कलाकंद


आज सकाळी काहीतरी गोड बनवण्याचा विचार करताना मेहुलनी त्याच्या कार पूजेच्यावेळी दिलेला कलाकंद आठवला. थोडा फार शोधल्यावर लक्षात आला की करायला एकदम सोप्पा आहे. पण जेंव्हा बनवला तेंव्हा लक्षात आला की सोप्पा असला तरी खूप किचकट आणि वेळ लागणार काम आहे.

कलाकंद
साहित्य
२ लिटर दुध
१ वाटी साखर
३ चमचे व्हिनेगर
१ चमचा पिस्ता
१ थेंब केवडा इसेन्स
चांदीचा वर्ख

कृती
  • निम्मे दुध उकळून घेणे
  • ३ चमचे पाणी आणि व्हिनेगर एकत्र करून उकळत्या दुधात घालणे.
  • दुधातून पनीरवेगळे झाले की लगेच गाळून घेवून थंड पाण्याखाली धुवून घेणे.
  • पंचात पनीर घालुन पाणी जाऊ देण्यासाठी टांगून ठेवणे.
  • उरलेले दुध उकळून घेणे व त्यात बनवलेले पनीर घालुन मिश्रण आटेपर्यंत मध्यम आचेवर शिजवणे.
  • त्यात साखर आणि केवड्याचा इसेन्स घालुन पुन्हा मुश्रन घट्ट होईपर्यंत शिजवणे.
  • ताटलीत मिश्रण टाकून पसरवणे व त्यावर चांदीचा वर्ख आणि पिस्ते लावणे.
  • थंड झाल्यावर कापून तुकडे करणे व खायला देणे.

टीप
मी मिश्रण नॉनस्टिक भांड्यात उकळायला ठेवलेले पण त्यात ते चांगले होत नसल्यानी अ‍ॅलुमिनियम भांड्यात केले. अ‍ॅलुमिनियम भांडेच मला गोड पकवान बनवायला बरे वाटते.
दुध उकळवताना सारखे ढवळणे महत्वाचे आहे नाहीतर भांड्याला दुध लागून त्यात करपट वास जातो.
५ नोव्हेंबर: मी आज २ लिटरऎवजी २ गॅलन दुधाची मिठाई बनवण्याचे ठरवले पण पनीर घातल्यावर दुध आटवण्यासाठी खूप जास्त वेळ लागला. त्यामुळे जर खूप सारे मिठाई बनवण्याचा बेत असेल तर तसा अंदाज आधी पासूनच बांधावा. साधारणपणे २ लिटर दुधाच्या १६ बर्फ्या होतात

बेरी नटी चॉकोचीप केक


ह्या आठवड्याच्या सामानाबरोबर क्रॅन्बेरी आणली कारण मला त्याचा ज्यूस आवडतो. एक घास खाल्यावारच लक्षात आले की ह्या बेरी अशाच खाण अशक्य आहे. मग मी बराच वेळ बघत होते काय करता येईल ते पण काहीच पसंत पडत नव्हते. शेवटी मी माझ्या मनानीच काहीतरी बनवण्याचे ठरवले.

बेरी नटी चॉकोचीप केक
साहित्य
२ वाटी मैदा
१ वाटी साखर
१ वाटी क्रॅन्बेरी
१ वाटी चॉकोचिप्स
१ वाटी सुकामेवा
१ वाटी द्राक्ष
१/२ वाटी लोणी
१.५ चमचा बेकिंग पूड
१/२ चमचा बेकिंग सोडा
१ अंडे
४ चमचा चॉकोलेट सॉस
मीठ

कृती
  • सुकामेवा, क्रॅन्बेरी बारीक कापणे आणि चॉकोचिप्स बरोबर एकत्र करणे.
  • मैदा, बेकिंग पूड, बेकिंग सोडा आणि मीठ एकत्र चाळून घेणे.
  • ओव्हन ३५०F/१८०C वर गरम करणे.
  • केकच्या भांड्याला लोण्याचा हात लावणे.
  • मोठ्या भांड्यात चाळलेले मिश्रण आणि साखर एकत्र करणे.
  • त्यात वितळवलेले लोणी घालुन हातानी एकत्र करणे.
  • द्राक्षांचा मिक्सर मध्ये रस काढून मिश्रणात घालणे.
  • त्यात अंडे आणि सुकामेवा-चॉकोचिप्स चे मिश्रण घालणे व फेटणे.
  • केकचे मिश्रण लोणी लावलेल्या भांड्यात ओतणे व ओव्हनमध्ये ३५०F/१८०C वर ४५ मिनिट भाजणे.
  • केक थंड झाल्यावर त्यावर चॉकोलेट सॉस घालुन खायला देणे.

टीप
मिश्रण पातळ नसले तरी घाबरू नये ह्या केकचे मिश्रण असेच असते.
माझ्याकडे सुकामेव्याचे मिश्रण होते म्हणून मी ते वापरले पण कुठलेही ड्रायफ्रुट्स एकत्र करून वापरता येईल.

जाड पोह्याचा चिवडा


चिवडा हा सगळ्यांची कमजोरी आहे :) ह्या प्रकारचा चिवडा आमच्या घरी फार वेळा करतात, पातळ पोह्यापेक्षासुद्धा जास्त.

जाड पोह्याचा चिवडा
साहित्य
२ वाटी जाड पोहे
२.५ चमचा तिखट
१/४ चमचा तीळ
१/४ चमचा जीरा
१/२ वाटी शेंगदाणे
१/४ वाटी फुटाणे डाळ
१.५ चमचा साखर
७-८ कडीपत्ता पाने
४ चमचे काजू
४ चमचे मनुका
१/४ चमचा म्हवरी
चिमुटभर हिंग
मीठ
तेल

कृती
  • जीरा आणि तीळ एकत्र कमी आचेवर तेलाविना साधारण ३-४ मिनिट भाजून घेणे.
  • मिक्सरमध्ये जीरा, तीळ आणि साखर एकत्र पूड करणे.
  • एका मोठ्या भांड्यात ती पूड, २ चमचा तिखट, काजू, मनुका आणि मीठ एकत्र करणे.
  • कढईत मध्यम आचेवर तेल गरम करणे.
  • पोहे एकावेळी थोडे थोडे करून तळून घेणे.
  • तेलातून काढल्या काढल्या लगेच टिशू वर तेल शोषून घेण्यासाठी ठेवावे. २-३ भाग टिशूवर आले की त्यांना मसाल्याच्या मिश्रणात घालुन ढवळणे.
  • सगळे पोहे तळून झाल्यावर एक दोन चमचा तेल गरम करावे व त्यात शेंगदाणे तळून घेणे.
  • त्याच तेलात म्हवारीची फोडणी करणे व त्यात हिंग, कडीपत्ता आणि फुटाणे डाळ घालुन २ मिनिट तळून घेणे.
  • त्यात शेंगदाणे आणि उरलेले १/२ चमचा तिखट घालुन चिवड्यात घालणे व ढवळणे.

टीप
कढईत थोडे थोडे तेल घालूनच पोहे तळावे कारण तेल काळे पडते त्यामुळे जास्त तेल वाया नाही जात
तेलात गाळणी ठेवून त्यात पोहे घातल्यानी ते बाहेर काढायला सोप्पे जाते
मी पोह्याचे तेल शोषून घेण्यासाठी त्यांना टिशूवर काढले पण पोहे गरम असतानाच मसाल्यात घालावे नाहीतर मसाला त्यांना नीट चिकटत नाही.

चकली


ह्या दिवाळीला मी थोडा फराळ करण्याचे ठरवले. त्याची तयारी आईकाढून त्याच्या कृती घेण्यापासून झाली. जेंव्हा मी चकलीची कृती पहिली, मला विश्वास नव्हता की ती बनवणे इतके सोप्पे आहे.

चकली
साहित्य
२ वाटी तांदुळाचे पीठ
१ चमचा मैदा
१/२ चमचा तिखट
१/४ चमचा तील
१/४ चमचा ओवा
१/४ वाटी लोणी
तेल
मीठ

कृती
  • तांदुळाचे पीठ, मैदा, तीळ, ओवा, तिखट आणि मीठ एकत्र करणे.
  • त्यात लोणी घालुन चांगले मळणे.
  • पाणी घालुन मऊ पीठ भिजवणे.
  • त्यातला अर्धा भाग चकलीच्या पत्रात घालणे.
  • तेल उंच आचेवर गरम करणे व लगेच आच मध्यम करून त्यात चकली बनवून तळणे.
  • दोन्ही बाजूनी गुलाबी झाल्यावर चकली तेलातून काढणे. उरलेल्या चकल्या तळताना तेल चांगले गरम असल्याची खात्री करणे.
  • चकल्या थंड झाल्यावर एअर टाईट डब्यात ठेवणे.

टीप
जर घरचे लोणी वापरायचे असेल तर थंड पाण्यानी ते धुवून घ्यावे.
चकली गुलाबी असतानाच बाहेर काढावी कारण नाहीतर ती करपेल.

तंदुरी चिकन


सगळ्यात आवडता स्टारटर. हैद्राबादमध्ये असताना मी एव्हरेस्टचा मसाला वापरून बनवायचे पण आज इथे वेगवेगळे मसाले एकत्र करून बनवले

तंदुरी चिकन
साहित्य
६ कोंबडीचे पाय
३/४ वाटी दही
२ चमचा तिखट
१ चमचा गरम मसाला
२ चमचा आले पेस्ट
२ चमचा लसूण पेस्ट
४ चमचे लिंबू
१/२ चमचा चाट मसाला
२ चमचा तेल
१/२ चमचा लोणी
मीठ

कृती
  • कोंबडीच्या पायांवर धार धार चाकुनी चिरा मारणे.
  • त्याला २ चमचा लिंबाचा रस आणि १ चमचा तिखट लावून ३० मिनिट बाजूला ठेवणे.
  • एका भांड्यात दही, लसूण पेस्ट, आले पेस्ट, १ चमचा तिखट, २ चमचा लिंबाचा रस, गरम मसाला, तेल आणि मीठ एकत्र करणे.
  • हे मिश्रण कोंबडीला लावून फ्रीजमध्ये ४-५ तास ठेवणे.
  • ओव्हन ३९५F/२००C वर गरम करणे.
  • लोणी वितळवून चिकनवर सोडणे व ओव्हनमध्ये १५ मिनिट भाजणे
  • तुकडे परतवणे व लोणी सोडणे. अजून १५ मिनिट भाजणे.
  • पुन्हा परतवून लोणी सोडणे व १० मिनिट भाजणे.
  • चाट मसाला पसरवून, कांदा आणि लिंबाच्या तुकड्याबरोबर खायला देणे.

टीप
लेगच्याऎवजी ७०० ग्राम कुठलेही तुकडे वापरता येतील
हॉटेलमध्ये लाल रंग येण्यासाठी रंगाचा वापर करतात माझ्याकडे तो नसल्यानी आणि वापरायची इच्छा नसल्यानी मी वापरला नाहीये.
मी भाजण्यासाठी ह्या भांड्याचा वापर केला. त्यामुळे जास्तीचे तेल/लोणी खाली तव्यावर साठते.

सेट डोसा


बँगलोरमध्ये पहिल्यांदा खाल्यापासून सेट डोसा हा माझा आवडता झाला. एकदम हलका फुलका आणि ३ मध्यम आकाराचे डोसे एका वेळी वाढला जाणारा हा डोसा फारच चविष्ठ आहे. बऱ्याच वेळ शोधल्यावर अस लक्षात आले की बहुतेकजण त्यात सोड्याचा व पोह्याचा वापर करतात. त्यावरून मी माझ्या सेट डोश्यासाठी थोडे साहित्य बदलून वापरले. एकदमच सुंदर झालेला. इतका की २ आठवड्यांपूर्वी केलेला फोटो काढण्यासाठी सुद्धा शिल्लक राहिला नाही. अजॉयनी पुन्हा बनवण्यासाठी सांगितल्यावर मी लगेच ह्या आठवड्यात बनवला आणि पहिल्यांदा फोटो काढला.

सेट डोसा
साहित्य
२ वाटी तांदूळ
१ वाटी इडली रवा
३/४ वाटी उडीद डाळ
१ वाटी पोहे
१ चमचा मेथी बिया
मीठ
तेल

कृती
  • तांदूळ, इडली रवा, उडीद डाळ आणि मेथी बिया वेगवेगळ्या सकाळी भिजवणे.
  • संध्याकाळी सगळे वाटायच्या आधी १ तास पोहे पाण्यात भिजवणे.
  • तांदूळ बारीक वाटून घेणे.
  • उडीद डाळ आणि मेथी बिया एकत्र करून बारीक वाटणे.
  • इडली रवापण बारीक वाटणे.
  • पोहे बारीक वाटणे.
  • सगळे वाटलेले मिश्रण चांगले एकत्र करून घेणे व रात्रभर आंबवण्यासाठी उबदार जागी ठेवणे.
  • दुसऱ्या दिवशी सकाळी पिठात मीठ आणि थोडे पाणी घालुन चांगले पसरेल असेल मिश्रण बनवणे.
  • तवा मध्यम आचेवर गरम करून त्यावर थोडे तेल पसरवणे व एक वाटी पीठ ओतणे.
  • खालची बाजूल गुलाबी झाली की वरून १-२ थेंब तेल टाकून परतणे व दुसरी बाजू होईपर्यंत भाजणे

टीप
हा डोसा नेहमी मिक्स भाजीबरोबर खायला देतात पण मला ती भाजी फार आवडत नाही त्यामुळे मी त्याऎवजी ह्या शेंगदाण्याच्या चटणी बरोबर खायला दिला.

खतखते


मला एकदम लहान असल्यापासून हा पदार्थ खूप आवडतो. बेळगावला काकीकडे गेल्यावर तिथे खायचो. आतापर्यंत मला लक्षात नव्हता आला की हा एकदम तब्येतीसाठी उत्कृष्ठ पदार्थ आहे :) नावाप्रमाणेच फ्रीजमधले सगळे संपवण्यासाठी एकदम उत्तम

खतखते
साहित्य
१ वाटी घेवडा
१/२ वाटी मटार
२ शेवग्याच्या शेंगा
२ कणीस
१ बटाटा
१ रताळे
१ कच्चे केळे
१.५ चमचा चिंच
१/४ वाटी गुळ
१/२ वाटी खोबरे
१/४ चमचा धने
१ चमचा तिखट
१/४ चमचा हळद
चिमुटभर हिंग
२ चमचा तूप
मीठ

कृती
  • अर्धा वाटी पाण्यात चिंच भिजवणे.
  • मोठ्या भांड्यात घेवडा आणि ४ वाटी पाणी घालुन मोठ्या आचेवर ५ मिनिट शिजवणे.
  • कणीस ३ तुकडे करून त्यात घालणे. २ वाटी पाणी घालुन अजून ५ मिनिट शिजवणे.
  • त्यात शेवग्याच्या शेंगा, बटाटे, रताळे, कच्चे केळे आणि २ वाटी पाणी घालुन अर्धवट शिजवणे.
  • त्यात खोबरे, चिंच आणि घने अर्धा वाटी पाणी घालुन वाटून घालणे.
  • भाज्या शिजत आल्याकी त्यात मटार घालणे.
  • हळद, गुळ, तिखट आणि मीठ घालुन उकळवणे.
  • छोट्या कढईत तूप आणि म्हवरी घालुन फोडणी करणे व हिंग घालणे. फोडणी भाजीत घालणे.

टीप
ह्यात १ वाटी भोपळ्याचे तुकडे पण घालता येतील पण इथे मला न मिळाल्यानी वापरले नाहीये.

मनगणे


लहानपणी मला हा पदार्थ खूप आवडायचा, इतका की आई दर शनिवारी दुपारच्या जेवणात बनवायची आणि मी त्याची वाट बघायचे. आईची हि पाककृती मी थोडीशी बदलून वापरली आहे.

मनगणे
साहित्य
१ वाटी हरबरा डाळ
३/४ वाटी गुळ
१/२ वाटी काजू
१/२ वाटी मनुका
३ वाटी दुध
चिमुटभर वेलची पूड
मीठ

कृती
  • हरबरा डाळ १.५ वाटी पाणी घालुन ४-५ शिट्ट्या येईपर्यंत कुकरमध्ये शिजवून घेणे.
  • त्यात गुळ, काजू, मनुका, वेलची पूड आणि मीठ घालुन मध्यम आचेवर ५ मिनिट उकळवणे व नंतर थंड होण्यासाठी बाजूला ठेवून देणे.
  • त्यात दुध घालुन वाढणे.

टीप
सगळ्यात सोप्पी डीश आहे नाही :) चव गुळ, डाळ आणि सुक्यामेव्यानी येते.
नेहमीच्या दुधाऎवजी नारळाचे दुध वापरता येईल पण आई दुध वापरते म्हणून मी पण तेच वापरले.

पनीर बिर्यानी


मागच्या आठवड्यात मी हि बियाणी बनवलेली. बऱ्याच दिवसांपूर्वी अनुजानी मला व्हेज बिर्यानी बनव असे सांगितलेले आणि मला असेही आठवतेय की तिला पनीर नव्हत वापरायच. पण मी हि पनीरची बिर्यानी बनवून तिची अर्धी इच्चा पूर्ण केलीये म्हणायला हरकत नाहीये.बनवायला एकदम सोप्पी आणि चविष्ठ. ह्याची कृती मी माझ्या ह्या मसालेदार बिर्याणीच्या कृतीवरून प्रेरित होऊन बनवलीये.

पनीर बिर्यानी
साहित्य
३ वाटी तांदूळ
४०० ग्राम पनीर
४ टोमाटो
३ कांदे
२ बटाटे
१ वाटी काजू
१/२ वाटी बदाम
८ दालचिनी
१५ लवंग
१५ वेलची
१/२ चमचा खसखस
१/२ चमचा मिरे
१ चमचा जिरे
१/२ चमचा बडीशेप
१/२ चमचा हळद
१ चमचा तिखट
१ चमचा धने पूड
१/२ चमचा आले पेस्ट
१/२ चमचा लसूण पेस्ट
१/४ वाटी दही
१/२ वाटी दुध
२ चिमुट केशर
८ चमचे तूप
४ चमचा लोणी
मीठ
तेल

कृती
  • एका भांड्यात हळद, तिखट, आले पेस्ट, लसूण पेस्ट, दही आणि मीठ एकत्र करणे व त्यात पनीरचे तुकडे करून घालणे. एक दोन तास बाजूला ठेवून देणे.
  • भात कोमट पाण्यात भिजवून बाजूला ठेवणे.
  • कढईत तेल गरम करून त्यात लोणी घालणे. पनीरचे तुकडे हलक्या गुलाबी रंग्वर भाजून घेणे व बाजूला ठेवणे.
  • त्याच कढईत ४ दालचिनी, ५ लवंग, मिरे, खसखस, बडीशेप, धने पूड, बदाम आणि १/२ वाटी काजू घालुन मंद आचेवर खमंग भाजून घेणे.
  • त्यात एक कांदा बारीक चिरून घालणे व गुलाबी होईपर्यंत भाजणे. मिश्रण थंड करणे व मिक्सर मध्ये एका टोमाटोबरोबर वाटणे.
  • कढईत २ चमचे तूप टाकून गरम करणे व त्यात हा मसाला घालुन भाजणे.
  • उरलेले ३ टोमाटो मिक्सर मध्ये वाटून घेणे व ते आणि मीठ मसाल्यात घालुन भाजी सुकेपर्यंत शिजवणे.
  • त्यात पनीरचे तुकडे घालुन ढवळणे व बाजूला ठेवणे.
  • कुकरमध्ये बटाटे उकातून त्याच्या साली काढून चकत्या करून घेणे.
  • दुध गरम करून त्यात केशर घालुन बाजूला ठेवणे.
  • भांड्यात पाणी गरम करून त्यात भिजवलेले तांदूळ घालुन शिजवणे. थोडेशे कच्चे राहिल्यावर त्यातील पाणी काढून थंड पाण्याखाली धुवून घेणे.
  • छोट्या कढईत ४ चमचे तूप गरम करून त्यात ४ दालचिनी, १० लवंग, १५ वेलची घालणे. हे मिश्रण आणि मीठ भातात मिसळणे व बाजूला ठेवणे.
  • उरलेले २ कांदे बारीक उभे चिरून तेलात मध्यम आचेवर गुलाबी आणि कुरकुरीत होईपर्यंत तळून घेणे.
  • त्याच तेला उरलेले १/२ वाटी काजू तळून घेणे व बाजूला ठेवणे.
  • कुकरला तुपाचा हात लावून बटाट्याच्या चाकात्यांचा थर लावणे.
  • भाताचा १/३ भाग बटाट्यावर पसरवणे. त्यावर तळलेले १/३ काजूचा वाटा, तळलेल्या कांद्याचा १/३ वाटा आणि अर्धे पनीरचे मिश्रण पसरणे.
  • पुन्हा १/३ भाताचा वाटा, १/३ भाग काजू, १/३ भाग कांदा आणि उरलेले पनीर पसरवणे
  • वरून उरलेला भात पसरवणे व त्यावर उरलेले काजू आणि कांदा पसरवणे.
  • परतणीच्या मागच्या बाजूनी पूर्ण थरातून जाईल अशी ५-६ भोके पाडणे व त्यावर केशर दुध ओतणे.
  • मंद आचेवर तवा ठेवून त्यावर हा कुकर बंद करून ठेवणे व २५-३० मिनिट शिजवणे व नंतर गरम गरम रायत्यासोबत खायला देणे.

टीप
मी १ थर भात, अर्धे पनीर मिश्रण आणि मग अजून एक थर भात (२ वाटी तांदुळाचा) वापरला. अर्धेच काजू आणि कांदा पण वापरले. उरलेला पनीर मसाला मी डब्यात घालुन पुढच्या आठवड्यात करण्यासाठी बाजूला ठेवून दिला. नंतर मला फक्त भात बनवावा आणि थोडा कांदा तळवा लागला. काम करून आल्यावर थकलेल्या दिवशी एकदम पटकन आणि चाविस्थ बिर्यानी खाता आली.
मी नेहमीच बिर्याणीच्या खाली बटाट्याचा थर देते त्यामुळे बिर्याणी करपट नाही.
मी पनीर आणि दह्याचे मिश्रण फ्रीजमध्ये ठेवलेले त्यामुळे पनीर चांगले राहते आणि मिश्रण थोडे सुकते सुद्धा.

तंदुरी पनीर पिझ्झा


माझा आवडता पिझ्झा :) इथे एका ठिकाणी मिळतो पण मला त्यांची चव नाही आवडत. त्यामुळे मी हा पिझ्झा बनवण्याचा बरेच दिवस विचार करत होते आज शेवटी बनवलाच.

तंदुरी पनीर पिझ्झा
साहित्य
४ वाटी गव्हाचे पीठ
२ वाटी मैदा
४०० ग्राम पनीर
२.५ वाटी मोझारेल्ला चीज
१ वाटी पार्मेसान चीज
१.५ वाटी दुध
५ चमचा दही
२.२५ चमचा यीस्ट
१/२ कांदा
१/४ वाटी सुकवलेले टोमाटो
४ ढोबळ्या मिरच्या
१/४ वाटी ओलिव्ह तेल
२ चमचा लोणी
१/२ चमचा साखर
२ चमचे तिखट
१/२ चमचा जिरे पूड
१/२ चमचा धने पूड
१/४ चमचा गरम मसाला
२ चमचा तंदुरी मसाला
१/२ चमचा लसूण पेस्ट
१/२ चमचा आले पेस्ट
१ चमचा बेसिल पाने
मीठ

कृती
  • एक वाटी कोमट पाण्यात साखर आणि यीस्ट घालुन ढवळणे. भांड्याला प्लास्टिकचे झाकण लावून १० मिनिट बाजूला ठेवणे.
  • परातीत गव्हाचे पीठ, मैदा, ओलिव्ह तेल, वितळवलेले लोणी, यीस्टचे पाणी आणि मीठ एकत्र करणे.
  • दुध घालुन मऊसर पीठ मळणे. मोठ्या भांड्यात तेलाचा हात लावून व झाकण लावून २ तास ठेवून देणे.
  • एका भांड्यात दही, आले पेस्ट, लसूण पेस्ट, जिरे पूड, धने पूड, गरम मसाला, तंदुरी मसाला आणि मीठ एकत्र करणे.
  • पनीरचे तुकडे मिश्रणात घालुन चांगले ढवळणे व फ्रीजमध्ये ठेवणे.
  • पीठ दुप्पट झाल्यावर त्याचे दोन भाग करून दोन तव्यांवर पसरवणे.
  • त्यावर पार्मेसान चीज, मोझारेल्ला चीज पसरवणे.
  • पनीर चे तुकडे, ढोबळी मिरची, कांदा, सुकलेला टोमाटो, बेसिल पाने पण पसरवणे.
  • ओव्हन ४००F/२००C वर गरम करून त्यात २५ मिनिट पिझ्झा भाजणे.

टीप
यीस्ट वापरताना पाणी कोमट असले पाहिजे, जास्त गरम पाण्यामुळे यीस्ट जळण्याची शक्यता असते आणि पाणी थंड असेल टर यीस्ट नीट फुलणार नाही. सगळे बरोबर झाले टर यीस्टच्या पाण्यात १० मिनिटांनी बुडबुडे आले असतात.
माझा एक पिझ्झा बरोबर झाला आणि दुसरा चांगला फुलाला नाही. थोडे शोधल्यावर कळले की ओव्हनच्या सगळ्यात वरच्या रकान्यात पिझ्झा बनवायला पाहिजे. मध्ये चांगला गरम न झाल्यानी पिझ्झा फुगत नाही.

तिरंगी भात


बरेच दिवस झाले नवीन पोस्ट करून. थोडा स्वयंपाकापासून आराम करत होते. भारतात असताना महिन्यातून एकदा पुण्याला गेल्यावर थोडी विश्रांती व्हायची पण इथे आल्यापासून मला ते सुख नाहीये. इथे आल्यापासून विश्रांती म्हणजे मग फास्टफूड खाऊन आराम करावा लागतो. पण आता मला एकदम ताजे तवाने वाटतेय. हि पाककृती मी अशीच चालू केलेली आणि मनात आले तसे जिन्नस घालत गेले.

तिरंगी भात
साहित्य
९ वाटी भात
२ टोमाटो
मुठभर कोथिंबीर
३ मुठ पालक
१ हिरवी मिरची
१ चमचा धने पूड
१ चमचा तिखट
१/४ चमचा गरम मसाला
भाजलेले काजू
तूप
मीठ

कृती
  • भातात मीठ घालुन त्याचे ३ भाग करणे.
  • मिक्सरमध्ये टोमाटो वाटून घेणे.
  • पालक, कोथिंबीर आणि हिरवी मिरची वाटून घेणे.
  • पालक-कोथिंबीर मिश्रण उकळवणे आणि आटल्यावर त्यात एक भाग भात आणि धने पूड घालुन सुकेपर्यंत शिजवणे.
  • दुसऱ्या भाताच्या भागात दोन चमचे तूप घालुन एकत्र करणे.
  • टोमाटो मिश्रण पण उकळवणे. त्यात तिखट, गरम मसाला आणि उरलेला एक भाग भात घालुन सुकेपर्यंत शिजवणे.
  • सगळे भाताचे भाग ताटलीत पसरवणे व काजू घालुन वाढणे.

टीप
पालक वाटताना मी एकदम थोडे पाणी घालुन १/३ भाग पालक पहिल्यांदा वाटला. मग त्यात अजून थोडा पालक घालुन वाटला असे करत वाटल्यानी पाणी कमी लागते आणि वाटण पातळ नाही होत.
भात बनवताना मी भात शिजल्यावर त्यातले उरलेले पाणी ओतून दिले आणि थंड पाण्याखाली धुतला त्यामुळे सगळे दाणे एकदम वेगवेगळे झाले.

तवा पनीर


सारख्या एक प्रकारच्या भाज्या खाऊन मला फार कंटाळा आलेला. पालक नसल्यानी मला पालक पनीर बनवता नाही आहे. सायकलिंग करून दामल्यांनी आणि दिल मिल गये आणि त्यातले अभी निकी सिन्स बघण्यात मी गुंग असल्यानी स्वताचीच हि तवा पनीरची डीश तयार केली.

तवा पनीर
साहित्य
२०० ग्राम पनीर
१ कांदा
२ टोमाटो
४-५ ढोबळी मिरची
१/४ चमचा हळद
१ चमचा तिखट
१/४ चमचा जिरे पूड
१/४ चमचा धने पूड
१/४ चमचा आमचूर पूड
मीठ
तेल

कृती
  • पनीर, टोमाटो, कांदा, ढोबळी मिरची यांचे मध्यम आकाराचे तुकडे करणे
  • तवा गरम करून त्यात तेल घालुन पनीरचे तुकडे भाजून घेणे.
  • त्याच तेलात कांदा, गुलाबी रंगावर भाजून घेणे.
  • त्याच तेलात ढोबळी मिरची भाजून बाजूला ठेवणे.
  • आता त्याच तेलात टोमाटो घालुन पूर्णपणे शिजवणे.
  • त्यात तिखट, हळद, जिरे पूड, धने पूड आणि आमचूर पूड घालुन २-३ मिनिट परतत शिजवणे.
  • त्यात पनीर, कांदा, ढोबळी मिरची आणि मीठ घालुन चांगले एकत्र करणे व ४-५ मिनिट शिजवून गरम गरम वाढणे.

टीप
मला ह्यात जास्त पदार्थ घालायचे नव्हते तसेच जास्त मसालेदार पण बनवायचे नव्हते. ह्यात पनीर आणि मसाल्याचे एकदम छान संगत देऊन चांगले लागले.
मी नॉनस्टिक तवा जो थोडा खोलगट होता तो वापरला त्यामुळे सगळे पदार्थ ढवळताना बरे पडले.

वांग्याचा पराठा


हल्ली मी खूप पराठे बनवते. बनवायला एकदम सोप्पा आणि भाज्या वगैरे बनवत बसायला नाही लागत. हा पराठा असाच काहीतरी प्रयोग करत बनवला. २-३ वेळा आधी बनवलेला पण कालचा एकदम छान होता त्यामुळे इथे देत आहे.

वांग्याचा पराठा
साहित्य
१ मध्यम आकारच वांग
२ वाटी गव्हाचे पीठ
१ चमचा तिखट
१/४ चमचा हळद
१/४ चमचा जिरे पूड
१/४ चमचा धने पूड
२-३ कोथिंबीर पाने
मीठ
तेल

कृती
  • वांगे ओव्हन मध्ये ५००F वर २५ मिनिट ब्रोईल करणे व मग थंड करणे.
  • वांग्याचे साल काढून आतील गराला चांगले एकत्र करणे.
  • त्यात तिखट, हळद, जिरे पूड, धने पूड, बारीक चिरलेली कोथिंबीर आणि मीठ घालणे.
  • गव्हाचे पीठ घालुन पीठ चांगले घट्ट भिजवणे व तेलाचा हात लावून २०-३० मिनिट भिजण्यासाठी ठेवून देणे.
  • लिंबाच्या आकाराचे गोळे बनवून, ३ घड्या घालुन पराठे बनवणे.
  • तव्यावर तेल सोडून भाजणे व थंड दही आणि लोणच्याबरोबर वाढणे.

टीप
वांगे भरते बनवताना भाजतात तसे गॅसवर भाजत येईल. ओव्हनमध्ये भाजण्यासाठी इथल्या ओव्हन मधली ब्रोईल बेकिंग पेक्षा चांगले होते त्यामुळे त्यातला रस बाहेर नाही येत आणि त्यामुळे कमी गव्हाचे पीठ वापरून पराठे बनवता येतात आणि वांग्याची चव शिल्लक राहते.

भोपळा आणि बदामाचा कप केक


थोड्या दिवसांपूर्वी मी खतखते बनवण्यासाठी भोपळा शोधत होते. कुठेच न मिळाल्यानी शेवटी एका ठिकाणचा डब्ब्यातला भोपळा आणलेला. पण तो उघडला तर लक्षात आले की भोपळ्याची पेस्ट आहे आणि मला तुकडे हवे होते. मग थोड्यावेळ शोधल्यावर कप केक बनवता येतील असे लक्षात आले. इथे माझ्या कप केकची कृती देत आहे. केक भाजताना इतका सुंदर वास सुटलेला की कधी एकदा तयार होतो आणि कधी खाते अस झालेलं.

भोपळा आणि बदामाचा कप केक
साहित्य
२ वाटी भोपळ्याची पेस्ट
३ वाटी मैदा
१ वाटी लोणी
१.५ वाटी ब्राऊन शुगर
१/२ वाटी पिठी साखर
२ चमचा बेकिंग पूड
१/२ चमचा बेकिंग सोडा
१/२ वाटी दुध
१/२ चमचा दालचिनी पूड
१/२ चमचा लवंग पूड
१/२ चमचा जायफळ पूड
१/४ वाटी बदामाचे तुकडे
१/२ चमचा पिस्ता इसेन्स
२ अंडी

कृती
  • मैदा, बेकिंग पूड, बेकिंग सोडा एकत्र ३-४ वेळा चाळून घेणे.
  • त्यात दालचिनी पूड, लवंग पूड आणि जायफळ पूड घालुन एकत्र करणे.
  • एका भांड्यात लोणी, ब्राऊन शुगर, पिठी साखर एकत्र फेटणे.
  • त्यात एकावेळी एक अंडे घालुन चांगले फेटणे.
  • थोडे थोडे मैद्याचे मिश्रण घालुन एकत्र करत सगळे मिश्रण चांगले एकत्र करणे.
  • त्यात दुध घालुन ढवळणे.
  • भोपळ्याची पेस्ट, पिस्ता इसेन्स घालुन ढवळणे.
  • बदामाचे तुकडे थोडे बाजूला ठेवून उरलेले एकत्र करणे.
  • ओव्हन ३५०F/१८०C वर गरम करणे.
  • कप केकच्या ट्रेला लोण्याचा हात लावून त्यात ३/४ लेव्हल पर्यंत मिश्रण ओतणे व वरून बद्दल लावणे.
  • ओव्हन मध्ये ३५०F/१८०C वर २० मिनिट भाजणे.

टीप
ताजा भोपळा वापरायचा असेल तर त्याला उकडून मिक्सरमध्ये वाटून घेणे.
साधारण १६ मध्यम आकाराचे कप केक बनतील

गाजराचा पराठा


आज काहीतरी सोप्पे पण नवीन रात्रीच्या जेवणात बनवायचे होते. पराठा बनवण्याचे ठरवले पण नेहमीचा न करता काहीतरी वेगळा बनवण्याच्या विचारांनी मी हा पराठा बनवला.

गाजराचा पराठा
साहित्य
१.५ बटाटा
२ वाटी किसलेले गाजर
२.५ वाटी गव्हाचे पीठ
१ चमचा तिखट
३/४ चमचा धने पूड
१/४ चमचा ओवा
१/२ लिंबू
मीठ
तेल
तूप

कृती
  • गव्हाचे पीठ, मीठ आणि २ चमचे तेल घालुन एकत्र करणे.
  • पाणी घालुन पीठ भिजवणे आणि तेलाचा हात लावून अर्धा ते एक तास भिजायला ठेवून देणे.
  • बटाटे उकडून थंड करणे.
  • कुस्करलेले बटाटे आणि किसलेले गाजर एकत्र करणे.
  • त्यात तिखट, मीठ, धने पूड, ओवा आणि लिंबाचा रस घालुन एकत्र करणे.
  • पीठाचे लिंबाच्या आकाराचे गोळे करणे. गजराच्या मिश्रणाचे सुद्धा त्याच आकाराचे गोळे करणे.
  • पिठाच्या गोळ्याची वाटी करून त्यात गाजराचा गोळा घालुन बंद करणे.
  • भरलेला पराठा अलगद पणे लाटून, मध्यम आचेवर तव्यावर दोन्ही बाजूनी गुलाबी होईपर्यंत तेल सोडून भाजणे.
  • तूप लावून दही आणि लोणच्याबरोबर वाढणे.

टीप
पूर्णपणे तुपावर भाजण्याऎवजी मला पराठा भाजताना तेलावर भाजून मग एकदम शेवटी थोडेसे तूप सोडायला जास्त आवडतो

व्हेरी बेरी केक


इथे सध्या इतक्या वेगवेगळ्या प्रकारच्या बेरी मिळतात की मी असा काहीतरी केक बनवण्याचे ठरवले.

व्हेरी बेरी केक
साहित्य
३ वाटी मैदा
४ चमचे बेकिंग पूड
२ अंडी
१ वाटी लोणी
१ वाटी साखर
३/४ वाटी दुध
२ वाटी रासबेरी
२ वाटी ब्लूबेरी
३/४ वाटी ब्लॅकबेरी
६-८ स्ट्रॉबेरी
मीठ

कृती
  • लोणी आणि साखर एकत्र चांगले फेटून घेणे.
  • त्यात अंडी घालुन घट्ट होईपर्यंत फेटणे
  • मैदा आणि बेकिंग पूड एकत्र चाळून घेणे व त्यात मीठ घालणे.
  • ओव्हन ३५०F/१८०C वर गरम करणे.
  • अंड्याच्या मिश्रणात थोडे थोडे मैद्याचे मिश्रण घालुन फेटणे.
  • मिश्रणात दुध घालुन ढवळणे.
  • सगळ्या बेरी मिश्रणात घालणे. (मी सगळ्या बेरी अख्या वापरल्या, फक्त स्ट्रॉबेरीचे तुकडे करून घातले)
  • केक भाजायच्या भांड्याला लोण्याचा हात लावून त्यात मिश्रण ओतणे. केक ३५०F/१८०C वर ३५ मिनिट भाजणे.

टीप
मी साखर मिक्सर मध्ये वाटून घेतली त्यामुळे ती पटकन वितळते.
सगळ्या बेरी फ्रीजमधून लगेच वापरल्या त्यामुळे जास्त भाजल्या नाही जात.
फ्रोझन बेरी पण वापरता येतील. मी सुद्धा पुढच्यावेळी बेरी फ्रीजर मध्ये ठेवून तश्याच वापरून बघणार आहे.
मी केक मध्ये सॉलटेड मीठ वापरले आणि वरून मीठ पण घातले त्यामुळे मीठ जरा जास्त लागत होत. जर सॉलटेड मीठ वापरत असेल तर वरून मीठ घालू नये.

कॉर्न सिख कबाब


इथे खूप सारे कणीस मिळतात. नेहमी आम्ही त्याला भाजुल लिंबू आणि तिखट मीठ लावून खातो पण ह्यावेळी मी जरा वेगळे काहीतरी करण्याचे ठरवले.

कॉर्न सिख कबाब
साहित्य
४ कणीस
२ बटाटे
४ चमचे कॉर्न फ्लौर
६ लसूण पाकळ्या
२ हिरव्या मिरच्या
१ कांदा
१/४ वाटी कोथिंबीर
मीठ
लोणी/तूप

कृती
  • कणीस आणि पाणी एकत्र करून साधारण २५ मिनिट उकळवणे. कणीस थंड करणे.
  • बटाटे उकडून थंड करणे.
  • मिक्सर मध्ये लसूण, मिरची आणि कांदा वाटून घेणे.
  • कणीस आणि बटाटे किसून एकत्र करणे.
  • त्यात वाटण, कोथिंबीर, कॉर्न फ्लौर आणि मीठ घालुन मळणे.
  • लांबट आकाराचे कबाब बनवणे.
  • ओव्हन ४००F/२००C वर गरम करणे.
  • बेकिंग ट्रेला लोणी किंवा तुपाचा हात लावून त्यावर कबाब ठेवणे.
  • ओव्हनमध्ये ४००F/२००C वर १५ मिनिट भाजणे.
  • सगळे कबाब परतवून अजून १५ मिनिट भाजणे

टीप
मी मिश्रण बनवताना कमीत कमी मसाले वापरून कणीसाची चव शाबूत ठेवण्याचा प्रयत्न केला.
कबाब तव्यावर मध्यम आचेवर भाजत येतील पण मी ओव्हन वापरल्यानी त्या वेळात मी दुसरी कामे करू शकले.

अननसाचा मुरंबा


मागच्या महिन्यात आम्ही एक मोठा अननस आणलेला. मला आईचा मुरंबा आठवला. लगेच आईला फोन केला आणि तेंव्हा कळले की बनवायला किती सोप्पा आहे ते. मी त्याच रात्री बनवून टाकला.

अननसाचा मुरंबा
साहित्य
५ वाटी अननस
३ वाटी पाणी
१.५ वाटी साखर

कृती
  • अननस पाण्यात बुडेल इतके पाणी घालुन मध्यम आचेवर झाकण लावून शिजवावा.
  • अननस गाळून पाणी वेगळे करणे.
  • त्याच पाण्यात साखर घालुन उकळी आणणे. मध्यम आचेवर सारखे ढवळत एक तारी पाक बनवणे.
  • त्यात शिजवलेला अननस घालुन अजून एकदा उकळी आणणे.
  • थंड करून फ्रीजमध्ये ठेवणे.

टीप
मुरंबा फ्रीजमध्ये ठेवावा म्हणजे थोडे महिने चांगला राहतो.
चपाती किंवा पराठ्याबरोबर एकदम छान लागतो
मला फार जास्त पाक आवडत नाही त्यामुळे वरच्या प्रमाणात कमी गोड व कमी पाक होतो. त्यात अजून १ वाटी पाणी आणि अर्धा वाटी साखर घालुन जास्त पाक बनवता येईल.

आलू गोबी


अजॉयला फ्लॉवर फार आवडतो मग आज काहीतरी वेगळा प्रकार म्हणून मी हि भाजी बनवली

आलू गोबी
साहित्य
२ बटाटे
१ फ्लॉवर
१/२ चमचा म्हवरी
१ चमचा जीरा
१ चमचा जिरे पूड
१ चमचा धने पूड
१ चमचा तिखट
१/२ चमचा गरम मसाला
१/४ चमचा हळद
१/४ चमचा पिठी साखर
कोथिंबीर
मीठ
तेल

कृती
  • बटाट्याची साले काढून त्याचे तुकडे करणे.
  • फ्लोवारचे मध्यम आकाराचे तुकडे करणे.
  • कढईत तेल गरम करून त्यात जिरे व म्हवरीची फोडणी करणे.
  • त्यात बटाटा आणि फ्लॉवर घालुन मध्यम आचेवर सारखे ढवळत शिजवणे.
  • शिजण्यासाठी ५ मिनिट राहिली असताना त्यात हळद घालणे
  • पूर्ण शिजल्यावर त्यात धने पूड, जिरे पूड, तिखट, गरम मसाला, पिठी साखर आणि मीठ घालुन ढवळणे.
  • वरून बारीक चिरलेली कोथिंबीर पसरवणे.

टीप
एकदम साधा आणि सोपा प्रकार चवीला टोमाटोच्या फ्लॉवरपेक्षा एकदम मस्त लागतो. भाजी सुकी असल्यानी फुलके किंवा पराथ्यांबरोबरच चांगली लागते.

कुरकुरीत इंडिअन हॅश ब्राऊन


मी २-३ आठवड्यांपूर्वी हे बनवलेले पण आज पोस्ट करत आहे. एकदम कुरकुरीत आणि चाविस्था पदार्थ

कुरकुरीत इंडिअन हॅश ब्राऊन
साहित्य
२ बटाटे
१ हिरवी मिरची
१/४ वाटी पिकल्ड काकडी
चिमुटभर मिरे पूड
मीठ
तूप

कृती
  • बटाटे किसून पाण्यात चांगले धुवून घेणे.
  • पाणी निथळवून पेपर वर सुकण्यासाठी पसरवणे.
  • सुकवलेला बटाटा कीस, हिरव्या मिरच्या, पिकल्ड काकडी, मिरे पूड आणि मीठ सगळे एकत्र करणे.
  • तवा गरम करून त्यावर तूप सोडणे.
  • बटाटा तव्यावर पातळ पसरवणे.
  • मध्यम आचेवर दोन्ही बाजूनी गुलाबी होईपर्यंत भाजणे.

टीप
मी मध्यम किसणीवर बटाटे किसले आणि त्यामुळे एकदम छान कुरकुरीत हॅश ब्राऊन झाले. जर जाड किसले तर कुरकुरीत होणे मुश्कील आहे.
हिरव्या मिरचीमुळे एकदम छान तिखट चव येते.

भेळ


भेळ हा माझा आवडीचा चटपट पदार्थ. खासकरून पिकनिकसाठी. लवकर बनणारा सोपा आणि चविष्ठ पदार्थ.

भेळ
साहित्य
६ वाटी चुरमुरे
२ वाटी फरसाण
१ वाटी शेव
१ वाटी बुंदी
१ वाटी नवरत्न मिश्रण
१.५ वाटी चिंच
२ वाटी गुळ
२ हिरवी मिरची
१ चमचा तिखट
१/२ चमचा जिरे पूड
४-५ खजूर
२ कांदे
२ टोमाटो
१/२ वाटी कोथिंबीर
मीठ

कृती
  • चिंच आणि खजूर पाण्यात एक तास भिजवणे.
  • भिजलेले चिंच खजूर, गुळ, तिखट, हिरवी मिरची, जिरे पूड आणि मीठ घालुन मिक्सरमध्ये वाटणे.
  • मिश्रण गाळून घेणे.
  • एका भांड्यात चुरमुर, फरसाण, शेव, नवरत्न मिश्रण, चिरलेला कांदा, टोमाटो आणि कोथिंबीर एकत्र करणे.
  • त्यात चिंचेचे मिश्रण घालुन चांगले ढवळणे.
  • वरून बुंदी आणि शेव घालुन खायला देणे.

टीप
कैरीच्या दिवसात बारीक चिरून कैरीपण घालता येईल
मी नेहमी चिंचेचे थोडे पाणी वेगळे ठेवते त्यामुळे प्रत्येकाच्या चवीनुसार ते वरून थोडे घेऊ शकतात
सगळे चिरून ठेवल्यास फक्त एकत्र करण्याचे काम राहते, पार्टी आणि पिकनिकसाठी एकदम उत्तम

रसकदम


बरेच दिवस झाले रसकदम खाऊन. माझा आवडता गोड पदार्थ त्यामुळे आज मी बनवण्याचे ठरवले. कृती रुचिरा नावाच्या पुस्तकातल्या कृतीवरून प्रभावित आहे.

रसकदम
साहित्य
३.५ वाटी दुध
१ चमचा व्हिनेगर
१.५ वाटी साखर
१.५ वाटी पिठी साखर
४ वाटी खवा
चिमुटभर केशर
१ वाटी किसलेले पनीर

कृती
  • २ चमचे दुध गरम करून त्यात केशर घालणे
  • उरलेले दुध उकळवणे व त्यात एक चमचा पाण्यात व्हिनेगर मिसळून घालणे.
  • पनीर वरच्या बाजूला जमा होईल आणि पाणी वेगळे होईल. पाणी ओतून देवून पनीर थंड पाण्यात स्वच्छ धुवून घेणे.
  • पनीर पंच्यात गुंडाळून पाणी पिळून टाकणे.
  • पनीर चांगले मळून घेणे व त्याचे २५ छोट्या आकाराचे गोळे बनवणे.
  • ६ वाटी पाण्यात साखर घालुन कुकरमध्ये उकळवणे.
  • त्यात पनीरचे गोळे सोडून ५ मिनिट उकळवणे.
  • कुकरचे झाकड लावून अजून ५ मिनिट उकळवणे. (शिट्टी न लावता)
  • कुकर उघडून त्यात अर्धा वाटी पाणी घालुन अजून ५ मिनिट उकळवणे व गोळे थंड होऊ देणे. गोळे पाकातून बाजूला काढून ताटलीत पसरवणे.
  • नॉनस्टिक तव्यावर मध्यम आचेवर पनीर गुलाबीरंगावर परतून घेणे.
  • खवा, पिठी साखर, केशर दुध एकत्र करून मळणे.
  • पनीर थंड झाले असेल त्याला मिक्सर मध्ये वाटून पूड करणे व एका ताटलीत पसरवणे.
  • शिजवलेले गोळे खव्याच्या मिश्रणात घालुन बंद करणे व नंतर पनीरच्या पूड मध्ये घोळवणे.

टीप
पनीर भाजताना ते करपणार नाही ह्याची काळजी घेणे व सारखे हलवत भाजणे. पनीरचा कच्चा वास गेला पाहिजे
शिजवलेले गोळे रसगुल्यासाराखेच असतात फक्त आकारणी छोटे आणि पाकचे प्रमाण वेगळे असते.
खव्याच्या मिश्रणात नारिंगी किंवा गुलाबी रंग घालता येईल पण माझ्याकडे नसल्यानी मी वापरला नाही.

अंड्याचे तुकडे


काल मी उकडलेल्या अंड्यांचा थोडा वेगळा प्रयोग करून पहिला. नेहमीच्या अंड्याच्या भाजीपेक्षा थोडा वेगळा छान वाटला खायला.

अंड्याचे तुकडे
साहित्य
४ अंडी
१ कांदा
२ हिरव्या मिरच्या
१/४ चमचा तिखट
१/४ चमचा धने पूड
चिमुट भर मिरे पूड
चिमुटभर दालचिनी पूड
कोथिंबीर
मीठ
तेल

कृती
  • अंडी उलालावून त्याचे कवच काढणे. अंड्याचे तुकडे करणे व बाजूला ठेवणे
  • तव्यावर तेल गरम करून त्यात हिरव्या मिरच्यांचे तुकडे तळणे.
  • त्यात कांदा घालुन गुलाबी रंगावर परतून घेणे.
  • त्यात मिरे पूड, धने पूड, दालचिनी पूड, अंड्यांचे तुकडे आणि मीठ घालुन ३-४ मिनिट परतणे.
  • वरून कोथिंबीर आणि तिखट घालुन खायला देणे.

टीप
मला ह्यात जास्त मसाले न वापरता थोडी वेगळी चव द्यायची होती त्यामुळे मी दालचिनी वापरली आणि एकदम अचूक निवड होती

कोळंबीचे पॅटिस


भारतात असताना मी एक दोनदा पॅटिस बनवण्याचा प्रयत्न केलेला. पण त्याला कधीच चांगले पापुद्रे आले नाहीत. बरेच किचकट आणि पसारा करणारे काम होते. त्यामुळे इथे मी बाजारातल्या पफ पेस्ट्री शिटचा वापर करण्याचे ठरवले. एकदम छान झालेले पण अजूनही मनातली शिटपण स्वतः बनवण्याची इच्छा गेली नाहीये.

कोळंबीचे पॅटिस
साहित्य
2 पफ पेस्ट्री शिट
१ वाटी कोळंबी
१ टोमाटो
२ कांदा
४ लसूण पाकळ्या
१ चमचा धने पूड
१ चमचा तिखट
१/४ चमचा गरम मसाला
१/४ चमचा जिरे पूड
१/२ चमचा मिरे पूड
चिमुटभर हळद
१ अंडे
मीठ
तेल

कृती
  • पफ पेस्ट्री शिट फ्रीजमधून काढून त्यांना नेहमीच्या तापमानावर आणावे.
  • त्या वेळात कढईत तेल गरम करून त्यात कांदा भाजून घेणे
  • त्यात बारीक चिरलेला टोमाटो घालणे आणि पूर्ण पणे शिजवणे.
  • त्यात कोळंबी आणि लसूण घालुन अजून २-३ मिनिट शिजवणे.
  • त्यात हळद, तिखट, गरम मसाला, जिरे पूड, मिरे पूड आणि मीठ घालणे व तेल बाजूला निघेपर्यंत भाजणे.
  • त्यात धने पूड घालुन अजून एक-दोन मिनिट शिजवणे व बाजूला ठेवणे.
  • ओव्हन २००C/४००F वर गरम करणे.
  • बेकिंग ट्रेला तुपाचा किंवा लोण्याचा हात लावणे.
  • प्रत्येत पेस्ट्री शिटला ३ उभ्या भागांत आणि २ आडव्या भागात कापून त्याचे १२ तुकडे करणे. प्रत्येक तुकड्यावर कोळंबीचे मिश्रण घालुन दुमडून बेकिंग ट्रेवर ठेवणे.
  • अंडे फेटून घेणे व एक टिशू त्यात बुडवून पफ वर फिरवणे.
  • ओव्हन मध्ये २००C/४००F वर १५ मिनिट भाजणे व गरम गरम खायला देणे.

टीप
मी मध्यम आकाराचे कोळंबी वापरलेली त्यामुळे मला त्याचे तुकडे करावे लागले नाहीत
अंड्याचा वापर केल्यानी वरून एकदम छान गुलाबी होतात.

खरबूजाची लस्सी


२ आठवड्यांपूर्वी मी एकदम वेगळा प्रयोग करून पहिला. फ्रीजमध्ये एक जुने खरबूज होते आणि दही होते त्यातून निर्माण झालेली हि कृती

खरबूजाची लस्सी
साहित्य
१ खरबूज
६ वाटी दही
५ चमचे साखर
एक थेंब व्हॅनिला इसेन्स
मीठ

कृती
  • खरबूज बारीक कापून घेणे
  • थोडे तुकडे वरून वापरण्यासाठी बाजूला ठेवणे व बाकीचे मिक्सरमध्ये वाटून घेणे.
  • ज्यूस गाळून घेणे आणि दह्यात मिसळणे.
  • त्यात साखर, मीठ, व्हॅनिला इसेन्स घालुन पुन्हा चांगले ढवळणे.
  • प्यायला देताना ग्लासमध्ये वरून खरबुजाचे तुकडे घालुन थंड करून देणे.

टीप
मी एकदम घट्ट दही वापरलेले आणि पाण्याचा बिलकुल वापर नाही केला कारण खाराबुजाचेच पाणी वापरल्यानी चव चांगली आली.

गार्डन सॅलेड


हे सॅलेड मी एकदम अचानकच बनवण्याचे ठरवले आणि एकदम चांगले पण झाले त्यामुळे इथे कृती देत आहे

गार्डन सॅलेड
साहित्य
१ वाटी लेट्युस
१/२ वाटी अननस
१/२ वाटी आंबा
१ उकडलेला बटाटा
१ टोमाटो
१ लाल मिरची
१/२ चमचा ओरेगनो
१/४ वाटी पिकल्ड काकडी
२ चमचा व्हिनेगर
मीठ

कृती
  • भांड्यात चिरलेले लेट्युस घालणे
  • त्यात अननस आणि आंब्याचे तुकडे घालणे
  • त्यात टोमाटो चिरून घालणे
  • उकडलेल्या बटाट्याची साल काढून तुकडे करणे आणि मिसळणे
  • त्यात बारीक चिरलेली लाल मिरची, पिकल्ड काकडी घालणे
  • मीठ, ओरेगनो आणि व्हिनेगर घालुन एकत्र करणे. व वाढणे.

टीप
मी सगळे पदार्थ वेग वेगळे कापून ठेवलेले आणि जेवणाच्या अर्धा तास आधी एकत्र केले त्यामुळे त्यांची चव शाबूत राहिली आणि खाण्यास चांगले लागले.

इडली


मी बरेच लोकांना बाहेरून इडलीचे पीठ आणताना किंवा इंस्टन्ट मिश्रण वापरताना बघितलय पण मला त्याची चव फार काही आवडत नाही. इडली करायला इतकी सोपी आहे की आज काल अजॉयसुद्धा एखाद वेळी बनवतो.

इडली
साहित्य
१ वाटी उडीद डाळ
२ वाटी इडली रवा
मीठ
तेल

कृती
  • उडीद डाळ आणि इडली रवा वेग वेगळ्या भांड्यात कमीत कमी ८ तास भिजवून ठेवणे.
  • उडीद दालीतील पाणी काढून बारीक वाटून घेणे.
  • इडलीच्या राव्यातील पाणी पण काढून ते पण वाटून घेणे.
  • दोन्ही वाटलेले मिश्रण एकत्र करून ८ तास आंबावण्यासाठी उबदार जागी ठेवणे.
  • सकाळी पिठात मीठ घालुन फेटून घेणे.
  • कुकरमध्ये पाणी घालुन उकळवणे.
  • इडलीच्या भांड्यांना तेलाचा हात लावून त्यात पीठ घालणे.
  • इडली भांडी कुकरमध्ये ठेवून झाकण लावून (शिट्टी न लावता) १०-१२ मिनिट मोठ्या आचेवर उकडून घेणे.
  • कुकर उकडून इडली २-३ मिनिट थंड करणे व मग काढून खायला देणे.

टीप
इथे हवामान थंड असल्यानी पीठ आंबावण्यासाठी गरम पाणी भरलेल्या भांड्यावर ठेवले.
इडली उकडल्या उकडल्या कुकरचा झाकण काढायला विसरू नये नाहीतर वाफेच पाणी जाऊन इडल्या मऊ होतील

टोफू बर्गर


मला घरी बर्गर बनवण्याची फार इच्छा झालेली पण चिकन किंवा मटन नव्हत वापरायच. पनीर वापरण्याचे ठरवलेलं पण इंडिअन मार्केट थोड दूर असल्यानी शेवटी टोफू वापरायचा ठरवला. बर्गर चांगला झालेला, मसाले वापरल्यानी टोफूला चांगली चव आली.

टोफू बर्गर
साहित्य
४ बर्गरचे पाव
१०० ग्राम टोफू
२ कांदे
१ टोमाटो
१ लाल मिरची
४ चीज स्लाईस
१/२ वाटी लेट्युस
रांच ड्रेसिंग
मीठ
मिरे पूड
तेल

कृती
  • टोफूचे तुकडे करून कढईत तेल घालुन गरम करून गुलाबी रंगावर भाजणे
  • त्यात कांद्याचे तुकडे, लाल मिरची घालुन गुलाबी होईपर्यंत भाजणे.
  • मीठ आणि मिरे पूड घालुन चांगले हलवणे. मिश्रणाचे ४ भाग करणे.
  • प्रत्येक पावावर चीजचा स्लाईस ठेवून मिश्रणाचा एक भाग ठेवणे.
  • त्यावर लेट्युस, टोमाटो, केचप आणि रांच सॉस घालुन दुसरा पाव ठेवणे व खायला देणे.

टीप
मी एकदम हलक्या आचेवर टोफू भाजला त्यामुळे तो एकदम छान मऊ राहिला. मसाल्यामुळे टोफूला चांगली चव आली.

मसाला डाळ


हि डाळ मी पुण्यात असताना असाच प्रयोग करताना बनवलेली. छान झाली आणि आई बाबांना एकदम आवडल्यामुळे इथे कृती देत आहे.

मसाला डाळ
साहित्य
३ वाटी तूर डाळ
१ कांदा
१ टोमाटो
६-७ लसूण पाकळ्या
१/४ चमचा म्हवरी
१/४ चमचा जिरे
१ चमचा तिखट
१/४ चमचा हळद
१/२ चमचा जिरे पूड
१/२ चमचा धने पूड
१/४ चमचा गरम मसाला
कोथिंबीर
लोणी
मीठ
तूप

कृती
  • १ वाटी पाणी घालुन डाळ कुकरमध्ये उकडून घेणे.
  • तेल गरम करून त्यात म्हवरी आणि जिरे घालुन फोडणी करणे.
  • त्यात बारीक चिरलेला कांदा, लसूण पाकळ्या घालुन भाजणे.
  • त्यात हळद, तिखट, जिरे पूड, धने पूड आणि गरम मसाला घालुन ढवळणे.
  • त्यात टोमाटो घालुन पूर्ण शिजवणे.
  • त्यात शिजवलेली तूर डाळ, मीठ घालुन चांगले ढवळणे व दोन-तीन मिनिट शिजवणे
  • त्यात बरोबर पातळ होईल इतके पाणी घालुन उकळवणे.
  • वरून कोथिंबीर घालणे व वाटीत वाढल्यावर लोणी घालणे.

टीप
डाळ शिजवताना मी जास्त पाणी घालत नाही त्यामुळे नंतर मसाल्यासकट शिजवताना त्याची चव डाळीत जाते.

कांदा भजी


मी ह्या प्रकारची भजी खूप कमी वेळा बनवते कारण मला खेकडा पद्धतीची भजी फार आवडते पण मागच्या आठवड्यात ह्या प्रकारची भजी खावीशी वाटली म्हणून बनवलेली.

कांदा भजी
साहित्य
२ कांदे
१/२ वाटी बेसन
१/४ वाटी कोथिंबीर
१ चमचा तिखट
१/४ चमचा हळद
१/२ चमचा धने पूड
१/४ चमचा जिरे पूड
मीठ
तेल

कृती
  • कांदा बारीक चिरून त्यात मीठ घालणे व ५-१० मिनिट बाजूला ठेवणे.
  • त्यात बेसन, कोथिंबीर पाने, तिखट, हळद, धने पूड, जिरे पूड घालुन चांगले एकत्र करणे व पेस्ट बनवणे. लागल्यास थोडेसे पाणी घालणे.
  • कढईत तेल गरम करून त्यातले एक चमचाभर तेल पिठात घालणे व ढवळणे.
  • छोट्या छोट्या आकाराचे भजी तेलात टाकून गुलाबी रंगावर तळणे.

टीप
मी नेहमी कांद्याला मीठ लावून बाजूला ठेवते त्यामुळे त्याला सुटलेले पाणी भजीचे पीठ भिजवायला वापरता येते व पीठ नंतर पातळ होत नाही.
मी पिठात गरम तेल घातल्यानी सोडा वापरावा लागला नाही व तरीसुद्धा चांगली खुसखुशीत झालेली

हरियाली चिकन बिर्याणी


मला काहीतरी चटपट खावसं वाटत होता म्हणून मी पाणी पुरी बनवलेली. तेंव्हापासून असलेला खूप सारा पुदिना राहिला होता. फ्रीजमध्ये चिकन पण होत आणि अजॉयला बिर्याणी खायची होती. ह्या सगळ्याचा परिणाम म्हणून हि बिर्याणी तयार झाली. :)

हरियाली चिकन बिर्याणी
साहित्य
६ चिकनचे लेग
२ वाटी बासमती तांदूळ
१/२ पुदिना गड्डी
१/२ कोथिंबीर गड्डी
२ हिरव्या मिरच्या
२ दालचिनी
१/४ चमचा मिरे पूड
४ लवंग
४ वेलची
१/४ वाटी तूप
३ कांदा
१ टोमाटो
१/२ चमचा लसूण पेस्ट
४ चमचा दही
१ चमचा तिखट
चिमुटभर हळद
मीठ

कृती
  • चिकनला तिखट, हळद. लसूण पेस्ट आणि दही लावणे व २ तास बाजूला ठेवणे.
  • ६ वाटी पाणी गरम करणे त्यात तांदूळ अर्धा तास भिजवणे.
  • मिक्सरमध्ये पुदिना, कोथिंबीर, टोमाटो आणि हिरव्या मिरच्या बारीक वाटणे.
  • २ चमचा तूप बाजूला ठेवून उरलेले तूप कढईत गरम करणे.
  • १ कांदा बारीक उभा चिरणे व गुलाबी रंगावर कुरकुरीत तळणे व बाजूला ठेवणे.
  • उरलेल्या तुपात दालचिनी, मिरे पूड आणि उरलेला कांदा बारीक चिरून गुलाबी होईपर्यंत भाजणे.
  • कांद्याचे मिश्रण हिरव्या वाटणात घालुन सगळे बारीक वाटणे.
  • त्याच कढईत वाटलेले मिश्रण, १.५ वाटी पाणी आणि चिकन घालुन एकत्र करणे. मीठ घालुन मिश्रण सुकेपर्यंत शिजवणे.
  • चिकन शिजत असताना तांदुळातील पाणी ओतून त्यात अजून २ वाटी पाणी आणि मीठ घालुन भात शिजवणे. भात शिजत आला की त्यातील उरलेले पाणी ओतून थंड होण्यासाठी बाजूला ठेवणे.
  • अर्धा चमचा तूप गरम करून त्यात लवंग, वेलची घालुन हलक्या आचेवर तळून घेणे. हे तुपाचे मिश्रण भातात ओतून एकत्र करणे.
  • कुकरला तुपाचा हात लावून त्यावर भाताचा थर लावणे. त्यावर चिकनचे मिश्रण व नंतर उरलेला भाताचा थर देणे. वरून तळलेले निम्मा कांदा घालुन कुकर बंद करणे.
  • कुकर १५ मिनिट मंद आचेवर गरम करणे व वाढत्ना वरून कुरकुरीत कांदा घालुन खायला देणे.

टीप
माझ्याकडे चिकनचे लेग होते म्हणून मी ते वापरले पण त्याऎवजी दुसरे तुकडेपण वापरता येतील.
इथल्या स्टोव्हला ८ स्वीच आहेत, मी त्यातील २ वर बिर्याणीचा कुकर ठेवला. नेहमीच्या स्टोव्हवर कुकर तसाच न ठेवता तवा ठेवून त्यावर ठेवावा म्हणजे बिर्याणी करपणार नाही. तसेच कुकरमध्ये सगळ्यात खाली उकडलेल्या बटाट्याच्या चकत्या लावल्यानीपण मदत मिळते.

खिमा अंडी मसाला


आमच्या तात्पुरत्या राहण्याच्या घरातून, भाड्याच्या घरात जायच्या आधी माझ्याकडे बरेच खाण्याचे सामान उरलेले. आणि खूप सारे सामान हलवायचे नसल्यानी काहीतरी बनवण्याच्या प्रयत्नातून हि पाककृती तयार झाली.

खिमा अंडी मसाला
साहित्य
४५० ग्राम खिमा
४ टोमाटो
२ कांदे
३ अंडी
१ चमचा गरम मसाला
१.५ चमचा तिखट
१ चमचा हळद
१/४ चमचा मिरे पूड
२-३ दालचिनी
१/४ चमचा लसूण पेस्ट
१/४ चमचा आले पेस्ट
१/२ चमचा धने पूड
चिमुटभर जिरे पूड
कोथिंबीर
मीठ
तेल

कृती
  • अंडी उकडून घेणे व बाजूला ठेवणे.
  • कढईत तेल गरम करणे व त्यात खिमा घुवून घालणे व गुलाबी रंगावर तेल सुटेपर्यंत भाजणे व बाजूला ठेवणे.
  • त्याच तेलात मिरे पूड, दालचिनी घालुन गुलाबी रंगावर भाजणे.
  • त्यात बारीक चिरलेला कांदा, लसूण पेस्ट, आले पेस्ट घालुन भाजणे.
  • हळद, १ चमचा तिखट, गरम मसाला, धने पूड आणि जिरे पूड घालुन एकत्र करणे व २-३ मिनिट भाजणे व नंतर थंड करणे.
  • मिश्रण मिक्सरमध्ये घालुन बारीक वाटणे.
  • कढईत चमचाभर तेल घालुन वाटलेले मिश्रण, बारीक चिरलेला टोमाटो घालुन शिजवणे.
  • त्यात १/४ वाटी पाणी, मीठ आणि भाजलेला खिमा घालुन पूर्ण शिजेपर्यंत व सुकेपर्यंत शिजवणे
  • अंडी किसने व त्यात हळद, तिखट आणि मीठ घालुन एकत्र करणे.
  • खिमा वाढताना त्यावर वरील अंड्याचे मिश्रण व बारीक चिरलेली कोथिंबीर घालुन खायला देणे.

टीप
किसलेल्या अंड्यांच्याऎवजी चीज किवा पनीरपण वापरता येईल.

हिरवे सॅलेड


इथे आल्यापासून वेग वेगळे समान खूप पटकन मिळते म्हणून मी थोडा वेगळा प्रयोग करायचा ठरवला. इथे माझा पहिला सॅलेड बनवायचा प्रयोग देत आहे.

हिरवे सॅलेड
साहित्य
१० हिरव्या लेट्युसची पाने
१/२ वाटी ग्रेप टोमाटो
१/२ अननस
१/४ वाटी कॉर्न
१० पिकल्ड काकडी
५ पिकल्ड मिरची
१/२ चमचा ओरिगानो
२.५ चमचा रांच ड्रेसिंग
मीठ

कृती
  • कॉर्न उकळत्या पाण्यात किंवा मायक्रोवेव्हमध्ये ५ मिनिट शिजवून घेणे. त्यातील पाणी ओतून बाजूला ठेवणे.
  • लेट्युस बारीक चिरणे.
  • ग्रेप टोमाटो अर्धे चिरून लेयुसमध्ये घालणे.
  • त्यात अननस बारीक चिरून, पिकल्ड काकडीचे तुकडे अर्धे करून घालणे.
  • त्यात बारीक चिरलेली पिकल्ड मिरची आणि कॉर्न घालुन एकत्र करणे.
  • त्यात रांच ड्रेसिंग, ओरिगानो आणि मीठ घालुन एकत्र करणे.

टीप
एकदम सोप्पा, पौष्टिक आणि चविष्ठ पदार्थ आहे. रांच ड्रेसिंग आणि ओरिगानो एकदम चांगला लागत होता. अजून वेगवेगळ्या भाज्या, फळे आणि ड्रेसिंग वापरायचा बेत आहे.

वाढदिवसाचा चॉकलेट केक


मला अगदी पहिल्यापासून चॉकलेटच आईसिंग फार आवडायचं. प्रत्येक वेळी वाटायचं की आईसिंग एकदम बेकरीवाल्यांसारख कधीतरी बनवता यायला पाहिजे. प्रत्येक वेळी वाटायचं की त्यात काहीतरी कला आहे जी जमण जरा मुश्कील असेल. पण हा केक करताना कळला की जर थोडासा सय्यम आणि त्याची छोटीशी युक्ती माहिती असेल तर खूप सोप्पं आहे.

वाढदिवसाचा चॉकलेट केक
साहित्य
७ चमचे लोणी
१ वाटी पिठी साखर
३ अंडी
मीठ चवीपुरते
१/२ वाटी मैदा
३००ग्राम चॉकलेट
८ चमचे कोको पूड

कृती
  • एका भांड्यात पाणी उकळवून त्यावर दुसरे भांडे ठेवीन १००ग्राम चॉकलेट वितळवणे. त्यात ४ चमचे कोको पूड घालुन ढवळून बाजूला ठेवणे.
  • दुसऱ्या भांड्यात ६ चमचे लोणी आणि १/२ वाटी पिठी साखर घालुन फेटून घेणे.
  • त्यात वितळवलेले चॉकलेट घालुन पुन्हा फेटणे.
  • दोन भांड्यात अंड्याचे पांढरे आणि पिवळे वेगवेगळे करणे.
  • लोणी आणि चॉकलेट मिश्रणात एकावेळी एक एक अंड्याचे पिवळे घालत फेटून घेणे.
  • मैदा चाळून बाजूला ठेवणे.
  • दुसऱ्या भांड्यात अंड्याचे पांढरे आणि मीठ एकत्र करून चांगले फेटून घेणे.
  • चॉकलेटच्या मिश्रणात एका वेळी एक चमचा अंड्याचे पांढरे आणि एक चमचा मैदा असे घालत अलगद एकत्र करणे.
  • ओव्हन १८०C/३५०F वर गरम करणे.
  • केकच्या भांड्याला तेलाचा हात लावून त्यात केकचे मिश्रण ओतणे.
  • केक १८०C/३५०F वर ४५ मिनिट भाजणे व रात्रभर थंड होण्यासाठी बाहेर ठेवणे.
  • दुसऱ्यादिवशी एका भांड्यात पाणी गरम करून त्यावर काचेचे भांडे ठेवणे. त्यात उरलेले लोणी आणि चॉकलेट घालुन एकत्र वितळवणे
  • दुसऱ्या भांड्यात उरलेली साखर आणि अर्धा वाटी पाणी घालुन उकळवणे.
  • आच एकदम मंद करून त्यात वितळवलेले चॉकलेट-लोणी आणि उरलेली कोको पूड घालुन शिजवणे.
  • थोडेसे हातावर घेवून मिश्रण सेट होतंय का ते बघणे. झालेतर आईसिंग तयार आहे.
  • गरम गरम आईसिंग केकच्या मध्यभागावर ओतून पूर्ण केकवर पसरवणे.
  • बटर आईसिंग आणि चॉकलेटच्या तुकड्यांनी सजवणे.

टीप
एकदम बरोबर वाचलंय! :) केकमध्ये बेकिंग सोडा किंवा बेकिंग पूड लागत नाही. :)
मी हे आई बाजूला असताना बनवला त्यामुळे तिच्या मार्गदर्शन आणि सय्यम वापरून मी ४ चमचे कोको पूड २००ग्राम चॉकलेटसाठी वापरून हे आईसिंग बनवले. पण जर आईसिंग पातळ असेल तर त्यात अजून कोको पूड घालता येईल. आणि जर आईसिंग घट्ट असेल तर थोडे गरम पाणी घालता येईल. आईसिंग थंड झाल्यावर आईसिंग सारखे पाहिजे, पातळ किंवा जास्त घट्ट नको.

Related Posts Plugin for WordPress, Blogger...

  © माझे स्वयंपाक प्रयोग | Template Recipes by Emporium Digital

TOP