चॉकलेट गनाश


मी हे गनाश ह्या एकदम चविष्ठ अंड्याविना चॉकलेट केकसाठी बनवले. बनवण्यासाठी एकदम सोप्पे आणि एकदम सुंदर आणि बाहेर हॉटेलमध्ये मिळते तसे हे आईसिंग माझे आवडते आहे.

चॉकलेट गनाश
साहित्य
२ वाटी सेमीस्वीट चॉकोचिप्स
१ वाटी क्रीम
१ चमचा लोणी

कृती
  • एका भांड्यात १ चॉकोचिप्स आणि लोणी घालुन १ मिनिट मायक्रोवेव्ह करणे.
  • त्यात अर्धा वाटी क्रीम आणि उरलेले १ वाटी चॉकोचिप्सघालुन फेटणे.
  • मिश्रण अजून ३० सेकंद मायक्रोवेव्ह करणे.
  • त्यात उरलेले अर्धा वाटी क्रीम घालुन मिश्रण एकजीव होऊन चमकेपर्यंत ढवळत राहणे.

टीप
मायक्रोवेव्हच्याऎवजी डबलबॉईलर (उकळत्या पाण्याच्या भांड्यावर दुसरे भांडे ठेवून) वापरून पण चॉकलेट वितळवता येईल पण मायक्रोवेव्हमुळे एकदम सोप्पे आणि स्वत्च्छ काम होते.

अंड्याविना चॉकलेट केक


अतुलच्या आईनी साधारण ६ महिन्यापूर्वी अंडी नसलेला केक बनवायला सांगितलेला. प्रत्येकवेळी काहीतरी कारणांनी ते राहूनच जायचं. आज जेंव्हा आम्ही त्यांच्याघरी नाष्ट्याला जाणार आहोत तेंव्हा मला वाटला हा केक घेऊन जाणे उत्तम ठरेल. केक एकदम मस्त मऊ आणि फुलून आला. मला अस वाटतंय की मला अंडे घातलेल्या ह्या चॉकलेट केकपेक्षा किंवा ह्या वाढदिवसाच्या चॉकलेट केकपेक्षा आजचा हा केक फार आवडला.

अंड्याविना चॉकलेट केक
साहित्य
४.५ वाटी मैदा
१ वाटी कोको पूड
३ वाटी साखर
१ वाटी तेल
१ चमचा बेकिंग सोडा
२ चमचा व्हॅनिला ईसेन्स
१ चमचा मीठ

कृती
  • ओव्हन ३५०F/१५०C वर गरम करणे.
  • मैदा आणि कोको पूड एकत्र चाळून एका भांड्यात घेणे.
  • त्यात बेकिंग सोडा आणि मीठ घालुन एकत्र करणे.
  • दुसऱ्या भांड्यात तेल, ३ वाटी पाणी आणि व्हॅनिला ईसेन्स एकत्र फेटून घेणे.
  • त्यात साखर घालुन पुन्हा फेटणे.
  • मैदा आणि कोको पूडचे मिश्रण चाळत तेलाच्या मिश्रणात घालणे व फेटून घेणे.
  • केक भाजायच्या भांड्याला तेलाचा हात लावून त्यात केकचे मिश्रण ओतणे.
  • केक ३५०F/१७५C वर एकूण ५० मिनिट भाजणे, भाजताना ३५ मिनिट झाल्यावर पुढची बाजू मागे जाईल अस फिरवणे.

टीप
मी केकवर चॉकलेट गनाश ओतून पांढऱ्या चॉकलेट क्रीम चीजच्या आईसिंगनी सजवले.
जर गनाशच्या वर आईसिंगनी सजवायचे असेल तर गनाश साधारण ३-४ तास सेट होऊ देणे म्हणजे आईसिंगची सजावट घसरणार नाही. मी वाट न बघता लगेच आईसिंग करायला घेतले त्यामुळे मला फार त्रास झाला.

पांढरे चॉकलेट क्रीम चीजचे आईसिंग


आज काल मला क्रीम चीजची चव आवडायला लागलीये. मी ह्या आधी ते गजराच्या केकवर पण वापरलाय. प्रत्येतवेळी मी इंडिअन मसाले घालुन फुलाच्या चवीचे आईसिंग बनवलंय. पण आज मी चॉकलेटच्या चवीचे आईसिंग रेड वेल्वेट कपकेकसाठी बनवले. केक मधल्या कोको पुड्च्या चवीला साजेसे हे क्रीम मस्त झालेले.

पांढरे चॉकलेट क्रीम चीजचे आईसिंग
साहित्य
२२५ ग्राम क्रीम चीज
२२५ ग्राम पांढरे चॉकलेट
१ वाटी लोणी
२ वाटी आईसिंग शुगर

कृती
  • एका भांड्यात निम्मे पांढरे चॉकलेट घालुन १ मिनिट मायक्रोवेव्ह करणे.
  • त्यात उरलेले पांढरे चॉकलेट घालुन चांगले ढवळणे. पुन्हा १५ सेकंद मायक्रोवेव्ह करणे.
  • चॉकलेट चांगले एकजीव होऊन वितळेपर्यंत ढवळणे व बाजूला ठेवून देणे.
  • दुसऱ्या भांड्यात क्रीम चीज मऊ होईपर्यंत फेटून घेणे.
  • त्यात वितळवलेले चॉकलेट घालुन पुन्हा फेटणे.
  • लोणी घालुन पुन्हा एकजीव होईपर्यंत फेटणे.
  • आईसिंग शुगर टाकून आईसिंग चांगले मऊसुत आणि एकजीव होईपर्यंत फेटणे.

टीप
चॉकलेट घालताना एकदम थंड झालेले असावे, व जर कोमट असेल तर थंड होईपर्यंत थांबावे. गरम चॉकलेट कधीही चीजमध्ये घालू नये.

रेड वेल्वेट कपकेक


आई बाबा इथे होते तेंव्हाच मी हे बनवलेले पण तेंव्हा जरा सुके झालेले आणि रंग पण बरोबर आलं नव्हता. आज बनवताना मी थोडा प्रमाण बदललं आणि आता ते एकदम सुंदर झालेत. मी त्यांना पांढरे चॉकलेट क्रीम चीजचे आईसिंग केलं

रेड वेल्वेट कपकेक
साहित्य
२.५ वाटी मैदा
१/४ चमचा कोको पूड
१/४ चमचा बेकिंग सोडा
१/४ चमचा मीठ
१.५ वाटी साखर
१ अंड
१.५ वाटी तेल
२ चमचे दही
१ चमचा पातळ लाल खाण्याचा रंग
१/४ चमचा व्हिनेगर
१/४ चमचा व्हॅनिला ईसेन्स

कृती
  • ३५०F/१७५C वर ओव्हन गरम करणे
  • मैदा व कोको पूड चाळून भांड्यात घेणे.
  • त्यात बेकिंग सोडा, मीठ आणि साखर घालुन एकत्र करणे.
  • दुसऱ्या भांड्यात अंड, तेल, लाल रंग, व्हॅनिला ईसेन्स आणि व्हिनेगर घालणे.
  • एका वाटीत दही घेऊन त्यात उरलेल्या मापाचे पाणी घालणे. चमच्यानी ढवळून अंड, तेल मिश्रणात घालणे
  • मिश्रण कमी वेगावर एकजीव होईपर्यंत फेटून घेणे.
  • त्यात मैदा-कोको पूडचे सर्व मिश्रण प्रत्येक वेळी एक वाटी भर घालुन एकजीव होई पर्यंत फेटून घेणे.
  • कपकेकच्या भांड्यात कागदी कप घालुन १२ कप मध्ये मिश्रण घालणे.
  • केक ३५०F/१७५C वर ओव्हनमध्ये २२ मिनिट भाजणे.

टीप
मी नेहमी साधारणतः ७०% केकचा भाजण्याचा वेळ झाला की त्याला वळवून ठेवते (ह्या केक साठी साधारणतः १५ मिनिट) त्यामुळे केके सगळ्याबाजुनी एकदम मस्त भाजला जातो.

मसाला पराठे


मी हे एकदम सोपे मसाला पराठे आज रात्रीच्या जेवणात बनवलेले. ह्याची कृती एकदम छोटी आणि सोपी आहे व पराठे एकदम उत्तम लागतात

मसाला पराठे
साहित्य
२.५ वाटी गव्हाचे पीठ
१ चमचा मैदा
१/२ चमचा जिरे
१ चमचा जिरे पूड
१/४ चमचा धने पूड
१ चमचा तिखट
१/४ चमचा हळद
मीठ
तेल

कृती
  • परातीत मैदा, गव्हाचे पीठ, जिरे, जिरे पूड, धने पूड, तिखट, हळद आणि मीठ एकत्र करणे.
  • त्यात २ चमचे तेल घालुन चांगले एकजीव करणे.
  • पिठात पाणी घालुन मळून घेणे. एक चमचा तेल सोडून पुन्हा मळणे व पीठ कमीत कमी अर्धा तास भिजण्यासाठी ठेवून देणे.
  • लिंबाच्या आकाराचे गोळे बनवून त्रिकोणी घडी घालुन लाटणे. तव्यावर तेल सोडून भाजून घेणे.

टीप
हळद घातल्यानी पराठे एकदम मस्त पिवळे होतात. मी जरा कमीच तेलावर पराठे भाजले त्यामुळे त्यांचा पिवळा रंग शाबूत राहिला.
मैदा घातल्यानी पराठे मस्त खुसखुशीत होतात.

फ्रेंच फ्राईज


अजॉयला फ्रेंच फ्राईज खायला आवडते. त्यामुळे आम्ही रेडी टू फ्राय वाले बऱ्याचड आणून भाजून खालले आहेत. पण बरेच दिवसापासून मला ते घरी बनवण्याची फार इच्छा होती. प्रत्येक वेळी त्याला लागणाऱ्या रेफ्रीजरेशनच्या वेळेमुळे राहून जायचे. पण मागच्या शनिवारी मी शेवटी कमीत कमी वेळेत बनवण्याचा प्रयत्न करण्याचे ठरवले आणि ते एकदम चांगले झालेले. इथे पाककृती देत आहे.


फ्रेंच फ्राईज
साहित्य
२ बटाटे
मीठ चवीपुरते
तेल

कृती
  • बटाट्याची साले काढून त्याचे आयताकृती तुकडे करणे.
  • थंड पाण्याखाली स्वतच धुवून घेणे. पाणी स्वत्च येईपर्यंत बटाटे धुतले पाहिजेत.
  • बटाटे थंड पाण्यात ५-१० मिनिटे बुडवून ठेवणे.
  • पाणी काढून टाकून बटाटे टॉवेलवर पसरवून सुखवणे
  • तेल गरम करून त्यात सोनेरी रंग येईपर्यंत भाजणे व टॉवेल वर पसरवणे.
  • खायला देण्याच्याआधी पुन्हा तेल गरम करून त्यात फ्राईज सोनेरी गुलाबी रंग येईपर्यंत भाजणे.
  • टॉवेलवर पसरवून त्यावर मीठ घालुन खायला देणे.

टीप
जर पाहुण्यांना देण्यासाठी बनवायचे असतील तर फ्राईजना एकदा भाजून फ्रीजमध्ये ठेवून देणे व आयत्यावेळी पुन्हा भाजून खायला देणे.
दोन वेळा भाजण्यानी बटाटे शिजतात, त्यातले पाणी निघून जाते व ते कुरकुरीत बनतात.

मुगाच्या सालीसहीत डाळीचे आप्पे


आईनी मध्यंतरी बरेच वेळा हे आप्पे सकाळच्या नाश्त्यासाठी बनवलेले आणि आम्हा सगळ्यांना ते फार आवडलेले. त्यामुळे ह्यावेळी मी तिला त्याची पाककृती दाखवायला सांगितली. आप्पे एकदम सोप्पे, पौष्टिक आणि चविष्ट आहेत.

मुगाच्या सालीसहीत डाळीचे आप्पे
साहित्य
१.५ वाटी मुगाची सालीसहीत डाळ
२-३ हिरव्या मिरच्या
२ लसुणाच्या पाकळ्या
१/४ चमचा आलं
१/४ कांदा
२ चिमुट गरम मसाला
मुठभर कोथिंबीर
मीठ चवीपुरते
तेल

कृती
  • मुगाची डाळ रात्रभर भिजवून ठेवणे.
  • सकाळी डाळीचे सगळे पाणी काढून मिक्सरमध्ये घालणे.
  • त्यात हिरवी मिरची, लसूण आणि आलं घालुन बारीक वाटणे.
  • मिश्रणात बारीक चिरलेला कांदा आणि कोथिंबीर घालणे.
  • त्यात मीठ आणि गरम मसाला घालुन चांगले फेटणे.
  • आप्पे पात्र गरम करून त्याला तेल लावणे. त्यात एक-एक चमचा मिश्रण घालुन वरून तेल सोडणे. झाकण ठेवून २ मिनिट मधम आचेवर गुलाबी रंगावर भाजणे.
  • आप्पे परतून झाकण न लावता अजून २-३ मिनिट दुसरी बाजुपण गुलाबी होईपर्यंत भाजणे. गरम गरम वाढणे.

टीप
मुगाची डाळ २-३ तास भिजवली तरी चालते त्यामुळे संध्याकाळी नाष्ट्यासाठी बनवायचे असल्यास फार आधीपासून डाळ भिजवायची गरज नाही.

व्हेज मन्चुरिअन


मला इंडिअन चायनीज फार आवडते त्यामुळे आमच्या जेवणात ते बऱ्याच वेळा असते. पण आई बाबा आल्यापासून किचनचा ताबा माझ्याकडे नसल्याने बरेच दिवस चायनीज मेनू झाला नाही. शेवटी शुक्रवारी मी किचनचा ताबा घेऊन स्वतःच जेवण बनवण्याचे ठरवले. व्हेज मन्चुरिअन तसे बऱ्याच वेळा बनवलेय पण फोटो कधीच चांगला आला नसल्यानी आधी कधी पोस्ट नाही करता आले. आज पाककृती देत आहे.

व्हेज मन्चुरिअन
साहित्य
२ वाटी कोबी
२ वाटी गाजर
२ वाटी श्रावणी घेवडा
२ वाटी ढोबळी मिरची
१ हिरवी मिरची
३ चमचे कॉर्न फ्लॉवर
५ चमचे मैदा
१ चमचा लसूण पेस्ट
२ लसूण पाकळ्या
३ देठ कांद्याची पात
१/४ वाटी स्वीट चिली सॉस
१/४ वाटी सोया सॉस
२ चमचे हॉट चिली सॉस
मीठ चवीपुरते
तेल

कृती
  • कोबी, गाजर, ढोबळी मिरची, श्रावणी घेवडा आणि हिरवी मिरची बारीक चिरणे व मीठ घालुन बाजूला ठेवणे.
  • त्यात लसुणाची पेस्ट, ४ चमचे मैदा आणि २ चमचे कॉर्न फ्लॉवर घालुन मळणे.
  • ह्या पीठाचे छोटे छोटे गोळे बनवून, उरलेल्या मैद्यात घोळवून तेलात मध्यम आचेवर भाजणे
  • कढईत तेल गरम करून त्यात बारीक चिरलेले लसूण, आणि कांद्याच्या पतीमधील कांदा घालुन गुलाबी रंगावर भाजणे.
  • त्यात स्वीट चिली सॉस, हॉट चिली सॉस आणि सोय सॉस घालुन ढवळणे.
  • ३ वाटी पाण्यात १ चमचा कॉर्न फ्लॉवर घालुन धवलने व ते मिश्रण वरच्या उकळत्या मिश्रणात घालुन ढवळणे.
  • त्यात आधी तळलेले मन्चुरिअनचे गोळे टाकून २-३ मिनिटे उकळी काढणे. काड्याची पात बारीक चिरून घालुन वाढणे.

टीप
मी नेहमी चिरलेल्या भाजीत मीठ घालुन ५ मिनिट बाजूला ठेवते त्यामुळे त्याला सुटलेल्या पाण्यातच पीठ मालत येते व नंतर पीठ सैल होत नाही
स्वीट सॉस आणि हॉट सॉसच्या ऎवजी मी ३ चमचे चिली फ्लेक्स, १/४ वाटी व्हिनेगर आणि २ चमचे साखर पण वापरली आहे.

पचडी


आई इथे आल्यावर ती दररोज नवीन नवीन काहीतरी बनवत असते. परवा तिनी हि मस्त पचडी बनवलेली. ती मला इतकी आवडली की मी लगेच कालच पुन्हा मला दाखवायला सांगितलं. काल आमचा बेत पाणी पुरीचा होता पण मला काही झालं तरी हि पचडी बनवायची होती म्हणून मग, पाणी पुरीच्या चटपटीत हा चविष्ट आणि पौष्टिक पदार्थ खून जेवण संपवायचे ठरले.

पचडी
साहित्य
२ वाटी कोबी
१ वाटी गाजर
१ टोमेटो
३/४ वाटी कांदा
१ चमचा शेंगदाणा पूड
१ चमचा साखर
१ मिरची
मुठभर कोथिंबीर पाने
१ लिंबू
१/४ चमचा मौव्हरी
चिमुटभर हिंग
तेल
मीठ

कृती
  • कोबी बारीक चिरून एका भांड्यात घ्यावा
  • त्यात टोमेटो बारीक चिरून घालणे
  • कांदा, कोथिंबीर, मिरची बारीक चिरून घालणे.
  • गाजर किसून घालणे.
  • त्यात शेंगदाणा पूड, साखर, आणि मीठ घालणे.
  • लिंबू पिळून, मिश्रण चांगले ढवळणे.
  • एका छोट्या कढईत तेल घालुन मौव्हरी आणि हिंग घालुन फोडणी करणे.
  • त्याला मिश्रणात घालुन चांगले ढवळणे.

टीप
जर पार्टीत किंव्हा पाहुण्यांना वाढण्यासाठी आधीपासून तयारी करायची असेल तर फक्त भाज्या चिरून ठेवणे. साखर मीठ आणि फोडणी आयत्यावेळी घालणे. जर पूर्ण पचडी आधी केली तर ती इतकी चांगली लागत नाही, त्यामुळे हा उत्तम उपाय आहे.

वांग्याची भजी


भजी हा प्रकार महाराष्ट्रात फार प्रसिद्ध. लग्न असू वा घरी बोलवलेले पाहुणे, भजी पाहिजेच. आमच्याकडे भजी करून फार दिवस झाले असा लक्षात येत मी सोमवारी भजी बनवण्याचे ठरवले. पण मग वांगे बघून थोडा नवीन प्रयोंग करूया अस ठरवलं. प्रयोग एकदम यशस्वी त्यामुळे इथे पाककृती देतीये.

वांग्याची भजी
साहित्य
२ वाटी चिरलेले वांगे
१ कांदा
१ चमचा तिखट
१/४ चमचा हळद
१/२ चमचा धने पूड
१/४ चमचा जिरे पूड
१/२ वाटी बेसन
मुठभर कोथिंबीर
मीठ चवीपुरते
तेल

कृती
  • चिरलेले वांगे, कांदा, तिखट, हळद, धने पूड, जिरे पूड, मीठ, बेसन आणि बारीक चिरलेली कोथिंबीर एकत्र करणे. थोडे पाणी वापरून भजीचे पीठ बनवणे.
  • तेल गरम करणे. त्यातील २ चमचे तेल भजीच्या पिठात घालुन चांगले मिसळणे.
  • छोट्या लिंबाच्या आकाराचे गोळे बनवून तळहातावर दाबणे.
  • तेलात भजी दोन्ही बाजूनी होईल अशी भाजून गरम गरम खायला देणे.

टीप
मी नेहमी भजीच्या पीठाचे सगळे साहित्य एकत्र करून पाणी घालायच्या आधी ५ मिनिटे वाट बघते. त्यामुळे भाज्यांचे पाणी तेवाध्यावेलात सुटते व नंतर पीठ पातळ होण्याचा प्रश्न येत नाही.

व्हॅनिला आईस्क्रीम


अजॉयचा आवडता आईस्क्रीमचा फ्लेवर. मागच्या शनिवारी जेवणानंतर मी तो बनवला. इतका उत्कृष्ठ आणि सोपा होता की मी तो अजून पर्यंत एकदाही का नाही बनवला असाच विचार मनात येतो.

व्हॅनिला आईस्क्रीम
साहित्य
१ लिटर दुध
३.५ वाटी क्रीम
२ वाटी साखर
१/४ वाटी व्हॅनिला इसेन्स

कृती
  • मिक्सरमध्ये साखर आणि अर्धा लिटर दुध साखर विरघळेपर्यंत फिरवणे.
  • एका भांड्यात दुध-साखर मिश्रण, क्रीम आणि व्हॅनिला इसेन्स एकत्र करून फोर्कवापरून फेटणे.
  • आईस्क्रीममेकरमध्ये मिश्रण घालुन आईस्क्रीममेकरच्या सूचनेप्रमाणे सेट होण्यासाठी ठेवणे.

टीप
मी आईस्क्रीममध्ये हेवी व्हिपिंग क्रीम वापरले. जर लाईट व्हीप्पिंग क्रीम वापरायचे असेल तर साधारण ४.५ वाटी वापरावे लागेल.

पायेश


मी आधी पण हि डीश बनवली होती पण आज मिलिंद आणि अजॉयसाठी पुन्हा बनवल्यावर फोटो काढून रेसिपी लिहायचे ठरवले. अजॉयचा आवडता गोड पदार्थ आणि इतके सोप्पे

पायेश
साहित्य
१ लिटर दुध
३/४ वाटी तांदूळ
१.२५ वाटी गुळ

कृती
  • दुध उकळवून ३/४ होईपर्यंत आटवणे
  • तांदूळ धुवून उकळत्या दुधात घालुन भात शिजेपर्यंत उकळवणे
  • गॅसवरून उतरवून त्यात बारीक चिरलेले गुळ घालणे.
  • गुळ विरघळेपर्यंत ढवळणे. थंड करून खायला देणे.

टीप
दुध आणि भात मध्यम आचेवर सारखे ढवळत शिजवणे म्हणजे पायेश करपणार नाही.

चॉकलेटमध्ये बुडवलेली काजू पिस्ता कुकी


मी उद्याच्या ट्रीपसाठी ह्या कुकीज बनवल्या. प्रवासात एकदम उत्तम नाश्ता. ह्या कुकीजची प्रेरणा मी अजॉयनी कॉसकोतून आणलेल्या शॉर्ट ब्रेडवरून घेतलीये.

चॉकलेटमध्ये बुडवलेली काजू पिस्ता कुकी
साहित्य
३ वाटी मैदा
२ वाटी लोणी
१.२५ वाटी साखर
१ अंड्याचे पिवळे
२ चमचा व्हॅनिला ईसेन्स
१/२ वाटी काजू
१/२ वाटी पिस्ता
१ वाटी सेमी स्वीट चॉकोचिप्स
१/४ वाटी पांढर्या चॉकोचिप्स
५ चमचा शॉर्टनिन्ग

कृती
  • एका भांड्यात लोणी आणि साखर घालुन फेटणे.
  • त्यात अंड्याचे पिवळे आणि व्हॅनिला ईसेन्स घालुन पुन्हा फेटणे.
  • काजू मिक्सर मध्ये वाटून बारीक पूड करणे. वर बनवलेल्या मिश्रणात ही पूड घालणे.
  • मैदा चाळून वरच्या मिश्रणात घालणे. घट्ट एकजीव होईपर्यंत मिश्रण चांगले ढवळणे
  • लिंबाच्या आकाराचे लाडू बनवून फ्रीजमध्ये १ तास थंडे होण्यासाठी ठेवणे.
  • ३७५F/१९०C वर ओव्हन गरम करणे.
  • पिस्त्यांचे बारीक तुकडे करणे.
  • प्रत्येक लाडू तळव्यावर घेऊन हलका दाबून जाड चकत्या बनवणे. बारीक चिरलेले पिस्त्यांचे तुकडे अर्ध्या कुकीवर पसरवणे. हलके दाबून पिस्ते कुकीमध्ये ढकलणे.
  • पार्चमेंट पेपर बेकिंग तव्यावर घालुन कुकी ठेवणे. प्रत्येक कुकीत साधारण १ इंच जागा सोडणे.
  • ३७५F/१९०C वर ओव्हनमध्ये १२ मिनिट भाजणे.
  • अंदाजे ५-१० मिनिट कुकी थंड होण्यासाठी बाजूला ठेवणे.
  • एका भांड्यात सेमीस्वीट चॉकोचिप्स आणि ४ चमचे शॉर्टनिन्ग घालुन १ मिनिट मायक्रोवेव्ह करणे. मध्ये ३० सेकंद झाल्यावर एकदा ढवळणे. मिश्रण चकचकीत आणि एकजीव होईपर्यंत चांगले ढवळणे.
  • बेकिंग तव्यावर पार्चमेंट पेपर पसरवणे. प्रत्येक कुकीचा पिस्ते नसलेला भाग चॉकोलेटमध्ये बुडवून बेकिंग तव्यावर ठेवणे.
  • एका भांडयामध्ये पांढर्या चोकोचिप्स आणि उरलेले १ चमचा शॉर्टनिन्ग घालुन ३० सेकंद मायक्रोवेव्ह करणे. मिश्रण चांगले एकजीव आणि चकचकीत होईपर्यंत ढवळणे. एका पायपिंग बॅगमध्ये हे चोकोलेट घालुन आधीच्या चोकोलेटवर झिग झॅग रेषा काढणे. चोकोलेट साधारण एक तास सेट होण्यासाठी ठेवणे.

टीप
जर मायक्रोवेव्ह नसेल तर एका भांड्यात उकळत्या पाण्यावर चोकोलेट आणि शॉर्टनिन्ग घातलेले भांडे ठेवून ढवळणे. मिश्रण एकजीव होईपर्यंत ढवळणे. मायक्रोवेव्ह करणे खूप सोपे असलेल्याने मी तेच जास्त प्रेफर करते.

लीची आईसक्रिम


इथे बहुतेक सगळ्या दुकानात कॅनमेध्ये लीची मिळते पण ताजी लीची मी कधीच दिसली नाही. शेवटी मागच्या महिन्यात मी तो डब्बा वापरून बघण्याचे ठरवले. डब्यातले पाणी पण वापरले तर बर्यापैकी चांगली चव येते.

लीची आईसक्रिम
साहित्य
१ सीडलेस लीचीचा डब्बा
१/२ वाटी साखर
१/२ वाटी दुध
३.५ वाटी क्रीम
१ लिंबू

कृती
  • लीची पाकातून बाजूला काढून तो पाक मिक्सर मध्ये घालणे.
  • त्यात साखर आणि दुख घालुन साखर विरघळेपर्यंत वाटणे
  • त्यात क्रीम आणि लिंबाचा रस घालुन फेटणे.
  • आईस्क्रीममेकर मध्ये हे मिश्रण घालुन सेट होण्यासाठी ठेवणे.
  • लीची बारीक चिरून आईस्क्रीममध्ये ते सेट होण्याच्या ३-४ मिनिटाच्या आधी घालणे.

टीप
जर ताजे लीची वापरायचे असेल तर साधारण ३० लीची वापरणे. अंदाजे १५ लीची २ वाटी पाणी घालुन वाटणे आणि पाकच्या ऎवजी वापरणे. उरलेल्या १५ लीचीना बारीक चिरून वापरणे. तसेच साखरपण अंदाजे २/३ वाटी लागेल.
लिंबू वापराल्यानी लीचीची चव निखरून येते

तंदुरी गोबी


आज ऑफिसमध्ये मिटिंगच्या आधी सगळेजण बर्बिक्यूविषयी चर्चा करत होते. तेंव्हापासून मला तंदुरी खाण्याची फार इच्छा होत होती. फ्रीजमध्ये गोबी असल्यानी मी तंदुरी गोबी बनवण्याचे ठरवले. रात्रीचे जेवण त्यामुळे एकदम चविष्ठ होते.

तंदुरी गोबी
साहित्य
१ कॉलीफ़्लॉवर
१ वाटी दही
१.५ चमचा तिखट
१ चमचा धने पूड
१/४ चमचा हळद
१/४ चमचा जिरे पूड
१/२ चमचा गरम मसाला
१/४ चमचा तंदुरी मसाला
१ चमचा चाट मसाला
२ हिरव्या मिरच्या
२ चमचे आल्याचे तुकडे
१० लासुणाच्या पाकळ्या
तेल
मीठ चवीपुरते

कृती
  • कॉलीफ़्लॉवरचे मध्यम आकाराचे तुकडे करून मिठाच्या पाण्यात घालावे. ७ मिनिट मायक्रोवेव्ह करणे. पाणी गाळून बाजूला ठेवणे.
  • मिक्सरमध्ये आले, लसूण, हिरव्या मिरच्या आणि २ चमचे दही घालुन बारीक वाटणे.
  • एका बावुलमध्ये वाटलेली पेस्ट, उरलेले दही, तिखट, जिरे पूड, धने पूड, गरम मसाला, हळद, तंदुरी मसाला आणि मीठ घालुन ढवळणे.
  • त्या मिश्रणात कॉलीफ़्लॉवरचे तुकडे खालून मिसळणे. फ्रीजमध्ये कमीत कमी २ तास ठेवणे.
  • तवा गरम करून त्यात थोडे तेल घालणे. कॉलीफ़्लॉवरचे तुकडे त्यावर पसरवून मध्यम आचेवर पूर्ण पणे होईपर्यंत शिजवणे. कॉलीफ़्लॉवरच्या तुकड्यांना परतवून दुसरी बाजू पूर्ण होईपर्यंत शिजवणे. असे सगळ्या बाजूला भाजून झाल्यावर ताटलीत काढणे.
  • चाट मसाला शिंपडून पुदिना चटणी, कांदा आणि लिंबूबरोबर खायला देणे.

टीप
मी ५ मिनिटच कॉलीफ़्लॉवरचे तुकडे शिजवलेपण माझ्यामते ७ मिनिट बरोबर होईल.
स्क्युवरमध्ये ३-४ तुकडे घालुन कॉलीफ़्लॉवरला बार्बिक्यू पण करू शकता

शुगर फ्री खजूर आणि बदाम लाडू


काल मी मॅक्रून्स बनवण्यासाठी बदामाची पूड करायला घेतली पण कश्यामुळे माहिती नाही पण त्यात थोडा ओलसरपणा आला. मग मी अजॉयला नवीन बदाम आणायला पाठवून त्या वेळात हे लाडू बनवले. खूपच चविष्ठ आणि बिन साखरेचे हे लाडू उत्तम झालेत.

शुगर फ्री खजूर आणि बदाम लाडू
साहित्य
२ वाटी बदाम
१ वाटी खजूर
३-४ चमचे मनुके

कृती
  • बदामाची पूड करणे.
  • बदामाच्या पुडीचे २ भाग करणे. प्रत्येक भागात अर्धा कप खजूर घालुन मिक्सर मध्ये बारीक वाटणे.
  • तयार झालेले मिश्रण चांगले मळून घेणे. प्रत्येक लाडूच्या मध्ये १-२ मनुके घालुन छोटे छोटे लाडू वळणे.

टीप
मी खजुराचा गोडपणा बदामाबरोबर वापण्याचा विचार करून साखर किंवा गुळ ह्या लाडूत वापरले नाही. मला साधारण थोडे कमी गोड असलेले पदार्थ आवडतात त्यामुळे हे लाडू माझ्या चवीनुसार बरोबर झालेले. पाहिजे असल्यास थोडी साखर घालुन अजून थोडे अजून गोड करता येईल

पनीर


आज काल इथे मिळणाऱ्या पनीरची क्वालिटी फारच बेकार झालीये, इतकी की पनीर हा नावडता पदार्थ बनू लागला आहे. पण ते बिलकुल चांगले नाहीये कारण अजॉय आणि मला दोघानाही पनीरचे पदार्थ फार आवडतात. असे नाहीये की मी कधी पनीर बनवले नाहीये. गोड पक्वान्नांसाठी मी नेहमीच पनीर घरी ताजे बनवत आलेत पण आता मी भाजीसाठी पण पनीर घरी करायला चालू केलेय. आणि तेंव्हा पासून मला असं लक्षात आलय की मी मागचे २-३ वर्ष बराच काही मिस केलय

पनीर
साहित्य
२ लिटर दुध
३ चमचे व्हिनेगर

कृती
  • दुध उकळवणे.
  • व्हिनेगर एक कपभर पाण्यामध्ये मिसळून दुधात घालणे. दुध भरपूर ढवळणे.
  • दुधापासून पनीर बाजूला होईल आणि पातळ पाणी दिसू लागेल.
  • हे मिश्रण चाळणीमध्ये पंचा पसरवून त्यावर ओतणे.
  • थंड पाणी सोडून तयार पनीर चांगले धुवून घेणे.
  • पंचा घट्ट बांधून त्यावर पाणी भरलेला कुकर रात्रभर ठेवणे. सकाळी पंचा उघडल्यावर पनीरचा घट्ट तुकडा जमा झालेला असेल.

टीप
बरेच लोक व्हिनेगरच्याऎवजी लिंबाच्या रसाचा वापर करतात पण मला व्हिनेगर वापरायला आवडत कारण त्याचा वास आणि चव पाण्यानी धुतलं की लगेच निघून जाते.
पनीर बनवण्यासाठी हाफ अ‍ॅन्ड हाफ वापरू नये अथवा पनीर खूप जास्त क्रिमी होईल. दुध किंवा रेड्युस्ड फ़ॅट दुध वापरणे एकदम उत्तम

अंजीर जिलॅटो


लहानपणापासून अंजीर हे माझा सगळ्यात आवडता फळ. मला माहिती आहे की माझ आंबाप्रेम बघून ह्यावर विश्वास बसने थोडे कठीण आहे पण ते खरय की अंजीर हेच माझं सगळ्यात आवडता फळ. तसे बघितला तर खेळताना जर फळ निवडायचा असेल तर मी नेहमीच अंजीर निवडायचे. मग जशी मी मोठी झाले तसं मला सुजाताच्या (पुण्यातल प्रसिद्ध आईस्क्रीमच दुकान) अंजीर आईस्क्रीमशी माझा परिचय झाला. अजूनही मी जेंव्हा जेंव्हा पुण्याला जाते तेंव्हा एक दाबा अंजीर आईस्क्रीम नक्की खाते. मग हे आईस्क्रीम बनवायला इतका उशीर का हा प्रश्न पडणा साहजिक आहे पण इथे सुके अंजीर मिळण फार कठीण गेलं त्यामुळे मी ह्यावेळी भारतातून सुके अंजीर मागवले आणि आज हे जिलॅटो बनवलं.

अंजीर जिलॅटो
साहित्य
१ लिटर दुध
२५० ग्राम सुके अंजीर
३/४ वाटी मध
१ चमचा लिंबाचा रस

कृती
  • अंजीर २ वाटी दुधात साधारण २ तास भिजवून ठेवणे.
  • मिक्सरमध्ये भिजवलेले ४-५ अंजीर सोडून बाकीचे वाटून घेणे.
  • त्यात मध आणि लिंबाचा रस घालुन पुन्हा वाटणे.
  • हे मिश्रण उरलेल्या दुधात घालुन चांगले ढवळणे.
  • आईस्क्रीम मेकरच्या सूचनेनुसार आईस्क्रीम जमवण्यासाठी ठेवणे.
  • उरलेले अन्जीरचे तुकडे बारीक चिरून आईस्क्रीम मध्ये मिसळणे

टीप
मला एकदा आईस्क्रीम करायला घेतले की पुन्हा वाट बघायला बिलकुल आवडत नाही त्यामुळे मी नेहमी थंड गार दुध वापरते. तसेच अंजीर भिजवून मी फ्रीजमध्येच ठेवून दिलेले त्यामुळे आईस्क्रीम मेकर मध्ये घालायच्या आधी मला मिश्रण थंड होण्याची वाट बघावी नाही लागली.

तंदुरी कोळंबी


मधले २ - ३ दिवस सोडले तर सिअ‍ॅटलमध्ये उन येऊन बरेच दिवस झाले. त्यामुळे बारबीक्यूवगैरे तर भूतकाळातल्या गोष्टी झाल्या. मात्र आज मी तंदुरी कोळंबी बनवून सुंदर संध्याकाळचे वातावरण करण्याचा प्रयत्न केला. ही पाककृती मी मसाले घालता घालता तयार केली पण कोळंबी इतकी सुंदर झालेली की उद्या उरलेले कोळंबी भाजण्याची मी वाटच बघतीये :)

तंदुरी कोळंबी
साहित्य
३/४ किलो कोळंबी
१ चमचा तंदुरी मसाला
१ चमचा तिखट
१ चमचा धने पूड
१/२ चमचा जिरे पूड
१/४ चमचा गरम मसाला
१/४ चमचा हळद
१/२ चमचा आलं पेस्ट
१/२ वाटी दही
मीठ
तेल

कृती
  • कोळंबी साफ करून त्याला मीठ लावणे
  • त्यात आलं पेस्ट, तिखट, धने पूड, जिरे पूड, गरम मसाला, हळद घालुन चांगले एकत्र करणे. कमीत कमी अर्धा तास बाजूला ठेवणे.
  • तवा गरम करून त्यात तेल घालणे.
  • कोळंबीमध्ये तंदुरी मसाला आणि दही घालुन एकत्र करणे. ते मिश्रण तव्यावर घालणे.
  • खालाच्याबाजुनी पूर्णपणे शिजेपर्यंत कोळंबी न हलवता व परतता भाजणे. त्यानंतर त्यांना परतून दुसऱ्याबाजूनी पण भाजणे. गरम गरम खायला देणे.

टीप
मध्यम आचेवर, न हलवता भाजल्यानी कोळंबीला तंदुरीची चव आणि रंग येतो.

कडबोळी


दिवाळी होऊन बरेच महिने झाले तर मग आज कडबोळी? पण वेफर्सपेक्षा कडबोळी खाता खाता वर्डकप बघायला मजा येईल असा वाटल्यावर रविवारी रात्री उशिरा मी त्यांना बनवायला घेतलं. लवकरच असा लक्षात आला की एक एक कडबोळी बनवायला खूप वेळ लागत होता मग मी त्यावर एक उपाय शोधला. चकलीच्या पात्रात एक मध्ये छोटी भोक असलेली ही चकती घालुन छोटे छोटे तुकडे तळले आणि ते सिनेमा किंवा खेळ बघताना खाण्यासाठी एकदम छान जमून आले.

कडबोळी
साहित्य
४ वाटी तांदुळाचे पीठ
३ वाटी दुध
१ वाटी लोणी
मीठ चवीपुरते
तेल

कृती
  • तांदुळाच्या पिठात लोणी घालुन चांगले एकत्र करणे.
  • त्यात दुध घालुन पिठाचा गोळा बनवणे.
  • छोट्या लिंबाच्या आकाराचा गोळा घेऊन पोलपाटावर वळवत लांबट दोरीचा आकार देणे व नंतर गोल वळवून तेलात गुलाबी रंगावर तळणे.
  • किंवा चकलीच्या पात्रात ते पीठ घालुन छोटे छोटे तुकडे तेलात घालुन भाजणे.

टीप
कडबोळी भाजताना गुलाबी झाल्या झाल्या लगेच काढावी नाहीतर करपून जातील कारण तेलातून काढल्यानंतर त्यांना थोड्यावेळानी अजून थोडा रंग चढतो.

कॉर्न कोथिंबीर पराठा


सर्व वाचकांना नवीन वर्ष्याच्या शुभेच्या. सुट्टीनंतरचे हे माझे पहिले पोस्ट. तसे ते पराठे मी अजॉय भारतातून आलेल्या दिवशीच बनवलेले पण कामामध्ये व्यस्त असल्यानी आज मला पोस्ट करण्यासाठी वेळ मिळालाय. हे पराठे बनवणा एकदम सोपं असून त्यात फ्रीजमध्ये सहज सापडणारे पदार्थ वापरलेत आणि तरीसुधा ते फारच चविष्ट झालेले.


कॉर्न कोथिंबीर पराठा
साहित्य
२ वाटी कॉर्न
२ वाटी गव्हाचे पीठ
मुठभर कोथिंबीर पाने
५ लसूण पाकळ्या
२ हिरव्या मिरच्या
१/२ लिंबू
चाट मसाला
मीठ
तूप
तेल

कृती
  • गव्हाच्या पिठात एक चमचा तेल आणि नंतर पाणी घालुन मळावे व बाजूला ठेवून देणे.
  • मायक्रोवेव्हमध्ये २ मिनिट कॉर्न शिजवून घेणे.
  • मिक्सरमध्ये लसूण, कोथिंबीर, हिरव्या मिरच्या, कॉर्न, लिंबाचा रस आणि मीठ घालुन पेस्ट बनवणे
  • पीठाचे लिंबाच्या आकाराचे गोळे बनवून ते लाटावेत.
  • एका लाटलेल्या चपातीवर कॉर्न-कोथिंबीर ह्याची वाटलेली पेस्ट पसरवणे. दुसरी चपाती त्यावर ठेवून त्याच्या कडा बंद करणे.
  • गरम तव्यावर तेल व तूप लावून दोन्ही बाजे मध्यम आचेवर भाजणे.
  • चिमुटभर चाटमसाला शिंपडून लोणचे व दह्याबरोबर खायला देणे.

टीप
मी कॉर्न शिजवण्यासाठी मायक्रोवेव्हचा उपयोग केला कारण ते खूप पटकन आणि सहज होऊन जाते पण जर मायक्रोवेव्ह नसेल तर कॉर्नमध्ये पाणी घालुन उकळवणे आणि नंतर जास्तीचे पाणी ओतून देणे.

Related Posts Plugin for WordPress, Blogger...

  © माझे स्वयंपाक प्रयोग | Template Recipes by Emporium Digital

TOP