मेथी कॉर्न आप्पे

Read English Version

हि डीश मी आधी पोस्ट केलेल्या कॉर्न आप्पेच्या कृतीवरून प्रेरित होऊन बनवलीये. थोडी वेगळी चव देण्याच्या प्रयत्नात हा प्रकार पण छान झालेला :)


साहित्य
४ वाटी स्वीटकॉर्न
२ वाटी रवा
४ हिरव्या मिरच्या
१ वाटी मेथी
१ वाटी कोथिंबीर
१/२ चमचा लसूण पेस्ट
१/२ चमचा इनो
मीठ
तेल

कृती

• मिक्सरमध्ये कॉर्न आणि हिरव्या मिरच्या एकत्र बारीक वाटून घेणे.
• त्यात मीठ, रवा, लसूण पेस्ट घालुन चांगले ढवळणे.
• त्यात बारीक चिरलेली मेथी आणि कोथिंबीर घालुन मिसळणे.
• मिश्रणात इनो घालुन चांगले ढवळणे.
• आप्पे पात्र गरम करून त्यात तेलाचा थेंब घालुन चमचाभर मिश्रण घालणे.
• आपे गुलाबी होईपर्यंत मध्यम आचेवर भाजणे, परतून दुसरी बाजूपण गुलाबी करणे.

टीप
जर फ्रोझन कॉर्न वापरले तर मायक्रोवेव्हमध्ये २ मिनिट गरम करणे म्हणजे वाटायला एकदम सोप्पे होईल

शेव बटाटा दही पुरीसाठी(SPDP) पुरी

Read English Version

इथे आल्यापासून शेव बटाटा दही पुरीसाठी(SPDP) पुरी कधी मिळाल्याच नाही. पाणी पुरीच्या पुऱ्या वापरणे योग्य नाही वाटले. अजॉयचा आवडता पदार्थ असल्यानी मी पुऱ्या घरी बनवण्याचे ठरवले. थोड्या प्रयोगानंतर ही कृती एकदम चांगल्या पुऱ्या बनवते. आता मित्रमैत्रिणीनी पण त्यावर संमती दिलीये :)


साहित्य
१ वाटी मैदा
२ चमचे रवा
१/४ वाटी लोणी
तेल
मीठ

कृती

• मैदा, रवा आणि मीठ एकत्र करणे.
• त्यात वितळवलेले लोणी घालणे.
• १/४ वाटी पाणी घालुन मऊसर पीठ मळणे.
• १/४ चमचा तेल घालुन पुन्हा मळणे व भिजवण्यासाठी तासभर ठेवून देणे.
• पीठाचे गोळे बनवून पातळ लाटणे. वाटी वापरून किंवा कुकीकटर वापरून छोट्या पुऱ्या कापणे.
• तेल गरम करून मध्यम आचेवर पुऱ्या गुलाबी रंगावर भाजून घेणे. तेल शोषून घेण्यासाठी पुऱ्या टिशूवर काढणे
• ओव्हन ३५०F/१७५C वर गरम करणे व पुऱ्या १० मिनिट भाजून घेणे.

टीप
पुऱ्या जर पातळ लाटल्या तर जास्त फुगत नाही आणि जश्या पाहिजे तश्या कुरकुरीत बनतात.
मी पुऱ्या ओव्हन मध्ये भाजून घेतल्या त्यामुळे जो काही मऊसर पणा उरलेला तो निघून गेला.

कोबीचे पॅटिस

Read English Version

सगळ्यात पहिल्यांदा सगळ्यांना नवीन वर्षाच्या शुभेच्छा. आई बाबांची इथली ट्रीप, नंतर आमची भारताची ट्रीप ह्या सगळ्यामुळे गेल्या बऱ्याच महिन्यांमध्ये मला खूपच कमी वेळा सकाळचा नाश्ता बनवण्याची संधी होती. त्यातच आताचा जेटलॅग त्यामुळे सकाळचा नाश्ता हि प्रयोगाची उत्तम वेळ ठरते. इथे आहे माझी पहिली कृती.


साहित्य
२ वाटी कोबी
२ बटाटे
२ चमचे कॉर्नफ्लोर
१/४ वाटी रवा
१/२ चमचा जीरा
२-३ लसुणाच्या पाकळ्या
मीठ चवीपुरते
तेल

कृती

• बटाटे कुकरमध्ये शिजवून थंड होण्यासाठी ठेवून देणे.
• तव्यावर तेल गरम करून जीऱ्याची फोडणी करणे.
• त्यात बारीक चिरलेले लसूण आणि कोबी घालुन गुलाबी रंगावर भाजणे.
• एका ताटलीत बटाटा किसून त्यात कॉर्नफ्लौर आणि मीठ घालुन मळणे.
• २-३ थेंब तेल शिंपडून पुन्हा मळणे व त्याचे लिंबाच्या आकाराचे गोळे करणे.
• प्रत्येक गोळा दाबून वाटी बनवणे व आधी बनवलेले कोबीचे मिश्रण अर्धा चमचा प्रत्येक वाटीत घालुन गोळे बंद करणे. थोडे दाबून पॅटिस बनवणे
• प्रत्येक पॅटिस रव्यात घोळवून तव्यावर थोडे थोडे तेल घालुन दोन्ही बाजूनी भाजणे.

टीप
मला कोबीचे मिश्रण फार मसालेदार न बनवता त्याला लसूण आणि जीऱ्याची चव द्यायची होती. पण तुम्ही तुमच्याचवीनुसार मसाले घालुन प्रत्येक वेळी वेगवेगळ्या चवीचे पॅटिसपण बनवू शकतात.

सॅन्डविच

Read English Version

हा माझा सगळ्यात आवडता बंगाली गोड पदार्थ. त्यामुळे मी अजॉयसाठी त्याचे आवडते मिष्टी दोही बनवायला घेतले, तेंव्हा बाजूला माझ्यासाठी हे सॅन्डविच बनवायला पण चालू केले. खूप चविष्ट झाला हा प्रयोग


साहित्य
२ लिटर दुध
४ चमचे व्हिनेगर
१ चमचा रवा
२ वाटी खवा
१/२ वाटी आईसिंग शुगर
२.५ वाटी साखर
चांदीचा वर्ख
पिस्त्याची पूड
चिमुटभर बेकिंग पूड
२ चिमुट केशर

कृती

• १/४ वाटी दुध बाजूला ठेवून बाकीचे दुध उकळवणे व त्यात २ चमचे पाण्यामध्ये व्हिनेगर घालुन एकत्र करणे.
• दुधापासून पाणी वेगळे होईपर्यंत एकसारखे ढवळणे
• हे मिश्रण चाळणीत पंचा टाकून त्यावर ओतणे. थंड पाण्याखाली धरणे. नंतर पंच्याला गाठ मारून ५ मिनिट बांधून ठेवणे.
• कुकर मध्ये ६ वाटी पाणी आणि साखर घालुन उकळी आणणे.
• बांधून ठेवलेले पनीर एका ताटात काढून चांगले मळून घेणे.
• त्यात रवा आणि बेकिंग पूड घालुन पुन्हा चांगले मळणे
• ह्या पनीरच्या पिठापासून पातळ चौकोनी तुकडे बनवणे. ह्यातील अर्धे तुकडे उकळत्या साखरेच्या पाण्यात घालणे.
• कुकरचे झाकण बंद करून एक शिट्टी काढणे. त्यानंतर आच मंद करून १० मिनिटे अजून शिजवणे. कुकर थंड होऊ देणे
• शिजलेले पनीर कुकरमधून काढून ठेवणे. कुकरमध्ये अजून २ वाटी पाणी घालुन उरलेले तुकडे त्यात सोडून आधीच्या तुकड्यांसारखे शिजवून थंड करून घेणे.
• आता हे सगळे पनीरचे तुकडे उरलेल्या साखरेच्या पाण्यासकट फ्रीजमध्ये थंड होण्यासाठी रात्रभर ठेवून देणे.
• दुसऱ्यादिवशी सकाळी खवा किसून त्यात आईसिंग शुगर घालुन मळणे.
• उरलेले १/४ वाटी दुध गरम करून त्यात केशर घालणे. हे केशरीदुध खव्यामध्ये घालुन चांगले मळून घेणे.
• फ्रीजमधून शिजवलेले पनीरचे तुकडे बाहेर काढून त्याचे त्रिकोणी तुकडे करणे.
• प्रत्येक २ तुकड्यांमध्ये थोडे थोडे खव्याचे मिश्रण घालुन सॅन्डविच बनवणे. तसेच पिस्त्याची पूड खव्याच्या मिश्रणावर तसेच सॅन्डविचवर पसरवणे
• चांदीचा वरखा लावून थंडगार वाढणे

टीप
मी जाड पनीरचे तुकडे करून चिरण्याऎवजी करतानाच पातळ तुकडे बनवले आणि दोन तुकड्यांमध्ये खवा घालुन सॅन्डविच बनवले.

मालपुआ

Read English Version

प्रत्येक आठवड्याला अजॉय डोक्यात तेल घालुन देण्यासाठी विचारतो. (तो माझ्या डोक्यात तेल घालुन देतो) माझा उत्तर ठरलेलं असत : मी कोणताही पदार्थ बनवून देऊ शकते पण तेल मालिश ते सुद्धा दर आठवड्याला तुझ्या इतक्या छोट्या केसांसाठी फार जास्त कष्ट दायक आहे. एखाद दुसऱ्या महिन्यातून एकदा मी करू शकते. मागच्या शनिवारी जेंव्हा मी हे उत्तर पुन्हा दिले तेंव्हा त्यांनी मालपुआची फर्माईश केली. मी पटकन थोडा फार पाकक्रिया शोधायला चालू केला पण प्रत्येकजण वेगवेगळ सांगत होते. शेवटी हि पाककृती मी स्वतःच बनवली.


साहित्य
१ वाटी मैदा
१/२ वाटी रवा
२.५ वाटी दुध
१ चमचा बडीशेप
१.५ वाटी साखर
चिमुटभर केशर
बदाम आणि पिस्ता वरून घालण्यासाठी

कृती

• मैदा, रवा, बडीशेप आणि दुध एकत्र मिसळून ४ तास भिजवत ठेवणे.
• साखर १.५ वाटी पाण्यात घालुन एकतारी पाक बनवणे.
• त्यात केशर घालुन बाजूला ठेवणे.
• कढई गरम करून त्यात १/४ वाटी आधी बनवलेले रवा-मैद्याचे पीठ गोलाकार ओतणे
• गुलाबी रंगावर दोन्ही बाजूनी भाजून झाल्यावर त्याला साखरेच्या पाकात दोन मिनिट बुडवणे.
• पाकातून बाहेर काढून त्यावर बदाम पिस्ताचे तुकडे पसरवून खायला देणे.

टीप
बऱ्याच व्हिडीओ मध्ये मालपुआ फ्राय करायला सांगितलेला पण पुढच्यावेळी मी शॅलो फ्राय करणार आहे.
तसेच मी १ वाटी साखरेचा पाक बनवला असल्यानी शेवटच्या थोड्या मालपुआना पाक पुरला नाही
मी ह्याच्याआधी हैदराबादमध्ये बडी मा आल्या होत्या तेंव्हा फक्त एकदाच मालपुआ खाल्ले आहेत त्यामुळे त्याची चव नक्की कशी असते ह्याचा फार काही अंदाज मला नाहीये. त्यामुळे पुढच्या वेळी मी मांना विचारून किती फरक आहे ते बघणार आहे.

रवा डोसा

Read English Version

मी पहिल्यांदा कॉलेजच्या समोरच्या दुकानात जेंव्हा रवा डोसा खालेला तेंव्हापासूनच तो माझ्या आवडीच्या पदार्थात सामील झाला. डोश्याचा कुरकुरीतपणा आणि काजूची चव दोन्ही गोष्टी त्याला एकदम मजेदार बनवतात. डिसेंबरमध्ये जेंव्हा आईला हा डोसा बनवताना पहिला तेंव्हाच कललेल की एकदम सोपी कृती आहे. आज रविवारच्या दिवशी ब्रंचसाठी मी त्याला बनवण्याचे ठरवले.


साहित्य
१ वाटी रवा
१ वाटी तांदुळाचे पीठ
१/४ वाटी मैदा
१/२ चमचा जीरा
१/४ चमचा हिंग
बारीक चिरलेले भाजलेले काजू
२ हिरव्या मिरच्या
मीठ
तूप

कृती

• रवा, मैदा, बारीक चिरलेल्या मिरच्या, जीरा, हिंग आणि मीठ एकत्र करणे.
• भरपूर पाणी घालुन डोश्याचे पीठ बनवणे व २० मिनिटासाठी बाजूला ठेवणे.
• अजून थोडे पाणी घालुन पीठ पातळ करणे.
• तवा मध्यम आचेवर ठेवून त्याला तूप लावणे.
• १/२ वाटी डोस्याचे पीठ तव्यावर ओतून पसरवणे व डोश्याची खालची बाजू गुलाबी होईपर्यंत भाजणे.
• २-३ तुपाचे थेंब टाकून डोसा परतणे व दुसरी बाजुपण गुलाबी होईपर्यंत भाजणे.
• डोश्यावर काजू पसरवून दुमडून खायला देणे.

टीप
मी पहिल्यांदा जेव्हा हा डोसा बनवलेला तेंव्हा पीठ भिजवून २० मिनिट वाट न बघता डोसे बनवले त्यामुळे ते जाड आणि मऊ झाले त्यामुळे पीठ भिजवणे फार महत्वाचे आहे.
मी डोश्याचे पीठ एकत्र न ओतता, तव्यावर थोडे थोडे वरन शिंपडत गेले. ज्या जागी पीठ नाठीये तिथे थोडे थोडे शिंपडत पूर्ण तव्यावर पीठ शिंपडले त्यामुळे सुंदर जाळी तयार झाली आणि डोसा पण पातळ झाला.

कॉर्न आप्पे

Read English Version

अजॉय परत आल्यामुळे काहीतरी विशेष बनवण्यासाठी हा आईचा पदार्थ बनवला.


साहित्य
३ वाटी कॉर्न
१.५ वाटी रवा
४ हिरव्या मिरच्या
१/४ चमचा आले पेस्ट
१/२ वाटी कोथिंबीर
१/४ वाटी खाण्याचा सोडा
मीठ
तेल

कृती

• कॉर्न आणि हिरव्या मिरच्या एकत्र बारीक वाटणे.
• त्यात रवा, आले पेस्ट, बारीक चिरलेली कोथिंबीर आणि मीठ घालुन ढवळणे.
• खाण्याचा सोडा आणि थोडे पाणी घालुन पेस्ट बनवणे.
• आप्पे पात्र गरम करून त्याला तेल लावणे.
• कॉर्नचे मिश्रण घालुन मध्यम आचेवर दोन्ही बाजूनी गुलाबी रंगावर भाजणे.

टीप
पेस्ट इडलीच्या पिठासारखी असली पाहिजे म्हणजे आप्पे चांगले होतील

अननसाचा शिरा

Read English Version

हा पदार्थ मी पहिल्यांदा बँगलोरमध्ये खालेला. तिथे हा एकदम सगळीकडे मिळतो. पण मी तेंव्हा फार जास्त वेळा खाल्ला नाही कारण तो अतिशय गोड असायचा आणि अननसाची चव फार काही यायची नाही. ह्यावेळी मी घरी बनवताना त्या गोष्टी ठीक करून बनवला आणि तो एकदम मस्त झालेला


साहित्य
१.५ वाटी अननस
१ वाटी रवा
८ चमचे साखर
२ चमचे तूप
२ चमचे काजू
२ चमचे मनुका
२ चिमुट केशर
२ चमचे दुध

कृती

• दुध गरम करून त्यात केशर घालणे व बाजूला ठेवणे.
• ४ वाटी पाणी भांड्यात गरम करून त्यात अननस कापून घालणे. मध्यम आचेवर पूर्णपणे शिजवणे.
• अननस शिजत असताना कढईत तूप गरम करून त्यात काजू भाजणे व बाजूला ठेवणे.
• त्याच तुपात रवा घालुन सारखा परतत गुलाबी होईपर्यंत भाजणे.
• अननस शिजला की फक्त अननसाच्या फोडी रव्यात घालुन पुन्हा परतणे.
• अननसाच्या उरलेल्या पाण्यात २ चमचा साखर घालुन उकळवणे.
• त्यात रवा आणि अननसाचे मिश्रण घालुन सारखे ढवळत शिजवणे.
• शिरा सुकायला लागला की त्यात साखर, केशर दुध, मनुका आणि काजू घालणे व पूर्णपणे शिजवणे

टीप
रवा आणि काजू एकदम मंद आचेवर भाजायचे म्हणजे ते करपणार नाहीत
साखर तुमच्या चवीप्रमाणे वापरता येईल मला हे प्रमाण एकदम छान वाटले

गुलाबजाम

Read English Version

आधी मी गिट्सची पाकिटे वापरून गुलाबजाम बनवायचे पण सगळ्यात त्रास व्हायचा तो पाक बरोबर बनवण्याचा. आज मी खव्याचे गुलाबजाम बनवायचे ठरवल्यावर थोडी शोधाशोध करून काय चुकत होते ते समजून घेतले.


साहित्य
१/४ किलो खवा
१ वाटी रवा
१/२ वाटी दुध
२ चिमुटभर वेलची पूड
चिमुटभर खाण्याचा सोडा
२ वाटी साखर
३ वाटी पाणी
तेल/तूप

कृती

• रवा आणि दुध एकत्र करून चपातीसाठी भिजवतो तसे पीठ भिजवणे व २ तास भिजण्यासाठी बाजूला ठेवणे.
• त्यात खवा मिसळणे व चांगले मळणे व मिश्रण पुरण यंत्रातून फिरवणे.
• त्यात चिमुटभर वेलची पूड घालुन मळणे व छोटे छोटे गोळे बनवणे.
• कढईत साखर, पाणी एकत्र करून मध्यम आचेवर उकळवणे.
• पाक उकळल्यावर त्यात चिमुटभर वेलची पूड घालुन अजून एक मिनिट उकळवणे व बाजूला ठेवणे.
• कढईत तेल किंवा तूप गरम करून त्यात ४-५ गुलाब जाम एकावेळी मंद आचेवर तळणे.
• गुलाबी झाले की ते बाजूला ठेवणे व नंतरचे ४-५ गुलाब जाम तळणे. ते गुलाबी होत आले की आधीचे गुलाबजाम पाकात घालणे.
• सगळे गुलाबजाम पाकात घाताळूयावर मिश्रण मंद आचेवर अजून एकदा उकळवणे व ५-६ तास बाजूला ठेवणे.

टीप
गुलाबजाम तेलात टाकल्यावर ते एका मिनिटात तरंगायला पाहिजे नाहीतर मिश्रणात चुइमुभर सोडा घालुन पुन्हा मळणे
पाकात गुलाबजाम घातल्यावर ते तरंगायला पाहिजेत नाहीतर ते व्यवस्थित तळले गेले नाहीयेत

कॉर्न चाट

Read English Version

हा पदार्थ मी थोड्या वेगवेगळ्या कृती एका पुस्तकात वाचून बनवला


साहित्य
१/४ वाटी मैदा
१/४ वाटी रवा
१/२ चमचा दही
चिमुटभर बेकिंग पूड
२ वाटी कॉर्न
२ टोमाटो
२ कांदे
१ लिंबू
१ चमचा आले लसूण पेस्ट
चिमुटभर गरम मसाला
कोथिंबीर
शेव
मीठ
तेल

कृती

• रवा, मैदा, बेकिंग पूड आणि मीठ एकत्र करणे.
• दही आणि चमचाभर तेल कोमट करणे.
• ते मिश्रण रव्यात घालुन त्याचे पीठ भिजवणे.
• बारीक व पातळ पुऱ्या लाटून तेलात तळणे.
• तेल गरम करून त्यात १/२ टोमाटो किसून, १/२ कांदा किसून घालणे व शिजवणे.
• त्यात आले लसूण पेस्ट, गरम मसाला, तिखट आणि मीठ घालुन ढवळणे.
• त्यात कॉर्न घालुन शिजवणे.
• कांदा आणि टोमाटो बारीक चिरणे.
• मध्यम आकाराच्या ताटलीत पुऱ्या पसरवणे, त्यावर कॉर्नचे मिश्रण, बारीक चिरलेला कांदा, टोमाटो पसरवणे.
• लिंबू पिळणे व त्यावर कोथिंबीर व शेव पसरवून वाढणे.

टीप
ह्यात १/२ चमचा कच्ची कैरी किसून घालता येईल आणि जर घालत असल्यास लिंबाचा रस थोडा कमी वापरणे.
थोडा चाट मसाला पण घालता येईल
रवा-मैद्याचे पीठ भिजवल्यावर मिश्रण मिक्सरमध्ये फिरवता येईल त्यामुळे व गरम दह्यामुळे पुऱ्या एकदम कुरकुरीत बनतील

पाटीशाप्ता

Read English Version

मा हे खूपवेळा बनवतात. मी नेहमी हे बनवण्याचा विचार करते पण आज बनवण्याचा मुहूर्त लागला


साहित्य
१ वाटी खोबरे
१/२ वाटी गुळ
१ वाटी रवा
१/२ वाटी + थोडासा मैदा
१ चमचा इडली रवा
१ चमचा साखर
दुध
तेल

कृती

• किसलेले खोबरे आणि गुळ कढईत शिजवून बाजूला ठेवणे.
• एका भांड्यात रवा, इडली रवा, मैदा, साखर आणि दुध एकत्र करून पातळ पीठ भिजवणे.
• तवा गरम करून त्यावर एखाद थेंब तेल सोडणे.
• भिजवलेल्या पीठाचे छोटे घावन काढणे व जेव्हा दोन्ही बाजूनी शिजेल तेंव्हा त्यावर गुळाचे मिश्रण ठेवून गुंडाळणे

टीप
मी पीठ भिजवून ५-१० मिनिट बाजूला ठेवले त्यामुळे रवा पूर्ण भिजतो आणि पीठ जाड होते. १/२ चमचा पाणी मी दर २-३ घावानानंतर घालुन पीठ बरोबर करत होते

फ्लॉवरचे लॉलीपॉप

Read English Version

अजॉय फ्लॉवर फार वेळा आणतो त्यामुळे त्याचे काहीतरी नवनवीन करण्याचा मी नेहमी प्रयत्न करत असते. थोड्या दिवसांपूर्वी मी चिकन लॉलीपॉपची कृती वाचत होते आणि मग मी तसेच फ्लॉवरचे बनवायचे ठरवले.


साहित्य
१ छोटा फ्लॉवर
२ चमचे बेसन
१ चमचा कॉर्न फ्लौर
१ चमचा तांदुळाचे पीठ
१ चमचा रवा
१/२ चमचा हळद
१/२ चमचा तिखट
१/२ चमचा जिरे पूड
१/२ चमचा धने पूड
१/२ चमचा गरम मसाला
मीठ
तेल

कृती

• फ्लॉवरचे मध्यम आकाराचे तुकडे करणे.
• बेसन, कॉर्न फ्लौर, तांदुळाचे पीठ, रवा, हळद, तिखट, जिरे पूड, धने पूड, गरम मसाला एकत्र करणे.
• त्यात मीठ आणि पाणी घालुन जाड पीठ भिजवणे.
• कढईत तेल गरम करून त्यातील चमचाभर तेल पिठात घालणे.
• फ्लॉवरचे तुकडे पिठात भिजवून गुलाबी रंगावर तळणे व देठाला अल्युमिनियम फॉइल लावून खायला देणे.

टीप
मी पिठात थोडासा लाल रंग घातला कारण तिखटानी पुरेसा लाल रंग येत नाही

माश्याचे रवा फ्राय

Read English Version

हा गोवा आणि कर्नाटकातील एकदम प्रसिद्ध प्रकार. खायला चविष्ठ करायला सोप्पा असा हा सगळ्यांनाच आवडेल.


साहित्य
४-५ माश्याचे तुकडे
२ चमचा तिखट
१ चमचा हळद
२ चमचे रवा
मीठ
तेल

कृती

• माश्याला मीठ लावून ५-१० मिनिट ठेवणे.
• त्यांना तिखट आणि हळद लावून अजून ५-१० मिनिट ठेवणे.
• तव्यावर थोडेसे तेल घालुन तवा गरम करणे.
• मासा रव्यात घोळवून तव्यावर मध्यम आचेवर दोन्ही बाजूनी लालसर होईपर्यंत भाजणे

टीप
हा प्रकार कुठल्याही माश्याचा बनवता येईल अगदी कोळंबीचा सुद्धा. चव माश्यापारमाणे बदलते

आंब्याचा शिरा

Read English Version

आज गोव्यावरून आल्यावर मला काहीतरी सोप्पे आणि चविष्ठ बनवायचे मनात होते. बऱ्याच वेळा हॉटेलचे खाणे खाऊन कंटाळा आल्यावर काहीतरी साधे खायचे मनात असल्यानी मी हि डीश बनवली


साहित्य
१ वाटी रवा
१.५ वाटी आंब्याचा रस
१ वाटी दुध
१.५ वाटी पाणी
१/२ वाटी साखर
४-५ बदाम
चिमुटभर केशर
तूप

कृती

• कढईत तूप गरम करून त्यात रवा मंद आचेवर गुलाबी होईपर्यंत भाजणे.
• दुसऱ्या भांड्यात पाणी आणि दुध एकत्र करून उकळवणे व रव्यात घालणे.
• रवा शिजून जाड झाल्यावर त्यात साखर आणि आंबा रस घालणे व अजून थोडा वेळ शिजवणे.
• वरून केशर आणि बदाम घालुन खायला देणे.

टीप
मी फक्त अर्धा वाटी साखर वापरली कारण आंब्याचा रसात सुद्धा साखर होती
मी आजकाल आंब्याच्या छोट्या तुकाद्यासकट मिळणारा रस वापरला त्यामुळे अजून छान चव आली

कचोरी

Read English Version

बरेच दिवसांनी मी काहीतरी वेगळे बनवण्याचे ठरवले. माझ्याकडच्या पुस्तकात वाचून मी तयार केलं आणि बऱ्यापैकी चांगला झालेला.


साहित्य
१ वाटी मुग डाळ
२ वाटी मैदा
२ चमचा रवा
२ चमचे तिखट
१ चमचा आमचूर पूड
१ चमचा गरम मसाला
१ चमचा बडीशेप
१ चमचा म्हवरी
१ चमचा जिरे
मीठ
साखर
तेल

कृती

• मुग डाळ रात्रभर पाण्यात भिजवून ठेवणे.
• सकाळी मुग डाळ पाण्याविना मिक्सर मध्ये जाडसर वाटून घेणे.
• कढईत ४-५ चमचे तेल गरम करून त्यात म्हवरी आणि जीऱ्याची फोडणी करणे.
• त्यात मुग डाळ घालुन ताट ठेवून शिजवणे.
• मिश्रण सुकले की त्यात तिखट, मसाला, आमचूर पूड, बडीशेप, साखर आणि मीठ घालुन ढवळणे.
• मिश्रण पूर्णपणे सुकेपर्यंत शिजवणे.
• परातीत मैदा, रवा आणि मीठ एकत्र करून त्यात अर्धा वाटी गरम तेल घालणे.
• त्यात थोये पाणी घालुन मऊसर पीठ मळणे.
• लिंबाच्या आकाराचे गोळे करून त्याच्या वाट्या बनवणे
• त्यात चमचाभर डाळीचे मिश्रण घालुन वाटी बंद करणे. हलक्या हातानी दाबून कचोरीचा आकार देणे.
• तेलात मध्यम आचेवर तळून घेणे.

टीप
मुग डाळ मिश्रण बारीक वाटू नये व त्यात वाटणा पाणी नसावे म्हणजे कचोरी चांगल्या होतात.

बीट आणि गाजराचे कटलेट

Read English Version

घरात असलेले भरपूर गाजर आणि बीट संपवायचे होते आणि काहीतरी चमचमीत खाण्याची हुक्की आल्यानी मी हे कटलेट बनवले.


साहित्य
२ बीट
६ गाजर
२ ब्रेडचे तुकडे
१ कांदा
१ चमचा तिखट
१ चमचा गरम मसाला
१/२ चमचा जिरे पूड
१/२ चमचा धने पूड
१ चमचा आलं लसूण पेस्ट
ब्रेडक्रम्स किंवा बारीक रवा
तेल
मीठ

कृती

• गाजर आणि बीट किसून घेणे.
• कढईत तेल गरम करून त्यात बारीक चिरलेला कांदा घालणे.
• कांदा शिजल्यावर त्यात आलं लसूण पेस्ट, धने पूड, जिरे पूड, गरम मसाला, तिखट घालुन ढवळणे.
• त्यात किसलेले गाजर आणि बीट घालुन मिश्रण शिजवणे.
• त्यात मीठ व ब्रेडच्या तुकड्यांचा चुरा करून घालुन ढवळणे व थंड होण्यासाठी ठेवणे.
• मिश्रणाचे लांबट गोळे करून रवा किंवा ब्रेडक्रम्स मध्ये घोळवून तव्यावर थोडेसे तेल घालुन भाजणे.

टीप
कटलेटमध्ये बटाटे किंवा घेवडा पण घालता येईल

वांग्याचे काप

Read English Version

आज काल हैदराबादमध्ये मोठी वांगी मिळणे फार मुश्कील झाले आहे. मी जेंव्हा मी पुण्याला गेलेले तेंव्हा तिथून दोन घेऊन आले. मी बंगाली पद्धतीची काप आधीच इथे दिली आहेत आता सरस्वत पद्धतीची हि पाककृती देत आहे. ह्यामध्ये फरक असा आहे की बंगाली काप एकदम मऊ असते पण हे काप बाहेरून कुरकुरीत आणि आतमध्ये मऊ असते. सगळ्या कापांमध्ये मला वांग्याची काप सगळ्यात जास्त आवडतात.


साहित्य
१ मोठे वांग
तिखट
हळद
मीठ
रवा
तेल

कृती

• वांग्याचे मध्यम आकाराचे चकती करणे.
• कापांना मीठ लावून ५-१० मिनिट बाजूला ठेवणे.
• त्याला हळद आणि तिखट लावणे.
• तव्यावर तेल घालुन गरम करणे.
• एका ताटलीत रवा घेणे. प्रत्येक काप रव्यात घोळवणे.
• तव्यावर काप कमी आचेवर गुलाबी रंगावर भाजून घेणे.

टीप
नेहमी काप एकदम मंद आचेवर भाजावी म्हणजे वांगी चांगली शिजतील आणि बाहेरून कुरकुरीत होईल
बारीक रवा वापरल्यास जास्त चांगला लागतात.
अश्या पद्धतीनी बटाटा, कच्ची केळी यांचीपण काप बनवता येतील

कॉर्न पॅटिस

Read English Version

हि माझ्या आईची पाककृती.. एकदम छान होते आणि करायलापण एकदम सोपी. आई कशी करायची ते मला आता आठवत नाही. तिला ते बनवताना बघून बरेच दिवस झाले, त्यामुळे आता फक्त वर वरूनच लक्षात आहे ती जे काही करायची. त्यामुळे आई करते तशी नसली तरी आज एकदम मस्त झाल्यामुळे मी इथे पोस्ट करतीये.


साहित्य
२ बटाटे
१ वाटी कॉर्न
१ चमचा जीरा पूड
१ चमचा तिखट
१/२ चमचा धने पूड
१/२ चमचा लसूण पेस्ट
१-२ चमचे कॉर्न फ्लौर
मीठ
रवा
तेल

कृती

• बटाटे व कॉर्न कुकरमध्ये उकडून घ्यावेत.
• बटाटे कुस्करून त्यामध्ये तिखट, जीरा पूड, धने पूड, लसूण पेस्ट आणि मीठ घालुन चांगले मळावे.
• त्यामाच्ये उकडलेले कॉर्न घालुन अलगद एकत्र करणे
• कॉर्न फ्लौर घालुन मिश्रण चांगले घट्ट करावे.
• लिंबूच्या आकाराचे गोळे बनवून त्यांना चपटे करावे.
• तवा गरम करून त्यावर थोडे तेल घालावे
• बनवलेले पॅटिस रव्यामध्ये घोळवून तव्यावर टाकावेत.
• दोन्हीबाजूनी गुलाबी रंग येईपर्यंत मध्यम आचेवर भाजावेत

टीप
कॉर्न फ्लौरमुळे पॅटिसाचे मिश्रण दाट होते, तसे नसल्यास ते भाजताना तेलात विरघळू शकतात. साधारण १-२ चमचे कॉर्न फ्लौर पुरे पडते पण जर मिश्रण तरीसुद्धा पातळ वाटल तर अजून थोडा कॉर्न फ्लौर घालण्यासाठी संकोच करू नये
कॉर्नच्या ऎवजी मटार घालुन मटार पॅटिस पण असेच बनवता येतील