हरबरा डाळ वडा आणि डोसा

Read English Version

आज काहीतरी वेगळे करून बघण्याचा माझा विचार होता. थोड्या आठवड्यांपूर्वी अशीच कुठलीतरी कृती वाचलेली आणि त्यांनीच प्रेरित होऊन मी हे वडे बनवले. संध्याकाळी त्याच पीठाचे डोसे बनवले आणि ते सुद्धा तितकेच चांगले झालेले.

हरबरा डाळ वडा

हरबरा डाळ डोसा

साहित्य
२.५ वाटी हरबरा डाळ
४ चमचे हिरव्या मिरच्या
४ चमचे कोथिंबीर
४ चमचे पुदिना
४ लसूण पाकळ्या
मीठ
तेल

कृती

• हरबरा डाळ रात्रभर भिजवून ठेवणे.
• सकाळी मिक्सरमध्ये डाळ, मिरच्या, लसूण, कोथिंबीर, पुदिना आणि मीठ एकत्र बारीक वाटणे.
• वड्यासाठी: गरम तेलात चमचाभर पीठ टाकून मध्यम आचेवर दोन्हीबाजुनी गुलाबी होईपर्यंत तळणे.
• डोश्यासाठी: पिठात थोडे पाणी घालुन पातळ करणे व तेल लावलेल्या गरम तव्यावर ओतून पसरवणे. दोन्हीबाजुनी गुलाबी होईपर्यंत भाजणे.

टीप
वडे बनवायचे असल्यास डाळ वाटल्यावाटल्या लगेच तळणे नाहीतर वडे तेल जास्त शोषून घेतात, खर सांगायच झाल तर मी त्यामुळेच संध्याकाळी उरलेल्या पीठाचे डोसे बनवले.

मुगाच्या सालीसहीत डाळीचे आप्पे

Read English Version

आईनी मध्यंतरी बरेच वेळा हे आप्पे सकाळच्या नाश्त्यासाठी बनवलेले आणि आम्हा सगळ्यांना ते फार आवडलेले. त्यामुळे ह्यावेळी मी तिला त्याची पाककृती दाखवायला सांगितली. आप्पे एकदम सोप्पे, पौष्टिक आणि चविष्ट आहेत.


साहित्य
१.५ वाटी मुगाची सालीसहीत डाळ
२-३ हिरव्या मिरच्या
२ लसुणाच्या पाकळ्या
१/४ चमचा आलं
१/४ कांदा
२ चिमुट गरम मसाला
मुठभर कोथिंबीर
मीठ चवीपुरते
तेल

कृती

• मुगाची डाळ रात्रभर भिजवून ठेवणे.
• सकाळी डाळीचे सगळे पाणी काढून मिक्सरमध्ये घालणे.
• त्यात हिरवी मिरची, लसूण आणि आलं घालुन बारीक वाटणे.
• मिश्रणात बारीक चिरलेला कांदा आणि कोथिंबीर घालणे.
• त्यात मीठ आणि गरम मसाला घालुन चांगले फेटणे.
• आप्पे पात्र गरम करून त्याला तेल लावणे. त्यात एक-एक चमचा मिश्रण घालुन वरून तेल सोडणे. झाकण ठेवून २ मिनिट मधम आचेवर गुलाबी रंगावर भाजणे.
• आप्पे परतून झाकण न लावता अजून २-३ मिनिट दुसरी बाजुपण गुलाबी होईपर्यंत भाजणे. गरम गरम वाढणे.

टीप
मुगाची डाळ २-३ तास भिजवली तरी चालते त्यामुळे संध्याकाळी नाष्ट्यासाठी बनवायचे असल्यास फार आधीपासून डाळ भिजवायची गरज नाही.

ढोकार दालना

Read English Version

मी बरेचदिवसांपासून हा पदार्थ बनवण्याचा विचार करत होते. मागच्यावर्षी एका नातेवैकांकडे कोलकत्तामध्ये खालेली. त्यावेळी मला फार काही बरे वाटत नसल्यानी फक्त चवीपुरता खालेली पण तेवढ्यातच मला हा प्रकार इतका आवडला की मी तो घरी बनवण्याचा निश्चय केला. शेवटी आज तो बनवण्याचा मुहूर्त आला


साहित्य
२ वाटी हरबरा डाळ
२ टोमेटो
२ हिरव्या मिरच्या
२ चमचे आलं
५ लसूणाच्या पाकळ्या
१/२ चमचे जिरे
१/४ चमचे हळद
१/२ चमचे जिरे पूड
१/२ चमचे धने पूड
तेल
तूप
मीठ

कृती

• रात्रभर डाळ पाण्यात भिजवून ठेवणे.
• मिक्सरमध्ये डाळ वाटून घेणे.
• कढई गरम करून त्यात २ चमचे तेल व जिरे टाकून फोडणी करावी
• आता त्यात किसलेले १ चमचा आलं, हळद, मीठ आणि वाटलेली डाळ घालुन ते मिश्रण शिजवणे. मिश्रण बाजू सोडेपर्यंत शिजवणे.
• ताटलीला तेलाचा हात लावून त्यावर हे मिश्रण पसरवणे व थंड करणे.
• थंड झाल्यावर चौकोनी तुकडे कापून तव्यावर तेल टाकून तळून घेणे.
• मिक्सरमध्ये टोमेटो, हिरव्या मिरच्या, उरलेले एक चमचा आलं, लसुणाच्या पाकळ्या घालुन वाटून घेणे.
• कढईत एक चमचा तेल घालुन गरम करणे व त्यात वाटलेले मिश्रण घालुन शिजवणे.
• त्यात जिरे पूड, धने पूड, मीठ आणि ३ वाटी पाणी घालुन उकळवणे.
• त्यात तळलेले डाळीचे ढोकळे घालुन उकळवणे. ढोकळे ग्रेव्ही शोषून घेईपर्यंत उकळवणे.
• वरून तूप सोडून वाढावे

टीप
मी ग्रेव्ही जास्त मसालेदार नाही बनवली त्यामुळे ढोकळ्याची चव खुलून आली.

मुंग डाळ वडा

Read English Version

बरेच दिवसांनी मी माझ्याकडच्या पाककृतीच्या पुस्तकातून काहीतरी बनवण्याचे ठरवले. हि पाककृती एकदम तशीच्या तशी नाहीये पण त्यातील एका वाचलेल्या कृतीवरून प्रेरणा घेतलेली आहे.


साहित्य
१ वाटी मुंग डाळ
२ चमचे बेसन
६ लसुणाच्या पाकळ्या
१ इंच आलं
२ हिरव्या मिरच्या
१ चमचा जीरा
१/२ चमचा तिखट
१/४ चमचा हळद
चिमुटभर खाण्याचा सोडा
मीठ
तेल

कृती

• मुंग डाळ पाण्यात ५-६ तास भिजवून ठेवणे.
• डाळ भिजवल्यावर, लसूण, आले, मिरची आणि जीरा घालुन मिक्सरमध्ये १-२ चमचे पाणी घालुन जाडसर वाटणे.
• त्यात डाळीतून पाणी उपसून ती घालुन बारीक वाटणे.
• वाटलेल्या पिठात बेसन, तिखट, हळद, मीठ आणि खाण्याचा सोडा घालुन चांगले एकत्र करणे.
• कढईत तेल गरम करून थोडे थोडे पीठ घालुन वडे तळणे.

टीप
पाककृतीत अजून खोबरे, कांदा, कडीपत्ता वगैरे पण घालायला सांगितलेला पण मला हे वडे असेच आवडले आणि त्याबरोबर खोबर्याची चटणी एकम मस्त लागली

जाड पोह्याचा चिवडा

Read English Version

चिवडा हा सगळ्यांची कमजोरी आहे :) ह्या प्रकारचा चिवडा आमच्या घरी फार वेळा करतात, पातळ पोह्यापेक्षासुद्धा जास्त.


साहित्य
२ वाटी जाड पोहे
२.५ चमचा तिखट
१/४ चमचा तीळ
१/४ चमचा जीरा
१/२ वाटी शेंगदाणे
१/४ वाटी फुटाणे डाळ
१.५ चमचा साखर
७-८ कडीपत्ता पाने
४ चमचे काजू
४ चमचे मनुका
१/४ चमचा म्हवरी
चिमुटभर हिंग
मीठ
तेल

कृती

• जीरा आणि तीळ एकत्र कमी आचेवर तेलाविना साधारण ३-४ मिनिट भाजून घेणे.
• मिक्सरमध्ये जीरा, तीळ आणि साखर एकत्र पूड करणे.
• एका मोठ्या भांड्यात ती पूड, २ चमचा तिखट, काजू, मनुका आणि मीठ एकत्र करणे.
• कढईत मध्यम आचेवर तेल गरम करणे.
• पोहे एकावेळी थोडे थोडे करून तळून घेणे.
• तेलातून काढल्या काढल्या लगेच टिशू वर तेल शोषून घेण्यासाठी ठेवावे. २-३ भाग टिशूवर आले की त्यांना मसाल्याच्या मिश्रणात घालुन ढवळणे.
• सगळे पोहे तळून झाल्यावर एक दोन चमचा तेल गरम करावे व त्यात शेंगदाणे तळून घेणे.
• त्याच तेलात म्हवारीची फोडणी करणे व त्यात हिंग, कडीपत्ता आणि फुटाणे डाळ घालुन २ मिनिट तळून घेणे.
• त्यात शेंगदाणे आणि उरलेले १/२ चमचा तिखट घालुन चिवड्यात घालणे व ढवळणे.

टीप
कढईत थोडे थोडे तेल घालूनच पोहे तळावे कारण तेल काळे पडते त्यामुळे जास्त तेल वाया नाही जात
तेलात गाळणी ठेवून त्यात पोहे घातल्यानी ते बाहेर काढायला सोप्पे जाते
मी पोह्याचे तेल शोषून घेण्यासाठी त्यांना टिशूवर काढले पण पोहे गरम असतानाच मसाल्यात घालावे नाहीतर मसाला त्यांना नीट चिकटत नाही.

सेट डोसा

Read English Version

बँगलोरमध्ये पहिल्यांदा खाल्यापासून सेट डोसा हा माझा आवडता झाला. एकदम हलका फुलका आणि ३ मध्यम आकाराचे डोसे एका वेळी वाढला जाणारा हा डोसा फारच चविष्ठ आहे. बऱ्याच वेळ शोधल्यावर अस लक्षात आले की बहुतेकजण त्यात सोड्याचा व पोह्याचा वापर करतात. त्यावरून मी माझ्या सेट डोश्यासाठी थोडे साहित्य बदलून वापरले. एकदमच सुंदर झालेला. इतका की २ आठवड्यांपूर्वी केलेला फोटो काढण्यासाठी सुद्धा शिल्लक राहिला नाही. अजॉयनी पुन्हा बनवण्यासाठी सांगितल्यावर मी लगेच ह्या आठवड्यात बनवला आणि पहिल्यांदा फोटो काढला.


साहित्य
२ वाटी तांदूळ
१ वाटी इडली रवा
३/४ वाटी उडीद डाळ
१ वाटी पोहे
१ चमचा मेथी बिया
मीठ
तेल

कृती

• तांदूळ, इडली रवा, उडीद डाळ आणि मेथी बिया वेगवेगळ्या सकाळी भिजवणे.
• संध्याकाळी सगळे वाटायच्या आधी १ तास पोहे पाण्यात भिजवणे.
• तांदूळ बारीक वाटून घेणे.
• उडीद डाळ आणि मेथी बिया एकत्र करून बारीक वाटणे.
• इडली रवापण बारीक वाटणे.
• पोहे बारीक वाटणे.
• सगळे वाटलेले मिश्रण चांगले एकत्र करून घेणे व रात्रभर आंबवण्यासाठी उबदार जागी ठेवणे.
• दुसऱ्या दिवशी सकाळी पिठात मीठ आणि थोडे पाणी घालुन चांगले पसरेल असेल मिश्रण बनवणे.
• तवा मध्यम आचेवर गरम करून त्यावर थोडे तेल पसरवणे व एक वाटी पीठ ओतणे.
• खालची बाजूल गुलाबी झाली की वरून १-२ थेंब तेल टाकून परतणे व दुसरी बाजू होईपर्यंत भाजणे

टीप
हा डोसा नेहमी मिक्स भाजीबरोबर खायला देतात पण मला ती भाजी फार आवडत नाही त्यामुळे मी त्याऎवजी ह्या शेंगदाण्याच्या चटणी बरोबर खायला दिला.

मनगणे

Read English Version

लहानपणी मला हा पदार्थ खूप आवडायचा, इतका की आई दर शनिवारी दुपारच्या जेवणात बनवायची आणि मी त्याची वाट बघायचे. आईची हि पाककृती मी थोडीशी बदलून वापरली आहे.


साहित्य
१ वाटी हरबरा डाळ
३/४ वाटी गुळ
१/२ वाटी काजू
१/२ वाटी मनुका
३ वाटी दुध
चिमुटभर वेलची पूड
मीठ

कृती

• हरबरा डाळ १.५ वाटी पाणी घालुन ४-५ शिट्ट्या येईपर्यंत कुकरमध्ये शिजवून घेणे.
• त्यात गुळ, काजू, मनुका, वेलची पूड आणि मीठ घालुन मध्यम आचेवर ५ मिनिट उकळवणे व नंतर थंड होण्यासाठी बाजूला ठेवून देणे.
• त्यात दुध घालुन वाढणे.

टीप
सगळ्यात सोप्पी डीश आहे नाही :) चव गुळ, डाळ आणि सुक्यामेव्यानी येते.
नेहमीच्या दुधाऎवजी नारळाचे दुध वापरता येईल पण आई दुध वापरते म्हणून मी पण तेच वापरले.

इडली

Read English Version

मी बरेच लोकांना बाहेरून इडलीचे पीठ आणताना किंवा इंस्टन्ट मिश्रण वापरताना बघितलय पण मला त्याची चव फार काही आवडत नाही. इडली करायला इतकी सोपी आहे की आज काल अजॉयसुद्धा एखाद वेळी बनवतो.


साहित्य
१ वाटी उडीद डाळ
२ वाटी इडली रवा
मीठ
तेल

कृती

• उडीद डाळ आणि इडली रवा वेग वेगळ्या भांड्यात कमीत कमी ८ तास भिजवून ठेवणे.
• उडीद दालीतील पाणी काढून बारीक वाटून घेणे.
• इडलीच्या राव्यातील पाणी पण काढून ते पण वाटून घेणे.
• दोन्ही वाटलेले मिश्रण एकत्र करून ८ तास आंबावण्यासाठी उबदार जागी ठेवणे.
• सकाळी पिठात मीठ घालुन फेटून घेणे.
• कुकरमध्ये पाणी घालुन उकळवणे.
• इडलीच्या भांड्यांना तेलाचा हात लावून त्यात पीठ घालणे.
• इडली भांडी कुकरमध्ये ठेवून झाकण लावून (शिट्टी न लावता) १०-१२ मिनिट मोठ्या आचेवर उकडून घेणे.
• कुकर उकडून इडली २-३ मिनिट थंड करणे व मग काढून खायला देणे.

टीप
इथे हवामान थंड असल्यानी पीठ आंबावण्यासाठी गरम पाणी भरलेल्या भांड्यावर ठेवले.
इडली उकडल्या उकडल्या कुकरचा झाकण काढायला विसरू नये नाहीतर वाफेच पाणी जाऊन इडल्या मऊ होतील

मसाला डाळ

Read English Version

हि डाळ मी पुण्यात असताना असाच प्रयोग करताना बनवलेली. छान झाली आणि आई बाबांना एकदम आवडल्यामुळे इथे कृती देत आहे.


साहित्य
३ वाटी तूर डाळ
१ कांदा
१ टोमाटो
६-७ लसूण पाकळ्या
१/४ चमचा म्हवरी
१/४ चमचा जिरे
१ चमचा तिखट
१/४ चमचा हळद
१/२ चमचा जिरे पूड
१/२ चमचा धने पूड
१/४ चमचा गरम मसाला
कोथिंबीर
लोणी
मीठ
तूप

कृती

• १ वाटी पाणी घालुन डाळ कुकरमध्ये उकडून घेणे.
• तेल गरम करून त्यात म्हवरी आणि जिरे घालुन फोडणी करणे.
• त्यात बारीक चिरलेला कांदा, लसूण पाकळ्या घालुन भाजणे.
• त्यात हळद, तिखट, जिरे पूड, धने पूड आणि गरम मसाला घालुन ढवळणे.
• त्यात टोमाटो घालुन पूर्ण शिजवणे.
• त्यात शिजवलेली तूर डाळ, मीठ घालुन चांगले ढवळणे व दोन-तीन मिनिट शिजवणे
• त्यात बरोबर पातळ होईल इतके पाणी घालुन उकळवणे.
• वरून कोथिंबीर घालणे व वाटीत वाढल्यावर लोणी घालणे.

टीप
डाळ शिजवताना मी जास्त पाणी घालत नाही त्यामुळे नंतर मसाल्यासकट शिजवताना त्याची चव डाळीत जाते.

मेदू वड्यासाठी चटणी

Read English Version

माझ्याकडच्या पुस्तकात वाचून मी हि चटणी केली आणि एकदम मस्त झाली. वड्याबरोबर एकदम उत्तम (अर्थातच मला वडा सांबार जास्त आवडत असल्यानी मी त्याची आठवण काढली).


साहित्य
१/२ नारळ
१/४ वाटी फुटाणे डाळ
६ हिरव्या मिरच्या
१ कोथिंबीर
१/२ वाटी दही
१/२ चमचा म्हवरी
१/२ चमचा उडीद डाळ
चिमुटभर हिंग
१ चमचा तेल
मीठ

कृती

• नारळ खवून घेणे व हिरवी मिरची, कोथिंबीर, फुटाणे डाळ आणि मीठ घालुन मिक्सरमध्ये बारीक वाटणे.
• ह्या मिश्रणात दही घालुन एकत्र करणे.
• कढईत ते; गरम करून त्यात म्हवरीची फोडणी करणे व त्यात हिंग घालणे.
• फोडणी चटणीत घालुन एकत्र करणे.

टीप
मी नारळाचे पाणीच नारळ मिश्रण वाटण्यासाठी वापरले त्यामुळे एकदम छान लागले आणि वेगळी साखर घालावी लागली नाही
तेलात लाल मिरची पण घालता येईल पण माझ्याकडे ती नसल्यानी मी नाही वापरली

मेदू वडा

Read English Version

मेदू वडा हा माझा आवडता पदार्थ. घरात संध्याकाळी यायचे पाहुणे दुपारी कळले तर बनवायला एकदम उत्तम.


साहित्य
२ वाटी उडीद डाळ
२ हिरव्या मिरच्या
४ खोबऱ्याचे तुकडे
१ कांदा
मीठ

कृती

• डाळ धुवून ५-६ तास पाण्यात भिजवून ठेवणे.
• जास्तीचे पाणी ओतून डाळ मिक्सरमध्ये बारीक वाटणे.
• त्यात मीठ, बारीक चिरलेल्या मिरच्या, कांदा आणि खोबरे घालुन एकत्र करणे.
• कढईत तेल गरम करून वडे मंद आचेवर भाजणे.

टीप
डाळ वाटल्याबरोबर लगेच वडे तळणे नाहीतर ते फार तेलकट होतात
वडे तेलात घातल्यावर ते तरंगायला पाहिजेत नाहीतर पिठात थोडे पाणी घालुन हलके करणे.
ह्यात आले पण घालता येते पण मला वाड्यात ते फारसे आवडत नसल्यानी मी वापरले नाही

कटाची आमटी

Read English Version

हि आमटी पुरण पोळीच्या डाळीच्या उरलेल्या पाण्यातून बनवतात. एकदम गोड आणि आंबट अशी हि आमटी पुरण पोळी बरोबर एकदम मस्त लागते.


साहित्य
२ वाटी हरबरा डाळ शिजवलेले पाणी
१/२ वाटी पुरण
१/२ वाटी गुळ
२ चमचा चिंच
१ चमचा धने
१ चमचा जिरे
१/२ चमचा म्हवरी
१ चमचा तिखट
४ चमचा खोबरे
१५ कडीपत्याची पाने
मीठ
तेल

कृती

• चिंच एक वाटी पाण्यात भिजवणे व बाजूला ठेवणे.
• चमचाभर तेल गरम करून त्यात धने आणि जिरे फोडणी करणे.
• किसलेले खोबरे घालुन गुलाबी रंगावर भाजणे.
• मिक्सरमध्ये खोबऱ्याचे मिश्रण घालुन चिंचेबरोबर बारीक वाटणे.
• अर्धा चमचा तेल गरम करून त्यात म्हवरी घालुन फोडणी करणे.
• कडीपत्ता घालुन भाजणे
• त्यात चिंच खोबऱ्याचे वाटण घालणे व एक मिनिट भाजणे.
• तिखट घालुन अजून एक मिनिट भाजणे.
• डाळीचे पाणी, पुरण आणि गुळ घालणे. जाड वाटल्यास थोडे पाणी पण घालणे.
• मीठ घालुन आमटी उकळवणे.

टीप
डाळीचे पाणी नसेल तर साधे पाणी पण वापरता येईल
पुरण बनवण्यासाठी ह्या पुरण पोळीच्या कृतीचा उपयोग करणे

पुरण पोळी

Read English Version

पुरण पोळी हा असा एक प्रकार आहे जो मला आईनी बनवलेलाच आवडतो. बरेच लोक त्याला पराठ्यासारखा बनवतात पण पोळी आणि पराठा दोन वेगवेगळ्या गोष्टी आहेत. पोळी हि एकदम मऊसुत असणे एकदम महत्वाचे आहे. आईकाढून आधी मी ह्याची कृती घेतलेली पण मला काही आई सारखी मऊ पोळी बनवायला जमली नाही. आता पुण्यात असताना मी आई कडून चांगली शिकून आले आणि इथे दसर्याच्या निमित्तानी देत आहे. सगळ्यांना दसर्याच्या शुभेच्छा.


साहित्य
४ वाटी हरबरा डाळ
३ वाटी गुळ
२ वाटी पीठ
१ चमचा मैदा
१ वाटी तांदुळाचे पीठ
१/२ वाटी तेल

कृती

• मैदा आणि गव्हाचे पीठ एकत्र करून एकदम मऊ पीठ भिजवणे.
• पीठ स्टीलच्या भांड्यात टाकून बोटे दाबून खड्डे करणे.
• सगळी भोके बुडतील इतके तेल ओतणे आणि कमीत कमी २ तास भिजायला ठेवणे.
• हरबरा डाळ कुकरमध्ये शिजवून घेणे.
• डाळीतील जास्तीचे पाणी बाजूला काढणे. (जास्तीच्या पाण्याची कटाची आमटी बनवता येईल)
• त्यात गुळ घालुन कढईत सुकेपर्यंत शिजवणे.
• पुरण पुरण यंत्रातून फिरवणे. थंड होण्यासाठी बाजूला ठेवणे.
• पुरण पोळी करण्यासाठी तवा एकदम मंद आचेवर गरम करणे.
• पुरणाचा लिंबाच्या दुप्पट आकाराचा गोळा बनवणे.
• पिठाचा लिंबाच्या आकाराचा गोळा बनवणे व त्याची वाटी बनवणे. त्यात पुरणाचा गोळा घालुन पीठ बंद करणे.
• गोळे तळव्यावर ठेवून अलगद दाबणे. पीठाचे कव्हर बाजूला गेले तर ओढून पुन्हा आत मध्ये घेणे
• भरपूर तांदुळाचे पीठ पोलपाटाला लावणे. पुरण पोळीचा गोळा तांदुळाच्या पिठात बुडवून लाटणे.
• मध्ये मध्ये पोळी हातावर घेवून खाली चिकट नाही ह्याची खात्री करणे व मधून मधून तांदुळाचे पीठ लावत राहणे.
• एकदम अलगद आणि बाहेरच्या दिशेनी लाटणे महत्वाचे आहे.
• पोळी गरम तव्यावर मंद आचेवर दोन्ही बाजूनी भाजणे. दुमडून वाढणे.

टीप
पोळीच्या पिठाचा इलॅस्टिकपणा पोळीला पातळ लाटण्यासाठी आणि त्याचा थर पातळ ठेवण्यासाठी उपयोगी पडतो.
पुरण पोळी बनवताना पहिल्यांदा छोटी लाटून बघणे व जसे जमेल तसे मोठे मोठे करणे. भरपूर तांदुळाचे पीठ वापरणे व नंतर पाहिजे तर स्वतःच्या सोयीप्रमाणे कमी करणे.
पोळी पोलपाटाला चिकट नाही हे बघण्यासाठी तळवा पोळीवर ठेवून पोलपाट उलटे करणे.तव्यावर पोळी टाकताना पण तसेच करणे. कधीही बोटांनी पोळी उचलू नये.
पोळीच्या कडांना जास्त पीठ असेल तर ह्याचा अर्थ असा आहे की पुरणापेक्षा पीठ जास्त वापरलाय. त्या नंतरच्या पोळीला थोडे कमी पीठ वापरून बघणे
पोळी लाटताना बाहेरच्या बाजूला लाटल्यानी पोळी सगळीकडून चांगली पसरते आणि बाहेरच कव्हर पण तुटत नाही.
शेवटची टीप म्हणजे हि एकदम किचकट कृती आहे त्यामुळे पहिल्यांदा यश नाही आलेतरी दुखी होऊ नये, थोड्या प्रयत्नानंतर यश नक्की येईल. मी आईनी सांगितलेल्या प्रत्येक गोष्टी सांगायचा प्रयत्न केलाय. आशा आहे त्याचा उपयोग होईल

साधा डोसा

Read English Version

मला नेहमीच कुरकुरीत पातळ साधा डोसा बनवण्याची इच्छा होती. बऱ्याच ठिकाणी वाचल्यावर मी हा डोसा बनवला तो इतका छान झालेला की मी ५ डोसे खाले


साहित्य
३ वाटी इडली रवा
१ वाटी उडीद डाळ
१/२ वाटी मुंग डाळ
१/२ वाटी तूर डाळ
१ चाचा मेथी बिया
१/४ वाटी तेल
मीठ
तूप

कृती

• इडली रवा, उडीद डाळ, मुंग डाळ, तूर डाळ आणि मिठी बिया वेगवेगळ्या ८ तास भिजवणे.
• मेथो सोडून सगळ्यातले पाणी काढणे.
• मेथी बिया आणि उडीद डाळ एकत्र बारीक वाटणे.
• इडली रवा, मुंग डाळ आणि तूर डाळ वेग वेगळे वाटणे.
• सगळे वाटण एकत्र करणे व गरम जागी रात्रभर भिजण्यासाठी ठेवणे.
• सकाळी पिठात मीठ आणि तेल एकत्र करणे.
• तवा गरम करून मंद आचेवर मिठाचे पाणी आणि तेल शिंपडून कपड्यांनी तवा पुसून घेणे.
• त्यावर १/४ वाटी डोस्याचे मिश्रण तव्यावर ओतणे.
• पटकन वाटी मिठाच्या पाण्यात भिजवून त्यानी डोसा गोल गोल फिरवत बाहेर पसरवून पातळ करणे.
• सर्व बाजूनी तूप सोडून मंद आचेवर भाजणे व चटणी किंवा/आणि सांबारबरोबर खायला देणे.

टीप
डोसा कुरकुरीत आणि पातळ होण्यासाठी पीठ बारीक वाटणे व चांगले आंबवणे महत्वाचे आहे. पीठ नीट आंबवण्यासाठीची टीप इथे: आप्पे कृतीबरोबर दिलेय.
डोसा पातळ करताना वाटी पिठात थोडी दाबून फिरवायची.

कुरकुरीत मुंगडाळ

Read English Version

मला हि डाळ आवडते आणि आज दुकानात त्याचे पाकीट बघितल्यावर घरी करून बघायचे ठरवले. एकदम सोप्पे आणि पटकन होणारा हा पदार्थ तुम्हीसुद्धा करून बघा.


साहित्य
१ वाटी मुंग डाळ
चिमुटभर खाण्याचा सोडा
मीठ
तेल

कृती

• मुंग डाळ ४-५ वाटी पाण्यात सोडा घालुन रात्रभर भिजवणे.
• सकाळी मुंग डाळ धुवून कापडावर पसरवणे.
• कढईत तेल गरम करून त्यात मध्यम आचेवर डाळ तळणे व टिश्यूवर तेल निथळण्यासाठी ठेवणे.
• मीठ शिंपडून थंड झाल्यावर खायला देणे.

टीप
मी मुंगडाळ तळताना त्यात एक मोठी स्टीलची चाळणी ठेवून त्यात तळली त्यामुळे डाळ तेलातून बाहेर काढणे सोप्पे होते
मुंग डाळ तेलात टाकल्यावर खूप बुडबुडे आले पाहिजेत. हळू हळू ते कमी होऊन एकदम नाहीशे झाले की डाळ तयार असेल.

मुंग डाळ वडी

Read English Version

काल मी मुंग डाळ हलवा बनवायचे ठरवलेले पण शेवटी वडी बनवली


साहित्य
१ वाटी मुंग डाळ
३/४ वाटी तूप
१/४ वाटी खवा
२ वाटी साखर
२ वाटी दुध
बदाम

कृती

• डाळ ४-५ तास पाण्यात भिजवणे व नंतर मिक्सरमध्ये बारीक वाटणे.
• तूप गरम करून त्यात मुंग डाळीचे वाटण घालुन हलक्या आचेवर परतत भाजणे.
• डाळ गुलाबी झाली की त्यात दुध घालुन मिश्रण घट्ट होईपर्यंत शिजवणे.
• त्यात खवा घालुन अजून थोडा वेळ शिजवणे.
• त्यात साखर घालुन मंद आचेवर मिश्रण घट्ट होईपर्यंत शिजवणे.
• ताटलीला तुपाचा हात लावून त्यावर डाळीचे मिश्रण पसरानते व त्यावर बदामाचे तुकडे लावून दाबणे.
• थंड झाल्यावर चौकोनी वड्या कापून खायला देणे.

टीप
मुंग डाळ एकदम मंद आचेवर भाजणे नाहीतर ती करपून जाईल

वाटली डाळ

Read English Version

उन्हाळा चालू झाला की कैरी जेवणात वापरणे चालू होते. असाच हा एक पदार्थ हळदी कुंकूमध्ये एकदम प्रसिद्ध


साहित्य
१ कैरी
१ वाटी हरबरा डाळ
२ हिरव्या मिरच्या
१/४ चमचा साखर
१/४ चमचा हळद
१/४ चमचा म्हवरी
मीठ
तेल

कृती

• हरबरा डाळ ५-६ तास पाण्यात भिजवणे.
• डाळ पाण्यातून उपसून त्यात मिरची घालुन बारीक वाटणे.
• त्यात किसलेली कीर घालुन एकत्र करणे.
• मीठ आणि साखर घालुन एकत्र करणे.
• तेल गरम करून त्यात म्हवरीची फोडणी करणे.
• त्यात हळद घालुन फोडणी डाळीत घालुन एकत्र करणे.

टीप
फोडणीत सुकलेली लाल मिरची पण घालता येईल

दही वडा

Read English Version

जवळ जवळ ५ वर्षांपूर्वी मी एकदम पहिल्यांदाच घरापासून दूर बँगलोरमध्ये राहत होते. मी अमिता, विनया आणि अनुमेहा ह्यांच्या बरोबर राहत होते आणि साधारण २ महिन्यानंतर आम्ही ठरवले चला आज दही वडा बनवूया. आम्हाला काहीच स्वयंपाकाचा अनुभव नव्हता ना आमच्याकडे पुरेशी भांडी होती. आम्ही एम टी आरच्या वडा मिश्रणाचा वापर करून भांड्यातच वडे तळले. हे चालले असताना मी त्यांना खूप वेळा सांगितले की मला दही वडे चांगले कसे बनवायचे माहितीयेत :) अगदी लहान असतानापासून माझा एकदम आवडता पदार्थ असल्यानी आई कशी आणि काय काय करायची मी एकदम मन लावून बघायचे. इथे मी त्या शिकलेल्या सगळ्या माहितीसकट कृती देत आहे अर्थातच आता एम टी आरचे पाकीट वापरण्याचे दिवस गेले :)


साहित्य
१ वाटी उडीद डाळ
१ हिरवी मिरची
१/४ चमचा आले पेस्ट
१/२ लिटर दही
२-३ चमचा साखर
मीठ
तेल

कृती

• उडीद डाळ रात्रभर पाण्यात भिजवणे.
• सकाळी पाण्यातून उपसून त्यात हिरवी मिरची, लसूण पेस्ट घालुन बारीक वाटणे.
• मिश्रण भांड्यात काढून त्यात मीठ घालुन चांगले घोटणे.
• कढईत तेल गरम करून त्यात छोटे छोटे वडे गुलाबी रंगावर तळणे.
• वडे तळत असताना पाणी आणि मीठ एकत्र करून बाजूला ठेवणे/
• एका खोलगट ताटात २-३ चमचे दही आणि वाटीभर पाणी एकत्र करून बाजूला ठेवणे.
• वडा गुलाबी झाला की लगेच मिठाच्या पाण्यात घालणे व अजून वडे तळायला चालू करणे.
• ते वडे तयार होत आले की मिठाच्या पाण्यातले वडे हातावर दाबून त्यातले पाणी काढून दह्याच्या ताटात ठेवणे.
• असे करत सगळे वडे तळणे. मधून मधून ताटातले वडे उलटे करणे म्हणजे ते सर्व बाजूनी भिजतील.
• दह्यात साखर, मीठ घालुन ढवळणे.
• वडे खायला देताना वाटीत वडा घालुन त्यावर दही सोडणे.

टीप
वडा तळायला तेलात घातल्यावर तो तरंगायला पाहिजे, नाहीतर पीठ अजून घोटायला पाहिजे
वडा मिठाच्या पाण्यात घातल्यावर तिथे सुद्धा तो तरंगायला पाहिजे नाहीतर तो अर्धवट कच्छ असेल
वड्यावर आवडत असल्यास थोडे तिखट आणि चिंचेची चटणी पण घालता येईल

मुगाची डाळ

Read English Version

सगळ्या डाळीमध्ये हि डाळ आमच्या जेवणात जास्त असते कारण करायला सोप्पी आणि सगळ्यात आवडीची. आधी कधीच हि कृती पोस्ट करण्याचा विचार आला नाही पण माझ्या वाहिनीच्या काकांनी आमच्या कडे आल्यावर ह्या डाळीचे इतके कौतुक केले की मी हि कृती पोस्ट करण्याचा विचार केला. माझ्या आई बाबांना पण ह्या डाळीची चव आणि वास फार आवडतो


साहित्य
३/४ वाटी मुंग डाळ
१ कांदा
३ हिरव्या मिरच्या
१/२ चमचा हळद
१/२ चमचा लसूण पेस्ट
१/२ चमचा जिरे
१/२ चमचा म्हवरी
४ चमचा तूप
मीठ

कृती

• डाळ कुकरमध्ये ४ शिट्ट्या काढून शिजवणे.
• कढईत तूप गरम करून त्यात जिरे आणि म्हवरीची फोडणी करणे.
• त्यात कांदा घालुन त्याचा वास जाईपर्यंत शिजवणे.
• त्यात लसूण पेस्ट, बारीक चिरलेली हिरवी मिरची आणि हळद घालुन १-२ मिनिट परतणे
• शिजवलेली डाळ घालुन ढवळणे व त्यात थोडे पाणी घालुन उकळी आणणे.

टीप
मी कधी कधी ह्यात सुक्या लाल मिरचीचे तुकडे पण फोडणीत घालते. त्यामुळे डाळ दिसायला एकदम आकर्षक होते आणि चव पण छान येते
वरून कोथिंबीर पण घालता येईल

आप्पे आणि खोबऱ्याची चटणी

Read English Version

अगदी लहान असल्यापासून घरात सगळ्यांना आप्पे फार आवडायचे. माहिती नाही मी आधी का नाही बनवलेत पण आज पहिल्यांदा करून बघितले आणि एकदम मस्त झालेत. आईला खूप वेळा फोन करून विचारावे लागले पण सगळे सार्थक झाले

आप्पे


साहित्य
१/२ वाटी उडीद डाळ
१/२ चमचा हरभरा डाळ
३ वाटी इडली रवा
मीठ

कृती

• हरभरा डाळ आणि उडीद डाळ एकत्र १२ तास पाण्यात भिजवणे.
• इडली रवा सुद्धा १२ तास भिजवणे.
• १२ तासांनी डाळीतील पाणी काढून बारीक वाटणे.
• त्यात इडली रवा बारीक वाटून घालणे व चांगले एकत्र करणे. १२ तास आंबावण्यासाठी ठेवणे.
• सकाळी आप्पे पात्र गरम करून त्यात हे मिश्रण घालणे. दोन्ही बाजूनी गुलाबी होई पर्यंत मध्यम आचेवर भाजणे.

टीप
थंडीच्या दिवसात पीठ आंबवण्यासाठी वेळ लागतो त्यामुळे भांड्याखाली पाणी गरम करून ठेवणे.
आप्पे बनवण्यासाठी आज काल नॉनस्टिक पात्र मिळते ते जास्त बरे पडते आणि त्यात एकदमच तेल लागत नाही.

खोबऱ्याची चटणी


साहित्य
१/२ खोबरे
मुठभर कोथिंबीर
४ चमचे चणा डाळ
१ हिरवी मिरची
१ चमचा साखर
मीठ

कृती

• खोबरे किसून घेणे.
• मिक्सरमध्ये किसलेले खोबरे, कोथिंबीर, चणा डाळ, हिरव्या मिरच्या, साखर आणि मीठ घालुन एकत्र वाटणे. लागल्यास थोडे पाणी घालणे.

टीप
ह्या चटणीत चणा डाळ असल्यास घालणे पण वापरल्यास एकदम सुंदर चव येते