लसूण घालुन गुलाबी रंगावर भाजणे.
  • त्यात कैरीचे तुकडे आणि कोथिंबीर-पुदिना-मिरचीची पेस्ट घालुन आटेपर्यंत शिजवणे.
  • त्यात हळद, गरम मसाला, तिखट, जिरे आणि धने पूड घालुन ढवळणे.
  • पनीरचे तुकडे आणि मीठ घालुन २ मिनिट शिजवणे

टीप
मी जी कैरी वापरली ती फार आंबट नव्हती त्यामुळे त्याच्या हलक्या आंबटपणामध्ये भाजीची चव एकदम खुलून आली. त्यामुळे जर कैरी खूप आंबट असेल तर त्याचे प्रमाण कमी करायला विसरू नये.

पेटीट पाल्मिअर्स


आम्ही हा पदार्थ सुशीलच्या घरी पहिल्यांदा बघितला आणि खाला. तेजल त्यादिवशी ऑफीसला गेलेली आणि आम्ही बाकी तिघेही खाण्यासाठी काहीतरी शोधात होतो. अजॉयला तर एकदम खातचक्षणी पदार्थ आवडला. मला वाटलेला की पफ पेस्ट्री शीट वापरून ते बनवणा खूप सोपा असेल. इथे परत आल्यावर आम्ही costcoमध्ये मिळते का बघितले तर ते इथे बनवत नसल्याने आणखीनच मोठं कारण मिळाल घरी बनवण्यासाठी. घरीयेऊन पटकन थोडा रिसर्च केला आणि माझा अंदाज खरा ठरला.

पेटीट पाल्मिअर्स
साहित्य
१ पफ पेस्ट्री शीट
१ वाटी साखर
लोणी

कृती
  • ओट्यावर थोडी साखर शिंपडून त्यावर पफ पेस्ट्री शीट उलघडून घालावी
  • शीटवर साखर शिंपडून, साखर शीटना चिकटेल असे हलके लाटून घेणे.
  • दोन्ही कडा मध्ये एकत्र येतील अश्या दुमडाव्यात व नंतर एक मध्ये घडी घालणे. पेस्ट्री शीटचे ४ थर बनतील.
  • ३० - ४० मिनिट फ्रीजमध्ये ठेवणे.
  • ओव्हन ४००F/२००C तापमानावर गरम करणे.
  • पेस्ट्री शीटचे घडीला परपेन्डीक्युलर असे आयताकृती तुकडे करणे.
  • प्रत्येक तुकड्याचे कापलेली जागा साखरेत घोळवून, त्यातली एक बाजू खाली असेल असे बेकिंग तव्यावर ठेवणे
  • ओव्हनमध्ये ४००F/२००C तापमानावर १८ मिनिट भाजणे.

टीप
पेस्ट्री शीट जास्तीत जास्त ३५ ते ४० मिनिट अगोदरच फ्रीजमधून काढून ठेवणे अथवा त्यावर काम करणे कठीण होऊ शकते.
मी पार्चमेंट पेपर तव्यावर घालण्याचा विचार केलेला पण माझ्याकडे तो तेंव्हा संपलेला पण पार्चमेंट पेपर वापरला तर तव्याच्या दृष्टीनी तो जास्त फायदेमंद ठरेल.

अननस फ्राईड भात


आज काल बाहेर खायचा म्हटलं म्हणजे त्यात थाई पदार्थ माझे फार आवडीचे. फ्राईड भात तर पाहिजेच पण जर त्यात अननस वाला भात मिळाला तर सोने पे सुहागा :) पण बरेच दिवस झाले मी थाई पदार्थ घरी बनवून त्यामुळे आज मी नेहमीच्या भाताऎवजी अननस फ्राईड भात बनवण्याचा ठरवलं

अननस फ्राईड भात
साहित्य
३ वाटी तांदूळ
३ वाटी ब्रोकोली
२ वाटी अननस
१ वाटी गाजर
१ वाटी सेलरी
१ वाटी लाल ढोबळी मिरची
१ कांदा
२ हिरव्या मिरच्या
१/४ वाटी सोया सॉस
मीठ चवीपुरते
तेल

कृती
  • तांदूळ अर्धा तास पाण्यात भिजवून ठेवणे
  • दुसऱ्या भांड्यात पाणी उकळवून त्यात तांदूळ घालणे. भात शिजत आलं की त्यातील पाणी गाळून भात बाजूला ठेवणे.
  • कढईत तेल गरम करून त्यात कांदे, हिरव्या मिरच्या, गाजर, सेलरी, ब्रोकोली, ढोबळी मिरची घालुन परतवणे.
  • भांज्याचा कच्चा वास निघून गेला आणि अर्धवट शिजल्यावर त्यात अननस, सोया सॉस आणि मीठ घालुन अजून परतवणे.
  • त्यात भात घालुन २-३ मिनिट परतवणे.

टीप
सोया सॉस थोडा खारट असतो त्यामुळे मीठ एकदम बेतानीच घालणे.

झटपट आंबा आईस्क्रीम


अगदी लहान होतो तेंव्हा पासून आई आईस्क्रीम घरी बनवायची. मला तिला मदत करायला किंव्हा पूर्णपणे स्वतः आईस्क्रीम बनवायला फार आवडायचे (अर्थात दुध आतावाण्यासाठी गॅसजवळ थांबण्याचे काम सोडून). तेंव्हा आमच्याकडे आईस्क्रीम मेकर पण नव्हत त्यामुळे आईस्क्रीम फ्रीजमध्ये जमवायचा मग मिक्सरमध्ये फिरवायचा पुन्हा जमवायचा असा ३-४ वेळा करून ते सॉफ्ट बनवायला लागायचं. त्यामुळे इथे आल्यवर मला नेहमी वाटायचा की आईस्क्रीम मेकर घ्यावा आणि इतकी झंजट कमी करावी. ह्या रविवारी घगाळ आणि पावूस बघून मी खरेदीला जायचा ठवला आणि तेंव्हा मला कॉस्टकोमध्ये चांगल्या दरात आईस्क्रीम मेकर मिळालं. लगेच मी आईला मेल केल की मला पाककृती दे म्हणून, पण जेंव्हा पाककृती बघितली तेंव्हा लक्षात आलं की माझ्याकडे सगळे पदार्थ लगेच नाहीयेत. मला बाकीचे पदार्थ कुठून कसे घ्यायचे ह्याचा शोध लावण्याचा धीर नव्हता त्यामुळे मी थोडा फार वाचून शेवटी हि पाककृती बनवली. इतकी सोपी क्रिया आहे की मी सारख बनवून घरी आलेल्या पाहुण्यांना खायला देणार आहे. घरी बनवलेल्या हापूस आंब्याच्या आईस्क्रीम सारख दुसर सुख नाही :)

झटपट आंबा आईस्क्रीम
साहित्य
१ लिटर हाफ अ‍ॅन्ड हाफ
५ वाटी हापूस आंब्याचा रस
२ वाटी क्रीम
१/२ वाटी कॉर्न सिरप
१ वाटी साखर

कृती
  • एका पातेल्यात आंबा रस आणि साखर मिसळून साखर पूर्णपणे विरघळेपर्यंत ढवळणे.
  • त्यात कॉर्न सिरप आणि हाफ अ‍ॅन्ड हाफ घालुन ढवळणे
  • त्यात क्रीम घालुन मिश्रण एकजीव करणे.
  • हे मिश्रण आईस्क्रीम मेकर मध्ये घालुन मशीन चालू करणे.
  • २५-३० मिनिटामध्ये आईस्क्रीम तयार होईल. स्कूप करून खायला देणे.

टीप
मी कॉर्न सिरप आणि साखर सोडून सगळे पदार्थ थंड गार वापरले. त्यामुळे मला मिश्रण आईस्क्रीम मेकर मध्ये घालण्याच्या आधी थंड करायची वाट बघावी नाही लागली. मिश्रण बनवून मग १-२ तास थंड करण्यास काही हरकत नाही. हे मिश्रण ग्लासच्या भांड्यात भरून नंतर वापरण्यासाठी पण ठेवता येईल(मी अर्ध्या मिश्रणाच तेच केलाय)
मी हाफ अ‍ॅन्ड हाफ चा वापर केला त्यामुळे दुध आटवून थंड करण्याचे कष्ट घ्यावे नाही लागले. त्यामुळे जर हाफ अ‍ॅन्ड हाफ नसेल तर दुध निम्मे होईपर्यंत आटवून थंड करून वापण्यास काही हरकत नाही.
आईस्क्रीम मेकरच्या सूचनेनुसार त्याचे भांडे आदल्या दिवशी फ्रीजर मध्ये ठेवून थंड करावे लागले.

मालपुआ


प्रत्येक आठवड्याला अजॉय डोक्यात तेल घालुन देण्यासाठी विचारतो. (तो माझ्या डोक्यात तेल घालुन देतो) माझा उत्तर ठरलेलं असत : मी कोणताही पदार्थ बनवून देऊ शकते पण तेल मालिश ते सुद्धा दर आठवड्याला तुझ्या इतक्या छोट्या केसांसाठी फार जास्त कष्ट दायक आहे. एखाद दुसऱ्या महिन्यातून एकदा मी करू शकते. मागच्या शनिवारी जेंव्हा मी हे उत्तर पुन्हा दिले तेंव्हा त्यांनी मालपुआची फर्माईश केली. मी पटकन थोडा फार पाकक्रिया शोधायला चालू केला पण प्रत्येकजण वेगवेगळ सांगत होते. शेवटी हि पाककृती मी स्वतःच बनवली.

मालपुआ
साहित्य
१ वाटी मैदा
१/२ वाटी रवा
२.५ वाटी दुध
१ चमचा बडीशेप
१.५ वाटी साखर
चिमुटभर केशर
बदाम आणि पिस्ता वरून घालण्यासाठी

कृती
  • मैदा, रवा, बडीशेप आणि दुध एकत्र मिसळून ४ तास भिजवत ठेवणे.
  • साखर १.५ वाटी पाण्यात घालुन एकतारी पाक बनवणे.
  • त्यात केशर घालुन बाजूला ठेवणे.
  • कढई गरम करून त्यात १/४ वाटी आधी बनवलेले रवा-मैद्याचे पीठ गोलाकार ओतणे
  • गुलाबी रंगावर दोन्ही बाजूनी भाजून झाल्यावर त्याला साखरेच्या पाकात दोन मिनिट बुडवणे.
  • पाकातून बाहेर काढून त्यावर बदाम पिस्ताचे तुकडे पसरवून खायला देणे.

टीप
बऱ्याच व्हिडीओ मध्ये मालपुआ फ्राय करायला सांगितलेला पण पुढच्यावेळी मी शॅलो फ्राय करणार आहे.
तसेच मी १ वाटी साखरेचा पाक बनवला असल्यानी शेवटच्या थोड्या मालपुआना पाक पुरला नाही
मी ह्याच्याआधी हैदराबादमध्ये बडी मा आल्या होत्या तेंव्हा फक्त एकदाच मालपुआ खाल्ले आहेत त्यामुळे त्याची चव नक्की कशी असते ह्याचा फार काही अंदाज मला नाहीये. त्यामुळे पुढच्या वेळी मी मांना विचारून किती फरक आहे ते बघणार आहे.

बदाम चॉकोचीप मफीन्स


आजकाल खूप पाउस पडत असल्यानी मला दररोज ऑफिसला गाडीनी जाव वागतंय. बरेचवेळा मी ट्राफिकजॅममध्ये फसते. त्यामुळे घरी आलं की नवीन काही प्रयोग करायची ताकद उरत नाही. काल मी ट्राफिकला चुकवण्यासाठी लवकर घरी येऊन काम करण्याचे ठरवले. ५ मिनिटाचे ट्राफिक सोडले तर प्रयोग यशस्वी झालं असे म्हणू शकते. घरी आल्यावर लक्षात आले की माझा कॉम्पुटर बंद पडलेला. त्यामुळे जोपर्यंत मी कॉम्पुटरवर win7 घालत होते त्यावेळेत हे बदाम घातलेले केक बनवले. आज काल जरा जास्तच विसरभोळी झालीये मी आणि असा म्हणतात की बदाम स्मरणशक्ती वाढवण्यास उपयोगी पडतात. कॉम्पुटर तर नवीन पेक्षाही चांगला चालू लागलाय win7चा प्रताप, आता बघुयात की बदाम उपयोगी पडतात का.

बदाम चॉकोचीप मफीन्स
साहित्य
१ वाटी लोणी
२ वाटी साखर
४ वाटी मैदा
२ वाटी चॉकोचीप
३/४ वाटी बदाम
१ वाटी दुध
४ चमचे ब्रावून शुगर
२ चमचे व्हॅनिला इसेन्स
१ चमचा बेकिंग सोडा
१/२ चमचा बेकिंग पूड
२ अंडी
मीठ चवीपुरते

कृती
  • एका भांड्यात साखर आणि लोणी फेटणे.
  • त्यात अंडी घालुन पुन्हा फेटणे.
  • त्यात व्हॅनिला इसेन्स, दुध घालुन पुन्हा फेटणे.
  • मैदा, बेकिंग पूड, बेकिंग सोडा आणि मीठ घालुन हलक्या हातानी सगळे मिश्रण एकजीव होईपर्यंत ढवळणे.
  • त्यात १.५ वाटी चॉकोचीप घालुन हलकेच एकत्र करणे व बाजूला ठेवणे.
  • बदामाचे तुकडे करून त्यात ब्रावून शुगर आणि उरलेले चॉकोचीप घालुन एकत्र करणे.
  • ओव्हन ३५०F/१८०C वर गरम करणे.
  • मफीनच्या भांड्यांना लोण्याचा हात लावून घेणे. प्रत्येक भांड्यात साधारण २/३ पर्यंत केकचे मिश्रण घालणे.
  • वर बदाम-चॉकोचीप-साखर मिश्रण पसरवणे.
  • मफीन ३५०F/१८०C वर २५ मिनिट भाजणे.

टीप
मी कच्चे बदाम वापरून त्यांना केकच्या वर पसरवले त्यामुळे केक भाजताना ते एकदम मस्त भाजले गेले.
तसेच मी बदमाबरोबर साखर आणि चॉकोचीप मिसळले त्यामुळे प्रत्येक घासात मस्त गोडपणा आला.

कोकम सरबत


एक मस्तपणे ताजेतवाने करणारे पेय्य. मी हे बरेचवेळा बनवते पण आज फोटो काढून पाककृती देत आहे.

कोकम सरबत
साहित्य
१०-१२ कोकम
३ चमचे साखर
१/२ चमचा जिरे पूड
१/४ चमचा धने पूड
मीठ चवीपुरते

कृती
  • कोकम १/२ वाटी पाण्यात एक तासभर भिजवून ठेवणे.
  • कोकम व पाणी मिक्सर मध्ये घालणे. त्यात ३.५ वाटी पाणी, साखर, जिरे पूड, धने पूड आणि मीठ घालणे.
  • मिक्सरमध्ये एकदम बारीक होईपर्यंत वाटणे.
  • सरबत गाळून घेऊन थंडगार प्यायला देणे.

टीप
जर सरबत बर्फ घालुन द्यायचे असेल तर १/२ वाटी कमी पाणी घालणे म्हणजे सरबताची चव कमी होणार नाही.

मटार कचोरी


मां हे एकदम मस्त बनवतात आणि नेहमी पुण्याला गेल्यावर मी त्यांना करायला सांगते. बरेच दिवस झाले त्यांच्याकडून हि पाककृती घेऊन, आणि मी एकदा बनवलेली पण. कारण तेंव्हा त्या बनवतात तितकी चांगली नव्हती झाली मी लिहिली नाही. पण आज जेंव्हा ती एकदम मस्त बनली मी लगेच देत आहे.

मटार कचोरी
साहित्य
२ वाटी मैदा
१ वाटी गव्हाचे पीठ
१ बटाटा
३ वाटी मटार
१/४ चमचा जिरे
१/२ चमचा तिखट
तेल
मीठ

कृती
  • मैदा, गव्हाचे पीठ, मीठ आणि १/२ चमचे तेल एकत्र करणे.
  • त्यात पाणी घालुन पीठ मळून घेणे व भिजण्यासाठी बाजूला ठेवणे.
  • बटाटे उकडून घेणे.
  • मटार पाण्यात घालुन २ मिनिट मायक्रोवेव्ह करून घेणे.
  • मटार मधून पाणी काढून टाकून मिकसर मध्ये वाटणे.
  • बटाटे थंड झाल्यावर किसून घेणे.
  • कढईत १ चमचा तेल घालुन त्यात जिरे घालुन फोडणी करणे.
  • त्यात किसलेले बटाटे, वाटलेले मटार, तिखट आणि मीठ सुका गोळा होईपर्यंत शिजवणे व थंड होण्यासाठी बाजूला ठेवणे.
  • भिजवलेल्या पिठाचा लिंबाच्या आकाराचा गोळा घेऊन वाटी बनवणे. त्यात निम्या आकाराचा बटाटा-मटारचा गोळा घालुन बंद करणे.
  • पुरीसारखे लाटून गरम गरम तेलात भाजून घेणे.

टीप
भिजवलेले पीठ जास्त घट्ट किंव्हा सैल नसावे अथवा मटार-बटाटा गोळा बंद करण्यास कठीण होऊ शकते.
पुरी लाटताना नेहमीच्या पुरीपेक्षा किंचित जाड असावी.

खजूर अक्रोड चॉकलेट ब्रावनी


थोड्या आठवड्यापूर्वी मी कॉस्टकोमधून अक्रोड आणि चॉकलेट चीप आणलेले. आज जेंव्हा मागच्या आठवड्याचे पायेश संपत आल्यावर मी हि ब्रावनी बनवण्याचे ठरवले. आठवड्यासाठी म्हणून केलेले हे ब्रावनी इतके छान झाले की ते सोमवारपर्यंतसुधा पुरतात की नाही अशी आशंका आहे.

खजूर अक्रोड चॉकलेट ब्रावनी
साहित्य
८०ग्राम डार्क चॉकलेट बार
१.५ वाटी सेमी स्वीट चॉकलेट चीप
३ वाटी पिठी साखर
१.५ वाटी मैदा
१ वाटी लोणी
१ वाटी खजूर
१ वाटी अक्रोड
३ अंडी
१ चमचा व्हॅनिला ईसेन्स
मीठ चवीपुरते

कृती
  • एका काचेच्या भांड्यात डार्क चॉकलेट, १/२ वाटी सेमी स्वीट चॉकलेट चीप आणि लोणी घालुन १ मिनिट मायक्रोवेव्ह करून चांगले एकत्र करणे.
  • अजून २० सेकंद मायक्रोवेव्ह करून ढवळणे.
  • मैदा दोनदा चाळून घेणे.
  • ओव्हन ३७५F/१९०C वर गरम करणे.
  • एका मोठ्या भांड्यात अंडी, पिठी साखर, व्हॅनिला ईसेन्स घालुन ५ मिनिट फेटून घेणे.
  • त्यात आधी बनवलेली चॉकलेट पेस्ट, चाळलेला मैदा आणि मीठ घालुन हलक्या हातानी एकजीव होईपर्यंत एकत्र करणे.
  • केकच्या मिश्रणात उरलेले १ वाटी चॉकलेट चीप, खजूर आणि अक्रोड कापून घालणे व एकत्र करणे.
  • केकच्या भांड्याला लोण्याचा हात लावून त्यात मिश्रण ओतणे व ३७५F/१९०C वर ३५ मिनिट भाजणे.
  • ब्रावनीवर आईस्क्रीम, चॉकलेट सॉस व अक्रोड घालुन खायला देणे.

टीप
मी चॉकलेट वितळवण्यासाठी मायक्रोवेव्हचा वापर करते आणि त्यामुळे किचकट काम एकदम सोपे होऊन जाते पण मायक्रोवेव्ह नसल्यास एका भांड्यात पाणी गरम करून त्यावर चॉकलेटचे भांडे ठेवून पण चॉकलेट वितळवता येईल.

अख्या मसाल्याचा व्हेज पुलाव


मला मिरे फार आवडतात फक्त पूड नाही तर पापडत असतात तसे तुकडे सुद्धा. इथे आल्यापासून आम्ही गार्लिक पापडच खातोय कारण अजॉयला तोच आवडतो आणि मला दोन प्रकारचे पापड खायला द्यायला कंटाळा येतो. म्हणूनच मिरे खाण्यासाठी मी हि पाककृती तयार केली :)

अख्या मसाल्याचा व्हेज पुलाव
साहित्य
२.५ वाटी तांदूळ
२ वाटी फ्लॉवर
२ कच्ची केळी
१ मध्यम आकाराचे वांगे
१ बटाटा
१ वाटी मटार
१/२ चमचा मिरे
१/२ चमचा जीरा
४-५ लवंग
४-५ वेलची
चिमुटभर केशर
मीठ
तेल
तूप

कृती
  • एका भांड्यात पाणी उकळवून त्यात तांदूळ घालुन भात तयार व्हायच्या थोडावेळ आधी शिजवणे.
  • उरलेले पाणी काढून टाकून भात बाजूला ठेऊन देणे.
  • कढईमध्ये तेल तापवून त्यात फ्लॉवर, वांग्याचे तुकडे आणि कच्या केळ्यांचे तुकडे घालुन भाजून घेणे.
  • मटार भाजून त्यांना पण बाजूला ठेवणे.
  • बटाटा किसून थोडा थोडा एकत्र करून भाजून घेणे
  • कढईमध्ये तूप घालुन त्यात लवंग, वेलची, मिरे, जीरा घालुन फोडणी करणे.
  • त्यात भात, फ्लॉवर, वांग्याचे आणि केळ्यांचे तुकडे घालणे. एकत्र करून २-३ मिनिट वाफ काढणे.
  • एक चमचा गरम करून त्यावर केशर चुरून भाजणे. केशर भातात मिसळणे
  • मीठ घालुन भात एकत्र करणे व अजून १ मिनिट वाफ काढणे. वाढताना वरून तळलेले मटार व बटाटे घालुन खायला देणे.

टीप मला भात पांढरा ठेवून त्याला केशराचा वास द्यायचा होता म्हणून मी भात शिजवताना केशन न घालता शेवटी घातले. आधी सांगितल्याप्रमाणे मला मिरे फार आवडत असल्यानी मी खूप घातले आणि लवंग आणि वेलची जास्त वापरले नाही कारण मला ते फार जास्त आवडत नाहीत :) मुळ हे की तुम्ही तुमच्या आवडीप्रमाणे मसाल्यांचा प्रमाण बदलू शकतात.वर दिलेल प्रमाण माझ्या चवीसाठी एकदम बरोबर होते आणि आता मी हा पुलाव दुपारच्या जेवणात खातीये. यमी!

रवा डोसा


मी पहिल्यांदा कॉलेजच्या समोरच्या दुकानात जेंव्हा रवा डोसा खालेला तेंव्हापासूनच तो माझ्या आवडीच्या पदार्थात सामील झाला. डोश्याचा कुरकुरीतपणा आणि काजूची चव दोन्ही गोष्टी त्याला एकदम मजेदार बनवतात. डिसेंबरमध्ये जेंव्हा आईला हा डोसा बनवताना पहिला तेंव्हाच कललेल की एकदम सोपी कृती आहे. आज रविवारच्या दिवशी ब्रंचसाठी मी त्याला बनवण्याचे ठरवले.

रवा डोसा
साहित्य
१ वाटी रवा
१ वाटी तांदुळाचे पीठ
१/४ वाटी मैदा
१/२ चमचा जीरा
१/४ चमचा हिंग
बारीक चिरलेले भाजलेले काजू
२ हिरव्या मिरच्या
मीठ
तूप

कृती
  • रवा, मैदा, बारीक चिरलेल्या मिरच्या, जीरा, हिंग आणि मीठ एकत्र करणे.
  • भरपूर पाणी घालुन डोश्याचे पीठ बनवणे व २० मिनिटासाठी बाजूला ठेवणे.
  • अजून थोडे पाणी घालुन पीठ पातळ करणे.
  • तवा मध्यम आचेवर ठेवून त्याला तूप लावणे.
  • १/२ वाटी डोस्याचे पीठ तव्यावर ओतून पसरवणे व डोश्याची खालची बाजू गुलाबी होईपर्यंत भाजणे.
  • २-३ तुपाचे थेंब टाकून डोसा परतणे व दुसरी बाजुपण गुलाबी होईपर्यंत भाजणे.
  • डोश्यावर काजू पसरवून दुमडून खायला देणे.

टीप
मी पहिल्यांदा जेव्हा हा डोसा बनवलेला तेंव्हा पीठ भिजवून २० मिनिट वाट न बघता डोसे बनवले त्यामुळे ते जाड आणि मऊ झाले त्यामुळे पीठ भिजवणे फार महत्वाचे आहे.
मी डोश्याचे पीठ एकत्र न ओतता, तव्यावर थोडे थोडे वरन शिंपडत गेले. ज्या जागी पीठ नाठीये तिथे थोडे थोडे शिंपडत पूर्ण तव्यावर पीठ शिंपडले त्यामुळे सुंदर जाळी तयार झाली आणि डोसा पण पातळ झाला.

खजूर चॉकोचीप पॅन केक


मी बरेचवेळा पॅन केक बनवले आहेत कारण ते एकदम सोपा आणि चविष्ठ नाश्ता होतात. मी क्रॅनबेरी, आंबा,ब्लूबेरी असे वेग वेगळी फळे घालुन बनवलंय पण आज फळे नसल्यानी मी त्यात खजूर आणि चॉकोचीप घालुन बनवला. केक एकदम सुंदर झाला आणि नाश्ता एकदम मस्त होता.

खजूर चॉकोचीप पॅन केक
साहित्य
१/२ कप खजूर
१/४ वाटी चॉकोचीप
१/२ कप गव्हाचे पीठ
१/२ कप मैदा
३/४ वाटी दही
१ अंड
३/४ चमचा साखर
१/२ चमचा व्हॅनिला ईसेन्स
१/२ चमचा बेकिंग पूड
१/४ चमचा बेकिंग सोडा
२.५ चमचा वितळवळेल लोणी
मीठ
तेल

कृती
  • खजुरातून बिया काढून बारीक चिरावे.
  • मैदा आणि पीठ एकत्र चाळून घेणे.
  • त्यात साखर, मीठ, बेकिंग सोडा आणि बेकिंग पूड घालुन एकत्र करणे.
  • त्यात अंडे, दही, वितळवलेले लोणी आणि व्हॅनिला ईसेन्स घालुन एकत्र करणे.
  • त्यात १/२ वाटी कोमट पाणी घालुन फेटणे.
  • नॉनस्टिक तवा गरम करणे.
  • त्यावर एकावेळी अर्धा कप पीठ ओतणे व त्यावर चॉकोचीप आणि खजूर पसरवणे.
  • मध्यम आचेवर गुलाबी रंगावर दोन्ही बाजू परतून घेणे. देताना मध किव्हा मॅपल सिरप वरून ओतून खायला देणे.

टीप
पिठातच लोणी असल्यानी तव्याला तेल लावावं लागत नाही.
अजॉयला खजुराचा गोडपणा जरा जास्त वाटला त्यामुळे मला वाटतंय की डार्क चॉकोचीप वापरले तर गोड बरोबर होईल.

कोळंबी बरिटो बोल


चिपोटले हि अजॉयची आवडती फूडचेन आणि बऱ्याच वेळा तिथे जाण्यासाठी मागे लागतो. आम्ही तिथे नेहमी चिकन बरिटो बोल खातो. आज मी स्वतः घरी बनवण्याचे ठरवले पण माझ्याकडे बोनलेस चिकन नसल्यानी मी कोळंबी वापरली. फार छान झालेले

कोळंबी बरिटो बोल
साहित्य
४०० ग्राम कोळंबी
१.५ वाटी तांदूळ
५ टोमाटो
१ लिंबू
३ वाटी स्वीटकॉर्न
३ चमचे दही
३ चमचे तिखट
१/२ चमचा ओरिगानो
१/२ चमचा मिरे पूड
१/४ चमचा धने पूड
१/४ चमचा गरम मसाला
१/२ वाटी किसलेले चीज
१/४ वाटी रेंच ड्रेसिंग
१/२ वाटी कोथिंबीर
४ चमचे लोणी
लेट्युस
मीठ
ओलिव्ह तेल

कृती
  • दह्यात एक चमचा तिखट, धने पूड, गरम मसाला घालुन एकत्र करणे. त्यात कोळंबी घालुन एकत्र करणे व बाजूला ठेवणे.
  • कुकरमध्ये तांदुळात २.५ वाटी पाणी घालुन भात बनवणे.
  • कढईत १/४ चमचा तेल घालुन त्यात कोथिंबीर थोडी शिजवून घेणे व भातात घालणे.
  • भातात लिंबाचा रस आणि मीठ घालुन एकत्र करणे व बाजूला ठेवणे
  • कढईत चमचाभर तेल घालुन त्यात टोमाटो वाटून घालणे. त्यात २ चमचा तिखट, मिरे पूड, ओरिगानो आणि मीठ घालुन चांगले शिजवणे. मिश्रण सुकले की बाजूला ठेवून देणे.
  • कढईत लोणी गरम करणे व त्यात कोळंबी मिश्रण सुकेपर्यंत भाजून घेणे
  • ३ मोठ्या भांड्यात बरिटो बनवण्यासाठी भाताचा थर देणे.
  • त्यावर कोळंबी, बर्रिक चिरलेले उरलेले २ टोमाटो आणि चीज घालणे.
  • स्वीटकॉर्न ३ मिनिट मायक्रोवेव्ह करून बोलमध्ये घालणे.
  • त्यावर टोमाटोचा तिखट सॉस, रेंच ड्रेसिंग आणि लेट्युस घालणे

टीप
मी कॉर्नला लवकर शिजवण्यासाठी मायक्रोवेव्ह केले. पण त्याऎवजी पाणी घालुन उकलावता पण येईल.
टोमाटोचा तिखट सॉस जास्त तिखट बनतो. मी अजून एक चमचा तिखट वापरलेले पण खूप मला ते जरा जास्तच तिखट वाटले.
जर घरी सार क्रीम असेल तर ते रेंच ड्रेसिंगच्याऎवजी वापरता येईल, माझ्याकडे नव्हते म्हणून मी ड्रेसिंग वापरले.
माझ्याकडची कोळंबी फार मोठी होती म्हणून तळल्यावर मी प्रत्येकाचे २-३ तुकडे केले.

आले कॉर्न फ्लॉवर


अजॉयला फ्लॉवर फार आवडतो आणि त्यामुळे आठवड्यातून एकदा तरी फ्लॉवरची भाजी होते. बऱ्याच प्रकारे मी त्यामध्ये थोडा वेगळेपणा आणण्याचा प्रयत्न करते. आज मी आल्याचा वापर करण्याचे ठरवले आणि त्याची उग्रता कमी करण्यासाठी त्यात कॉर्नचा वापर केला.

आले कॉर्न फ्लॉवर
साहित्य
१ फ्लॉवर
१ वाटी कॉर्न
१ चमचा आले
२ टोमाटो
१ कांदा
३/४ चमचा तिखट
१/४ चमचा हळद
१/४ चमचा धने पूड
मीठ
तेल

कृती
  • कढईत तेल गरम करून त्यात फ्लॉवरचे तुकडे गुलाबी रंगावर तळून घेणे.
  • कढईत तेल गरम करून त्यात कांदा भाजणे.
  • त्यात आले घालुन अजून एक मिनिट भाजणे
  • तिखट, हळद, धने पूड घालुन अजून १-२ मिनिट भाजणे.
  • टोमाटो वाटून त्यात घालणे व दोन मिनिट शिजवणे.
  • त्यात स्वीटकॉर्न, मीठ घालुन ५-६ मिनिट चांगले सुकेपर्यंत शिजवणे.
  • तळलेला फ्लॉवर त्यात मिसळून २-३ मिनिट शिजवणे.

टीप
फ्लॉवरला जास्त काळे करू नये कारण तेलातून बाहेर काढल्यानंतर तो अजून थोडा गडद होतो.

फ्राईड चिकन


आम्ही बँगलोरमध्ये असताना केफसी मध्ये बऱ्याचवेळी जायचो, खूप साऱ्या आठवणीसुद्धा आहेत. पण इथे आल्यापासून आम्ही एकदासुद्धा केफसीमध्ये नाही गेलोय. त्यामुळे फ्राईड चिकन खाऊन बरेच दिवस झालेत. त्यामुळे आज मी ते बनवण्याचे ठरवले.

फ्राईड चिकन
साहित्य
५ चिकनचे लेग तुकडे
१ अंडे
३/४ वाटी मैदा
५ चमचे ब्रेडक्रम्स
१ चमचा तिखट
१/४ चमचा ओरिगानो
१/४ चमचा मिरे पूड
१/४ चमचा धने पूड
१/४ चमचा लसूण पेस्ट
मीठ
तेल

कृती
  • धार धार सुरीनी चिकनच्या तुकड्यांना चिरा पडणे.
  • गरम पाण्यात १/२ चमचा तिखट, ओरिगानो, मिरे पूड आणि मीठ घालणे.
  • त्यात चिकनचे तुकडे घालुन एक तास भिजवणे
  • एका भांड्यात अंडे, लसूण पेस्ट, उरलेले अर्धा चमचा तिखट, धने पूड आणि मीठ घालणे.
  • ताटलीत मैदा, ब्रेडक्रम्स आणि मीठ एकत्र करणे.
  • चिकनच्या तुकड्यातून पाणी निथळून टाकणे. प्रत्येक चिकनचा तुकडा अंड्याच्या मिश्रणात दुबवाने व नंतर मैद्याच्या मिश्रणात घोळवणे.
  • तेल गरम करून त्यात मध्यम आचेवर गुलाबी रंगावर चिकनचे तुकडे तळणे.

टीप
चिकनचे तुकडे पाण्यात भिजवाल्यानी ते थोडे मऊसर होते. मी त्यात थोडे मसाले घातले त्यामुळे थोडी चव चिकनला लागते.
चिकन मध्यम आचेवर भाजल्यानी ते एकदम चांगले शिजले व ते बाहेरून करपलेपण नाही.
मी ब्रेडक्रम्स पनीरभरा कबाब बनवताना जास्त बनवून ठेवलेले.

आलुबुखारचा केक


आम्ही ह्यावेळी बरेच आलुबुखार आणलेले पण ते पिकलेले नव्हते. त्यामुळे मी हा केक बनवण्याचे बऱ्याच दिवसांपासून ठरवत होते पण आज वेळ मिळाला

आलुबुखारचा केक
साहित्य
१ वाटी लोणी
१.५ वाटी साखर
३/४ वाटी मैदा
१ वाटी हेझलनट
१ वाटी अक्रोड
१ वाटी शेंगदाणा
३ अंडी
१/२ चमचा बेकिंग पूड
६ आलूबुखार
२ चमचे लिंबाचा रस
४ चमचा पिठीसाखर
२ चमचा बदाम

कृती
  • हेझलनटची पूड करणे.
  • एका भांड्यात साखर आणि लोणी एकत्र फेटणे.
  • त्यात अंडे घालुन फेटणे.
  • त्यात हेझलनटचा १/३ वाटा घालणे आणि फेटणे.
  • एक अंडे आणि १/३ हेझलनटचा वाटा घालत फेटत राहणे.
  • मैदा आणि बेकिंग पूड एकत्र चाळून घेणे व मिश्रणात घालुन फेटणे.
  • केकच्या भांड्याला लोण्याचा हात लावणे व केकचे मिश्रण त्यात ओतणे.
  • ओव्हन ३५०F/१८०C वर गरम करणे.
  • केक ३५०F/१८०C वर ४५ मिनिट भाजून घेणे.
  • ओव्हनमधून बाहेर काढून त्यावर आलुबुखारची बी काढून अर्धे करून पसरवणे.
  • ओव्हनमध्ये ३५०F/१८०C वर अजून १० मिनिट भाजणे व थंड करणे.
  • एका भांड्यात लिंबाचा रस आणि पिठी साखर एकत्र करणे व मिश्रण घट्ट होईपर्यंत उकळवणे.
  • पाक केकवर ओतून त्यावर बारीक चिरलेले बदाम घालणे.

टीप
लिंबाच्या मिश्रणाऎवजी मारमालेड जॅमपण वापरता येईल पण माझ्याकडे तो नसल्यानी मी लिंबाच्या रसाचे मिश्रण वापरले.

दुधीभोपळ्याचा कोफ्ता


अजॉयला भोपळ्याचा कोफ्ता फार आवडतो, इतका की पुण्याला गेल्यावर मां त्यासाठी नेहमी बनवते. मागच्या वर्षापर्यंत आम्ही खूप वेळा पुण्याला जायचो त्यामुळे मी हे कधीच नाही बनवलं पण इथे आल्यापासून आम्ही दोघेसुद्धा कोफ्ता फार मिस करतो. त्यामुळे आता मांकडून ह्याची कृती घेऊन मी आज कोफ्ता बनवला.

दुधीभोपळ्याचा कोफ्ता
साहित्य
३ वाटी दुधीभोपळा
१ वाटी गाजर
१.५ वाटी बेसन
३ चमचा कॉर्न फ्लौर
२ कांदे
२ टोमाटो
२ वाटी दही
४ चमचे साखर
१/२ चमचा चाट मसाला
१/२ चमचा जीरा
१.५ चमचा तिखट
१/२ चमचा हळद
१ चमचा धने पूड
१ चमचा जिरे पूड
१ हिरवी मिरची
१/४ वाटी काजू
१/४ वाटी मनुका
तेल
मीठ

कृती
  • दुधीभोपळा आणि गाजर किसून घेणे.
  • तेल गरम करून त्यात जीऱ्याची फोडणी करणे.
  • त्यात किसलेला दुधीभोपळा आणि गाजर घालुन सारखे हलवत सुकेपर्यंत शिजवणे.
  • कढईत तेल गरम करून त्यात कांदा भाजणे व बाजूला ठेवणे
  • मिक्सरमध्ये टोमाटो, तिखट, जीरा पूड, धने पूड आणि मीठ वाटून घेणे
  • त्यात शिजवलेला कांदा घालुन बारीक वाटणे.
  • दुधीभोपळ्याच्या मिश्रणात बेसन घालुन मऊ पीठ भिजवणे.
  • मिश्रणाचे लिंबाच्या आकाराचे गोळे बनवून त्यात काजू, मनुका आणि बारीक हिरवी मिरचीचे तुकडे घालणे.
  • कोफ्ता तेलात गुलाबी रंगावर तळून घेणे.
  • कढईत वाटलेली पेस्ट, ३ वाटी पाणी घालुन ५-६ मिनिट उकळवणे.
  • त्यात कोफ्ता घालुन अजून थोडा वेळ उकळवणे.
  • एका भांड्यात दही, साखर आणि चाट मसाला एकत्र करणे.
  • वाढताना वाटीत कोफ्ता आणि त्याची कढी घालणे. त्यावर दही पसरवणे व किसलेले गाजर, काजू, मनुका घालुन देणे.

टीप
गाजराच्याऎवजी कच्चे केळेपण वापरता येईल

पनीरभरा कबाब


आज फ्रीज उघडल्यावर लक्षात आले की माझ्याकडे २ लिटर दुध आहे ज्याची शेवटची तारीख उद्याची आहे. काही गोड बनवण्याचा कंटाळा आल्यानी, मी हा पदार्थ शोधला.

पनीरभरा कबाब
साहित्य
२ लिटर दुध
५ चमचे व्हिनेगर
१ वाटी कोथिंबीर
२ चमचा पुदिना
५-६ मिरच्या
२ ब्रेडचे तुकडे
१/२ चमचा चाट मसाला
मीठ
तेल

कृती
  • दुध उकलाव्रून त्यात एक्वाती पाण्यात व्हिनेगर टाकून घालणे.
  • पनीर तयार झाले की लगचे धुवून आणि गाळून घेणे.
  • पंचात अर्धा ते एक तास टांगून ठेवणे.
  • ओव्हन ३५०F/१८०C वर गरम करणे.
  • त्यात ब्रेडचे तुकडे ५ मिनिट ३५०F/१८०C वर भाजून घेणे. तुकडे परतून पुन्हा ५ मिनिट भाजणे.
  • मिक्सर मध्ये वाटून ब्रेडक्रम बनवणे.
  • मिक्सरमह्ये कोथिंबीर, पुदिना आणि मिरच्या घालुन पाणी न घालता वाटून घेणे.
  • परातीत पनीर, मीठ, आणि वाटलेले मिश्रण घालुन मळणे.
  • लिंबाच्या आकाराचे गोळे करून ब्रेडक्रम मध्ये घोळवून तेलात मध्यम आचेवर तळून घेणे.
  • वरून चाट मसाला शिंपडून सॉस बरोबर खायला देणे.

टीप
जर पनीर बनवायचे नसेल तर बाजारातील पनीर किसून वापरता येईल पण फ्रेश पनीरनी खूप सुंदर चव आणि मऊपणा येतो आणि तरी सुद्धा बाहेरून एकदम कुरकुरीत बनतात.
कोथिंबीर, पुदिना आणि मिरच्या वाटणा पाणी न घालता धुतलेल्या भाज्यावाराचे पाणी पुरेसे पडते.

व्हेजिटेबल स्टर फ्राय


माझ्याकडे फ्रीजमध्ये बऱ्याच भाज्या होत्या. आज जेवणासाठी काहीतरी पटकन बनणारे आणि तरीसुद्धा चविष्ठ बनवायचा बेत होता. इंडो चाईनीज माझा आवडता पदार्थाचा प्रकार असल्यानी मी हा पदार्थ बनवला.

व्हेजिटेबल स्टर फ्राय
साहित्य
मुठभर भेंडी
मुठभर वांग्याचे तुकडे
मुठभर कोबी
१ वाटी घेवडा
१ कांदा
१ ढोबळी मिरची
२ कांद्याची पात
६ लसूण पाकळ्या
१ चमचा लसूण पेस्ट
१/४ चमचा आले पेस्ट
१/२ लिंबू
५ चमचे सोया सॉस
१ चमचा सॉस
२ चमचे कॉर्न फ्लौर
मीठ
तेल

कृती
  • भेंडी तेलात तळून घेणे.
  • कांदासुद्धा पातळ होईपर्यंत भाजून घेणे.
  • त्यात लसूण पाकळ्या, वांग्याचे तुकडे, घेवडा, ढोबळी मिरची, कोबी घालुन सारखे परतत शिजवणे.
  • त्यात तळलेली भेंडी, लसूण पेस्ट, आले पेर्स्त आणि लिंबू घालुन ढवळणे.
  • त्यात सॉस आणि सोया सॉस घालुन २ मिनिट शिजवणे.
  • कॉर्न फ्लौर ६ वाटी पाण्यात घालुन भाज्यांमध्ये घालणे आणि दाट होईपर्यंत शिजवणे
  • मीठ आणि कण्याची पात घालुन अजून एक मिनिट शिजवणे व गरम गरम भाताबरोबर किंवा नुडल्स बरोबर खायला देणे.

टीप
थोडा आंबटपणा देण्यासाठी मी लिंबू वापरला पण जर आंबटपणा नको असेल तर लिंबू नाही घातला तरी चालू शकेल. लिंबाच्याऎवजी व्हिनेगरपण चालेल.
माझ्याकडे बेबीकॉर्न नव्हते पण ते असतील तर ते पण घालता येतील

गुलाब आणि सुकामेव्याचा मिल्कशेक


मी पुण्याहून ह्यावेळी थोडा गुलकंद घेवून आलेले. आज फार जास्त गरम नव्हता पण फ्रीजमध्ये आईस्क्रीम आणि बाहेर शेल्फवर गुलकंद बघून मी हा मिल्कशेक बनवण्याचे ठरवले. एकदम सुंदर आणि शांत शुक्रवारची संध्याकाळ.

गुलाब आणि सुकामेव्याचा मिल्कशेक
साहित्य
६ वाटी दुध
२ वाटी व्हॅनिला आईसक्रीम
१/३ वाटी काजू
१/३ वाटी बदाम
१/३ वाटी पिस्ता
१/२ वाटी साखर
२ चमचे गुलकंद
चिमुटभर लाल रंग

कृती
  • मिक्सरमध्ये काजू, बदाम, पिस्ता घालुन बारीक पूड करून घेणे.
  • त्यात गुलकंद, आईस्क्रीम घालुन पुन्हा वाटणे.
  • त्यात दुध, साखर आणि लाल रंग घालुन शेक होईपर्यंत वाटणे.

टीप
मी थोडा सुकामेवा अर्धवट वाटून वापरला त्यामुळे त्यांचे तुकडे शेक पिताना मध्ये मध्ये येत होते आणि त्याची चव अजून जास्त चांगली लागली
थोड सजवण्यासाठी मी लाल रंग १-२ थेंब पाण्यात घालुन चमच्याची मागची बाजू त्यात बुडवून शेकवरती डिझाईन बनवली.

मुंग डाळ वडा


बरेच दिवसांनी मी माझ्याकडच्या पाककृतीच्या पुस्तकातून काहीतरी बनवण्याचे ठरवले. हि पाककृती एकदम तशीच्या तशी नाहीये पण त्यातील एका वाचलेल्या कृतीवरून प्रेरणा घेतलेली आहे.

मुंग डाळ वडा
साहित्य
१ वाटी मुंग डाळ
२ चमचे बेसन
६ लसुणाच्या पाकळ्या
१ इंच आलं
२ हिरव्या मिरच्या
१ चमचा जीरा
१/२ चमचा तिखट
१/४ चमचा हळद
चिमुटभर खाण्याचा सोडा
मीठ
तेल

कृती
  • मुंग डाळ पाण्यात ५-६ तास भिजवून ठेवणे.
  • डाळ भिजवल्यावर, लसूण, आले, मिरची आणि जीरा घालुन मिक्सरमध्ये १-२ चमचे पाणी घालुन जाडसर वाटणे.
  • त्यात डाळीतून पाणी उपसून ती घालुन बारीक वाटणे.
  • वाटलेल्या पिठात बेसन, तिखट, हळद, मीठ आणि खाण्याचा सोडा घालुन चांगले एकत्र करणे.
  • कढईत तेल गरम करून थोडे थोडे पीठ घालुन वडे तळणे.

टीप
पाककृतीत अजून खोबरे, कांदा, कडीपत्ता वगैरे पण घालायला सांगितलेला पण मला हे वडे असेच आवडले आणि त्याबरोबर खोबर्याची चटणी एकम मस्त लागली

झीब्रा केक


साधारण एका वर्षापूर्वी ऑफिसमध्ये एकानी चेक बॉक्स केक बनवलाय असा मेल आलेलं. मेल मध्ये कसे बनवलंय वगैरे बरच काही लिहिलेलं पण मला इतके भांडे किंवा कार्डबोर्ड नव्हता वापरायचा त्यामुळे मग मी हा एकदम प्रसिद्ध झीब्रा केक बनवला.

झीब्रा केक
साहित्य
३ वाटी मैदा
२ वाटी साखर
४ अंडी
२ वाटी दुध
२ वाटी तेल
१ चमचा व्हॅनिला ईसेन्स
८ चमचा कोको पूड
४ चमचे बेकिंग पूड

कृती
  • एका भांड्यात अंडी आणि साखर घालुन फेटून घेणे.
  • त्यात दुध आणि तेल २ चमचे प्रत्येकातून बाजूला ठेवून उरलेले घालुन फेटणे.
  • मैदा चाळून मिश्रणात थोडा थोडा घालत फेटणे.
  • त्यात व्हॅनिला ईसेन्स आणि बेकिंग पूड घालुन फेटणे
  • दुसऱ्या भांड्यात ४.५ वाटी मिश्रण काढून घेणे व त्यात कोको पूड घालुन फेटणे.
  • कोको पूड घातलेल्या मिश्रणात उरलेले दुध अंड तेल (२ चमचा प्रत्येकी) घालुन फेटून घेणे.
  • ओव्हन ३५०F/१८०C वर गरम करणे.
  • भांड्याला लोणी लावून घेणे.
  • १/४ वाटी पांढरे पीठ भांड्याच्या मध्ये ओतणे. मग १/४ वाटी कोकोचे मिश्रण मध्ये ओतावे. असे एकदा पांढरे व एकदा कोको मिश्रण घालत भांडे अर्धे भरेपर्यंत करणे. दुसऱ्या भांड्यात पुन्हा तसेच करणे.
  • ओव्हनमध्ये ३५०F/१८०C वर ४० मिनिट भाजणे.

टीप
जर दोन भांड्याच्याऎवजी एका भांड्यात केक बनवायचा असेल तर १/२ वाटी एकावेळी पीठ ओतणे म्हणजे पट्टे एकदम चांगल्या आकाराचे येतील.

पीनट सॉस


चिकन सातेबरोबर एकदम महत्वाचा डीप. मला हा बनवायलाच लागला कारण अजॉयला तो इतका आवडतो की तो कधी कधी चाईनीज हॉटेलमध्येपण हा सॉस मागतो.

पीनट सॉस
साहित्य
१ वाटी शेंगदाणे
२ चमचा ब्रावून शुगर
१/४ चमचा तिखट
२ चमचा सोया सॉस
१ चमचा तेल
१ लसूण पाकळी
२ चमचे लिंबाचा रस
मीठ

कृती
  • शेंगदाणे भाजून घेणे व थंड करणे.
  • शेंगदाणे, ब्रावून शुगर, तिखट, सोया सॉस, तेल, लसूण, लिंबाचा रस आणि मीठ घालुन मिक्सर मह्ये बारीक वाटणे.
  • त्यात अर्धा वाटी पाणी घालुन सॉस बारीक वाटून घेणे.

टीप
मी दुप्पट तिखट वापरलेले पण त्यामुळे खूप जास्त तिखट झालेले म्हणून मी १/४ चमचा तिखट दिले आहे. तुमच्या चवीनुसार जास्त तिखट वापरता येईल

चिकन साते


चिकन साते हि माझी थाई प्रकारची एकदम आवडती डीश. ह्या आधी जेव्हा बनवलेला तेंव्हा फोटो काढायच्या आधीच संपून गेलेले. त्यामुळे ह्यावेळी पहिल्यांदाच फोटो काढून घेतला.

चिकन साते
साहित्य
४०० ग्राम बोनलेस चिकन ब्रेस्ट
१ चमचा ब्रावून शुगर
२ लसुणाच्या पाकळ्या
१ चमचा धने पूड
१ चमचा जिरे पूड
१/४ चमचा हळद
१ चमचा मिरे पूड
२ चमचे तेल
२ चमचे सोया सॉस
२ चमचे लिंबाचा रस
१/२ वाटी दुध
मीठ

कृती
  • चिकन ब्रेस्टचे पातळ आयताकृती तुकडे करणे.
  • त्याला ब्रावून शुगर, लसुणाच्या पाकळ्या, धने पूड, जिरे पूड, हळद, मिरे पूड, तेल, सोया सॉस, लिंबाचा रस आणि मीठ लावून घेणे.फ्रीजमध्ये ४ तास ठेवणे.
  • प्रत्येक चिकनची पट्टीमध्ये काडी घालणे. प्रत्येक काडीला २ चिकनच्या पट्ट्या लावणे.
  • चिकनला थोड्या दुधामध्ये भिजवून घेणे.
  • नॉनस्टिक तवा गरम करून त्यावर चिकन मध्यम आचेवर, प्रत्येक २-३ मिनिटांनी परतून, पूर्ण शिजेपर्यंत भाजणे

टीप
मी बऱ्याच पाककृतीमध्ये फिश सॉस घालावे असे वाचले पण थोडे फार वाचल्यावर कळले की ते खारट पाण्यासारखे असते आणि बऱ्याच वेळी मीठाऐवजी वापरले जाते. त्यामुळे फिश सॉसच्याऎवजी नेहमीचे मीठ वापरले.

चिली कोळंबी


आज मला कोळंबीचे काहीतरी लवकर बनणारे पण नेहमीच्या कोळंबी मसाल्यापेक्षा वेगळे काहीतरी बनवायचे होते. आणि मी हा पदार्थ बनवला.

चिली कोळंबी
साहित्य
३०० ग्राम कोळंबी
१ चमचा लसूण पेस्ट
१ कांदा
४ हिरव्या मिरच्या
४ चमचे सोया सॉस
२ चमचे टोमाटो सॉस
२ चमचे कॉर्न फ्लौर
मीठ
तेल

कृती
  • कोळंबीला लसूण पेस्ट आणि मीठ लावून ठेवणे.
  • तेलात तव्यावर कोळंबी १ मिनिट भाजून घेणे.
  • त्याच तेलात उभ्या कापलेल्या मिरच्या, कांदा घालुन सारखे ढवळत शिजवणे.
  • त्यात सोया सॉस, टोमाटो सॉस घालुन अजून २ मिनिट शिजवणे.
  • कोळंबी घालुन अजून एक मिनिट शिजवणे.
  • एका वाटी कॉर्न फ्लौर आणि २ वाटी पाणी घालणे व एकत्र करणे. कोळंबीमध्ये घालुन ३-४ मिनिट शिजवणे.

टीप
माझ्याकडे कांद्याची पात नव्हती त्यामुळे मी तो घातला नाही पण वरून त्याचे पाने कापून घातले तर अजून चांगले वाटेल.

गुळाचा संदेश


सरस्वती पूजेच्या दिवशी मी हि मिठाई करून बघण्याचे ठरवले. अजॉयची आवडती मिठाई. खूपच चांगला झालेला आणि सगळ्यात उत्तम गोष्ट म्हणजे कलाकंद सारखी किचकटपण नाहीये करायला. त्यामुळे त्यांनी पुन्हा काहीतरी बनवण्यास सांगितल्यास कमी कष्टाची पण खूप तारीफ देणारी हि मिठाई कधीही बनवू शकते.

गुळाचा संदेश
साहित्य
१ लिटर दुध
३/४ वाटी गुळ
२ चमचा व्हिनेगर
१/४ चमचा पिस्ता पूड

कृती
  • भांड्यात दुध उकळवणे व त्यात २ चमचा पाण्यात मिसळलेले व्हिनेगर घालणे.
  • पनीर तयार झाल्यावर लगेच गाळून थंड पाण्याखाली धुवून घेणे.
  • पंचात टांगून ५-१० मिनिट पाणी जाण्यासाठी बाजूला ठेवणे.
  • परातीत पनीर काढून चांगले मळून घेणे. एकम मऊसर आणि एकसारखे झाले पाहिजे.
  • त्यात गुळ किसून घालणे व एकत्र करणे.
  • कढईत मिश्रण घालुन मध्यम आचेवर शिजवणे. भांड्यापासून मिश्रण सुटायला लागले व एकत्र गोळा व्हायला लागले की खाली काढणे.
  • छोटे छोटे गोळे करून त्यांना साच्यात घालुन आकार देणे. साचे नसल्यास नुसतेच पण गोळे करून ठेवता येतील.
  • पिस्ता पूड शिंपडणे व पूर्ण पणे थंड होऊ देणे.

टीप
मी नेहमीच्या गुळाऎवजी कलकत्याचे पाताली गुळ वापरले. पण नेहमीचे गुळ वापरताना मी त्यात थोडासा खजूर वाटून घालण्याचा विचार करत आहे. कारण त्या गुळाची चव खजूर आणि गुळ एकत्र केल्यासारखी लागते.
पनीर बनवताना ते दुधापासून वेगळे झाले की लगेच धुवून घेणे, जर जास्त शिजवले तर मिठाई कडक होते.
संदेशला आकार देण्यासाठी मिश्रण गरमच असायला हवे. जर ते थंड व्हायला लागले तर पुन्हा थोडेसे कोमट करून घेणे.

भरलेला पालक पराठा


अजॉयला पालक तोंड वाकड न करता खायला लावायचा हा अजून एक प्रयत्न ;-) खर सांगायचं तर तो तोंड वाकड तर नाही करत, मी आहे जी तोंड वाकड करते. पराठा बनवण्यासाठी थोडा वेगळेपणा म्हणून मी आतमध्ये घालायला मिश्रण बनवले.

भरलेला पालक पराठा
साहित्य
३ वाटी गव्हाचे पीठ
६ वाटी पालक
२ बटाटे
१/२ चमचा जीरा
१/४ चमचा म्हवरी
चिमुटभर हिंग
१ चमचा तिखट
१/२ चमचा गरम मसाला
मीठ
तेल
तूप

कृती
  • परातीत गव्हाचे पीठ, चमचाभर तेल, मीठ घालुन मऊसर भिजवणे. ३०-४० मिनिट भिजण्यासाठी ठेवून देणे.
  • बटाटे कुकरमध्ये उकडून घेणे
  • कढईत चमचाभर तेल गरम करून त्यात जीरा व म्हवरीची फोडणी करणे व हिंग टाकणे.
  • त्यात पालक घालुन शिजवणे.
  • पालकाला पाणी सुटले की त्यात तिखट, गरम मसाला आणि मीठ घालणे व सारखे ढवळत पूर्ण सुकेपर्यंत शिजवणे.
  • मिक्सरमध्ये पालकाचे मिश्रण वाटून घेणे व कुस्करलेल्या बटाट्यात घालणे व लिंबाच्या आकाराचे गोळे करणे.
  • पीठाचे सुद्धा गोळे करून त्यांना वाटीचा आकार देणे व त्यात बटाटा-पालक मिश्रणाचा गोळा घालुन बंद करणे.
  • पराठा लाटणे व मध्यम आचेवर तव्यावर दोन्ही बाजूनी गुलाबी होईपर्यंत तेल सोडून भाजून घेणे
  • पूर्ण शिजल्यावर तूप पसरवून दही आणि/किंवा लोणच्या बरोबर खायला देणे

टीप
मला मसाला किंवा कोथिंबीर वापरायची नव्हती त्यामुळे मी बटाटा वापरला. त्यानी पालकाची तीव्रता कमी झाली

Related Posts Plugin for WordPress, Blogger...

  © माझे स्वयंपाक प्रयोग | Template Recipes by Emporium Digital

TOP