भरलेले पनीर


पनीर बनवण्यासाठी मी थोड्या वेगवेगळ्या कृती शोधत होते आणि हि पनीर पसंदाची कृती मिळाली. मला हि कशी बनवतात हे फार आवडले आणि त्यावर प्रभावित होऊन मी हे बनवलेय.

भरलेले पनीर
साहित्य
४०० ग्राम पनीर
२ चमचे मनुके
१/४ चमचा कोथिंबीर
२ हिरव्या मिरच्या
१/२ चमचा मैदा
१/२ चमचा कॉर्न फ्लौर
२ टोमाटो
१/२ चमचा जीरा
१/४ चमचा म्हवरी
१/२ चमचा हळद
१ चमचा तिखट
१/२ चमचा गरम मसाला
१/४ चमचा जिरे पूड
१/४ चमचा धने पूड
१/२ चमचा कसुरी मेथी
१ चमचा क्रीम
मीठ
तेल

कृती
  • पनीर त्रिकोणी मध्य्रम आकारात कापणे
  • ३ तुकडे किसणे व त्यात बारीक चिरलेली कोथिंबीर, हिरवी मिरची आणि मनुका घालुन एकत्र करणे.
  • बाकीच्या तुकड्यांना चिरा देणे.
  • त्यात आधी बनवलेलं मिश्रण घालुन बाजूला ठेवणे.
  • मैदा, कॉर्न फ्लौर आणि पाणी एका भांड्यात एकत्र करून पातळ पीठ भिजवणे.
  • त्यात पनीरचे भरलेले तुकडे घालुन तेल गरम करून त्यात गुलाबी रंग येईपर्यंत हे तुकडे तळणे.
  • त्याच तेलात म्हवरी आणि जिरे टाकून फोडणी करणे.
  • त्यात बारीक चिरलेला टोमाटो घालुन शिजवणे.
  • तिखट, जिरे पूड, धने पूड, हळद, गरम मसाला घालुन परतणे.
  • मिश्रण थंड करून त्यात कसुरी मेथी घालुन बारीक वाटणे.
  • त्याच कढईत हे वाटण आणि पाणी घालुन उकळवणे. तळलेले पनीरचे तुकडे घालुन उकळी आणणे.
  • त्यात मीठ आणि क्रीम घालुन अजून एक मिनिट उकळवणे.

टीप
कसुरी मेथी मी वाटण भाजायच्या आधी न घालता वाटली त्यामुळे एक विशिष्ठ चव आली.

ब्रेड सॅन्डविच फ्राय


ह्या सारखाच अजून एक पदार्थ: ब्रेड रोल बनवलेला पण ह्यात थोडे वेगळे मिश्रण घातल्यानी इथे देत आहे.

ब्रेड सॅन्डविच फ्राय
साहित्य
८ ब्रेड स्लाईस
१ बटाटे
१ चमचा तिखट
१/२ चमचा जिरे पूड
१/२ चमचा धने पूड
१/२ चमचा आमचूर पूड
मीठ
तेल

कृती
  • बटाटे किसून पाण्यात घालणे
  • पाणी निथळून त्यात तिखट, जिरे पूड, धने पूड, आमचूर पूड आणि मीठ घालणे.
  • ब्रेडच्या कडा कापून टाकणे.
  • प्रत्येक ब्रेडचा तुकडा एक-दोन सेकंद पाण्यात भिजवणे व लगेच ओं तळव्यांमध्ये दाबून पाणी काढणे.
  • मध्ये बटाट्याचे मिश्रण घालुन कडा दुमडून त्रिकोणी आकारात बंद करणे.
  • कढईत तेल गरम करून मध्यम आचेवर ब्रेड तळणे.

टीप
ब्रेड खूप जास्तवेळ पाण्यात बुडवला तर त्याचा लगदा होईल व नीट आकार देता नाही येणार त्यामुळे पटकन पाण्यातून बाहेर काढणे महत्वाचे आहे

झेरी झेरी आलू भाजा


आम्ही मागच्या आठवड्यात आम्ही ओहरीस मध्ये बंगाली फूड फेस्टिवलसाठी गेलेलो आणि तिथे आम्ही हा पदार्थ खाल्ला आणि तेंव्हा असे वाटलेले की त्यानी हा एकदम फ्रेंच फ्राईजसारखा बनवलेला असे वाटत होते. ह्या आठवड्यात मी स्वत: बनवण्याचे ठरवले.

झेरी झेरी आलू भाजा
साहित्य
२ बटाटे
मीठ
तेल

कृती
  • बटाटे किसणे व पाण्यात धुवून टिश्यूवर काढणे.
  • तेल गरम करून त्यात मध्यम आचेवर हा कीस गुलाबी रंग येईपर्यंत तळणे.
  • त्यावर मीठ टाकून खायला देणे.

टीप
कुरकुरीत भाजा बनवण्यासाठी एकदम मंद आचेवर भरपूर वेळ तळणे महत्वाचे आहे
तेलातून बाहेर काढल्यावर अजून थोडेसे गडद होते त्यामुळे तेलात कीस काला होऊ देऊ नये
बटाटे किसून लगेच पाण्यात टाकल्यानी ते काळे होत नाही

पालक पनीर


हा अजून एका अजॉयला पालक खाऊ घालण्याचा पालक पुरीशिवाय अजून एक प्रयत्न.

पालक पनीर
साहित्य
२ पालक
२०० ग्राम पनीर
२ टोमाटो
५ चमचा क्रीम
१/४ चमचा कॉर्न फ्लौर
१/२ चमचा लसूण पेस्ट
१/४ चमचा आले पेस्ट
१/४ चमचा जिरे
१/४ चमचा हळद
१ चमचा तिखट
१/२ चमचा जिरे पूड
१/२ चमचा धने पूड
१/४ चमचा कसुरी मेथी
मीठ
तेल

कृती
  • ४-५ वाटी पाणी उकळवून त्यात पालकाची पाने दोन मिनिट बुडवणे.
  • पाणी ओतून पाने बारीक वाटणे.
  • तेल गरम करून त्यात जीऱ्याची फोडणी करणे.
  • त्यात लसूण पेस्ट, आले पेस्ट, हळद व बारीक चिरलेला टोमाटो घालणे.
  • थोडा वेळ परतून त्यात तिखट, धने पूड, जिरे पूड आणि कसुरी मेथी घालणे.
  • मंद आचेवर टोमाटो शिजेपर्यंत परतणे.
  • मिक्सरमध्ये पालकाच्या पेस्ट बरोबर घालुन बारीक वाटणे.
  • कढईत पनीरच्या तुकड्यांबरोबर एकत्र उकळवणे.
  • त्यात क्रीम घालणे.
  • कॉर्न फ्लौर ४ चमचा पाण्याबरोबर एकत्र करून उकळत्या भाजीत घालुन वाढणे.

टीप
क्रीम आणि कॉर्न फ्लौरनी ग्रेव्ही जरा जाड होते. फक्त क्रीम वापरल्यानी ग्रेव्हीतून पालकाची चव जाऊ शकते आणि कॉर्न फ्लौरनी एकदम पाणचट होऊ शकते त्यामुळे मी दोन्ही एकत्र वापरले

बटर चिकन


हॉटेलमधील एक अतिशय आवडती डीश. साधारण महिन्यापूर्वी केलेला पण फोटो काढून पोस्ट करण्याची ताकद उरली नव्हती त्यामुळे आज पुन्हा हि डीश केल्यावर इथे देत आहे

बटर चिकन
साहित्य
३०० ग्राम बोनलेस चिकन
२ टोमाटो
१ कांदा
१.५ चमचा तिखट
२ चमचा धने पूड
१ चमचा कसुरी मेथी
१ चमचा जीरा
१/२ चमचा लसूण पेस्ट
१/२ चमचा आले पेस्ट
चिमुटभर लाल रंग
१/२ चमचा साखर
१/४ चमचा टोमाटो सॉस
१ वाटी क्रीम
४ चमचा लोणी
मीठ
तेल

कृती
  • चिकनचे तुकडे करणे व त्यांना मीठ, तिखट, धने पूड, १/४ चमचा लसूण पेस्ट आणि १/४ चमचा आले पेस्ट लावणे.
  • कढईत तेल गरम करून त्यात चिकनचे तुकडे ४-५ मिनिट परतणे.
  • त्याच तेलात जीऱ्याची फोडणी करणे व त्यात बारीक चिरलेला कांदा, कसुरी मेथी, उरलेली लसूण पेस्ट, आले पेस्ट, तिखट, धने पूड घालणे.
  • त्यात तेल घालुन उकळवणे.
  • त्यात बारीक चिरलेला टोमाटो घालुन ते पूर्ण शिजेपर्यंत उकळवणे व नंतर बारीक वाटणे.
  • कढईत लोणी वितळवणे व त्यात वाटण व मीठ घालणे.
  • त्यात १/२ वाटी पाणी, लाल रंग घालुन उकळवणे.
  • त्यात साखर, सॉस आणि परतलेले चिकनचे तुकडे घालुन उकळवणे.
  • आच मंद करून त्यात क्रीम घालुन अजून ४-५ मिनिट शिजवणे.

टीप
क्रीम घालताना आच धीमी करायला विसरू नये नाही तर मिश्रण व्यवस्थित एकत्र होणार नाही

कोळंबीचा पुलाव


हा एकदम सोप्पा आणि चविष्ठ पुलाव मी शनिवारी भाज्या संपल्यानी हा पुलाव बनवला.

कोळंबीचा पुलाव
साहित्य
२ वाटी कोळंबी
२ वाटी तांदूळ
२ कांदे
२ चमचा काजू
१ चमचा तिखट
१/४ चमचा हळद
१/२ चमचा गरम मसाला
१/४ चमचा धने पूड
१/४ चमचा दालचिनी पूड
१/४ चमचा लवंग पूड
१/२ चमचा लसूण पेस्ट
मीठ
तूप
तेल

कृती
  • कोळंबीला तिखट आणि मीठ लावून अर्धा तास बाजूला ठेवणे.
  • भात शिजवून बाजूला ठेवणे.
  • कढईत तेल गरम करून त्यात कोळंबी परतणे.
  • त्याच तेलात कांदा आणि काजू परतून घेणे.
  • लसूण पेस्ट आणि परतलेली कोळंबी घालुन परतणे.
  • त्यात हळद, गरम मसाला, धने पूड, दालचिनी पूड, लवंग पूड आणि मीठ खालून परतणे. कोळंबी शिजेपर्यंत परतणे.
  • त्यात शिजलेला भात आणि मीठ घालुन एकत्र करणे.
  • वरून तूप सोडून एकत्र करणे व अजून २ मिनिट शिजवणे.

टीप
मी कांदा आणि कोळंबी भाजण्यासाठी चमचाभर तेलाचा वापर आणि वरून २ चमचा तूप सोडले त्यामुळे एकदम चांगली चव आलेली

पनीर पुदिना टिक्का


हा अजून एक सोप्पा आणि चावैस्था पदार्थ मी शुक्रवारच्या जेवणात बनवला.

पनीर पुदिना टिक्का
साहित्य
२०० ग्राम पनीर
१/४ वाटी दही
१/२ वाटी पुदिना
१/४ वाटी कोथिंबीर
१/४ चमचा आले पेस्ट
१/४ चमचा लसूण पेस्ट
४ हिरव्या मिरच्या
लोणी
मीठ

कृती
  • पनीरचे चौकोनी तुकडे करणे.
  • पुदिना, कोथिंबीर, आले, लसूण आणि मिरच्या एकत्र मीठाबरोबर वाटणे.
  • त्यात दही घालणे व ते पनीरच्या तुकड्यांना लावणे. अर्धा तास फ्रीजमध्ये ठेवणे
  • ओव्हन २५०C वर गरम करणे.
  • बेकिंग ट्रेला लोणी लावणे व त्यावर पनीरचे तुकडे पसरणे.
  • पनीर २००C वर ५ मिनिट भाजणे.
  • पनीर उलटे करून अजून ५ मिनिट भाजणे.

टीप
पनीरचे तुकडे रात्रीच्या जेवणात एकदम छान लागत होते पण नाश्त्याला इतके नाही त्यामुळे जर जास्तीचे तुकडे असतील तर ते तसेच फ्रीजमध्ये ठेवून आयत्यावेळी भाजणे.

कॉर्न आप्पे


अजॉय परत आल्यामुळे काहीतरी विशेष बनवण्यासाठी हा आईचा पदार्थ बनवला.

कॉर्न आप्पे
साहित्य
३ वाटी कॉर्न
१.५ वाटी रवा
४ हिरव्या मिरच्या
१/४ चमचा आले पेस्ट
१/२ वाटी कोथिंबीर
१/४ वाटी खाण्याचा सोडा
मीठ
तेल

कृती
  • कॉर्न आणि हिरव्या मिरच्या एकत्र बारीक वाटणे.
  • त्यात रवा, आले पेस्ट, बारीक चिरलेली कोथिंबीर आणि मीठ घालुन ढवळणे.
  • खाण्याचा सोडा आणि थोडे पाणी घालुन पेस्ट बनवणे.
  • आप्पे पात्र गरम करून त्याला तेल लावणे.
  • कॉर्नचे मिश्रण घालुन मध्यम आचेवर दोन्ही बाजूनी गुलाबी रंगावर भाजणे.

टीप
पेस्ट इडलीच्या पिठासारखी असली पाहिजे म्हणजे आप्पे चांगले होतील

खजुराचे लाडू


काल असेच इंटरनेटवर हि पाककृती दिसली आणि घरात असलेल्या सगळ्या साहित्यातून हि डीश बनत असल्यानी लगेच बनवली

खजुराचे लाडू
साहित्य
२ वाटी बियाविना खजूर
१ वाटी काजू
१ वाटी बदाम
१ वाटी सुके खोबरे
१ वाटी खसखस
१ चमचा तूप

कृती
  • कढईट तूप गरम करून त्यात खजूर घालणे.
  • खजूर शिजेपर्यंत परतणे व नंतर थंड करण्यासाठी बाजूला ठेवणे.
  • काजू आणि बदाम वेगवेगळे बारीक वाटणे.
  • शिजवलेले बारीक खजूर बारीक वाटणे
  • खजुराची पेस्ट, बदाम पूड, काजू पूड, सुके खोबरे आणि खसखस एकत्र करणे.
  • लिंबाच्या आकाराचे लाडू वळणे.

टीप
एकदम सोप्पी आणि पटकन बनणारी हि कृती एकदम छान आहे आणि प्रसादासाठी एकदम चांगला आहे

पनीर सॅन्डविच


आज मला थोड्या वेगळ्या लोकांवर प्रयोग करायची संधी मिळाली. वेगळे लोक म्हणजे आई बाबा आणि वेगळी जागा म्हणजे पुण्याचे त्यांचे घर. मी इथे थोडे दिवस राहण्यासाठी आलीये आणि सकाळच्या नाश्त्यासाठी काहीतरी वेगळे आणि लवकर होणारा पदार्थ म्हणून मी हे सॅन्डविच बनवले.

पनीर सॅन्डविच
साहित्य
१२ ब्रेड स्लाईसेस
२ वाटी किसलेले पनीर
४ हिरव्या मिरच्या
मुठभर कोथिंबीर
१ चमचा तिखट
१/२ चमचा जीरा पूड
१/२ चमचा धने पूड
१/४ चमचा आमचूर पूड
मीठ
लोणी

कृती
  • पनीर, बारीक चिरलेल्या हिरव्या मिरच्या, तिखट, बारीक चिरलेली कोथिंबीर, जिरे पूड, धने पूड, आमचूर पूड आणि मीठ एकत्र करणे.
  • ब्रेडच्या एका स्लाईसला एका बाजूनी लोणी लावणे व ती बाजू खाली ठेवून ताटलीत ठेवणे.
  • ब्रेड वर पनीरचे मिश्रण पसरवून त्यावर दुसरा ब्रेड स्लाईस ठेवणे. त्याच्या वरच्या बाजूलासुद्धा लोणी लावणे.
  • सॅन्डविच भाजून गरम गरम वाढणे.

टीप
ब्रेडच्या तुकड्यांना आधीच लोणी लावून घेतले तर भाजायला ठेवताना मिश्रण बाहेर पडत नाही.

Related Posts Plugin for WordPress, Blogger...

  © माझे स्वयंपाक प्रयोग | Template Recipes by Emporium Digital

TOP