कोल्ड कॉफी

Read English Version

सगळ्यात पहिल्यांदा मी इंस्टंट पूड वापरून कोल्ड कॉफी बनवायला चालू केलेला. माझ्या बहिणीला टी खूप आवडायची त्यामुळे कधीही कोल्ड कॉफी म्हटले की मला तिचीच आठवण येते. कोल्ड कॉफी आणि बहिण असे एक समीकरणच झालेय. आवडीबरोबरच बरेच काही प्रसंग आणि आठवणीपण आहेत. इथे आल्यापासून कॉस्कोचे डीलचे कुपन वापरून आम्ही भरपूर बाटल्या ह्या स्टारबक्स बनवते त्या पिल्या. पण थोडे दिवसांनी मला फ्रेश थंड कॉफीची फारच कमी वाटायला लागली आणि मी हि घरीच बनवायला चालू केली. मला भारतात सीमासाठी हि बनवण्याची फार इच्छा होती पण सर्दी खोकला यामुळे नाही करता आली. इथे मी पाककृती देतीये आणि अशी आशा करते की ती हि बनवेल आणि आमचे सोनेरी दिवस जेंव्हा आम्ही वेड्यासारखे कॉफीच्या मागे होतो ते आठवेल


साहित्य
४ वाटी दुध
२ वाटी व्हॅनिला आईसक्रीम
१.५ चमचा कॉफी पूड
५ चमचे साखर

कृती

• एक वाटीभर पाणी उकळवून त्यात साखर विरघळवणे
• त्यात कॉफी घालुन विरघळवणे व थंड होण्यासाठी बाजूला ठेवणे.
• मिक्सरमध्ये आईस्क्रीम, कॉफी आणि दुध घालुन फिरवणे.
• चांगले फेस येई पर्यंत फिरवणे आणि थंड खायला देणे.

टीप
आईस्क्रीम वापरल्यानी कॉफी लगेच प्यायला देता येते व नंतर थंड करावी लागत नाही.

व्हेज पिझ्झा

Read English Version

बरेच दिवस झाले मला हा पिझ्झा बनवायचा होता. घरी बनवला की इंडिअन चव करता येते. बऱ्याच भाज्या मी माझ्या मनानी घातल्या पण चव एकदम उत्कृष्ठ होती.


साहित्य
४ वाटी गव्हाचे पीठ
२ वाटी मैदा
२ वाटी दुध
१/४ वाटी ओलिव्ह तेल
१/४ वाटी लोणी
१/२ चमचा साखर
२.२५ चमचा यीस्ट
३ टोमाटो
२ चमचा लसूण पेस्ट
२ चमचा बेसिल
१/२ चमचा मिरे पूड
२ चमचा तिखट
३ चमचा सॉस
१ वाटी पार्मेसन चीज
२ वाटी मोझ्झारेल्ला चीज
१ वाटी पनीर
१.५ वाटी वांगे
८ भेंडी
१ वाटी स्वीटकॉर्न
मीठ
तेल

कृती

• साखर आणि यीस्ट एक वाटी कोमट पाण्यात घालुन झाकून १० मिनिट ठेवणे. पाण्यात बुडबुडे आले पाहिजेत.
• परातीत गव्हाचे पीठ, मैदा, मीठ, ओलिव्ह तेल आणि वितळवलेले लोणी एकत्र करणे.
• त्यात यीस्टचे पाणी आणि दुध घालुन मऊसर पीठ भिजवणे. काचेच्या भांड्यात झाकण किंवा प्लास्टिक लावून २ तास ठेवणे.
• तेल गरम करून त्यात लसूण पेस्ट घालुन छान वास सुटेपर्यंत भाजणे.
• त्यात बेसिल, मिरे पूड, तिखट, मीठ घालुन २ मिनिट शिजवणे.
• टोमाटो वाटून त्यात घालणे. सॉसपण घालणे व पूर्ण सुकेपर्यंत शिजवणे व बाजूला ठेवणे.
• तेलात भेंडी, पनीर, वांग्याचे तुकडे तळून घेणे. भेंडीचे देठ काढून त्याला उभी चिरावी. भाज्यांवर मीठ टाकून बाजूला ठेवणे.
• पीठ दुप्पट झाले की त्याचे २ भाग करून पिझ्झाच्या तव्यावर पसरवणे.
• टोमाटोचा मसाला पिझ्झावरती पसरवणे.
• त्यावर पार्मेसन चीज, तळलेल्या भाज्या आणि स्वीटकॉर्न पसरवणे.
• मोझ्झारेल्ला चीज पसरवणे.
• ओव्हन ४००F/२००C वर गरम करणे.
• पिझ्झा २५ मिनिट ४००F/२००C वर भाजणे.

टीप
भेंडी तळताना मी अख्खी देठासकट तळली त्यामुळे त्यातल्या बिया बाहेर येत नाहीत
सगळ्या भांज्याना हलका गुलाबी रंग येईपर्यंतच भाजले त्यामुळे छान लागते. जास्त भाजू नये कारण ओव्हनमध्ये भाज्या अजून शिजतात.

कोळंबीचे सॅन्डविच

Read English Version

सगळ्यांना नवीन वर्षाच्या शुभेच्या. माझे नवीन वर्ष एकदम शांत होते, खूप जास्त जेट लॅगमुळे ९ वाजेपर्यंत जागणेपण मुश्कील झालेय. हि पाककृती खास आहे कारण ह्याची तयारी आदल्यावर्षी कायला चालू केली आणि पदार्थ ह्या वर्षी तयार झाला. हा मी अजॉयच्या खास मागणीवर सकाळच्या नाश्त्यासाठी बनवला.


साहित्य
१४-१६ ब्रेडचे तुकडे
४०० ग्राम कोळंबी
१/२ वाटी आम्बवलेली काकडी
४ चमचे दही
१ चमचा तिखट
१ चमचा धने पूड
१/२ चमचा मिरे पूड
१/४ चमचा चाट मसाला
१/४ चमचा जीरा पूड
१/४ चमचा गरम मसाला
१/४ चमचा हळद
१/२ वाटी लोणी
मीठ

कृती

• दही, तिखट, हळद, धने पूड, मिरे पूड, जीरा पूड, गरम मसाला, चाट मसाला आणि मीठ एकत्र करणे.
• कोळंबीचे बारीक तुकडे करून ते दह्याच्या मिश्रणात घालुन एकत्र करणे व फ्रीजमध्ये ४-५ तास ठेवून देणे.
• तवा गरम करून त्यात १/४ वाटी लोणी आणि कोळंबीचे मिश्रण घालणे.
• तेज आचेवर सारखे परतत मिश्रण सुकेपर्यंत शिजवणे.
• सॅन्डविच बनवण्यासाठी ब्रेंडच्या तुकड्यांवर आम्बवलेली काकडी आणि शिजवलेले कोळंबीचे मिश्रण घालुन लोणी लावून ग्रील करणे.

टीप
कोळंबीचे बारीक तुकडे केल्यानी एका घासातच पूर्ण कोळंबी निघून येणार नाही.

कलाकंद

Read English Version

आज सकाळी काहीतरी गोड बनवण्याचा विचार करताना मेहुलनी त्याच्या कार पूजेच्यावेळी दिलेला कलाकंद आठवला. थोडा फार शोधल्यावर लक्षात आला की करायला एकदम सोप्पा आहे. पण जेंव्हा बनवला तेंव्हा लक्षात आला की सोप्पा असला तरी खूप किचकट आणि वेळ लागणार काम आहे.


साहित्य
२ लिटर दुध
१ वाटी साखर
३ चमचे व्हिनेगर
१ चमचा पिस्ता
१ थेंब केवडा इसेन्स
चांदीचा वर्ख

कृती

• निम्मे दुध उकळून घेणे
• ३ चमचे पाणी आणि व्हिनेगर एकत्र करून उकळत्या दुधात घालणे.
• दुधातून पनीरवेगळे झाले की लगेच गाळून घेवून थंड पाण्याखाली धुवून घेणे.
• पंचात पनीर घालुन पाणी जाऊ देण्यासाठी टांगून ठेवणे.
• उरलेले दुध उकळून घेणे व त्यात बनवलेले पनीर घालुन मिश्रण आटेपर्यंत मध्यम आचेवर शिजवणे.
• त्यात साखर आणि केवड्याचा इसेन्स घालुन पुन्हा मुश्रन घट्ट होईपर्यंत शिजवणे.
• ताटलीत मिश्रण टाकून पसरवणे व त्यावर चांदीचा वर्ख आणि पिस्ते लावणे.
• थंड झाल्यावर कापून तुकडे करणे व खायला देणे.

टीप
मी मिश्रण नॉनस्टिक भांड्यात उकळायला ठेवलेले पण त्यात ते चांगले होत नसल्यानी अ‍ॅलुमिनियम भांड्यात केले. अ‍ॅलुमिनियम भांडेच मला गोड पकवान बनवायला बरे वाटते.
दुध उकळवताना सारखे ढवळणे महत्वाचे आहे नाहीतर भांड्याला दुध लागून त्यात करपट वास जातो.
५ नोव्हेंबर: मी आज २ लिटरऎवजी २ गॅलन दुधाची मिठाई बनवण्याचे ठरवले पण पनीर घातल्यावर दुध आटवण्यासाठी खूप जास्त वेळ लागला. त्यामुळे जर खूप सारे मिठाई बनवण्याचा बेत असेल तर तसा अंदाज आधी पासूनच बांधावा. साधारणपणे २ लिटर दुधाच्या १६ बर्फ्या होतात