लेमन शिफॉन केक

Read English Version

मला आता आठवत पण नाही कि मी हा केक कधी आणि कसा बनवण्याचे थरवले. बहुदा मी जेंव्हा हलका आणि मऊसर केक करण्याचा प्रयोग करताना हा केक बनवला असेल. पण त्यानंतर मी बर्याच वेळा हा केक बनवला आणि प्रत्येक वेळा एकदम हिट होता :) आठवड्यापूर्वी कॉस्कोमधून लेमन क्रीम आणि व्हाईट चॉकलेट वाले बदाम आणले आणि मला ह्या केकची आठवण झाली


साहित्य
१.५ वाटी - १.५ टेबल स्पून मैदा
१.५ टेबल स्पून कॉर्न फ्लौर
१/४ टी स्पून बेकिंग सोडा
१/४ टी स्पून मीठ
१.५ वाटी + १ टेबल स्पून साखर
२ लिंबू
३ अंडी
१/२ वाटी तेल
१/२ टी स्पून व्हॅनिला इसेन्स
१/४ टी स्पून क्रीम ऑफ टारटर

कृती

• ओव्हन ३२५F/१६५C वर गरम करणे
• मैदा, कॉर्न फ्लौर, बेकिंग सोडा, मीठ आणि १.५ वाटी साखर एकत्र करणे
• अंड्याचे पांढरे आणि पिवळे वेगळे करणे
• अंड्याचे पांढरे फोमी होईपर्यंत फेटणे
• त्यात क्रीम ऑफ टारटर घालून सॉफ्ट पिकस येईपर्यंत फेटणे
• त्यात उरलेली १ टेबल स्पून साखर घालून हार्ड पिक्स येईपर्यंत फेटणे व मिश्रण बाजूला ठेवणे
• एका भांड्यात अंड्याचे पिवळे, लिंबाचे साल किसून, १ टेबल स्पून लिंबाचा रस, तेल,व्हॅनिला इसेन्स आणि २/३ वाटी पाणी घालून फेटणे
• त्यात मैदयाचे मिश्रण घालून फेटणे
• १/३ अंड्याचे पांढरे मिश्रण एका वेळी घालून हलक्या हातानी ढवळणे, असे सगळे मिश्रण एकत्र होईपर्यंत करणे
• ८. ५ इंचाचे लोफच्या भांड्याला लोण्याचा हात लावून त्यात मिश्रण घालणे
• ३२५F/१६५C वर ४५ मिनिट केक भजने व नंतर बाहेर काढून थंड होऊ देणे

टीप
मैदा आणि कॉर्न स्टार्च मोजताना पहिल्यांदा १.५ टी स्पून कॉर्न फ्लौर वाटीत घालणे व त्यात नंतर मैदा घालून मोजणे. केक फ्लौर पण ह्याऐवजी वापरता येईल.

केशर मलई पेढा

Read English Version

मागच्या वर्षी आमच्या घराच्या भूमीपुजेला काहीतरी सोप्पे आणि पटकन होणारी मिठाई बनवताना मी हे पेढे बनवलेले. आता इतक्या दिवसांनी नवीन पोस्ट करायला ह्याच्याहून चांगल मला आणखीन काही वाटत नाही.


साहित्य
१२ औंस खवा
१.५ वाटी साखर
२.५ वाटी दुधाची पावडर
१/२ वाटी दुध
चिमुटभर वेलची पूड
चिमुटभर केशर
२ चमचे पिस्ता
तूप

कृती

• खवा किसून त्यात साखर, दुधाची पावडर आणि वेलची पूड ढवळणे.
• दुध आणि केशर एकत्र करून त्यात २० सेकंद मायक्रोवेव्ह करणे.
• जाड कढईत मंद आचेवर तूप आणि खवा मिश्रण घालून ढवळत शिजवणे.
• त्यात एक-दोन मिनिटांनी केशर दुध घालणे.
• मिश्रण ढवळत थोडे जाडसर होईपर्यंत शिजवणे व ५ मिनिट थंड होण्यासाठी बाजूला ठेवणे.
• पिस्ता बारीक चिरणे
• छोटे छोटे गोळे करून तळव्यावर पिस्ता ठेवून दाबणे.

टीप
पेढा मिश्रण कोमट असताना बनवणे नाही तर शेप देणे कठीण होऊशकते
खव्याचे मिश्रण सारखे ढवळणे नाहीतर कढईला लागू शकते.
मी अनोडाईज कढई वापरली

बदाम पिस्ता क्रेझीन बिस्कॉटी

Read English Version

मी हल्लीच इकडल्या लायब्ररीची जादू आणि ताकद बघितली. लायब्ररीत पाय टाकताच मला कळलेले कि मी इथून भरपूर पुस्तके घेणार आहे. त्या आठवड्यात मी ५ पेक्षाही जास्त वेळ घालून वेगवेगळ्या विषयावर ४० पुस्तके घरी आणली :) एका डेझर्टच्या पुस्तकात हि कृती होती आणि पहिल्यांदा मी ती साधारण तशीच्या तशी वापरून हे बिस्कॉटी बनवलेले. पण त्यानंतर मी बनवताना मैदा, लोणी वगैरे बरच काही वेगळ्या प्रमाणात वापरले आणि ते एकदम मस्त कुरकुरीत शलेले. आता कमीत कमी एका आठवड्याचे ४ वाजता खाण्याचा खाऊ तयार आहे :)



साहित्य
३/४ वाटी लोणी
२.२५ वाटी साखर
६.२५ वाटी मैदा
२ चमचे बेकिंग पूड
२ लिंबाची साल किसून
४ अंडी
१ वाटी बदाम
१ वाटी पिस्ता
१ वाटी क्रेझीन
२ चमचे बडीशेप
१ चमचा मीठ

कृती

• ओव्हन ३५०F/१७५C वर गरम करणे.
• एका भांड्यात लोणी आणि साखर एकत्र एकजीव होईपर्यंत फेटणे, साधारण एक मिनिट.
• मैदा, बेकिंग पूड, मीठ आणि लिंबाची किसलेली साल त्यात घालून एकत्र घालून फेटणे.
• त्यात एकावेळी एक अंडे घालत फेटणे
• त्यात बदामाचे, पिस्त्याचे तुकडे, क्रेझीन आणि बडीशेप घालून पुन्हा फेटणे
• ओट्यावर थोडा मैदा शिंपडून मिश्रण टाकणे. नीट मळून त्याचे १२ इंचाचे व साधारण १ इंचापेक्षा थोडेसे जास्त उंचीचे २ लांब गोळे बनवणे.
• बेकिंग तव्यावर बटर पेपर घालून त्यावर हे गोळे ठेवणे
• ओव्हनमध्ये ३५०F/१७५C वर ३० मिनिट भाजणे. नंतर १० मिनिट बाहेर थंड होऊ देणे
• धारधार सुरीने त्याचे १/२ इंच रुंदीचे तुकडे करणे
• बेकिंग तव्यावर चिरलेली बाजू वरती ठेवून तुकडे पसरणे व ओव्हनमध्ये ३५०F/१७५C वर २५ मिनिट भाजणे
• बिस्कॉटी थंड होऊ देणे व त्यानंतर डब्यात भरणे

टीप
मी बदाम, पिस्ते आणि क्रेझीन वापरले पण त्याऐवजी कुठलेही नट्स वापरता येतील. ह्यावेळी मी बडीशेप घालायला विसरलेले पण ह्या आही मी ती घातलेली आणि त्यांनी मस्त चव आणि वास आलेला आणि सगळ्यांना खूप आवडलेले
मी फेटण्यासाठी किचनएडचा स्टँडिंग मिक्सर वापरला पण हातातला मिक्सरपण वापरता येईल

पेर बार

Read English Version

मी काल काहीतरी नवीन आणि १-२ तासात तयार होईल असे काहीतरी बेक करायला शोधत होते.शोध लेमन बार, जे मी एका महिन्यापूर्वी बनवलेले त्याच्या वेगळ्या प्रकारावर संपला. लेमन बारमध्ये मला जरा अंड्याची चव आणि वास जास्त वाटलेला त्यामुळे मी कमी अंडे वापरून काहीतरी बनवण्याचे ठरवले. तेंव्हाच मला चीजकेक आणि बार चे फ्युजन बनवण्याचे सुचले. हा माझा सगळ्यात जास्त साहशी प्रयत्न होता कारण मी तो घरी येणाऱ्या मित्रांसाठी केलेला पण नशिबानी हि दिश जमून गेली.


साहित्य
१ वाटी लोणी
२.२५ वाटी साखर
१.५ अंडे
१.५ वाटी मैदा
२.५ वाटी व्हॅनिला इसेन्स
२.७५ वाटी पीकॅन
१२ आउन्स क्रीम चीज
२ पेर
१/२ चमचा जायफळ पूड

कृती

• ओव्हन ३५०F/१७५C वर गरम करणे.
• हातातला मिक्सर वापरून लोणी चांगले फेटून घेणे.
• त्यात २/३ वाटी साखर घालून आणखीन फेटणे.
• त्यात एक चमचा व्हॅनिला इसेन्स, मैदा चाळून घालणे व फेटणे.
• त्यात पीकॅन तुकडे करून मिसळणे.
• ६ इंचाच्या २ बेकिंगच्या भांड्यांना लोण्याचा हात लावणे व त्यात बनवलेले मिश्रण अर्धे अर्धे वाटून पसरवणे.
• ओव्हनमध्ये ३५०F/१७५C वर २२ मिनिट भाजणे.
• भांडी ओव्हनमधून बाहेर काढून ३० मिनिट थंड होऊ देणे
• एका भांड्यात हातातला मिक्सर वापरून क्रीम चीज फेटणे
• त्यात १.५ वाटी साखर, अंडे आणि उरलेला १.५ चमचा व्हॅनिला इसेन्स घालून एकजीव होईपर्यंत फेटणे
• पेरचा मधला भाग कापून टाकून उरलेल्या भागाचे उभे तुकडे करणे व त्यात १ चमचा साखर घालून बाजूला ठेवणे
• ओव्हन ३७५F/१९०C वर गरम करणे.
• बेकिंगच्या भांड्यात क्रीम चीजचे मिश्रण दोन्ही भांड्यात निम्मे निम्मे पसरवणे
• त्यावर पेरचे तुकडे पसरवणे
• पेरच्या तुकड्यांवर जायफळ आणि उरलेली (साधारण एक चमचा) साखर शिंपडणे
• ओव्हनमध्ये ३७५F/१९०C वर ३५ मिनिट भाजणे.
• ओव्हनमधून बाहेर काढून साधारण ३० मिनिट थंड होऊ देणे. त्यानंतर कमीत कमी १ तास फ्रीजमध्ये थंड करून मग चौकोनी तुकडे करून वाढणे

टीप
१.५ अंडे मोजणे जरा अवघड आहे :) पण मी पहिल्यांदा १ अंडे आणि १ चीजचे पाकीट वापरून मिश्रण बनवण्याचा प्रयत्न करत होते पण ते मिश्रण पुरेसे नाही पडले म्हणून मी अजून एक अंडे फेटले आणि त्याचा निम्मा भाग वापरला. त्यामुळे जर दोन भांड्यांच्याऐवजी एक ८-९ इंचाचे भांडे वापरायचे असेल तर एका अंड्याचे मिश्रण कदाचित पुरेसे असेल. त्यासाठी १ अंडे, १ क्रीम चीजचे पाकीट, १ वाटी साखर आणि १ चमचा व्हॅनिला इसेन्स वापरायचा.
मी पीकॅन वापरले कारण माझ्याकडे ते घरीच होते पण कुठलेही नट्स वापरता येईल
मी थोडे जास्त पिकलेले पर वापरले त्यामुळे ते चांगले मऊ होते आणि त्यामुळे शेवटी तुकडे कापताना निघून येत नाहीत.
ओव्हनमधून शेवटी जेंव्हा डेझर्ट बाहेर काढतो तेंव्हा कदाचित थोडे पाणी वरती दिसेल पण काळजी करू नये, ते थंड झाल्यावर सेट होते

काजू कतली

Read English Version

मी हे बरेच दिवसांपासून बनवण्याचा विचार करत होते. साधारण २ वर्षांपूर्वी दिवाळीला आई बाबा इथे असताना बनवलेले. त्यानंतर मी त्याविषयी विसरूनच गेलेले. २-३ आठवड्यांपूर्वी अजॉयनी काजू कतली बनवायची मागणी केल्यावर मला तर भीती होती कि आधीच मी सगळ विसरूनच गेले असेन पण आईला पाठवलेल्या कच्या नोट्समध्ये माहिती मिळाल्यानंतर ह्यावेळी एकदम छान झालेले. ह्यावेळी फोटो काढायला पण विसरले नाही त्यामुळे हि कृती लिहायला काही कमी नाहिये. माझ्यामते हि सगळ्यात सोपी आणि खूप वाहवा देणारी दमदार कृती आहे.


साहित्य
६ वाटी काजू
१ वाटी दुध पूड
२ वाटी साखर
चिमुटभर वेलची
चांदीचा वर्ख

कृती

• काजू मिक्सरमध्ये बारीक वाटून पूड करणे
• काजू पूड आणि दुध पूड एकत्र करणे
• तवा चांगला गरम करणे व आचेवरून बाजूला काढणे
• काजू पूड आणि दुध पूड तव्यावर घालून कोमट होईपर्यंत चांगले एकत्र करणे व नंतर भांड्यात काढणे
• १.५ वाटी पाणी आणि साखर एकत्र गरम करून २ तारी पाक बनवणे
• वेलची पूड आणि पाक काजू मिश्रणामध्ये घालून चांगले ढवळणे व नंतर माळून गोळा बनवणे
• बेकिंग तवा किंवा ताटलीवर बटरपेपर ठेवून त्यावर हे मिश्रण घालून जोरात थापून पसरवणे
• त्यावर चांदीचा वर्ख लावून २-३ तास थंड होण्यासाठी बाजूला ठेवणे
• काजू कतली कापून खायला देणे

टीप
साखरेचा पाक बरोबर बनवणे आणि चांगले मळणे यशस्वी होण्यासाठी महत्वाचे आहे
मिश्रण पसरवताना चांगले जोरात ठोकून पसरवल्यानी काजू कतली एकदम चांगली सेट होते

चॉकलेट कपकेक

Read English Version

एकादिवशी असच काहीतरी बेकिंग करायचा म्हणून केलेला हा प्रयोग. बरेच दिवसांपासून फ्रीजमध्ये असलेल्या बटर आयसिंगचा एकदम मस्त उपयोग आणि ते केक बरोबर एकदम छान लागले


साहित्य
2 वाटी साखर
२ चमचे व्हॅनिला इसेन्स
१ अंडे
१/२ वाटी तेल
१ वाटी दुध
१.७५ वाटी मैदा
१ वाटी कोको पूड
१ चमचा बेकिंग पूड
१ चमचा बेकिंग सोडा
१/२ चमचा मीठ
२ चमचे इन्स्टण्ट कॉफी

कृती

• ओव्हन 3२५F/१६०C वर गरम करणे
• अंडी, साखर आणि व्हॅनिला इसेन्स एकत्र फेटणे
• त्यात तेल आणि दुध घालून मध्यम वेगात मिश्रण फेटून घेणे
• मैदा, कोको पूड, बेकिंग पूड आणि बेकिंग सोडा २-३ वेळा चाळून घेणे
• चाळलेले पीठ अंडी-तेल-दुधाच्या मिश्रणात घालून २ मिनिट कमी वेगावर फेटणे
• १ वाटी पाणी आणि कॉफी एकत्र करून मायक्रोवेव्हमध्ये १ मिनिट गरम करणे
• कॉफी केकच्या मिश्रणात घालून मध्यम वेगात २ मिनिट फेटणे
• कपकेकच्या भांड्यात १४ लायनर घालून त्यात ३/४ पातळीपर्यंत भरणे
• ओव्हनमध्ये १८ मिनिट भाजणे.
• केक कमीत कमी १ तास थंड होऊ देणे मग केकवर फ्रॉसटिंग आणि फिलिंग घालून केक खायला देणे

टीप
मी फिलिंग नाही वापरले पण चॉकलेट गनाश एकदम चांगले जाइल
मी आधी बनवलेले चॉकलेट बटरक्रीम फ्रॉसटिंगसाठी वापरले

चॉकलेट बटरक्रीम

Read English Version

साधारण ३ वर्षांआधी मी विल्टनचा केक डेकोरेशनचा क्लास केलेला. त्यात बरेच डेकोरेशन आणि आयसिंग बनवायला शिकवलेल. हे चॉकलेट क्रीम मी तीच कृती थोडी बदलून केलय.


साहित्य
२ वाटी डालडा
१.५ वाटी कोको पूड
१ चमचा व्हॅनिला इसेन्स
१ चमचे दुध
४५० ग्राम आयसिंग शुगर
चिमुटभर मीठ

कृती

• डालडा, इसेन्स आणि दुध एकत्र करणे
• आयसिंग शुगर आणि कोको पूड एकत्र चाळून घेणे
• ते डालडात घालून ते सगळे एकजीव होईपर्यंत एकत्र फेटणे
• मीठ घालून अजून २ मिनिट क्रिमी होईपर्यंत फेटणे

टीप
क्रीम साधारण अर्धा वर्ष फ्रीजमध्ये एअर टाईट डब्ब्यात राहू शकते

केशर पिस्ता आईस्क्रीम

Read English Version

बाबांचं एकदम आवडते आईस्क्रीम. मी लहान असताना मला फार काही आवडायचा नाही. तेंव्हा मला अंजीर आईस्क्रीमसाठी फार वेडी होते आणि बहुतेक वेळा तेच खायचे. पण ह्या थोड्या वर्षात मला केशराची फार आवड निर्माण झालीये. त्यानी जो रंग येतो, त्याची चव सगळेच एकदम मस्त. आई बाबा इकडे आलेले तेंव्हा मी हे आईस्क्रीम बनवलेले. तेंव्हा फोटो काढायला नव्हता जमला पण आज पहिल्यांदा फोटो काढला.


साहित्य
१ लिटर दुध
३.५ वाटी क्रीम
१ वाटी पिस्ता
२ वाटी साखर
१/४ चमचा केशर

कृती

• अर्धा लिटर दुध साखर घालुन मिक्सर मध्ये घुसळून घेणे.
• एका भांड्यात एक कप दुध घेवून उकळवणे. त्यात केशर घालुन चांगले पिवळे होईपर्यंत हलवणे.
• उरलेले दुध व केशर घातलेले दुध गोड केलेल्या दुधात घालुन चांगले एकत्र करणे.
• मिक्सरमध्ये पिस्ता पूड करून घेणे व दुधात घालणे.
• दुधात क्रीम घालुन चांगले एकत्र करणे. मिश्रण फ्रीजमध्ये थंड करण्यासाठी एक तास भर ठेवणे.
• मिश्रण आईस्क्रीममेकरमध्ये घालुन सेट करणे.

टीप
दुध उकळवून त्यात केशर घालणे एकदम महत्वाचे आहे नाहीतर केशरची चव आणि रंग येणार नाही.
तसेच मिश्रण आईस्क्रीममेकरमध्ये घालण्या आधी थंड नाही केलेतर सेट होणार नाही

केळ्याचे कोफ्ते

Read English Version

हि कृती माझ्या फूड नेटवर्कवरच्या अनेक कार्यक्रमाच्या बघण्याचा परिणाम म्हणायला हरकत नाही. आज असेच टीव्ही बघत असताना वाटले केळ्यांचे काहीतरी वेगळे बनवावे. कोफ्ते करावेसे वाटले आणि मग मी वास घेत घेत कुठचे मसाले घालायचे ठरवत गेले. मजा आली असा एकदमच हटके प्रयोग करायला.


साहित्य
३ कच्ची केळी
१ वाटी काजू
१/४ चमचा मिरे पूड
१/४ चमचा मिरे
१/२ चमचा बडीशेप
१/४ चमचा खसखस
२ लसूण पाकळ्या
१/२ चमचा आले
१/२ चमचा साखर
१/४ चमचा तिखट
१ दांडी दालचिनी
२ वाटी दुध
१/४ कांदा
मीठ
तेल

कृती

• केळी किसून त्यात बारीक चिरलेली लसूण, किसून आले, मिरे पूड, १/४ चमचा बडीशेप आणि मीठ घालुन मळणे.
• मळलेल्या केळ्याचे छोटे छोटे गोळे करून तेलात सर्वात जोरात आचेवर गडद रंग येईपर्यंत तळून घेणे.
• मिक्सरमध्ये काजू, मिरे, उरलेले १/४ चमचा बडीशेप, दालचिनी घालुन बारीक पूड होईपर्यंत वाटणे.
• त्यात कांदा चिरून घालुन पुन्हा वाटणे.
• एक वाटी दुध घालुन पेस्ट बनवणे.
• चमचाभर तेल कढईत गरम करून त्यात वाटण, १ वाटी पाणी आणि १ वाटी दुध घालुन जाड होईपर्यंत मध्यम आचेवर ढवळत शिजवणे.
• त्यात मीठ, साखर आणि कोफ्ते घालुन २ मिनिट अजून उकळवणे.

टीप
केळी वापराल्यानी कोफ्ते एकदम पटकन चांगले कुरकुरीत होतात आणि ते जास्त तेल पण शोषून घेत नाहीत
मी ह्यात ग्रेव्ही आणि कोफ्ते ह्यांना वेगवेगळी पण तरीसुद्धा एकत्र होणारी चव देण्याचा प्रयत्न केलाय

लिंबू आणि अ‍ॅप्रिकॉटचा केक

Read English Version

मी अजॉयच्या वाढदिवसासाठी पाउंड केक सारखा पण थोडा जास्त रिच असा केक शोधात होते. त्याला प्लेन केक हा प्रकार फार आवडतो त्यामुळे त्याच्यासारखाच पण थोडा भारी :) असा हा केक मी माझ्याकडच्या एका पुस्तकातील कृती बघून आणि थोडा आमच्या चवीनुसार प्रमाण बदलून केला. मला ह्या केक मध्ये लिंबू नाहीतर संत्र वापरायाचच होत, इतके दिवस फूड नेटवर्कवरच्या कार्यक्रमात त्यांच्या सालीचा वापर करताना बघून प्रत्यक्षात कसा लागत हे जरा जाणून घ्यायचं होत त्यामुळे ह्यात मी लिंबाचा वापर केलाय


साहित्य
३ वाटी मैदा
१७५ ग्राम अ‍ॅप्रिकॉट
१ वाटी बदाम
१.२५ वाटी पिस्ता
२/३ वाटी उभे चिरलेले बदाम
२ वाटी साखर
१ + १/३ वाटी लोणी
१.२५ चमचा बेकिंग पूड
३ अंडी
१/३ चमचा मीठ
१ मोठं लिंबू

कृती

• ओव्हन १८०C/३५०F वर गरम करणे.
• एका मोठ्या भांड्यात लोणी आणि १.५ वाटी साखर एकत्र करून घोटणे.
• मैदा आणि बेकिंग पूड एकत्र ३-४ वेळा चाळून घेणे व लोणी-साखरेच्या मिश्रणात घालणे.
• त्यात अंडी, मीठ, लिंबाची साल किसून, १/२ वाटी कोमट पाणी घालुन पुन्हा एकत्र फेटणे.
• त्यात बारीक चिरलेले अ‍ॅप्रिकॉट, १ वाटी बदाम पूड करून आणि १ वाटी पिस्ता बारीक चिरून अलगद एकत्र करणे.
• लोफच्या किंवा केक बनवायच्या कुठल्याही आकाराच्या भांड्याला लोण्याचा हात लावून पार्चमेंट कागद खाली व बाजूना लावणे. त्यात केकचे मिश्रण चमच्यानी घालुन एकसारखे करणे.
• उरलेले पिस्ता आणि चिरलेले बदाम वर घालुन ते अलगद मिश्रणात दाबणे
• केक ७५ मिनिट १८०C/३५०F वर भाजणे. साधारण ५० मिनिट भाजल्यावर त्यावर अल्युमिनियमचा कागद वरून लावणे व उरलेला वेळ भाजणे.
• ओव्हनमधून केक बाहेर काढून १० मिनिट थंड होण्यासाठी बाहेर ठेवणे.
• त्यावेळात मध्यम आचेवर लिंबाचा रस आणि उरलेली साखर एकत्र करून ती विरघळेपर्यंत व त्यानंतर थोडे बुडबुडे येईपर्यंत शिजवणे.
• मिश्रण गरम असताना केकवर ओतणे व केक अलगद बाहेर काढणे व थंड होण्यासाठी ठेवणे.

टीप
केक भाजताना मध्ये अल्युमिनियमचा कागद लावल्यानी वर लावलेले बदाम आणि पिस्ते जास्त भाजून करपत नाहीत.

स्ट्रॉबेरी आईस्क्रीम

Read English Version

मागच्या आठवड्यात मी जॅम बनवण्यासाठी स्ट्रॉबेरी आणलेल्या. पण त्यावर १-२ तास घालवण्यासाठी वेळ न मिळाल्यानी मी शेवटी त्याचे आईस्क्रीम बनवण्याचे ठरवले. प्रथमच बनवून एकदम असे सगळ्यांना खायला द्यायचे असल्यानी थोडी भीती होती पण सगळ्यांना ते आवडले असल्यानी इथे कृती देत आहे.


साहित्य
५ वाटी दुध
३.५ वाटी क्रीम
१.५ किलो स्ट्रॉबेरी
४ वाटी साखर
१/२ लिंबू

कृती

• मिक्सरमध्ये १किलो स्ट्रॉबेरी आणि साखर एकत्र वाटून घेणे व मोठ्या भांड्यात ओतणे.
• त्यात दुध घालुन चांगले एकत्र करणे.
• त्यात लिंबू आणि क्रीम घालुन पुन्हा एकजीव होईपर्यंत ढवळणे.
• आईस्क्रीम मेकर मध्ये मिश्रण जितके मावते तितके एका वेळी घालुन ते सेट होण्यासाठी चालू करणे.
• उरलेली स्ट्रॉबेरी बारीक चिरून आईस्क्रीम सेट होत आल्यावर घालणे व पूर्ण सेट होऊ देणे
• आईस्क्रीम भांड्यात काढून एक-दोन तास अजून घट्ट होऊ देणे.

टीप
मी थोडी स्ट्रॉबेरी खायला देताना आईस्क्रीम वर घालण्यासाठी बाजूला ठेवलेली.

साबुदाण्याच्या पोह्याचा चिवडा

Read English Version

हा चिवडा इतका सोपा आणि हमखास चांगला होणारा प्रकार. मी जेंव्हा लहान होते तेंव्हा मला हा चिवडा फार आवडायचा. एकदम हलका, तिखट गोड असा हा चिवडा आता मला आणखीनच आवडतो तो त्याच्या बनवायच्या सोप्या कृती मुळे. मी आता हा नियमित करत जाणार आहे.


साहित्य
१०० ग्राम साबुदाणा पोहे
१ वाटी शेंगदाणे
२.५ चमचा तिखट
१ चमचा जिरे पूड
१ चमचा साखर
१ चमचा मीठ
तेल

कृती

• मिक्सरमध्ये तिखट, जिरे पूड, साखर, मीठ घालुन बारीक पूड होईपर्यंत वाटून घेणे व मोठ्या भांड्यात घालणे
• कढईत तेल गरम करून त्यात शेंगदाणे गुलाबी रंगावर तळून घेणे. मसाल्यात घालुन हलवून घेणे.
• त्याच तेलात थोडे थोडे पोहे घालुन तळणे. प्रत्येक वेळी तळल्या तळल्या लगेच मसाल्यात घालुन हलवणे.

टीप
पोहे तळून झाल्यावर गरम गरमच मसाल्यात घालणे फार महत्वाचे आहे नाहीतर मसाला त्यांना नीट लागत नाही.

आंबा मुज केक

Read English Version

हार्दिक आणि श्वेनीच्या फेरवेल पार्टीमध्ये एक आंबा मुज केक आणलेला. मला तो फार आवडलेला आणि त्याचा पहिला घास खातच मला तो स्वतः बनवण्याची फार इच्छा झालेली. केके इतका छान होता की बरेच जण त्यासाठी सिअ‍ॅटल सोडून जाव म्हणजे फेरवेल पार्टीमध्ये हा केक खाता येईल असा पण विनोद करायला लागलेले. मी बराच वेळ गप्पा होते तेंव्हा कोणीतरी म्हणाले की शीतलला त्याची गरज नाही कारण ती तर हा केक घरीच बनवेल. मी तेंव्हा काही बोलले नाही कारण माझ्या लक्षात आला की माझ्याकडून जरा जास्तच अपेक्षित केलं जातंय, पण माझा विचार एकदम पक्का झाला की हा केक वीकएंडलाच करून बघायचा. आणलेल्या केकमध्ये आंबा इसेन्स वापरला होता, मी आमरस वापरायचा ठरवला. चव खूपच छान आलीये. आता सगळ्यांना घरी बोलावून एकदा हमी भरून घ्यायला पाहिजे.


साहित्य
१ वाटी मैदा
३ अंडी
२०० ग्राम क्रीम चीज
३ वाटी क्रीम
५ वाटी आमरस
१ चमचा कॉर्न फ्लौर
२ चमचे दुधाची पूड
१/४ चमचा बेकिंग पूड
१.७५ वाटी साखर
४ चमचे जिलेटीन
४ चमचे लिंबाचा रस
२ चमचा तेल
१.२५ चमचा व्हॅनिला ईसेन्स
१/४ चमचे मीठ

कृती

• ३५०F/१७५C वर ओव्हन गरम करणे
• मैदा, कॉर्न फ्लौर ५ वेळा एकत्र चाळून घेणे. त्यात दुधाची पूड, बेकिंग पूड घालुन पुन्हा २ वेळा एकत्र चाळून घेणे.
• मिक्सरमध्ये अंड्याचे पांढरे आणि मीठ चाळून फोम येईपर्यंत फेटून घेणे.
• त्यात १/४ वाटी साखर घालुन घट्ट होईपर्यंत फेटून घेणे.
• दुसऱ्या भांड्यात अंड्याचे पिवळे, १/२ चमचे व्हॅनिला ईसेन्स आणि १/४ वाटी साखर घालुन साखर विरघळेपर्यंत फेटणे.
• त्यात तेल आणि अजून अर्धा चमचा व्हॅनिला ईसेन्स घालुन ३० सेकंद फेटणे.
• अंड्याचे पाढरे त्यात घालुन अलगद एकत्र करून घेणे.
• मैद्याचे मिश्रण १/३ वाटा एकावेळी घालत अलगद एकत्र करणे. जास्त ढवळू नये.
• ९ इन्च स्प्रिंगफॉर्म भांड किंवा कुठलेही ९ इन्च गोलाकार भांडे घेऊन त्याला खाली पार्चमेंट कागद घालुन लोणी लावणे. त्यावर केकचे मिश्रण ओतणे.
• केक ३५०F/१७५C वर ओव्हनमध्ये २० मिनिट भाजून घेणे.
• लगेच थंड होण्यासाठी जाळीच्या रॅकवर उलटवून ठेवणे.
• तेवढ्या वेळात एका भांड्यात १/४ वाटी साखर आणि १/४ वाटी पाणी घालुन ढवळत उकळवणे. अजून २-३ मिनिट उकळू देणे. भांडे खाली घेऊन त्यात १/४ चमचा व्हॅनिला ईसेन्स घालुन ढवळणे. थंड होण्यासाठी बाजूला ठेवणे.
• साखरेचे पाणी थंड होईपर्यंत एका भांड्यात क्रीम चीज, १ वाटी साखर आणि २ चमचे लिंबाचा रस घालुन एकत्र फेटणे.
• मायक्रोवेव्हमध्ये १/४ वाटी पाणी १ मिनिट गरम करणे. त्यात २ चमचे जिलेटीन घालुन पूर्ण विरघळेपर्यंत ढवळणे. क्रीम चीजच्या मिश्रणात घालुन फेटून घेणे.
• दुसऱ्या भांड्यात क्रीम घट्ट होईपर्यंत फेटून घेणे. अलगद पणे क्रीम चीजच्या मिश्रणात ढवळणे.
• त्यात ३ वाटी आंबा रस घालुन एकजीव होईपर्यंत ढवळणे.
• केकला आडवे कापून २ थर बनवणे. खालचा थर ९ इंच स्प्रिंगफॉर्म भाण्यात घालणे. त्यावर अर्धे साखरेचे पाणी ब्रशनी लावणे. आंब्याचे अर्धे मिश्रण त्यावर ओतून सपाट करून घेणे. त्यावर दुसरा केकचा थर ठेवणे. उरलेले अर्धे साखरेचे पाणी ब्रशनी लावून घेणे. उरलेले आंब्याचे मिश्रण ओतून सपाट करणे. फ्रीजमध्ये १ तास थंड करणे.
• केक थंड होऊन ४५ मिनिट झाल्यावर एका भांड्यात उरलेला २ वाटी आमरस, २ चमचे लिंबाचा रस घालुन गरम मध्यम आचेवर गरम करणे. उकळू देऊ नये अथवा चव बिघडेल. मिश्रण बाजूला काढणे.
• मायक्रोवेव्हमध्ये १/४ वाटी पाणी १ मिनिट गरम करणे. त्यात २ चमचा जिलेटीन घालुन विरघळवणे.हे मिश्रण आंब्याच्या गरम मिश्रणात घालुन चांगले ढवळणे. थोडे थंड होण्यासाठी बाजूला ठेवणे व पुन्हा ढवळून घेणे.
• फ्रीजमधून केक बाहेर काढून त्यावर हे मिश्रण एकसारखे ओतून थर देणे.
• केक फ्रीजमध्ये कमीत कमी ८ तास जमवण्यासाठी ठेवणे. भांड्याची रिंग काढून वरून फळे घालुन तुकडे खायला देणे.

टीप
केकचा दुसरा थर थोडा छोटा असावा. माझा केक फुलल्यामुळे कापल्यावर आपोआपच थोडा छोटा झाला. तसा नसेल तर बाजूनी थोडा कापून घेणे म्हणजे मग केक कापल्यावर तो थर बाहेरून दिसणार नाही.
केक जर भांड्यातच थंड झाला तर चिकटून बसेल त्यामुळे लगेच थंड करण्यासाठी जाळीच्या रॅकवर काढणे महत्वाचे आहे.
मी ह्यात देसाई बंधूंचा गोड आमरस वापरलाय त्यामुळे आंब्याचा स्वतः रस काढल्यास त्यात साखर घालायला विसरू नये.
जरी कृती थोडी लांब असली तरी एकदा बनवल्यावर लक्षात येईल की इतकी किचकट नाहीये. आणि शेवटी बनणारा केक फारच सुंदर होईल त्यामुळे कष्ट व्यर्थ नाही जाणार. :)

ब्रेडचे दही वडे

Read English Version

अजॉय जेंव्हा घरी ब्रेड घेऊन आला तेंव्हा मी माझ्या ठरलेल्या नवीन वर्षाच्या नवीन उपक्रमानुसार तो तसाच न खाता काहीतरी नवीन बनवण्याचे ठरवले. हा चविष्ठ वडा करायला एकदम सोपा आहे.


साहित्य
८ ब्रेडचे स्लाईसेस
२.५ वाटी दही
२ हिरव्या मिरच्या
४ लसूण पाकळ्या
३ चमचे साखर
१/४ चमचा मिरे
चिमुटभर तिखट
चिमुटभर चाट मसाला
मुठभर कोथिंबीर
मीठ
तेल

कृती

• ब्रेड पाण्यात भिजवून लगेच हातावर ठेवून दाबून त्यातील पाणी काढून टाकावे.
• परातीत ब्रेड, बारीक चिरलेल्या मिरच्या आणि लसूण, मिरे पूड आणि मीठ घालुन मळून घ्यावे.
• लिंबाच्या आकाराचे गोळे करून ते गरम तेलात भाजून घ्यावे.
• एका भांड्यात दही, साखर, तिखट, चाट मसाला आणि मीठ घालुन ढवळून घ्यावे.
• प्लेटमध्ये वडे घालुन त्यावर दही पसरवावे व वरून बारीक चिरलेली कोथिंबीर घालुन खायला देणे

टीप
सगळे वडे लगेच खायचे नसतील तर ब्रेडचे मळलेले मिश्रण ठेवून खायच्या आधी तळावे नाहीतर तळलेले वडे ठेवल्यास ते रबरी होतात.

अंड्याविना चॉकलेट केक

Read English Version

अतुलच्या आईनी साधारण ६ महिन्यापूर्वी अंडी नसलेला केक बनवायला सांगितलेला. प्रत्येकवेळी काहीतरी कारणांनी ते राहूनच जायचं. आज जेंव्हा आम्ही त्यांच्याघरी नाष्ट्याला जाणार आहोत तेंव्हा मला वाटला हा केक घेऊन जाणे उत्तम ठरेल. केक एकदम मस्त मऊ आणि फुलून आला. मला अस वाटतंय की मला अंडे घातलेल्या ह्या चॉकलेट केकपेक्षा किंवा ह्या वाढदिवसाच्या चॉकलेट केकपेक्षा आजचा हा केक फार आवडला.


साहित्य
४.५ वाटी मैदा
१ वाटी कोको पूड
३ वाटी साखर
१ वाटी तेल
१ चमचा बेकिंग सोडा
२ चमचा व्हॅनिला ईसेन्स
१ चमचा मीठ

कृती

• ओव्हन ३५०F/१५०C वर गरम करणे.
• मैदा आणि कोको पूड एकत्र चाळून एका भांड्यात घेणे.
• त्यात बेकिंग सोडा आणि मीठ घालुन एकत्र करणे.
• दुसऱ्या भांड्यात तेल, ३ वाटी पाणी आणि व्हॅनिला ईसेन्स एकत्र फेटून घेणे.
• त्यात साखर घालुन पुन्हा फेटणे.
• मैदा आणि कोको पूडचे मिश्रण चाळत तेलाच्या मिश्रणात घालणे व फेटून घेणे.
• केक भाजायच्या भांड्याला तेलाचा हात लावून त्यात केकचे मिश्रण ओतणे.
• केक ३५०F/१७५C वर एकूण ५० मिनिट भाजणे, भाजताना ३५ मिनिट झाल्यावर पुढची बाजू मागे जाईल अस फिरवणे.

टीप
मी केकवर चॉकलेट गनाश ओतून पांढऱ्या चॉकलेट क्रीम चीजच्या आईसिंगनी सजवले.
जर गनाशच्या वर आईसिंगनी सजवायचे असेल तर गनाश साधारण ३-४ तास सेट होऊ देणे म्हणजे आईसिंगची सजावट घसरणार नाही. मी वाट न बघता लगेच आईसिंग करायला घेतले त्यामुळे मला फार त्रास झाला.

पांढरे चॉकलेट क्रीम चीजचे आईसिंग

Read English Version

आज काल मला क्रीम चीजची चव आवडायला लागलीये. मी ह्या आधी ते गजराच्या केकवर पण वापरलाय. प्रत्येतवेळी मी इंडिअन मसाले घालुन फुलाच्या चवीचे आईसिंग बनवलंय. पण आज मी चॉकलेटच्या चवीचे आईसिंग रेड वेल्वेट कपकेकसाठी बनवले. केक मधल्या कोको पुड्च्या चवीला साजेसे हे क्रीम मस्त झालेले.


साहित्य
२२५ ग्राम क्रीम चीज
२२५ ग्राम पांढरे चॉकलेट
१ वाटी लोणी
२ वाटी आईसिंग शुगर

कृती

• एका भांड्यात निम्मे पांढरे चॉकलेट घालुन १ मिनिट मायक्रोवेव्ह करणे.
• त्यात उरलेले पांढरे चॉकलेट घालुन चांगले ढवळणे. पुन्हा १५ सेकंद मायक्रोवेव्ह करणे.
• चॉकलेट चांगले एकजीव होऊन वितळेपर्यंत ढवळणे व बाजूला ठेवून देणे.
• दुसऱ्या भांड्यात क्रीम चीज मऊ होईपर्यंत फेटून घेणे.
• त्यात वितळवलेले चॉकलेट घालुन पुन्हा फेटणे.
• लोणी घालुन पुन्हा एकजीव होईपर्यंत फेटणे.
• आईसिंग शुगर टाकून आईसिंग चांगले मऊसुत आणि एकजीव होईपर्यंत फेटणे.

टीप
चॉकलेट घालताना एकदम थंड झालेले असावे, व जर कोमट असेल तर थंड होईपर्यंत थांबावे. गरम चॉकलेट कधीही चीजमध्ये घालू नये.

रेड वेल्वेट कपकेक

Read English Version

आई बाबा इथे होते तेंव्हाच मी हे बनवलेले पण तेंव्हा जरा सुके झालेले आणि रंग पण बरोबर आलं नव्हता. आज बनवताना मी थोडा प्रमाण बदललं आणि आता ते एकदम सुंदर झालेत. मी त्यांना पांढरे चॉकलेट क्रीम चीजचे आईसिंग केलं


साहित्य
२.५ वाटी मैदा
१/४ चमचा कोको पूड
१/४ चमचा बेकिंग सोडा
१/४ चमचा मीठ
१.५ वाटी साखर
१ अंड
१.५ वाटी तेल
२ चमचे दही
१ चमचा पातळ लाल खाण्याचा रंग
१/४ चमचा व्हिनेगर
१/४ चमचा व्हॅनिला ईसेन्स

कृती

• ३५०F/१७५C वर ओव्हन गरम करणे
• मैदा व कोको पूड चाळून भांड्यात घेणे.
• त्यात बेकिंग सोडा, मीठ आणि साखर घालुन एकत्र करणे.
• दुसऱ्या भांड्यात अंड, तेल, लाल रंग, व्हॅनिला ईसेन्स आणि व्हिनेगर घालणे.
• एका वाटीत दही घेऊन त्यात उरलेल्या मापाचे पाणी घालणे. चमच्यानी ढवळून अंड, तेल मिश्रणात घालणे
• मिश्रण कमी वेगावर एकजीव होईपर्यंत फेटून घेणे.
• त्यात मैदा-कोको पूडचे सर्व मिश्रण प्रत्येक वेळी एक वाटी भर घालुन एकजीव होई पर्यंत फेटून घेणे.
• कपकेकच्या भांड्यात कागदी कप घालुन १२ कप मध्ये मिश्रण घालणे.
• केक ३५०F/१७५C वर ओव्हनमध्ये २२ मिनिट भाजणे.

टीप
मी नेहमी साधारणतः ७०% केकचा भाजण्याचा वेळ झाला की त्याला वळवून ठेवते (ह्या केक साठी साधारणतः १५ मिनिट) त्यामुळे केके सगळ्याबाजुनी एकदम मस्त भाजला जातो.

व्हेज मन्चुरिअन

Read English Version

मला इंडिअन चायनीज फार आवडते त्यामुळे आमच्या जेवणात ते बऱ्याच वेळा असते. पण आई बाबा आल्यापासून किचनचा ताबा माझ्याकडे नसल्याने बरेच दिवस चायनीज मेनू झाला नाही. शेवटी शुक्रवारी मी किचनचा ताबा घेऊन स्वतःच जेवण बनवण्याचे ठरवले. व्हेज मन्चुरिअन तसे बऱ्याच वेळा बनवलेय पण फोटो कधीच चांगला आला नसल्यानी आधी कधी पोस्ट नाही करता आले. आज पाककृती देत आहे.


साहित्य
२ वाटी कोबी
२ वाटी गाजर
२ वाटी श्रावणी घेवडा
२ वाटी ढोबळी मिरची
१ हिरवी मिरची
३ चमचे कॉर्न फ्लॉवर
५ चमचे मैदा
१ चमचा लसूण पेस्ट
२ लसूण पाकळ्या
३ देठ कांद्याची पात
१/४ वाटी स्वीट चिली सॉस
१/४ वाटी सोया सॉस
२ चमचे हॉट चिली सॉस
मीठ चवीपुरते
तेल

कृती

• कोबी, गाजर, ढोबळी मिरची, श्रावणी घेवडा आणि हिरवी मिरची बारीक चिरणे व मीठ घालुन बाजूला ठेवणे.
• त्यात लसुणाची पेस्ट, ४ चमचे मैदा आणि २ चमचे कॉर्न फ्लॉवर घालुन मळणे.
• ह्या पीठाचे छोटे छोटे गोळे बनवून, उरलेल्या मैद्यात घोळवून तेलात मध्यम आचेवर भाजणे
• कढईत तेल गरम करून त्यात बारीक चिरलेले लसूण, आणि कांद्याच्या पतीमधील कांदा घालुन गुलाबी रंगावर भाजणे.
• त्यात स्वीट चिली सॉस, हॉट चिली सॉस आणि सोय सॉस घालुन ढवळणे.
• ३ वाटी पाण्यात १ चमचा कॉर्न फ्लॉवर घालुन धवलने व ते मिश्रण वरच्या उकळत्या मिश्रणात घालुन ढवळणे.
• त्यात आधी तळलेले मन्चुरिअनचे गोळे टाकून २-३ मिनिटे उकळी काढणे. काड्याची पात बारीक चिरून घालुन वाढणे.

टीप
मी नेहमी चिरलेल्या भाजीत मीठ घालुन ५ मिनिट बाजूला ठेवते त्यामुळे त्याला सुटलेल्या पाण्यातच पीठ मालत येते व नंतर पीठ सैल होत नाही
स्वीट सॉस आणि हॉट सॉसच्या ऎवजी मी ३ चमचे चिली फ्लेक्स, १/४ वाटी व्हिनेगर आणि २ चमचे साखर पण वापरली आहे.

पचडी

Read English Version

आई इथे आल्यावर ती दररोज नवीन नवीन काहीतरी बनवत असते. परवा तिनी हि मस्त पचडी बनवलेली. ती मला इतकी आवडली की मी लगेच कालच पुन्हा मला दाखवायला सांगितलं. काल आमचा बेत पाणी पुरीचा होता पण मला काही झालं तरी हि पचडी बनवायची होती म्हणून मग, पाणी पुरीच्या चटपटीत हा चविष्ट आणि पौष्टिक पदार्थ खून जेवण संपवायचे ठरले.


साहित्य
२ वाटी कोबी
१ वाटी गाजर
१ टोमेटो
३/४ वाटी कांदा
१ चमचा शेंगदाणा पूड
१ चमचा साखर
१ मिरची
मुठभर कोथिंबीर पाने
१ लिंबू
१/४ चमचा मौव्हरी
चिमुटभर हिंग
तेल
मीठ

कृती

• कोबी बारीक चिरून एका भांड्यात घ्यावा
• त्यात टोमेटो बारीक चिरून घालणे
• कांदा, कोथिंबीर, मिरची बारीक चिरून घालणे.
• गाजर किसून घालणे.
• त्यात शेंगदाणा पूड, साखर, आणि मीठ घालणे.
• लिंबू पिळून, मिश्रण चांगले ढवळणे.
• एका छोट्या कढईत तेल घालुन मौव्हरी आणि हिंग घालुन फोडणी करणे.
• त्याला मिश्रणात घालुन चांगले ढवळणे.

टीप
जर पार्टीत किंव्हा पाहुण्यांना वाढण्यासाठी आधीपासून तयारी करायची असेल तर फक्त भाज्या चिरून ठेवणे. साखर मीठ आणि फोडणी आयत्यावेळी घालणे. जर पूर्ण पचडी आधी केली तर ती इतकी चांगली लागत नाही, त्यामुळे हा उत्तम उपाय आहे.

व्हॅनिला आईस्क्रीम

Read English Version

अजॉयचा आवडता आईस्क्रीमचा फ्लेवर. मागच्या शनिवारी जेवणानंतर मी तो बनवला. इतका उत्कृष्ठ आणि सोपा होता की मी तो अजून पर्यंत एकदाही का नाही बनवला असाच विचार मनात येतो.


साहित्य
१ लिटर दुध
३.५ वाटी क्रीम
२ वाटी साखर
१/४ वाटी व्हॅनिला इसेन्स

कृती

• मिक्सरमध्ये साखर आणि अर्धा लिटर दुध साखर विरघळेपर्यंत फिरवणे.
• एका भांड्यात दुध-साखर मिश्रण, क्रीम आणि व्हॅनिला इसेन्स एकत्र करून फोर्कवापरून फेटणे.
• आईस्क्रीममेकरमध्ये मिश्रण घालुन आईस्क्रीममेकरच्या सूचनेप्रमाणे सेट होण्यासाठी ठेवणे.

टीप
मी आईस्क्रीममध्ये हेवी व्हिपिंग क्रीम वापरले. जर लाईट व्हीप्पिंग क्रीम वापरायचे असेल तर साधारण ४.५ वाटी वापरावे लागेल.