लेमन शिफॉन केक

Read English Version

मला आता आठवत पण नाही कि मी हा केक कधी आणि कसा बनवण्याचे थरवले. बहुदा मी जेंव्हा हलका आणि मऊसर केक करण्याचा प्रयोग करताना हा केक बनवला असेल. पण त्यानंतर मी बर्याच वेळा हा केक बनवला आणि प्रत्येक वेळा एकदम हिट होता :) आठवड्यापूर्वी कॉस्कोमधून लेमन क्रीम आणि व्हाईट चॉकलेट वाले बदाम आणले आणि मला ह्या केकची आठवण झाली


साहित्य
१.५ वाटी - १.५ टेबल स्पून मैदा
१.५ टेबल स्पून कॉर्न फ्लौर
१/४ टी स्पून बेकिंग सोडा
१/४ टी स्पून मीठ
१.५ वाटी + १ टेबल स्पून साखर
२ लिंबू
३ अंडी
१/२ वाटी तेल
१/२ टी स्पून व्हॅनिला इसेन्स
१/४ टी स्पून क्रीम ऑफ टारटर

कृती

• ओव्हन ३२५F/१६५C वर गरम करणे
• मैदा, कॉर्न फ्लौर, बेकिंग सोडा, मीठ आणि १.५ वाटी साखर एकत्र करणे
• अंड्याचे पांढरे आणि पिवळे वेगळे करणे
• अंड्याचे पांढरे फोमी होईपर्यंत फेटणे
• त्यात क्रीम ऑफ टारटर घालून सॉफ्ट पिकस येईपर्यंत फेटणे
• त्यात उरलेली १ टेबल स्पून साखर घालून हार्ड पिक्स येईपर्यंत फेटणे व मिश्रण बाजूला ठेवणे
• एका भांड्यात अंड्याचे पिवळे, लिंबाचे साल किसून, १ टेबल स्पून लिंबाचा रस, तेल,व्हॅनिला इसेन्स आणि २/३ वाटी पाणी घालून फेटणे
• त्यात मैदयाचे मिश्रण घालून फेटणे
• १/३ अंड्याचे पांढरे मिश्रण एका वेळी घालून हलक्या हातानी ढवळणे, असे सगळे मिश्रण एकत्र होईपर्यंत करणे
• ८. ५ इंचाचे लोफच्या भांड्याला लोण्याचा हात लावून त्यात मिश्रण घालणे
• ३२५F/१६५C वर ४५ मिनिट केक भजने व नंतर बाहेर काढून थंड होऊ देणे

टीप
मैदा आणि कॉर्न स्टार्च मोजताना पहिल्यांदा १.५ टी स्पून कॉर्न फ्लौर वाटीत घालणे व त्यात नंतर मैदा घालून मोजणे. केक फ्लौर पण ह्याऐवजी वापरता येईल.

बदाम पिस्ता क्रेझीन बिस्कॉटी

Read English Version

मी हल्लीच इकडल्या लायब्ररीची जादू आणि ताकद बघितली. लायब्ररीत पाय टाकताच मला कळलेले कि मी इथून भरपूर पुस्तके घेणार आहे. त्या आठवड्यात मी ५ पेक्षाही जास्त वेळ घालून वेगवेगळ्या विषयावर ४० पुस्तके घरी आणली :) एका डेझर्टच्या पुस्तकात हि कृती होती आणि पहिल्यांदा मी ती साधारण तशीच्या तशी वापरून हे बिस्कॉटी बनवलेले. पण त्यानंतर मी बनवताना मैदा, लोणी वगैरे बरच काही वेगळ्या प्रमाणात वापरले आणि ते एकदम मस्त कुरकुरीत शलेले. आता कमीत कमी एका आठवड्याचे ४ वाजता खाण्याचा खाऊ तयार आहे :)



साहित्य
३/४ वाटी लोणी
२.२५ वाटी साखर
६.२५ वाटी मैदा
२ चमचे बेकिंग पूड
२ लिंबाची साल किसून
४ अंडी
१ वाटी बदाम
१ वाटी पिस्ता
१ वाटी क्रेझीन
२ चमचे बडीशेप
१ चमचा मीठ

कृती

• ओव्हन ३५०F/१७५C वर गरम करणे.
• एका भांड्यात लोणी आणि साखर एकत्र एकजीव होईपर्यंत फेटणे, साधारण एक मिनिट.
• मैदा, बेकिंग पूड, मीठ आणि लिंबाची किसलेली साल त्यात घालून एकत्र घालून फेटणे.
• त्यात एकावेळी एक अंडे घालत फेटणे
• त्यात बदामाचे, पिस्त्याचे तुकडे, क्रेझीन आणि बडीशेप घालून पुन्हा फेटणे
• ओट्यावर थोडा मैदा शिंपडून मिश्रण टाकणे. नीट मळून त्याचे १२ इंचाचे व साधारण १ इंचापेक्षा थोडेसे जास्त उंचीचे २ लांब गोळे बनवणे.
• बेकिंग तव्यावर बटर पेपर घालून त्यावर हे गोळे ठेवणे
• ओव्हनमध्ये ३५०F/१७५C वर ३० मिनिट भाजणे. नंतर १० मिनिट बाहेर थंड होऊ देणे
• धारधार सुरीने त्याचे १/२ इंच रुंदीचे तुकडे करणे
• बेकिंग तव्यावर चिरलेली बाजू वरती ठेवून तुकडे पसरणे व ओव्हनमध्ये ३५०F/१७५C वर २५ मिनिट भाजणे
• बिस्कॉटी थंड होऊ देणे व त्यानंतर डब्यात भरणे

टीप
मी बदाम, पिस्ते आणि क्रेझीन वापरले पण त्याऐवजी कुठलेही नट्स वापरता येतील. ह्यावेळी मी बडीशेप घालायला विसरलेले पण ह्या आही मी ती घातलेली आणि त्यांनी मस्त चव आणि वास आलेला आणि सगळ्यांना खूप आवडलेले
मी फेटण्यासाठी किचनएडचा स्टँडिंग मिक्सर वापरला पण हातातला मिक्सरपण वापरता येईल

पेर बार

Read English Version

मी काल काहीतरी नवीन आणि १-२ तासात तयार होईल असे काहीतरी बेक करायला शोधत होते.शोध लेमन बार, जे मी एका महिन्यापूर्वी बनवलेले त्याच्या वेगळ्या प्रकारावर संपला. लेमन बारमध्ये मला जरा अंड्याची चव आणि वास जास्त वाटलेला त्यामुळे मी कमी अंडे वापरून काहीतरी बनवण्याचे ठरवले. तेंव्हाच मला चीजकेक आणि बार चे फ्युजन बनवण्याचे सुचले. हा माझा सगळ्यात जास्त साहशी प्रयत्न होता कारण मी तो घरी येणाऱ्या मित्रांसाठी केलेला पण नशिबानी हि दिश जमून गेली.


साहित्य
१ वाटी लोणी
२.२५ वाटी साखर
१.५ अंडे
१.५ वाटी मैदा
२.५ वाटी व्हॅनिला इसेन्स
२.७५ वाटी पीकॅन
१२ आउन्स क्रीम चीज
२ पेर
१/२ चमचा जायफळ पूड

कृती

• ओव्हन ३५०F/१७५C वर गरम करणे.
• हातातला मिक्सर वापरून लोणी चांगले फेटून घेणे.
• त्यात २/३ वाटी साखर घालून आणखीन फेटणे.
• त्यात एक चमचा व्हॅनिला इसेन्स, मैदा चाळून घालणे व फेटणे.
• त्यात पीकॅन तुकडे करून मिसळणे.
• ६ इंचाच्या २ बेकिंगच्या भांड्यांना लोण्याचा हात लावणे व त्यात बनवलेले मिश्रण अर्धे अर्धे वाटून पसरवणे.
• ओव्हनमध्ये ३५०F/१७५C वर २२ मिनिट भाजणे.
• भांडी ओव्हनमधून बाहेर काढून ३० मिनिट थंड होऊ देणे
• एका भांड्यात हातातला मिक्सर वापरून क्रीम चीज फेटणे
• त्यात १.५ वाटी साखर, अंडे आणि उरलेला १.५ चमचा व्हॅनिला इसेन्स घालून एकजीव होईपर्यंत फेटणे
• पेरचा मधला भाग कापून टाकून उरलेल्या भागाचे उभे तुकडे करणे व त्यात १ चमचा साखर घालून बाजूला ठेवणे
• ओव्हन ३७५F/१९०C वर गरम करणे.
• बेकिंगच्या भांड्यात क्रीम चीजचे मिश्रण दोन्ही भांड्यात निम्मे निम्मे पसरवणे
• त्यावर पेरचे तुकडे पसरवणे
• पेरच्या तुकड्यांवर जायफळ आणि उरलेली (साधारण एक चमचा) साखर शिंपडणे
• ओव्हनमध्ये ३७५F/१९०C वर ३५ मिनिट भाजणे.
• ओव्हनमधून बाहेर काढून साधारण ३० मिनिट थंड होऊ देणे. त्यानंतर कमीत कमी १ तास फ्रीजमध्ये थंड करून मग चौकोनी तुकडे करून वाढणे

टीप
१.५ अंडे मोजणे जरा अवघड आहे :) पण मी पहिल्यांदा १ अंडे आणि १ चीजचे पाकीट वापरून मिश्रण बनवण्याचा प्रयत्न करत होते पण ते मिश्रण पुरेसे नाही पडले म्हणून मी अजून एक अंडे फेटले आणि त्याचा निम्मा भाग वापरला. त्यामुळे जर दोन भांड्यांच्याऐवजी एक ८-९ इंचाचे भांडे वापरायचे असेल तर एका अंड्याचे मिश्रण कदाचित पुरेसे असेल. त्यासाठी १ अंडे, १ क्रीम चीजचे पाकीट, १ वाटी साखर आणि १ चमचा व्हॅनिला इसेन्स वापरायचा.
मी पीकॅन वापरले कारण माझ्याकडे ते घरीच होते पण कुठलेही नट्स वापरता येईल
मी थोडे जास्त पिकलेले पर वापरले त्यामुळे ते चांगले मऊ होते आणि त्यामुळे शेवटी तुकडे कापताना निघून येत नाहीत.
ओव्हनमधून शेवटी जेंव्हा डेझर्ट बाहेर काढतो तेंव्हा कदाचित थोडे पाणी वरती दिसेल पण काळजी करू नये, ते थंड झाल्यावर सेट होते

लिंबू आणि अ‍ॅप्रिकॉटचा केक

Read English Version

मी अजॉयच्या वाढदिवसासाठी पाउंड केक सारखा पण थोडा जास्त रिच असा केक शोधात होते. त्याला प्लेन केक हा प्रकार फार आवडतो त्यामुळे त्याच्यासारखाच पण थोडा भारी :) असा हा केक मी माझ्याकडच्या एका पुस्तकातील कृती बघून आणि थोडा आमच्या चवीनुसार प्रमाण बदलून केला. मला ह्या केक मध्ये लिंबू नाहीतर संत्र वापरायाचच होत, इतके दिवस फूड नेटवर्कवरच्या कार्यक्रमात त्यांच्या सालीचा वापर करताना बघून प्रत्यक्षात कसा लागत हे जरा जाणून घ्यायचं होत त्यामुळे ह्यात मी लिंबाचा वापर केलाय


साहित्य
३ वाटी मैदा
१७५ ग्राम अ‍ॅप्रिकॉट
१ वाटी बदाम
१.२५ वाटी पिस्ता
२/३ वाटी उभे चिरलेले बदाम
२ वाटी साखर
१ + १/३ वाटी लोणी
१.२५ चमचा बेकिंग पूड
३ अंडी
१/३ चमचा मीठ
१ मोठं लिंबू

कृती

• ओव्हन १८०C/३५०F वर गरम करणे.
• एका मोठ्या भांड्यात लोणी आणि १.५ वाटी साखर एकत्र करून घोटणे.
• मैदा आणि बेकिंग पूड एकत्र ३-४ वेळा चाळून घेणे व लोणी-साखरेच्या मिश्रणात घालणे.
• त्यात अंडी, मीठ, लिंबाची साल किसून, १/२ वाटी कोमट पाणी घालुन पुन्हा एकत्र फेटणे.
• त्यात बारीक चिरलेले अ‍ॅप्रिकॉट, १ वाटी बदाम पूड करून आणि १ वाटी पिस्ता बारीक चिरून अलगद एकत्र करणे.
• लोफच्या किंवा केक बनवायच्या कुठल्याही आकाराच्या भांड्याला लोण्याचा हात लावून पार्चमेंट कागद खाली व बाजूना लावणे. त्यात केकचे मिश्रण चमच्यानी घालुन एकसारखे करणे.
• उरलेले पिस्ता आणि चिरलेले बदाम वर घालुन ते अलगद मिश्रणात दाबणे
• केक ७५ मिनिट १८०C/३५०F वर भाजणे. साधारण ५० मिनिट भाजल्यावर त्यावर अल्युमिनियमचा कागद वरून लावणे व उरलेला वेळ भाजणे.
• ओव्हनमधून केक बाहेर काढून १० मिनिट थंड होण्यासाठी बाहेर ठेवणे.
• त्यावेळात मध्यम आचेवर लिंबाचा रस आणि उरलेली साखर एकत्र करून ती विरघळेपर्यंत व त्यानंतर थोडे बुडबुडे येईपर्यंत शिजवणे.
• मिश्रण गरम असताना केकवर ओतणे व केक अलगद बाहेर काढणे व थंड होण्यासाठी ठेवणे.

टीप
केक भाजताना मध्ये अल्युमिनियमचा कागद लावल्यानी वर लावलेले बदाम आणि पिस्ते जास्त भाजून करपत नाहीत.

आंबा मुज केक

Read English Version

हार्दिक आणि श्वेनीच्या फेरवेल पार्टीमध्ये एक आंबा मुज केक आणलेला. मला तो फार आवडलेला आणि त्याचा पहिला घास खातच मला तो स्वतः बनवण्याची फार इच्छा झालेली. केके इतका छान होता की बरेच जण त्यासाठी सिअ‍ॅटल सोडून जाव म्हणजे फेरवेल पार्टीमध्ये हा केक खाता येईल असा पण विनोद करायला लागलेले. मी बराच वेळ गप्पा होते तेंव्हा कोणीतरी म्हणाले की शीतलला त्याची गरज नाही कारण ती तर हा केक घरीच बनवेल. मी तेंव्हा काही बोलले नाही कारण माझ्या लक्षात आला की माझ्याकडून जरा जास्तच अपेक्षित केलं जातंय, पण माझा विचार एकदम पक्का झाला की हा केक वीकएंडलाच करून बघायचा. आणलेल्या केकमध्ये आंबा इसेन्स वापरला होता, मी आमरस वापरायचा ठरवला. चव खूपच छान आलीये. आता सगळ्यांना घरी बोलावून एकदा हमी भरून घ्यायला पाहिजे.


साहित्य
१ वाटी मैदा
३ अंडी
२०० ग्राम क्रीम चीज
३ वाटी क्रीम
५ वाटी आमरस
१ चमचा कॉर्न फ्लौर
२ चमचे दुधाची पूड
१/४ चमचा बेकिंग पूड
१.७५ वाटी साखर
४ चमचे जिलेटीन
४ चमचे लिंबाचा रस
२ चमचा तेल
१.२५ चमचा व्हॅनिला ईसेन्स
१/४ चमचे मीठ

कृती

• ३५०F/१७५C वर ओव्हन गरम करणे
• मैदा, कॉर्न फ्लौर ५ वेळा एकत्र चाळून घेणे. त्यात दुधाची पूड, बेकिंग पूड घालुन पुन्हा २ वेळा एकत्र चाळून घेणे.
• मिक्सरमध्ये अंड्याचे पांढरे आणि मीठ चाळून फोम येईपर्यंत फेटून घेणे.
• त्यात १/४ वाटी साखर घालुन घट्ट होईपर्यंत फेटून घेणे.
• दुसऱ्या भांड्यात अंड्याचे पिवळे, १/२ चमचे व्हॅनिला ईसेन्स आणि १/४ वाटी साखर घालुन साखर विरघळेपर्यंत फेटणे.
• त्यात तेल आणि अजून अर्धा चमचा व्हॅनिला ईसेन्स घालुन ३० सेकंद फेटणे.
• अंड्याचे पाढरे त्यात घालुन अलगद एकत्र करून घेणे.
• मैद्याचे मिश्रण १/३ वाटा एकावेळी घालत अलगद एकत्र करणे. जास्त ढवळू नये.
• ९ इन्च स्प्रिंगफॉर्म भांड किंवा कुठलेही ९ इन्च गोलाकार भांडे घेऊन त्याला खाली पार्चमेंट कागद घालुन लोणी लावणे. त्यावर केकचे मिश्रण ओतणे.
• केक ३५०F/१७५C वर ओव्हनमध्ये २० मिनिट भाजून घेणे.
• लगेच थंड होण्यासाठी जाळीच्या रॅकवर उलटवून ठेवणे.
• तेवढ्या वेळात एका भांड्यात १/४ वाटी साखर आणि १/४ वाटी पाणी घालुन ढवळत उकळवणे. अजून २-३ मिनिट उकळू देणे. भांडे खाली घेऊन त्यात १/४ चमचा व्हॅनिला ईसेन्स घालुन ढवळणे. थंड होण्यासाठी बाजूला ठेवणे.
• साखरेचे पाणी थंड होईपर्यंत एका भांड्यात क्रीम चीज, १ वाटी साखर आणि २ चमचे लिंबाचा रस घालुन एकत्र फेटणे.
• मायक्रोवेव्हमध्ये १/४ वाटी पाणी १ मिनिट गरम करणे. त्यात २ चमचे जिलेटीन घालुन पूर्ण विरघळेपर्यंत ढवळणे. क्रीम चीजच्या मिश्रणात घालुन फेटून घेणे.
• दुसऱ्या भांड्यात क्रीम घट्ट होईपर्यंत फेटून घेणे. अलगद पणे क्रीम चीजच्या मिश्रणात ढवळणे.
• त्यात ३ वाटी आंबा रस घालुन एकजीव होईपर्यंत ढवळणे.
• केकला आडवे कापून २ थर बनवणे. खालचा थर ९ इंच स्प्रिंगफॉर्म भाण्यात घालणे. त्यावर अर्धे साखरेचे पाणी ब्रशनी लावणे. आंब्याचे अर्धे मिश्रण त्यावर ओतून सपाट करून घेणे. त्यावर दुसरा केकचा थर ठेवणे. उरलेले अर्धे साखरेचे पाणी ब्रशनी लावून घेणे. उरलेले आंब्याचे मिश्रण ओतून सपाट करणे. फ्रीजमध्ये १ तास थंड करणे.
• केक थंड होऊन ४५ मिनिट झाल्यावर एका भांड्यात उरलेला २ वाटी आमरस, २ चमचे लिंबाचा रस घालुन गरम मध्यम आचेवर गरम करणे. उकळू देऊ नये अथवा चव बिघडेल. मिश्रण बाजूला काढणे.
• मायक्रोवेव्हमध्ये १/४ वाटी पाणी १ मिनिट गरम करणे. त्यात २ चमचा जिलेटीन घालुन विरघळवणे.हे मिश्रण आंब्याच्या गरम मिश्रणात घालुन चांगले ढवळणे. थोडे थंड होण्यासाठी बाजूला ठेवणे व पुन्हा ढवळून घेणे.
• फ्रीजमधून केक बाहेर काढून त्यावर हे मिश्रण एकसारखे ओतून थर देणे.
• केक फ्रीजमध्ये कमीत कमी ८ तास जमवण्यासाठी ठेवणे. भांड्याची रिंग काढून वरून फळे घालुन तुकडे खायला देणे.

टीप
केकचा दुसरा थर थोडा छोटा असावा. माझा केक फुलल्यामुळे कापल्यावर आपोआपच थोडा छोटा झाला. तसा नसेल तर बाजूनी थोडा कापून घेणे म्हणजे मग केक कापल्यावर तो थर बाहेरून दिसणार नाही.
केक जर भांड्यातच थंड झाला तर चिकटून बसेल त्यामुळे लगेच थंड करण्यासाठी जाळीच्या रॅकवर काढणे महत्वाचे आहे.
मी ह्यात देसाई बंधूंचा गोड आमरस वापरलाय त्यामुळे आंब्याचा स्वतः रस काढल्यास त्यात साखर घालायला विसरू नये.
जरी कृती थोडी लांब असली तरी एकदा बनवल्यावर लक्षात येईल की इतकी किचकट नाहीये. आणि शेवटी बनणारा केक फारच सुंदर होईल त्यामुळे कष्ट व्यर्थ नाही जाणार. :)

रेड वेल्वेट कपकेक

Read English Version

आई बाबा इथे होते तेंव्हाच मी हे बनवलेले पण तेंव्हा जरा सुके झालेले आणि रंग पण बरोबर आलं नव्हता. आज बनवताना मी थोडा प्रमाण बदललं आणि आता ते एकदम सुंदर झालेत. मी त्यांना पांढरे चॉकलेट क्रीम चीजचे आईसिंग केलं


साहित्य
२.५ वाटी मैदा
१/४ चमचा कोको पूड
१/४ चमचा बेकिंग सोडा
१/४ चमचा मीठ
१.५ वाटी साखर
१ अंड
१.५ वाटी तेल
२ चमचे दही
१ चमचा पातळ लाल खाण्याचा रंग
१/४ चमचा व्हिनेगर
१/४ चमचा व्हॅनिला ईसेन्स

कृती

• ३५०F/१७५C वर ओव्हन गरम करणे
• मैदा व कोको पूड चाळून भांड्यात घेणे.
• त्यात बेकिंग सोडा, मीठ आणि साखर घालुन एकत्र करणे.
• दुसऱ्या भांड्यात अंड, तेल, लाल रंग, व्हॅनिला ईसेन्स आणि व्हिनेगर घालणे.
• एका वाटीत दही घेऊन त्यात उरलेल्या मापाचे पाणी घालणे. चमच्यानी ढवळून अंड, तेल मिश्रणात घालणे
• मिश्रण कमी वेगावर एकजीव होईपर्यंत फेटून घेणे.
• त्यात मैदा-कोको पूडचे सर्व मिश्रण प्रत्येक वेळी एक वाटी भर घालुन एकजीव होई पर्यंत फेटून घेणे.
• कपकेकच्या भांड्यात कागदी कप घालुन १२ कप मध्ये मिश्रण घालणे.
• केक ३५०F/१७५C वर ओव्हनमध्ये २२ मिनिट भाजणे.

टीप
मी नेहमी साधारणतः ७०% केकचा भाजण्याचा वेळ झाला की त्याला वळवून ठेवते (ह्या केक साठी साधारणतः १५ मिनिट) त्यामुळे केके सगळ्याबाजुनी एकदम मस्त भाजला जातो.

चॉकलेटमध्ये बुडवलेली काजू पिस्ता कुकी

Read English Version

मी उद्याच्या ट्रीपसाठी ह्या कुकीज बनवल्या. प्रवासात एकदम उत्तम नाश्ता. ह्या कुकीजची प्रेरणा मी अजॉयनी कॉसकोतून आणलेल्या शॉर्ट ब्रेडवरून घेतलीये.


साहित्य
३ वाटी मैदा
२ वाटी लोणी
१.२५ वाटी साखर
१ अंड्याचे पिवळे
२ चमचा व्हॅनिला ईसेन्स
१/२ वाटी काजू
१/२ वाटी पिस्ता
१ वाटी सेमी स्वीट चॉकोचिप्स
१/४ वाटी पांढर्या चॉकोचिप्स
५ चमचा शॉर्टनिन्ग

कृती

• एका भांड्यात लोणी आणि साखर घालुन फेटणे.
• त्यात अंड्याचे पिवळे आणि व्हॅनिला ईसेन्स घालुन पुन्हा फेटणे.
• काजू मिक्सर मध्ये वाटून बारीक पूड करणे. वर बनवलेल्या मिश्रणात ही पूड घालणे.
• मैदा चाळून वरच्या मिश्रणात घालणे. घट्ट एकजीव होईपर्यंत मिश्रण चांगले ढवळणे
• लिंबाच्या आकाराचे लाडू बनवून फ्रीजमध्ये १ तास थंडे होण्यासाठी ठेवणे.
• ३७५F/१९०C वर ओव्हन गरम करणे.
• पिस्त्यांचे बारीक तुकडे करणे.
• प्रत्येक लाडू तळव्यावर घेऊन हलका दाबून जाड चकत्या बनवणे. बारीक चिरलेले पिस्त्यांचे तुकडे अर्ध्या कुकीवर पसरवणे. हलके दाबून पिस्ते कुकीमध्ये ढकलणे.
• पार्चमेंट पेपर बेकिंग तव्यावर घालुन कुकी ठेवणे. प्रत्येक कुकीत साधारण १ इंच जागा सोडणे.
• ३७५F/१९०C वर ओव्हनमध्ये १२ मिनिट भाजणे.
• अंदाजे ५-१० मिनिट कुकी थंड होण्यासाठी बाजूला ठेवणे.
• एका भांड्यात सेमीस्वीट चॉकोचिप्स आणि ४ चमचे शॉर्टनिन्ग घालुन १ मिनिट मायक्रोवेव्ह करणे. मध्ये ३० सेकंद झाल्यावर एकदा ढवळणे. मिश्रण चकचकीत आणि एकजीव होईपर्यंत चांगले ढवळणे.
• बेकिंग तव्यावर पार्चमेंट पेपर पसरवणे. प्रत्येक कुकीचा पिस्ते नसलेला भाग चॉकोलेटमध्ये बुडवून बेकिंग तव्यावर ठेवणे.
• एका भांडयामध्ये पांढर्या चोकोचिप्स आणि उरलेले १ चमचा शॉर्टनिन्ग घालुन ३० सेकंद मायक्रोवेव्ह करणे. मिश्रण चांगले एकजीव आणि चकचकीत होईपर्यंत ढवळणे. एका पायपिंग बॅगमध्ये हे चोकोलेट घालुन आधीच्या चोकोलेटवर झिग झॅग रेषा काढणे. चोकोलेट साधारण एक तास सेट होण्यासाठी ठेवणे.

टीप
जर मायक्रोवेव्ह नसेल तर एका भांड्यात उकळत्या पाण्यावर चोकोलेट आणि शॉर्टनिन्ग घातलेले भांडे ठेवून ढवळणे. मिश्रण एकजीव होईपर्यंत ढवळणे. मायक्रोवेव्ह करणे खूप सोपे असलेल्याने मी तेच जास्त प्रेफर करते.

स्ट्रॉबेरी क्रेप

Read English Version

मी हे क्रेप्स एकंदर एक महिन्यापूर्वी बनवलेले पण त्यांच्याविषयी पूर्णतः विसरून गेलेले. काल एकदम लक्षात आल्यावर मी त्याचे फोटो शोधायला चालू केले. आणि मग लक्षात आले की तेंव्हा माझा कॉम्प्युटर बिघडला असल्यानी ते मी अजॉयच्या कॉम्प्युटरवर ठेवले आणि विसरून गेले. आज हि सोपी, सहज अशी चविष्ठ पाककृती इथे देत आहे.


साहित्य
३ वाटी स्ट्रॉबेरी
१/२ वाटी मैदा
१.५ वाटी दुध
१/२ वाटी वितळवलेले लोणी
२ अंडी
१/२ व्हॅनिला ईसेन्स
२ चमचा साखर
मीठ चवीपुरते

कृती

• एका भांड्यात स्ट्रॉबेरी बारीक चिरून त्यात एक चमचा साखर घालुन बाजूला ठेवणे.
• दुसऱ्या भांड्यात मैदा, दुध, उरलेली एक चमचा साखर, लोणी, व्हॅनिला ईसेन्स, अंडी आणि मीठ घालुन हॅन्ड मिक्सर वापरून फेसणे
• तवा गरम करून त्यावर डावभर मिश्रण घालुन तवा तिरका करून पातळ पसरवणे
• मध्यम आचेवर क्रेप दोन्ही बाजूनी गुलाबी होईपर्यंत भाजणे व एका ताटात काढणे
• आता ह्या क्रेपवर २ चमचा स्ट्रॉबेरीचे सारण पसरवून रोल बनवणे. पाहिजे असल्यास थोडी पिठीसाखर शिंपडून खायला देणे.

टीप
मी क्रेप भाजण्यासाठी नॉनस्टिक तव्याचा वापर केला त्यामुळे मला तेल बिलकुल वापरावे लागले नाही.

चॉकलेट केक

Read English Version

ह्या आठवड्यात मला २ केक बनवायचे होते. एक फॉनडन्टच्या क्लाससाठी आणि एक फुलांच्या क्लाससाठी. हा केक मी फुलांनी सजवण्यासाठी बनवला. मला तो पांढऱ्या फुलांनी सजवायचा होता पण माझा आईसिंग जरा खराब झाल, मग मी हा केक महिनाभर क्लासमध्ये शिकताना बनवलेल्या फुलांनी सजवला. इथे हि सोपी केकची पाककृती देत आहे.


साहित्य
१.५ वाटी मैदा
१ वाटी लोणी
१ वाटी साखर
१ चमचा कोको पूड
१ स्पून बेकिंग पूड
३ अंडी

कृती

• ओव्हन ३२५F/१६०C वर गरम करणे
• मैदा, कोको पूड आणि बेकिंग पूड चाळून एका भांड्यात घेणे
• त्यात लोणी वितळवून, साखर आणि अंडी घालुन चांगले फेटून घेणे.
• केकच्या भांड्याला तेल किंवा लोणी लावून त्यात केकचे मिश्रण घालणे
• केक ३२५F/१६०C वर भाजणे
• ओव्हनमधून केक बाहेर काढून ५ मिनिट थंड करणे. त्यानंतर केक तटावर काढून पूर्णपणे थंड करणे

टीप

मी हा केक दोनवेळा आयताकृती भांड्यात बनवला. दोन केकच्यामध्ये चॉकलेट वितळवून घालुन तो जोडला व उंच बनवला. त्यावर चॉकलेटचे बटर आईसिंग आणि रॉयल आईसिंगची फुलं लावून सजवला.

प्लेन केक

Read English Version

मी हा सोपा केक माझ्या फॉनडन्ट केक डेकोरेशन कलाससाठी बनवलेला. चवीला उत्तम अगदी आईसिंग बरोबर किंवा तसाच


साहित्य
५ वाटी मैदा
२.५ वाटी लोणी
२.५ वाटी साखर
२ चमचे बेकिंग पूड
१.५ चमचे लिंबू रस
४ अंडी

कृती

• ओव्हन ३२५F/१६०C वर गरम करणे
• मैदा आणि बेकिंग पूड चाळून एका भांड्यात घेणे
• त्यात साखर, लोणी वितळवून, लिंबू रस, आणि अंडी घालुन फेटणे.
• केकच्या भांड्याला तेल किंवा लोणी लावून त्यात केकचे मिश्रण घालणे
• केक ३२५F/१६०C वर भाजणे
• ओव्हनमधून केक बाहेर काढून ५ मिनिट थंड करणे. त्यानंतर केक तटावर काढून पूर्णपणे थंड करणे. असाच किंवा आईसिंग करून वाढणे

टीप
केक असाच खाताना बरोबर लागत होता पण आईसिंग केलेला थोडा जास्त गोड लागत होता. त्या मुळे पुढच्यावेळी मी जर आईसिंग करणार असेल तर थोडी साखर कमी वापरेन

नटी बटरस्कॉच चॉकलेट केक

Read English Version

काल मी माझ्या केक डेकोरेशनच्या क्लासमध्ये घेऊन जायला केकसाठी पाककृती शोधत होते. प्रथम मला वाटले की कुठला तरी सोपा आणि सरळ असा केक बनवून काम संपवावे पण जशी मी स्वयंपाकगृहात गेले तसे मला वाटले की काहीतरी नवीन माझ्याकडच्या पुस्तकातून प्रयत्न करावे. त्या पुस्तकातील मला पीनटबटर केकची रेसिपी मला खूप आवडली पण पीनट बटर माझ्याकडे नव्हत म्हणून मग मी ही रेसिपी तयार केली. केक फारच सुरेख आणि चविष्ट झाला आणि त्याचा सुगंध इतका सुरेख होता की क्लासमध्ये सगळे लोक मला विचारात होते या केकविषयी.


साहित्य
४ वाटी मैदा
२.५ वाटी लोणी
१ वाटी हेजलनट
१ वाटी बदाम
१.५ वाटी साखर
३ अंडी
१ वाटी दुध
२ वाटी बटरस्कॉच चॉकोचीपस
२ चमचे बेकिंग पूड
मीठ चवीपुरतं

कृती

• ओव्हन ३५०F/१८०C वरती गरम करणे.
• हेजलनटस आणि बदाम मिक्सरमध्ये वाटून पूड करणे.
• लोणी आणि साखर एकत्र करून फेटून घेणे.
• त्यात हेजलनट आणि बदामची पूड टाकून पुन्हा फेटणे.
• आता एक एक अंडे टाकून प्रत्येक वेळा चांगले फेटणे.
• मैदा आणि बेकिंग पूड एकत्र २ वेळा चाळून घेणे. त्यात मीठ घालणे..
• लोणी-साखर-अंध्याच्या मिश्रणात मैदा-बेकिंग पूड मिश्रण आणि दुध असे थोडे थोडे घालुन अलगद एकत्र करणे.
• बटरस्कॉच चॉकोचिप्स मायक्रोवेव्हमध्ये १ मिनिट गरम करून ढवळणे. केकच्या मिश्रणात अलगद घालुन मिसळणे.
• केकच्या भांड्याला तेल किंवा लोणी लावून त्यात पारचमेंट कागद घालुन त्यालापण तेल किंवा लोणी लावणे. केकचे मिश्रण त्यात अर्ध्या पातळीपर्यंत भरणे
• केक ओव्हनमध्ये ३५०F/१८०C वरती ४० मिनिट भाजणे.
• आईसिंगनी सजवणे किंवा तसाच खायला देणे.

टीप
मी दोन ८ इंचाची गोल भांडी केक भाजण्यासाठी वापरली पण मला वाटते की हा केक एका ८ इंचाच्या आणि एका ६ इंचाच्या भांड्यात जास्त छान झाला असता.
मी एका केकला माझ्या केक डेकोरेशनच्या क्लासमध्ये बटर आईसिंग केल आणि एक केक तसाच खाला. दोन्ही खूप चविष्ट होते पण मी नंतर कधी आईसिंगवाला केक बनवणार असेल तर ह्यात डार्क चॉकलेट किंवा कमी साखर वापरेन
हल्लीच मला कळले की ओव्हन कमीत कमी १५ मिनिट आधी गरम करून ठेवला तर तो सगळीकडे एकसारखा गरम होतो आणि केक सगळ्या बाजूनी चांगला फुलतो. माझा केक फक्त मध्ये न फुलता सगळीकडे एकसारखा फुलाला आणि मला तो केक डेकोरेशनच्या वेळी थोडा पण कापावा नाही लागला.

लिंबू आणि खजुराचा कपकेक

Read English Version

हल्लीच मी फूड नेटवर्क बघायला चालू केला आणि तिथे काही कार्यक्रम चांगले असतात. त्यातील एक म्हणजे कपकेक वॉर्स. त्यात भाग घेणाऱ्या लोकांच्या कल्पनाशक्ती आणि त्यातून निर्माण होणारे कपकेक्स हे एकदम बघण्यासारखे असतात. त्यातूनच प्रेरणा घेऊन मी हा पदार्थ केला.


साहित्य
४ वाटी मैदा
३ वाटी खजूर
२ वाटी दुध
१ वाटी लोणी
२ वाटी क्रीम
१ वाटी आईसिंग शुगर
१.५ वाटी साखर
२ अंडी
२ लिंबू
१ चमचा बेकिंग पूड
१/४ चमचा बेकिंग सोडा
मीठ

कृती

• १ वाटी खजूर आणि दुध मिक्सरमध्ये वाटून बाजूला ठेवावेत
• लोणी आणि साखर हॅन्ड मिक्सर वापरुन फेटणे.
• त्यात अंडी घालुन पुन्हा एकजीव होईपर्यंत फेटणे
• मैदा, बेकिंग पूड, बेकिंग सोडा आणि मीठ चाळून घेणे
• लोणी-साखर-अंडी ह्याच्या मिश्रणामध्ये ते आणि दुध-खजूर मिश्रण थोडे थोडे घालुन फेटणे.
• आता त्यात उरलेले खजूर बारीक चिरून, एका लिंबूच साल किसून आणि त्याच लिंबूचा रस घालुन अलगद ढवळणे.
• ओव्हन ३५०F/१८०C वर गरम करणे
• कपकेकच्या भांड्यांमध्ये कागदाचे केककव्हर घालून त्यात केकचे मिश्रण २/३ पर्यंत भरणे
• केक ओव्हनमध्ये ३५०F/१८०C वर २५ मिनिटं भाजणे व नंतर पूर्णपणे थंड होण्यासाठी बाजूला ठेवणे
• एका भांड्यात क्रीम आणि आईसिंग शुगर एकत्र करणे.
• हॅन्ड मिक्सर वापरुन घट्ट होईपर्यंत फेटणे
• प्रत्येक केकवरती थोडे थोडे क्रीम चमच्याने घालणे किंवा पाईपिंग पिशवीत घालून सजवणे. त्यावर उरलेल्या लिंबूच साल किसून घालणे.

टीप
मी बटर पेपरचा कोन बनवून त्यांनी केक वर आईसिंग केला कारण माझ्याकडे पाईपिंग पिशवी नव्हती. चांगला मार्ग होता तो. थोड्या केक वर मी चमच्यानी पण आईसिंग लावलं.
क्रीम फेताण्यासाठी हॅन्ड मिक्सर फार उपयोगी पडतो. एकदम सोप, लवकर आणि खात्रीदायक आईसिंग बनत

क्रेझिन पॅन केक

Read English Version

मी असे पॅन केक बरेचवेळा बनवतीये, प्रत्येक वेळा वेगळे फळ. पण आज जेंव्हा मी सुके क्रॅनबेरी घालुन ते बनवले तेंव्हा असे वाटले की हे पॅन केक मिश्रण फक्त त्याच्यासाठीच बनले आहे. त्यामुळे इथे मी आज ते पोस्ट करतीये.


साहित्य
२ वाटी मैदा
१ चमचा साखर
१.५ चमचे बेकिंग पूड
१/२ वाटी लोणी वितळवून
२.५ वाटी दुध
१ अंडे
२ चमचे व्हॅनिला ईसेन्स
१ वाटी क्रेझींस
मीठ
तेल

कृती

• अंडे आणि साखर चांगले फेटून घ्यावे
• त्यात दुध आणि वितळवलेले लोणी घालुन फेटावे
• आता त्यात व्हॅनिला ईसेन्स, चाळून घेतलेला मैदा, बेकिंग पूड आणि मीठ घालुन फेटावे
• तवा गरम करणे
• त्यावर २-३ थेंब तेल टाकणे आणि नंतर अर्धी वाटी केकचे मिश्रण घालणे.
• त्यावर थोडे क्रेझींस टाकणे व खालची बाजू गुलाबी रंग होईपर्यंत भाजणे
• २ थेंब तेल शिंपडून केक उलटवणे दुसरी बाजूसुद्धा गुलाबी होईपर्यंत भाजणे. बाकीचे सगळे केक पण असेच बनवणे.
• एकावर एक ठेवून, मॅपल सिरप घालुन वाढणे.

टीप
मी क्रेझीनसच्या ऐवजी अ‍ॅप्रिकॉट्स, ब्लू बेरीज, मनुके आणि असेच बरेच वेगळी वेगळी फळ घालुन हे पॅन केकस बनवले आहेत पण मी आधी म्हटल्याप्रमाणे क्रेझीनचे केक सगळ्यात छान लागले.

मोल्टन लाव्हा केक

Read English Version

बरेच दिवसांपूर्वी मी ह्या केक विषयी वाचले होते आणि त्याचा कॉन्सेप्ट मला फार आवडला. मग मी ह्याची पाककृती शोधल्यावर कळले की हि सगळ्यात सोप्पी आणि पटकन तयार होणारी पाककृती आहे. पण माझ्याकडे ते बनवण्यासाठी रामेकिंस किंव्हा पेपर कप नसल्यानी बरेच दिवस केक बनवण्याचे मनातच राहून गेले. पण आज मी रामेकिंस विकत आणले आणि केक बनविले. एकदम हीट ठरलाय हा केक.


साहित्य
१ वाटी मैदा
१.२५ वाटी सेमीस्वीट चॉकोचिप्स
१ वाटी लोणी
५ चमचे कोको पूड
३ अंडे
३ अंड्यांचे पिवळे
२ वाटी साखर

कृती

• रामेकिंसना लोण्याचा हात लावून बाजूला ठेवणे.
• ओव्हन ४५०F/२३०C वर गरम करणे.
• मायक्रोवेव्हमध्ये लोणी आणि चॉकोचिप्स एकत्र करून १ मिनिट गरम करणे.
• लोणी आणि चॉकोचिप्स नीट ढवळणे आणि एकजीव करणे आणि बाजूला ठेवणे.
• अंडी आणि अंड्याचे पिवळे एकत्र फेसून घेणे.
• त्यात साखर घालुन पांढरे होईपर्यंत पुन्हा फेटणे.
• त्यात वितळवलेले चॉकलेट - लोणी मिश्रण घालुन पुन्हा फेटणे
• मैदा आणि कोको पूड चाळून घेणे व वर बनवलेल्या मिश्रणात डाव घालुन हलकेच ढवळून घेणे.
• बनवलेले मिश्रण ६ रामेकिंसमध्ये घालणे,
• रामेकिंसना बेकिंग ट्रेमध्ये ठेवून ते ओव्हन मध्ये ४५०F/२३०C वर १३ मिनिट भाजणे.
• ओव्हन मधून लगेच काढून बशीत उलटे करून खायला देणे

टीप
रामेकिंसऎवजी पेपर कप मफीन पॅनमध्ये ठेवून पण भाजू शकतो पण त्यासाठी थोडे उंच पेपर कप वापरणे म्हणजे त्याला धरून केक ला उचलून उलटे करणे सोपे जाईल
केकला उलटे करण्यासाठी रामेकीन एका बशीत ठेवणे व रामेकिंवर एक बशी ठेवणे व दोन्ही बश्याना धरून उलटे करणे. रामेकिंस खूप गरम असल्यानी बश्यांची फार मदत होते.

बदाम चॉकोचीप मफीन्स

Read English Version

आजकाल खूप पाउस पडत असल्यानी मला दररोज ऑफिसला गाडीनी जाव वागतंय. बरेचवेळा मी ट्राफिकजॅममध्ये फसते. त्यामुळे घरी आलं की नवीन काही प्रयोग करायची ताकद उरत नाही. काल मी ट्राफिकला चुकवण्यासाठी लवकर घरी येऊन काम करण्याचे ठरवले. ५ मिनिटाचे ट्राफिक सोडले तर प्रयोग यशस्वी झालं असे म्हणू शकते. घरी आल्यावर लक्षात आले की माझा कॉम्पुटर बंद पडलेला. त्यामुळे जोपर्यंत मी कॉम्पुटरवर win7 घालत होते त्यावेळेत हे बदाम घातलेले केक बनवले. आज काल जरा जास्तच विसरभोळी झालीये मी आणि असा म्हणतात की बदाम स्मरणशक्ती वाढवण्यास उपयोगी पडतात. कॉम्पुटर तर नवीन पेक्षाही चांगला चालू लागलाय win7चा प्रताप, आता बघुयात की बदाम उपयोगी पडतात का.


साहित्य
१ वाटी लोणी
२ वाटी साखर
४ वाटी मैदा
२ वाटी चॉकोचीप
३/४ वाटी बदाम
१ वाटी दुध
४ चमचे ब्रावून शुगर
२ चमचे व्हॅनिला इसेन्स
१ चमचा बेकिंग सोडा
१/२ चमचा बेकिंग पूड
२ अंडी
मीठ चवीपुरते

कृती

• एका भांड्यात साखर आणि लोणी फेटणे.
• त्यात अंडी घालुन पुन्हा फेटणे.
• त्यात व्हॅनिला इसेन्स, दुध घालुन पुन्हा फेटणे.
• मैदा, बेकिंग पूड, बेकिंग सोडा आणि मीठ घालुन हलक्या हातानी सगळे मिश्रण एकजीव होईपर्यंत ढवळणे.
• त्यात १.५ वाटी चॉकोचीप घालुन हलकेच एकत्र करणे व बाजूला ठेवणे.
• बदामाचे तुकडे करून त्यात ब्रावून शुगर आणि उरलेले चॉकोचीप घालुन एकत्र करणे.
• ओव्हन ३५०F/१८०C वर गरम करणे.
• मफीनच्या भांड्यांना लोण्याचा हात लावून घेणे. प्रत्येक भांड्यात साधारण २/३ पर्यंत केकचे मिश्रण घालणे.
• वर बदाम-चॉकोचीप-साखर मिश्रण पसरवणे.
• मफीन ३५०F/१८०C वर २५ मिनिट भाजणे.

टीप
मी कच्चे बदाम वापरून त्यांना केकच्या वर पसरवले त्यामुळे केक भाजताना ते एकदम मस्त भाजले गेले.
तसेच मी बदमाबरोबर साखर आणि चॉकोचीप मिसळले त्यामुळे प्रत्येक घासात मस्त गोडपणा आला.

खजूर अक्रोड चॉकलेट ब्रावनी

Read English Version

थोड्या आठवड्यापूर्वी मी कॉस्टकोमधून अक्रोड आणि चॉकलेट चीप आणलेले. आज जेंव्हा मागच्या आठवड्याचे पायेश संपत आल्यावर मी हि ब्रावनी बनवण्याचे ठरवले. आठवड्यासाठी म्हणून केलेले हे ब्रावनी इतके छान झाले की ते सोमवारपर्यंतसुधा पुरतात की नाही अशी आशंका आहे.


साहित्य
८०ग्राम डार्क चॉकलेट बार
१.५ वाटी सेमी स्वीट चॉकलेट चीप
३ वाटी पिठी साखर
१.५ वाटी मैदा
१ वाटी लोणी
१ वाटी खजूर
१ वाटी अक्रोड
३ अंडी
१ चमचा व्हॅनिला ईसेन्स
मीठ चवीपुरते

कृती

• एका काचेच्या भांड्यात डार्क चॉकलेट, १/२ वाटी सेमी स्वीट चॉकलेट चीप आणि लोणी घालुन १ मिनिट मायक्रोवेव्ह करून चांगले एकत्र करणे.
• अजून २० सेकंद मायक्रोवेव्ह करून ढवळणे.
• मैदा दोनदा चाळून घेणे.
• ओव्हन ३७५F/१९०C वर गरम करणे.
• एका मोठ्या भांड्यात अंडी, पिठी साखर, व्हॅनिला ईसेन्स घालुन ५ मिनिट फेटून घेणे.
• त्यात आधी बनवलेली चॉकलेट पेस्ट, चाळलेला मैदा आणि मीठ घालुन हलक्या हातानी एकजीव होईपर्यंत एकत्र करणे.
• केकच्या मिश्रणात उरलेले १ वाटी चॉकलेट चीप, खजूर आणि अक्रोड कापून घालणे व एकत्र करणे.
• केकच्या भांड्याला लोण्याचा हात लावून त्यात मिश्रण ओतणे व ३७५F/१९०C वर ३५ मिनिट भाजणे.
• ब्रावनीवर आईस्क्रीम, चॉकलेट सॉस व अक्रोड घालुन खायला देणे.

टीप
मी चॉकलेट वितळवण्यासाठी मायक्रोवेव्हचा वापर करते आणि त्यामुळे किचकट काम एकदम सोपे होऊन जाते पण मायक्रोवेव्ह नसल्यास एका भांड्यात पाणी गरम करून त्यावर चॉकलेटचे भांडे ठेवून पण चॉकलेट वितळवता येईल.

खजूर चॉकोचीप पॅन केक

Read English Version

मी बरेचवेळा पॅन केक बनवले आहेत कारण ते एकदम सोपा आणि चविष्ठ नाश्ता होतात. मी क्रॅनबेरी, आंबा,ब्लूबेरी असे वेग वेगळी फळे घालुन बनवलंय पण आज फळे नसल्यानी मी त्यात खजूर आणि चॉकोचीप घालुन बनवला. केक एकदम सुंदर झाला आणि नाश्ता एकदम मस्त होता.


साहित्य
१/२ कप खजूर
१/४ वाटी चॉकोचीप
१/२ कप गव्हाचे पीठ
१/२ कप मैदा
३/४ वाटी दही
१ अंड
३/४ चमचा साखर
१/२ चमचा व्हॅनिला ईसेन्स
१/२ चमचा बेकिंग पूड
१/४ चमचा बेकिंग सोडा
२.५ चमचा वितळवळेल लोणी
मीठ
तेल

कृती

• खजुरातून बिया काढून बारीक चिरावे.
• मैदा आणि पीठ एकत्र चाळून घेणे.
• त्यात साखर, मीठ, बेकिंग सोडा आणि बेकिंग पूड घालुन एकत्र करणे.
• त्यात अंडे, दही, वितळवलेले लोणी आणि व्हॅनिला ईसेन्स घालुन एकत्र करणे.
• त्यात १/२ वाटी कोमट पाणी घालुन फेटणे.
• नॉनस्टिक तवा गरम करणे.
• त्यावर एकावेळी अर्धा कप पीठ ओतणे व त्यावर चॉकोचीप आणि खजूर पसरवणे.
• मध्यम आचेवर गुलाबी रंगावर दोन्ही बाजू परतून घेणे. देताना मध किव्हा मॅपल सिरप वरून ओतून खायला देणे.

टीप
पिठातच लोणी असल्यानी तव्याला तेल लावावं लागत नाही.
अजॉयला खजुराचा गोडपणा जरा जास्त वाटला त्यामुळे मला वाटतंय की डार्क चॉकोचीप वापरले तर गोड बरोबर होईल.

फ्राईड चिकन

Read English Version

आम्ही बँगलोरमध्ये असताना केफसी मध्ये बऱ्याचवेळी जायचो, खूप साऱ्या आठवणीसुद्धा आहेत. पण इथे आल्यापासून आम्ही एकदासुद्धा केफसीमध्ये नाही गेलोय. त्यामुळे फ्राईड चिकन खाऊन बरेच दिवस झालेत. त्यामुळे आज मी ते बनवण्याचे ठरवले.


साहित्य
५ चिकनचे लेग तुकडे
१ अंडे
३/४ वाटी मैदा
५ चमचे ब्रेडक्रम्स
१ चमचा तिखट
१/४ चमचा ओरिगानो
१/४ चमचा मिरे पूड
१/४ चमचा धने पूड
१/४ चमचा लसूण पेस्ट
मीठ
तेल

कृती

• धार धार सुरीनी चिकनच्या तुकड्यांना चिरा पडणे.
• गरम पाण्यात १/२ चमचा तिखट, ओरिगानो, मिरे पूड आणि मीठ घालणे.
• त्यात चिकनचे तुकडे घालुन एक तास भिजवणे
• एका भांड्यात अंडे, लसूण पेस्ट, उरलेले अर्धा चमचा तिखट, धने पूड आणि मीठ घालणे.
• ताटलीत मैदा, ब्रेडक्रम्स आणि मीठ एकत्र करणे.
• चिकनच्या तुकड्यातून पाणी निथळून टाकणे. प्रत्येक चिकनचा तुकडा अंड्याच्या मिश्रणात दुबवाने व नंतर मैद्याच्या मिश्रणात घोळवणे.
• तेल गरम करून त्यात मध्यम आचेवर गुलाबी रंगावर चिकनचे तुकडे तळणे.

टीप
चिकनचे तुकडे पाण्यात भिजवाल्यानी ते थोडे मऊसर होते. मी त्यात थोडे मसाले घातले त्यामुळे थोडी चव चिकनला लागते.
चिकन मध्यम आचेवर भाजल्यानी ते एकदम चांगले शिजले व ते बाहेरून करपलेपण नाही.
मी ब्रेडक्रम्स पनीरभरा कबाब बनवताना जास्त बनवून ठेवलेले.

आलुबुखारचा केक

Read English Version

आम्ही ह्यावेळी बरेच आलुबुखार आणलेले पण ते पिकलेले नव्हते. त्यामुळे मी हा केक बनवण्याचे बऱ्याच दिवसांपासून ठरवत होते पण आज वेळ मिळाला


साहित्य
१ वाटी लोणी
१.५ वाटी साखर
३/४ वाटी मैदा
१ वाटी हेझलनट
१ वाटी अक्रोड
१ वाटी शेंगदाणा
३ अंडी
१/२ चमचा बेकिंग पूड
६ आलूबुखार
२ चमचे लिंबाचा रस
४ चमचा पिठीसाखर
२ चमचा बदाम

कृती

• हेझलनटची पूड करणे.
• एका भांड्यात साखर आणि लोणी एकत्र फेटणे.
• त्यात अंडे घालुन फेटणे.
• त्यात हेझलनटचा १/३ वाटा घालणे आणि फेटणे.
• एक अंडे आणि १/३ हेझलनटचा वाटा घालत फेटत राहणे.
• मैदा आणि बेकिंग पूड एकत्र चाळून घेणे व मिश्रणात घालुन फेटणे.
• केकच्या भांड्याला लोण्याचा हात लावणे व केकचे मिश्रण त्यात ओतणे.
• ओव्हन ३५०F/१८०C वर गरम करणे.
• केक ३५०F/१८०C वर ४५ मिनिट भाजून घेणे.
• ओव्हनमधून बाहेर काढून त्यावर आलुबुखारची बी काढून अर्धे करून पसरवणे.
• ओव्हनमध्ये ३५०F/१८०C वर अजून १० मिनिट भाजणे व थंड करणे.
• एका भांड्यात लिंबाचा रस आणि पिठी साखर एकत्र करणे व मिश्रण घट्ट होईपर्यंत उकळवणे.
• पाक केकवर ओतून त्यावर बारीक चिरलेले बदाम घालणे.

टीप
लिंबाच्या मिश्रणाऎवजी मारमालेड जॅमपण वापरता येईल पण माझ्याकडे तो नसल्यानी मी लिंबाच्या रसाचे मिश्रण वापरले.

झीब्रा केक

Read English Version

साधारण एका वर्षापूर्वी ऑफिसमध्ये एकानी चेक बॉक्स केक बनवलाय असा मेल आलेलं. मेल मध्ये कसे बनवलंय वगैरे बरच काही लिहिलेलं पण मला इतके भांडे किंवा कार्डबोर्ड नव्हता वापरायचा त्यामुळे मग मी हा एकदम प्रसिद्ध झीब्रा केक बनवला.


साहित्य
३ वाटी मैदा
२ वाटी साखर
४ अंडी
२ वाटी दुध
२ वाटी तेल
१ चमचा व्हॅनिला ईसेन्स
८ चमचा कोको पूड
४ चमचे बेकिंग पूड

कृती

• एका भांड्यात अंडी आणि साखर घालुन फेटून घेणे.
• त्यात दुध आणि तेल २ चमचे प्रत्येकातून बाजूला ठेवून उरलेले घालुन फेटणे.
• मैदा चाळून मिश्रणात थोडा थोडा घालत फेटणे.
• त्यात व्हॅनिला ईसेन्स आणि बेकिंग पूड घालुन फेटणे
• दुसऱ्या भांड्यात ४.५ वाटी मिश्रण काढून घेणे व त्यात कोको पूड घालुन फेटणे.
• कोको पूड घातलेल्या मिश्रणात उरलेले दुध अंड तेल (२ चमचा प्रत्येकी) घालुन फेटून घेणे.
• ओव्हन ३५०F/१८०C वर गरम करणे.
• भांड्याला लोणी लावून घेणे.
• १/४ वाटी पांढरे पीठ भांड्याच्या मध्ये ओतणे. मग १/४ वाटी कोकोचे मिश्रण मध्ये ओतावे. असे एकदा पांढरे व एकदा कोको मिश्रण घालत भांडे अर्धे भरेपर्यंत करणे. दुसऱ्या भांड्यात पुन्हा तसेच करणे.
• ओव्हनमध्ये ३५०F/१८०C वर ४० मिनिट भाजणे.

टीप
जर दोन भांड्याच्याऎवजी एका भांड्यात केक बनवायचा असेल तर १/२ वाटी एकावेळी पीठ ओतणे म्हणजे पट्टे एकदम चांगल्या आकाराचे येतील.