दुधीभोपळ्याचा डोसा


दर आठवड्यात आणतो त्यापेक्षा वेगळ्या भाज्या आणायच्या म्हणून आम्ही दुधी भोपळा आणला. भोपळा फारच मोठं होता त्यामुळे मी त्याचे वेगवेगळे पदार्थ करून बघितले.

दुधीभोपळ्याचा डोसा
साहित्य
१ वाटी दुधीभोपळा
१ वाटी तांदुळाचे पीठ
१/२ वाटी बेसन
१ चमचा जीरा
२ चमचे बडीशेप
१/२ चमचा मेथी
२-३ मिरच्या
१ वाटी दुध
१/२ वाटी पाणी
मीठ

कृती
  • जीरा बडीशेप आणि मेथी एकत्र थोडेसे कुटून घेणे.
  • त्यात तांदुळाचे पीठ, बेसन आणि किसलेला दुधीभोपळा घालणे.
  • त्यात बारीक चिरलेल्या मिरच्या, मीठ, दुध आणि पाणी घालुन डोस्याचे पीठ भिजवणे.
  • तवा गरम करून त्यावर हे मिश्रण ओतून पटकन तवा हलवून डोसा पसरवणे. दोन्ही बाजूनी कुरकुरीत भाजून खायला देणे.

टीप
हे डोसे थोडे जाड असल्यानी हे लोणच्याबरोबर चांगले लागतात.

अंड्याचे पॅटिस


मी एक दोन आठवायचा छोटीसी सुट्टी घेतलेली कारण मला स्वयंपाकाचा कंटाळा आलेला. पण पुण्याला जाऊन आल्यापासून पुन्हा काहीतरी बनवण्याची इच्छा झाली. मग मी हा नाश्त्याला पदार्थ बनवला. ह्या आधी एकदा अंड्याचे पॅटिस बनवलेले तेंव्हा ते खूप तेलकट झालेले आणि म्हणून आज मला करायच्या वेळी थोडी भीती वाटत होती पण हे पॅटिस एकदम चांगले झाले.

अंड्याचे पॅटिस
साहित्य
१/२ वाटी मैदा
१/२ वाटी गव्हाचे पीठ
२ अंडी
१ कांदा
१/२ चमचा तिखट
मीठ
तेल

कृती
  • मैदा, गव्हाचे पीठ आणि मीठ एकत्र करून पीठ भिजवणे.
  • अंडी, बारीक चिरलेला कांदा, तिखट आणि मीठ एकत्र फेटून घेणे.
  • मळलेल्या पीठाचे गोळे बनवून फुलक्याच्या आकाराची चपाती लाटून घेणे.
  • थोडा मैदा आणि पाणी एकत्र करून त्याचे मिश्रण चिकटवण्यासाठी मिश्रण बनवणे.
  • प्रत्येक चपातीवर २ चमचे अंड्याचे मिश्रण घालणे आणि पटकन चारी बाजू बंद करणे.
  • तेलावर हलक्या आचेवर भाजणे.

टीप
अजॉयनी तिखटच्याऎवजी हिरव्या मिरच्या घालायला सांगितले पण मी कालच खिचडीत खूप सारी मिरची वापरल्यानी मिरची वापरण्याचे तळले. पण माझ्यामते सुद्धा हिरव्या मिरच्या जास्त चांगल्या लागतील.
आधी मी हे पॅटिस तेलात पूर्णपणे तळलेले पण ते खूप जास्त तेलकट झालेले कारण अंड्याचे मिश्रण बाहेर येऊन खूप जास्त तेल शोषून घेता. त्यामुळे ह्यावेळी तव्यावर प्रयत्न केल्यावर पॅटिस चांगले झालेले. पण त्यामुळे पॅटिस जास्त कुरकुरीत नव्हते त्यामुळे नंतर एकदा मी तव्यावर १-२ मिनिट आतले मिश्रण शिजून घट्ट होईपर्यंत तव्यावर आणि मग कढईत तळण्याचा प्रयोग करून बघणार आहे.
तसाच एकदा मी आतल्या मिश्रणाच्याऎवजी त्यात उकडलेल्या अंड्याचा कीस, मीठ, मिरच्या आणि कोथिंबीर घालुन करून बघणार आहे.

पालक मेथी वडा


आई बाबा काल आल्यावर त्यांच्यासाठी काहीतरी नवीन बनवण्याची मला फार इच्छा होती.. आणि घरात खूप साऱ्या पालेभाज्या पण होत्या मग मी हा पदार्थ बनवला.

पालक मेथी वडा
साहित्य
२ वाटी पालक
१ वाटी मेथी
१/२ वाटी कोथिंबीर
३ वाटी बेसन
३ चमचे तांदुळाचे पीठ
१ हिरवी मिरची
१ चमचा तिखट
१/२ चमचा जिरे पूड
१/२ चमचा धने पूड
मीठ
तेल

कृती
  • सगळ्या पालेभाज्या बारीक चिरून घेणे.
  • त्यात बारीक चिरून हिरवी मिरची, बेसन, तिखट, तांदुळाचे पीठ, जिरे पूड, धने पूड, मीठ घालुन एकत्र करणे.
  • थोडे पाणी घालुन घट्ट पीठ भिजवावे
  • कढईत तेल गरम करून त्यातले २ चमचे गरम तेल वड्याच्या मिश्रणात घालणे.
  • छोटे छोटे वाडे बनवून ते गरम गरम तेलात मध्यम आचेवर तळून घेणे.

टीप
मीठ घालुन भाज्या थोड्यावेळ बाजूला ठेवावे म्हणजे त्याला सुटलेले पाणी पीठ भिजवायला वापरता येते आणि नंतर पीठ पातळ होण्याची शक्यता राहत नाही.
वडे गोलाकाराऎवजी थोडे पातळ करावे म्हणजे एकदम कुरकुरीत होतील.

Related Posts Plugin for WordPress, Blogger...

  © माझे स्वयंपाक प्रयोग | Template Recipes by Emporium Digital

TOP